រដ្ឋមន្ត្រីក្រសួងមហាផ្ទៃ លោក ស ខេង បញ្ជាទៅសមត្ថកិច្ចឲ្យរកមូលហេតុដែលនាំឱ្យមានការធ្វើអត្តឃាត ក្រោយពីរបាយការណ៍ក្នុងត្រីមាសទី១ នៃឆ្នាំ២០២២ បង្ហាញថា ចំនួនអ្នកធ្វើអត្តឃាតនៅកម្ពុជាមានកាន់តែច្រើន ហើយភាគច្រើននៃអ្នកសម្លាប់ខ្លួនទាំងនោះគឺជាក្មេងៗ។
ការបញ្ជារបស់រដ្ឋមន្ត្រីក្រសួងមហាផ្ទៃ ធ្វើឡើងក្នុងពិធីបុណ្យបញ្ចុះខណ្ឌសីមាព្រះវិហារនៅវត្តមុនីរតនប្បភា ហៅវត្តថ្មី ស្ថិតនៅឃុំស្វាយភ្លោះ ស្រុកពាមជរ ខេត្តព្រៃវែង កាលពីថ្ងៃទី២៣ ខែមេសា ឆ្នាំ២០២២។
លោក ស ខេង បានបញ្ជាទៅសមត្ថកិច្ចត្រូវស្រាវជ្រាវរកមូលហេតុឱ្យបានច្បាស់ ដើម្បីងាយស្រួលក្នុងការដោះស្រាយក្រោយពីលោកតាមដានព័ត៌មានសង្គម បូករួមទាំងការទទួលបានរបាយការណ៍ពីអគ្គស្នងការដ្ឋាននគរបាល ដោយមើលឃើញថា បញ្ហាលោតទឹកសម្លាប់ខ្លួន ការបាញ់សម្លាប់ខ្លួនឯង រួមទាំងការចងក ជាដើម។
លោក ស ខេង លើកឡើងថា អ្នកដែលធ្វើអត្តឃាតទាំងនោះអាចបណ្ដាលមកពីមានវិបត្តិអ្វីមួយជាក់ជាមិនខាន ដោយកន្លងមក លោកធ្លាប់ឮការសន្និដ្ឋានពីមជ្ឈដ្ឋានខ្លះថាបណ្ដាលមកពីការប្រើប្រាស់គ្រឿងញៀន ដែលជាមូលហេតុមួយនាំឱ្យមានការធ្វើអត្តឃាតខ្លួនឯង។
លោកស្រី យឹម សុធារី អ្នកព្យាបាលផ្លូវចិត្ត និងទីប្រឹក្សាជម្លោះ និងសន្តិភាព ត្រូវបានវិទ្យុបារាំងអន្តរជាតិដកស្រង់សម្ដីចុះផ្សាយថា មនុស្សជាច្រើនតែងតែយល់ថាមូលហេតុតែមួយដែលនាំឱ្យមានអំពើអត្តឃាតនោះ គឺមកពីភាពក្រីក្រ គ្រឿងញៀន និងអំពើហិង្សា ជាដើម ក៏ប៉ុន្តែនោះគឺជាមូលហេតុដែលមនុស្សម្នាក់ៗប្រឈមនៅក្នុងជីវិតតែប៉ុណ្ណោះ។ មូលហេតុធំចម្បងដែលនាំឱ្យមនុស្សធ្វើអត្តឃាតបញ្ចប់ជីវិតខ្លួនឯង គឺការខ្វះការគាំទ្រ និងជម្រើស។
បើតាមអ្នកជំនាញផ្នែកសុខភាពផ្លូវចិត្តរូបនេះ បុគ្គលគ្រប់រូបមានចំណែកចូលរួមក្នុងការដោះស្រាយបញ្ហានេះ។ រដ្ឋាភិបាលគួរបង្កើនសកម្មភាពគាំទ្រកម្មវិធីសុខភាពផ្លូវចិត្តទៅកាន់ពលរដ្ឋឱ្យបានច្រើន និងធំទូលាយជាងពេលបច្ចុប្បន្ន។ ចំណែកឯគ្រួសារ មិត្តភក្ដិ និងមិត្តរួមការងារវិញ គួរចូលរួមស្តាប់ និងបង្កើតការសន្ទនាដោយភាពកក់ក្តៅទៅកាន់បុគ្គលដែលជួបបញ្ហាផ្លូវចិត្ត។
របាយការណ៍របស់អគ្គស្នងការដ្ឋាននគរបាលជាតិ បានឱ្យដឹងថា ក្នុងត្រីមាសទី១ នៃឆ្នាំ២០២២ ពោលគឺចាប់ពីខែមករា ដល់ខែមីនា ឆ្នាំ២០២២ ការធ្វើអត្តឃាតនៅកម្ពុជាមានដល់ទៅ ២៤៧ករណី ក្នុងនោះមនុស្សចំនួន ២៤២នាក់បានបាត់បង់ជីវិត និង ៥នាក់ទៀតរបួស។
របាយការណ៍ដដែលបញ្ជាក់ថា ការធ្វើអត្តឃាតទាំង ២៤៧ករណីនេះ បានកើតឡើងនៅគ្រប់រាជធានី-ខេត្ត លើកលែងតែខេត្តកែប និងខេត្តប៉ៃលិន ប៉ុណ្ណោះ។
អង្គការសុខភាពពិភពលោក (WHO) បានរកឃើញថា ករណីធ្វើអត្តឃាតបានកើនឡើងជាបន្តបន្ទាប់ចាប់តាំងពីឆ្នាំ២០១៦ មក។ នៅក្នុងប្រទេសកម្ពុជា ករណីនេះបានផ្ទុះឡើងខ្លាំងចាប់តាំងពីឆ្នាំ២០១៨ ដោយមានអ្នកស្លាប់ក្នុងករណីធ្វើអត្តឃាតចំនួន ៨៣៦នាក់ ស្មើនឹង ១,០២% នៃចំនួនអ្នកស្លាប់ ប៉ុន្តែបច្ចុប្បន្ន ចំនួនអ្នកស្លាប់ដោយករណីអត្តឃាតបានកើនឡើងដល់ ៥,៨៧% ហើយភាគច្រើនអ្នកធ្វើអត្តឃាត គឺជាយុវជនដែលមានអាយុចន្លោះពី ១៥ឆ្នាំទៅ ១៩ឆ្នាំ៕