សាលាឧទ្ធរណ៍រាជធានីភ្នំពេញ នឹងប្រកាសដីកាបណ្ដឹងសារទុក្ខលើអតីត និងអ្នកការពារសិទ្ធិមនុស្សអាដហុក ៥រូបនៅពាក់កណ្ដាលខែក្រោយ ក្រោមបទចោទប្រកាន់ «សូកប៉ាន់សាក្សី និងសមគំនិតសូកប៉ាន់សាក្សី» ក្នុងសំណុំរឿង នាង ខុម ចាន់តារាទី ហៅស្រីមុំ។
ការលើកពេលនេះ ធ្វើឡើងបន្ទាប់ពីសាលាឧទ្ធរណ៍បានបើកសវនាការពេញមួយរសៀលនាថ្ងៃទី២៨ ខែមេសា ឆ្នាំ២០២២ តាមបណ្ដឹងសារទុក្ខរបស់មេធាវីការពារក្ដីឱ្យអ្នកការពារសិទ្ធិមនុស្សអាដហុក និងអតីតអាដហុកទាំង ៥រូប ដែលប្រឆាំងនឹងសាលក្រមសាលាដំបូងរាជធានីភ្នំពេញដែលបានកាត់ឱ្យពួកគាត់ជាប់ពន្ធនាគារ។
ក្នុងបន្ទប់សវនាការ ប្រធានក្រុមប្រឹក្សាសាលាឧទ្ធរណ៍ លោក ស៊ិន វិសាល បានសួរទៅអ្នកការពារសិទ្ធិមនុស្សទាំង ៤រូបដូចគ្នា ខណៈលោក នី ចរិយា មិនបានចូលរួមសវនាការនេះទេ ដោយសារលោកជាប់បេសកកម្មនៅខេត្ត ប៉ុន្តែលោកមានមេធាវីការពារ។
យ៉ាងណាក៏ដោយ មុននឹងឆ្លើយសំណួរប្រធានក្រុមប្រឹក្សាជំនុំជម្រះ ទាំងមេធាវី និងលោក នី សុខា និងលោក យី សុខសាន្ត លោក ណៃ វ៉ង់ដា បានស្នើឱ្យតុលាការលើកពេលសវនាការទៅថ្ងៃក្រោយ ដោយសារពួកគាត់ទាមទារឱ្យតុលាការកោះហៅនាង ខុម ចាន់តារាទី ហៅស្រីមុំ និងអ្នកស្រី ទ្រី ឈួន មកតវ៉ា។ ប៉ុន្តែប្រធានក្រុមប្រឹក្សាជំនុំជម្រះបដិសេធការស្នើសុំរបស់ក្រុមសហមេធាវី និងលោក នី សុខា និងលោក យី សុខសាន្ត និងអ្នកផ្សេងទៀត ហើយបន្តសវនាការដដែល។
ឆ្លើយតបនឹងសំណួរប្រធានក្រុមប្រឹក្សាជំនុំជម្រះ លោក នី សុខា លោក យី សុខសាន្ត លោក ណៃ វ៉ង់ដា និងអ្នកស្រី លឹម មុន្នី បានលើកឡើងដូចៗគ្នាថា ពួកគាត់មិនសុខចិត្តនឹងការកាត់ទោសឱ្យពួកគាត់ជាប់ពន្ធនាគារ ដោយថាពួកគាត់មិនបានប្រព្រឹត្តកំហុសដូចការចោទប្រកាន់ឡើយ។
ក្នុងសវនាការថ្ងៃនេះក៏មានខាងមន្ត្រីអង្គភាពប្រឆាំងអំពើពុករលួយចូលថតជាវីដេអូ ខណៈសមត្ថកិច្ចបានឱ្យអ្នកចូលរួមទុកទូរស័ព្ទទាំងអស់ ហើយសវនាការនេះចម្លែកពីសវនាការផ្សេងៗ តុលាការមិនអនុញ្ញាតឡើយ។
ក្រោយបើកសវនាការពេញមួយរសៀលនេះ ប្រធានក្រុមប្រឹក្សាជំនុំជម្រះ លោក ស៊ិន វិសាល បានសម្រេចនឹងប្រកាសដីកានៅថ្ងៃទី២៣ ខែឧសភា ឆ្នាំ២០២២។
កាលពីឆ្នាំ២០១៦ អ្នកការពារសិទ្ធិមនុស្សសមាគមអាដហុកចំនួន ៤រូប គឺលោក នី សុខា លោក យី សុខសាន្ត លោក ណៃ វ៉ង់ដា និងអ្នកស្រី លឹម មុន្នី ព្រមទាំងអគ្គលេខាធិការរងនៃគណៈកម្មាធិការជាតិរៀបចំការបោះឆ្នោត និងជាអតីតមន្ត្រីជាន់ខ្ពស់សមាគមអាដហុក លោក នី ចរិយា បានរងការចោទប្រកាន់ពីបទ «សូកប៉ាន់សាក្សី និងសមគំនិតសូកប៉ាន់សាក្សី» ក្នុងសំណុំរឿងនាង ខុម ចាន់តារាទី ហៅស្រីមុំ។
អ្នកទាំង ៥រូបត្រូវបានឃុំខ្លួនបណ្ដោះអាសន្នក្នុងពន្ធនាគារអស់រយៈពេលជាង ១ឆ្នាំ មុននឹងត្រូវបានដោះលែងឱ្យនៅក្រៅឃុំវិញកាលពីចុងខែមិថុនា ឆ្នាំ២០១៧។
លោកនាយករដ្ឋមន្ត្រី ហ៊ុន សែន កាលពីថ្ងៃទី២៨ ខែវិច្ឆិកា ឆ្នាំ២០២១ បានបញ្ជាទៅក្រសួងការងារ និងក្រសួងយុត្តិធម៌ ឱ្យសហការជាមួយតុលាការ ដើម្បីដោះស្រាយបញ្ចប់សំណុំរឿងនេះដើម្បីឲ្យពួកគាត់បានបំពេញការងាររបស់ខ្លួនបានពេញលេញ៕