29 C
Phnom Penh

បុរស​ខ្លាំង​កម្ពុជា​ថា​ពលរដ្ឋ​ខ្មែរ​រីករាយ​ចូល​ឆ្នាំ​ដូច​អបអរ​ជ័យជម្នះ ៧​មករា​ឆ្នាំ​១៩៧៩

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​កម្ពុជា លោក ហ៊ុន សែន បាន​ប្រៀបធៀប​ភាព​សប្បាយ​រីករាយ​របស់​ពលរដ្ឋ​ខ្មែរ​ក្នុង​ពិធី​បុណ្យ​ចូល​ឆ្នាំ​ខ្មែរ​នៅ​ឆ្នាំ​នេះ ដូចជា​ពេល​អបអរ​ជ័យជម្នះ ៧ មករា ឆ្នាំ​១៩៧៩ យ៉ាង​ដូច្នោះ​ដែរ ក្រោយពី​ខកខាន​អបអរ​ពិធី​ចូល​ឆ្នាំ​រយៈពេល ២​ឆ្នាំ​ដោយសារ​កូវីដ-១៩។

ថ្លែង​នៅ​ព្រឹក​ថ្ងៃ​ទី​២០ ខែ​មេសា ឆ្នាំ​២០២២ ក្នុង​កម្មវិធី​សម្ពោធ​សមិទ្ធផល​នានា​ដែល​ជា​គម្រោង​ការពារ​ទឹកជំនន់ និង​កែលំអ​ប្រព័ន្ធ​ប្រឡាយ-លូ​ក្នុង​ទីក្រុង​ភ្នំពេញ​ជំហាន​ទី​៤ លោក ហ៊ុន សែន អះអាង​ថា ការ​ចូល​ឆ្នាំ​ខ្មែរ​នា​ឆ្នាំ​នេះ​ហាក់​មាន​សភាព​ខុស​ស្រឡះ​ពី​ការ​ចូល​ឆ្នាំ​នា​ពេល​កន្លងទៅ។ ពោល គឺ​ប្រៀប​ដូច​ពេល​ពលរដ្ឋ​ត្រូវ​បាន​រំដោះ​ពី​របប​ប្រល័យ​ពូជសាសន៍ និង​ការ​អបអរ​ពេល​កម្ពុជា​បញ្ចប់​សង្គ្រាម​ទាំងស្រុង​តាម​នយោបាយ​ឈ្នះ​ឈ្នះ​យ៉ាង​ដូច្នោះ​នោះ​ដែរ ពីព្រោះ​ពលរដ្ឋ​ពិត​ជា​បាន​នាំគ្នា​សប្បាយ​យ៉ាង​គគ្រឹកគគ្រេង​គ្រប់​ទីកន្លែង​ទាំងអស់​ទូទាំង​ព្រះរាជាណាចក្រ​កម្ពុជា។

លោក​នាយករដ្ឋមន្ត្រី​លើកឡើង​ថា មាន​កត្តា​ចំនួន​៦ ដែល​ជំរុញ​ឲ្យ​ពលរដ្ឋ​សប្បាយ​រីករាយ​ក្នុង​ឱកាស​ពិធី​បុណ្យ​ចូល​ឆ្នាំ​ប្រពៃណី​ជាតិ​ខ្មែរ​កន្លងទៅ​នេះ ក្នុង​នោះ​រួម​មាន៖

