ក្រុមអង្គការសង្គមស៊ីវិលដែលធ្វើការលើវិស័យសិទ្ធិមនុស្ស សម្ដែងការសោកស្តាយបន្ទាប់ពីកម្ពុជាសម្រេចចិត្តបោះឆ្នោតអនុប្បវាទក្នុងការព្យួរប្រទេសរុស្ស៊ីជាផ្លូវការជាសមាជិកក្រុមប្រឹក្សាសិទ្ធិមនុស្សអង្គការសហប្រជាជាតិ ពីព្រោះរុស្ស៊ីបានសម្លាប់ជនស៊ីវិលអ៊ុយក្រែនរាប់មិនអស់ក្នុងអំឡុងសង្គ្រាមឈ្លានពានជាងមួយខែមកនេះ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា បានប្រាប់សារព័ត៌មាន The Cambodia Daily នៅថ្ងៃទី៨ មេសា ថា ពិតមែនតែកម្ពុជាមានសិទ្ធិសម្រេចក្នុងការបោះឆ្នោត ប៉ុន្តែលទ្ធផលដែលកម្ពុជាបោះឆ្នោតអនុប្បវាទនេះ ធ្វើឱ្យអង្គការសង្គមស៊ីវិលដែលធ្វើការលើវិស័យសិទ្ធិមនុស្សមានការខកចិត្តយ៉ាងខ្លាំង បន្ទាប់ពីរុស្ស៊ីបានសម្លាប់ជនស៊ីវិលអ៊ុយក្រែនរាប់មិនអស់ក្នុងអំឡុងសង្គ្រាមឈ្លានពានជាងមួយខែមកនេះ។
លោក ស៊ឹង សែនករុណា អះអាងថា ជំហរកម្ពុជាបែបនេះក៏ជាការបង្ហាញឱ្យឃើញច្បាស់ផងដែរនូវការអនុវត្តសិទ្ធិមនុស្សកន្លងមក ដែលតែងតែមានការចោទប្រកាន់ថាជាប្រទេសដែលរំលោភសិទ្ធិមនុស្សធ្ងន់ធ្ងរ បើទោះបីជាកម្ពុជាបានបដិសេធនូវការចោទប្រកាន់នេះរហូតមកក៏ដោយ។
ការអះអាងនេះ ធ្វើឡើងបន្ទាប់ពីកម្ពុជាបានបោះឆ្នោតអនុប្បវាទក្នុងការព្យួរប្រទេសរុស្ស៊ីពីសមាជិកក្រុមប្រឹក្សាសិទ្ធិមនុស្សរបស់អង្គការសហប្រជាជាតិ កាលពីថ្ងៃព្រហស្បតិ៍ ចុងសប្តាហ៍នេះ។
កាលពីថ្ងៃទី៧ ខែមេសា ឆ្នាំ២០២២ មហាសន្និបាតអង្គការសហប្រជាជាតិ (UNGA) បានសម្រេចបោះឆ្នោតព្យួរប្រទេសរុស្ស៊ីពីសមាជិកក្រុមប្រឹក្សាសិទ្ធិមនុស្សរបស់អង្គការសហប្រជាជាតិ បន្ទាប់ពីមានការចោទប្រកាន់ថា កងទ័ពរុស្ស៊ីបានសម្លាប់ជនស៊ីវិលក្នុងពេលកំពុងដកថយចេញពីរដ្ឋធានីនានាក្នុងប្រទេសអ៊ុយក្រែន ក្នុងសង្គ្រាមឈ្លានពានរបស់ពួកគេ។
ការបោះឆ្នោតដកប្រទេសរុស្ស៊ីចេញពីក្រុមប្រឹក្សាសិទ្ធិមនុស្សនេះ គឺមានសំឡេងពីរភាគបីដែលគាំទ្រឲ្យដករុស្ស៊ី ក្នុងចំណោមសមាជិកបោះឆ្នោតចំនួន ២៩៣នាក់ ក្នុងនោះសំឡេងគាំទ្រឱ្យដករុស្ស៊ីមានចំនួន ៩៣សំឡេង ដូចជាសហរដ្ឋអាមេរិក ជាដើម ចំណែកសំឡេងប្រឆាំងមានចំនួន ២៤សំឡេងក្នុងនោះក៏មានប្រទេសចិន ផងដែរ ខណៈកម្ពុជាស្ថិតក្នុងចំណោមប្រទេសចំនួន ៥៨ ដែលបានបោះឆ្នោតអនុប្បវាទ។
