សាលាឧទ្ធរណ៍រាជធានីភ្នំពេញ នឹងបើកសវនាការសំណុំរឿងមន្ត្រី និងអតីតមន្ត្រីសមាគមការពារសិទ្ធិមនុស្សអាដហុកចំនួន ៥នាក់ នៅចុងខែមេសា នេះ ក្រោមបទចោទ «សូកប៉ាន់សាក្សី និងសមគំនិតសូកប៉ាន់សាក្សី»។
នៅក្នុងដីកាដាច់ដោយឡែកពីគ្នាចុះថ្ងៃទី២៨ ខែមីនា ឆ្នាំ២០២២ ចេញដោយព្រះរាជអាជ្ញានៃមហាអយ្យការអមសាលាឧទ្ធរណ៍រាជធានីភ្នំពេញ លោក អ៊ឹម សុផាន បានកោះហៅមន្ត្រីសមាគមអាដហុក ៣រូប រួមមានលោក យី សុខសាន្ត លោក នី សុខា និងអ្នកស្រី លឹម មុន្នី ព្រមទាំងអតីតមន្ត្រីសមាគមអាដហុក ២រូបទៀត រួមមានលោក ណៃ វ៉ង់ដា និងលោក នី ចរិយា ដើម្បីចូលរួមសវនាការនៅថ្ងៃទី២៨ ខែមេសា ឆ្នាំ២០២២ ខាងមុខនេះ។
ការកោះហៅអ្នកការពារសិទ្ធិមនុស្ស ៤នាក់ និងមន្ត្រីគណៈកម្មាធិការជាតិរៀបចំការបោះឆ្នោត (គ.ជ.ប) ម្នាក់នេះ ធ្វើឡើងបន្ទាប់ពីតុលាការបានលើកពេលសវនាការសំណុំរឿងនេះម្ដងរួចមកហើយកាលពីថ្ងៃទី២៥ ខែមីនា ឆ្នាំ២០២២ ដោយសារមេធាវីរបស់លោក នី ចរិយា ប៉ះពាល់ផ្ទាល់ជាមួយអ្នកជំងឺកូវីដ-១៩។
ប្រធានសមាគមការពារសិទ្ធិមនុស្សអាដហុក លោក នី សុខា បានប្រាប់សារព័ត៌មាន The Cambodia Daily ថា លោកនិងអ្នកទាំង ៤រូបផ្សេងទៀតនឹងចូលរួមសវនាការតាមការកោះហៅរបស់សាលាឧទ្ធរណ៍។ លោកថា លោកទន្ទឹងរង់ចាំរកភាពស្អាតស្អំរបស់លោកអស់ពេលជាច្រើនឆ្នាំហើយ។ លោកសង្ឃឹមថាសាលាឧទ្ធរណ៍នឹងផ្តល់យុត្តិធម៌ដល់ក្រុមរបស់លោកដែលធ្វើការងារសង្គមជួយពលរដ្ឋរងគ្រោះ។
កាលពីថ្ងៃទី២៦ ខែកញ្ញា ឆ្នាំ២០១៨ សាលាដំបូងរាជធានីភ្នំពេញបានសម្រេចផ្ដន្ទាទោសអ្នកទាំង ៥រូបដាក់ពន្ធនាគារម្នាក់ៗចំនួន ៥ឆ្នាំ ក្រោមបទចោទប្រកាន់ «សូកប៉ាន់សាក្សី និងសមគំនិតសូកប៉ាន់សាក្សី»។ ទោស ៥ឆ្នាំនេះ តុលាការសម្រេចឱ្យពួកគាត់អនុវត្តក្នុងពន្ធនាគាររយៈពេល ១៤ខែ និងទោសនៅសល់ត្រូវព្យួរ ប៉ុន្តែដោយមិនពេញចិត្តចំពោះការសម្រេចរបស់សាលាដំបូងរាជធានីភ្នំពេញពេលនោះ ពួកគាត់ទាំង ៥រូបក៏បានប្ដឹងសារទុក្ខទៅសាលាឧទ្ធរណ៍កាលពីថ្ងៃទី២៣ ខែតុលា ឆ្នាំ២០១៨ ប៉ុន្តែចាប់តាំងពីឆ្នាំ២០១៨ ដល់ខែមេសា ឆ្នាំ២០២២ សំណុំរឿងរបស់ពួកគេបានអូសបន្លាយរយៈពេលប្រមាណ ៥ឆ្នាំមកហើយ។
កាលពីខែមេសា ឆ្នាំ២០១៦ មន្ត្រី និងអតីតមន្ត្រីសមាគមការពារសិទ្ធិមនុស្សអាដហុកទាំង ៥រូប ត្រូវបានចាប់ខ្លួនដោយចោទប្រកាន់ពីបទ «សូកប៉ាន់សាក្សី និងសមគំនិតសូកប៉ាន់សាក្សី» ក្នុងសំណុំរឿងផ្ដល់ប្រាក់ជាង ២០០ដុល្លារទៅឱ្យស្ត្រីម្នាក់ឈ្មោះ ខុម ចាន់តារាទី ហៅស្រីមុំ ក្នុងនាមជនរងគ្រោះដែលរត់មករកអាដហុកឱ្យជួយពេលនោះ។ នាងឈ្មោះ ខុម ចាន់តារាទី នៅពេលនោះត្រូវបានគេចោទថាជាស្រីកំណាន់របស់លោក កឹម សុខា ប្រធានគណបក្សសង្គ្រោះជាតិដែលត្រូវបានតុលាការរំលាយ។
ពួកគេទាំង ៥នាក់ត្រូវបានបញ្ជូនទៅឃុំខ្លួននៅពន្ធនាគារព្រៃសកាលពីថ្ងៃទី១ ខែឧសភា ឆ្នាំ២០១៦ រហូតដល់ថ្ងៃទី២៩ ខែមិថុនា ឆ្នាំ២០១៧ ទើបត្រូវបានតុលាការសម្រេចដោះលែងឱ្យនៅក្រៅឃុំជាបណ្ដោះអាសន្នវិញ៕