  • ទី​១ កត្តា​សុខ​សន្តិភាព គឺជា​ផ្នែក​មួយ​សំខាន់​បំផុត​ដែល​ធ្វើ​ឲ្យ​ពលរដ្ឋ​មាន​ឱកាស​ដើរ​កម្សាន្ត​គ្រប់​ទីកន្លែង។
  • ទី​២ ការ​តភ្ជាប់​នូវ​ហេដ្ឋារចនាសម្ព័ន្ធ។
  • ទី​៣ កត្តា​មធ្យោបាយ​ធ្វើ​ដំណើរ។
  • ទី​៤ កត្តា​ប្រាក់ចំណូល​របស់​ប្រជាពលរដ្ឋ។
  • ទី​៥ កត្តា​នៃ​ការ​កើនឡើង​នៃ​តំបន់​ទេសចរណ៍​ថ្មីៗ​នៅ​កម្ពុជា។
  • ទី​៦ កត្តា​ភាព​ស៊ាំ​ក្នុង​សហគមន៍​នៃ​ការ​ទទួល​បាន​វ៉ាក់សាំង​ប្រឆាំង​កូវីដ-១៩ ដល់​ពលរដ្ឋ​កម្ពុជា។

សៀវភៅ ១៣​ទសវត្សរ៍​នៃ​ដំណើរ​កម្ពុជា​ដែល​សរសេរ​ដោយ​បុរស​ខ្លាំង លោក ហ៊ុន សែន បាន​ឲ្យ​ដឹង​ថា កងទ័ព​វៀតណាម​បាន​ចូល​មក​ជួយ​បដិវត្តន៍​កម្ពុជា​ផ្តួល​រំលំ​របប​កម្ពុជា​ប្រជាធិបតេយ្យ​បាន​ជោគជ័យ​នៅ​ថ្ងៃ​ទី​៧ ខែ​មករា ឆ្នាំ​១៩៧៩ ហើយ​កងទ័ព​ស្ម័គ្រចិត្ត​វៀតណាម​បាន​ដក​ចេញ​បណ្តើរៗ​នៅ​ឆ្នាំ​១៩៨២ និង​ឈាន​ទៅ​ដល់​ទាំងស្រុង​នៅ​ខែ​កញ្ញា ឆ្នាំ​១៩៨៩ ដែល​ជា​ដំណាក់កាល​ផ្ទេរ​ពី​ការ​ប្រើប្រាស់​កម្លាំង​ពីរ​គួបផ្សំ​គ្នា​មក​កាន់​ដំណាក់កាល​ប្រើប្រាស់​កម្លាំង​បដិវត្តន៍​កម្ពុជា​ផ្ទាល់ ដើម្បី​រ៉ាប់រង​ភារកិច្ច​ការពារ​ជាតិ។

នៅ​ក្នុង​សៀវភៅ​នោះ​បាន​សរសេរ​ថា៖ «កម្ពុជាវៀតណាម ជា​ធាតុ​ពីរ​ដែល​មិន​អាច​ខ្វះ​មួយ​ណា​បាន​ឡើយ»

នៅ​ថ្ងៃ​ទី​៨ ខែ​មករា ឆ្នាំ​១៩៧៩ មួយ​ថ្ងៃ​ក្រោយ​ពី​របប​កម្ពុជា​ប្រជាធិបតេយ្យ​ត្រូវ​បាន​ផ្តួល​រំលំ ក្រុមប្រឹក្សា​ប្រជាជន​បដិវត្តន៍​កម្ពុជា​ត្រូវ​បាន​បង្កើត​ឡើង ដើម្បី​ដឹកនាំ​ប្រទេស​កម្ពុជា​ដែល​ក្រោម​អាណាព្យាបាល​របស់​វៀតណាម។ សាធារណរដ្ឋ​ប្រជាមានិត​កម្ពុជា ត្រូវ​បាន​បង្កើត​ឡើង​ជា​ផ្លូវការ​នៅ​ថ្ងៃ​ទី​១២ ខែ​មករា ដោយ​មាន​លោក ហេង សំរិន ជា​ប្រធាន​ក្រុមប្រឹក្សា​រដ្ឋ (មាន​ឋានៈ​ស្មើ​នឹង​ប្រមុខ​រដ្ឋ) និង​លោក ប៉ែន សុវណ្ណ ជា​ប្រធាន​ក្រុមប្រឹក្សា​គណៈរដ្ឋមន្ត្រី (មាន​ឋានៈ​ស្មើ​នឹង​នាយករដ្ឋមន្ត្រី)។