ទាក់ទិននឹងបញ្ហានេះ កាលពីថ្ងៃទី២៨ ខែមីនា ឆ្នាំ២០២២ បុរសខ្លាំងដើរបញ្ច្រាសទិសនៅកម្ពុជា លោក ហ៊ុន សែន បានប្រកាន់ជំហរប្រឆាំងនឹងការឈ្លានពានរបស់រុស្ស៊ី ទៅលើប្រទេសអ៊ុយក្រែន ថាសកម្មភាពឈ្លានពានរបស់រុស្ស៊ី គឺកម្ពុជាមិនអាចទទួលយកបាននោះទេ ហើយកម្ពុជាក៏មិនអាចអព្យាក្រឹតបានដែរ។
បើតាមទីភ្នាក់ងារសារព័ត៌មាន Reuters បានឲ្យដឹងថា ឯកអគ្គរដ្ឋទូតរងរបស់រុស្ស៊ីប្រចាំអង្គការសហប្រជាជាតិ លោក Gennady Kuzmin បានព្រមានដល់ប្រទេសនានាថា រាល់ការបោះឆ្នោតគាំទ្រ ឬអនុប្បវាទ ថានឹងត្រូវបានចាត់ទុកជាកាយវិការមួយដែលបង្ហាញពីការមិនរាប់អានខ្លួន ហើយអាចនឹងបង្កជាផលវិបាកសម្រាប់ទំនាក់ទំនងទ្វេភាគីផងដែរ។
ប្រធានក្រុមប្រឹក្សាភិបាលនៃចលនាពលរដ្ឋដើម្បីប្រជាធិបតេយ្យ លោក ម៉ែន ណាត បានប្រាប់សារព័ត៌មាន The Cambodia Daily នៅថ្ងៃទី៨ មេសា ថា ការសម្រេចចិត្តបោះឆ្នោតអនុប្បវាទរបស់កម្ពុជានេះ គឺជាការលំបាកមួយសម្រាប់កម្ពុជា។ លោកបន្តថា ការបោះឆ្នោតនេះបង្ហាញឲ្យឃើញពីប៉ូលនយោបាយអន្តរជាតិផងដែរ ចំពោះប្រទេសដែលនៅតែបន្តការគាំទ្រប្រទេសកុម្មុយនីស្ត និងប្រទេសដែលគាំទ្រលទ្ធិប្រជាធិបតេយ្យ។ ដោយឡែកប្រទេសទន់ខ្សោយដែលមានផលប្រយោជន៍ទាំងសងខាង គឺស្ថិតក្នុងការពិបាកសម្រេចចិត្តយ៉ាងខ្លាំងលើបញ្ហានេះ។
ចំណែកអ្នកវិភាគនយោបាយ និងសង្គម លោក គឹម សុខ បានប្រាប់សារព័ត៌មាន The Cambodia Daily នៅថ្ងៃនេះដែរថា ជំហររដ្ឋាភិបាលលោក ហ៊ុន សែន គឺជាការមិនឲ្យតម្លៃលើការប្រឆាំងនឹងអំពើឧក្រិដ្ឋកម្មរំលោភសិទ្ធិមនុស្សនោះទេ ហើយក៏ជាជំហរបញ្ច្រាសចរន្តពិភពលោកថែមទៀត នៅពេលដែលពិភពលោកមិនអាចទ្រាំឱបដៃឈរមើលកងទ័ពរុស្ស៊ី សម្លាប់យ៉ាងរង្គាលលើពលរដ្ឋអ៊ុយក្រែនស្លូតត្រង់នៅពេលនេះ។
លោក គឹម សុខ លើកឡើងថា រឿងនេះមិនធ្វើឲ្យរដ្ឋាភិបាលលោក ហ៊ុន សែន មានវាសនាល្អនោះទេ ពីព្រោះបើលោក ពូទីន នៅតែបន្តសង្គ្រាមឈ្លានពានអ៊ុយក្រែនយូរទៀត ពិភពលោកអាចនឹងនាំគ្នាពិចារណាឡើងវិញអំពីកំណែទម្រង់អង្គការសហប្រជាជាតិ ដូចជាការជំរុញឲ្យដករុស្ស៊ីចេញពីសមាជិកភាពនៃក្រុមប្រឹក្សាសន្តិសុខអចិន្ត្រៃយ៍នៃអង្គការសហប្រជាជាតិទៀតផង។
លោក គឹម សុខ បញ្ជាក់ថា ទៅថ្ងៃមុខ អង្គការសហប្រជាជាតិក៏អាចនឹងមានចរន្តគិតគូរទៅដល់ការបង្កើតកម្លាំងសន្តិសុខអចិន្ត្រៃយ៍ ដើម្បីអាចធ្វើអន្តរាគមន៍ដោយផ្ទាល់ក្នុងស្ថានភាពបន្ទាន់ ដើម្បីទប់ស្កាត់អំពើឈ្លានពាន និងរដ្ឋប្រហារយោធានៅលើពិភពលោក ដូច្នេះរដ្ឋាភិបាលលោក ហ៊ុន សែន នឹងកាន់តែអស់កិត្តិយសពីចរន្តសកលនេះជាមិនខាន៕