នៅ​ថ្ងៃ​ទី​១៧ ខែ​មករា ឆ្នាំ​១៩៧៩ រដ្ឋាភិបាល​សាធារណរដ្ឋ​ប្រជាមានិត​កម្ពុជា និង​រដ្ឋាភិបាល​សាធារណរដ្ឋ​សង្គម​និយម​វៀតណាម បាន​ចុះហត្ថលេខា​លើ​សន្ធិសញ្ញា​មិត្តភាព​សម្រាប់​រយៈពេល ២៥​ឆ្នាំ។ តាមរយៈ​សន្ធិសញ្ញា​នេះ បក្ស​ប្រជាជន​បដិវត្តន៍​កម្ពុជា សុខចិត្ត​ទទួល​យក​អាណាព្យាបាល​វៀតណាម​នៅ​កម្ពុជា ដោយ​អនុញ្ញាត​ឲ្យ​កងទ័ព​វៀតណាម ប្រមាណ ១៥​ម៉ឺន​នាក់​ឈរ​ជើង​នៅ​លើ​ទឹកដី​កម្ពុជា។ នៅ​ក្នុង​ផ្នែក​ស៊ីវិល​វិញ វៀតណាម​បាន​ដាក់​អ្នក​ជំនាញការ​នៅ​តាម​គ្រប់​មន្ទីរ ក្រសួង​នៃ​រដ្ឋាភិបាល​សាធារណរដ្ឋ​ប្រជាមានិត​កម្ពុជា។

លោក ថាច់ សេដ្ឋា អតីត​សមាជិក​ព្រឹទ្ធសភា​គណបក្ស​សង្គ្រោះ​ជាតិ ដែល​បាន​សម្រេច​ចូលរួម​នយោបាយ​ជាមួយ​គណបក្ស​ភ្លើង​ទៀន ធ្លាប់​បាន​ប្រាប់​សារព័ត៌មាន​ក្នុង​ស្រុក​កន្លងមក​ថា គណបក្ស​របស់​លោក​ចាត់ទុក​ថា ថ្ងៃ​៧​មករា គឺជា​ថ្ងៃ​ដែល​ប្រទេស​វៀតណាម​ឈ្លានពាន​កម្ពុជា។ លោក​ថា បើ​គ្មាន​វៀតណាម​បង្កើត​បក្ស​កុម្មុយនីស្ត​កម្ពុជា ក៏​គ្មាន​ការ​កាប់​សម្លាប់​ពលរដ្ឋ​ខ្មែរ​ដ៏​រង្គាល​នេះ​ដែរ។ លោក​បន្ត​ថា អ្នក​សម្លាប់​ខ្មែរ​ក៏​ជា​អ្នក​ដែល​អះអាង​ថា​ជា​អ្នក​ដែល​ជួយ​ខ្មែរ​ដែរ។

របាយការណ៍​របស់​ក្រសួង​ទេសចរណ៍ ឱ្យ​ដឹង​ថា រយៈពេល ៤​ថ្ងៃ​នៃ​ពិធី​បុណ្យ​ចូល​ឆ្នាំ​ខ្មែរ​ប្រពៃណី​ជាតិ ភ្ញៀវ​ទេសចរ​ជាង ៥​លាន ១៧​ម៉ឺន​នាក់​បាន​ចេញ​ដើរ​លេង​កម្សាន្ត​នៅ​ទូទាំង​ប្រទេស ខណៈ​មនុស្ស​ជាង ១០០​នាក់​បាន​ស្លាប់ និង​រង​របួស​ដោយសារ​គ្រោះថ្នាក់​ចរាចរណ៍ និង​មាន​អគ្គិភ័យ​កើតឡើង ៧​ករណី​អំឡុង​ថ្ងៃ​បុណ្យ​ចូល​ឆ្នាំ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស