29 C
Phnom Penh

បេក្ខជន​ក្រុមប្រឹក្សា​ឃុំ​សង្កាត់​និង​សកម្មជន​បក្ស​ភ្លើង​ទៀន​៧៨​រូប​ចុះចូល​បក្ស​កាន់​អំណាច

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​បក្ស​កាន់​អំណាច អះអាង​ថា បេក្ខជន​ក្រុមប្រឹក្សា​ឃុំ-សង្កាត់​ទាំង​ពេញ​សិទ្ធិ និង​បម្រុង រួម​ទាំង​សកម្មជន​ជាច្រើន​របស់​គណបក្ស​ភ្លើង​ទៀន ៧៨​រូប​ដែល​មកពី​ខណ្ឌ​ចំនួន​១១ ក្នុង​រាជធានី​ភ្នំពេញ បាន​សម្រេច​ចិត្ត​ចូលរួម​ជីវភាព​នយោបាយ​ជាមួយ​គណបក្ស​កាន់​អំណាច។

អភិបាល​រាជធានី​ភ្នំពេញ លោក ឃួង ស្រេង ដែល​ជា​សមាជិក​គណៈកម្មាធិការ​កណ្តាល និង​ជា​ប្រធាន​គណៈកម្មាធិការ​គណបក្ស​កាន់​អំណាច​រាជធានី​ភ្នំពេញ កាលពី​ថ្ងៃ​ទី​១ ខែ​ឧសភា ឆ្នាំ​២០២២ បាន​បើក​ពិធី​ទទួល​សមាជិក​ក្រុមប្រឹក្សា​ឃុំ-សង្កាត់​គណបក្ស​ភ្លើង​ទៀន ចំនួន ៧៨​រូប ក្នុង​នោះ ៥២​រូប​ជា​បេក្ខជន​ឈរ​ឈ្មោះ​បោះឆ្នោត​ឃុំ-សង្កាត់​របស់​គណបក្ស​ភ្លើង​ទៀន​ទាំង​ពេញ​សិទ្ធិ និង​បម្រុង និង ២៦​រូប​ផ្សេង​ទៀត​គឺ​សុទ្ធសឹងតែ​ជា​សកម្មជន​បក្ស​នេះ​ទាំងអស់។

លោក ឃួង ស្រេង លើកឡើង​ថា គណបក្ស​កាន់​អំណាច​ក្រោម​ការ​ដឹកនាំ​របស់​លោក ហ៊ុន សែន បាន​លះបង់​គ្រប់​បែប​យ៉ាង​ដើម្បី​ស្វែងរក​សន្តិភាព​ជូន​ពលរដ្ឋ​កម្ពុជា ដោយ​មិន​ទុក​ឱ្យ​មាន​ពលរដ្ឋ​ខ្មែរ​ណា​ម្នាក់​ស្លាប់​ដោយ​ការ​អត់បាយ​នោះ​ឡើយ។

ការ​អះអាង​នេះ ធ្វើឡើង​ស្រប​ពេល​ដែល​ការ​បោះឆ្នោត​ជ្រើសរើស​ក្រុមប្រឹក្សា​ឃុំ-សង្កាត់​កាន់តែ​ខិត​ជិត​មក​ដល់ នៅ​ដើម​ខែ​មិថុនា ខាងមុខ​នេះ ខណៈ​គណបក្ស​ភ្លើង​ទៀន មិនទាន់​មាន​ប្រតិកម្ម​លើ​បញ្ហា​នេះ​នៅឡើយ។

មន្ត្រី​ជាន់ខ្ពស់​គណបក្ស​សង្គ្រោះ​ជាតិ លោក មុត ចន្ថា បាន​សរសេរ​លើ​គណនី​ហ្វេសប៊ុក​របស់​លោក​កាលពី​ថ្ងៃ​ទី​២ ខែ​ឧសភា ឆ្នាំ​២០២២ ថា មូលហេតុ​ដែល​បេក្ខជន​ក្រុមប្រឹក្សា​ឃុំ-សង្កាត់ និង​សកម្មជន​គណបក្ស​ភ្លើង​ទៀន​ចុះចូល​ជាមួយ​បក្ស​កាន់​អំណាច គឺ​ដោយសារតែ​ពួកគាត់​ត្រូវ​គេ​បំភ័យ​អំពី​កំហុស​ផ្លូវច្បាប់​របស់​គណបក្ស​ភ្លើង​ទៀន។

លោក មុត ចន្ថា បន្ថែម​ថា ការ​បំភ័យ​នោះ គឺ​គេ​អាច​លើកឡើង​អំពី​ការ​ប្រឈម​នឹង​ផ្លូវច្បាប់​ក្រោម​ហេតុផល​ថា បក្ស​ភ្លើង​ទៀន​ត្រូវ​បាន​ដឹកនាំ​ដោយ​លោក សម រង្ស៉ី ដែល​ត្រូវ​តុលាការ​កាត់ទោស​ពី​បទ​ឧក្រិដ្ឋ​ដែល​អាច​ធ្វើ​ឱ្យ​បេក្ខជន​ក្រុមប្រឹក្សា​ឃុំ-សង្កាត់ និង​សកម្មជន​គណបក្ស​ភ្លើង​ទៀន​ទាំងនោះ​ជាប់​ពាក់ព័ន្ធ និង​មាន​ទោស​ដូច​ក្នុង​ផែនការ ៩ វិច្ឆិកា ២០១៩ ដូច្នោះ​ដែរ។

មន្ត្រី​ជាន់ខ្ពស់​បក្ស​ប្រឆាំង​រូប​នេះ​អះអាង​ថា បេក្ខជន​ក្រុមប្រឹក្សា​ឃុំ-សង្កាត់​គណបក្ស​ភ្លើង​ទៀន​មួយ​ចំនួន សម្រេច​ចូលរួម​ជាមួយ​បក្ស​កាន់​អំណាច​អាច​ដោយសារតែ​ពួកគេ​ខកចិត្ត បន្ទាប់ពី​បាន​ដឹង​ខ្លួន​ថា ត្រូវ​មន្ត្រី​ជាន់ខ្ពស់​បក្ស​ភ្លើង​ទៀន​បោកប្រាស់ ដោយ​ការ​បន្លំ​ឈ្មោះ ឬ​លួច​យក​ឈ្មោះ​ខ្លួន​ទៅ​ដាក់​ក្នុង​បញ្ជី​ឈ្មោះ​បេក្ខជន ដែល​បញ្ហា​នេះ​គឺ​ស្រដៀង​គ្នា​ទៅ​នឹង​ការ​បន្លំ​ស្នាមមេដៃ​ស្នើ​បង្កើត​គណបក្ស​បេះដូង​ជាតិ ដែល​ឈាន​ដល់​ការ​ចោទប្រកាន់ និង​ចាប់​ខ្លួន​ស្ថាបនិក​គណបក្ស​នេះ​ពី​បទ​ក្លែង​បន្លំ​ឯកសារ​កាលពី​ពេល​ថ្មីៗ​នេះ។

លោក មុត ចន្ថា បញ្ជាក់​ថា ការ​ចូលរួម​បោះឆ្នោត​របស់​បក្ស​ភ្លើង​ទៀន ដែល​មាន​លោក សម រង្ស៊ី ជា​អ្នក​បញ្ជា​ពីក្រោយ​នេះ គឺជា​ការ​ជួយ​ច្រោះ​មនុស្ស​ឱ្យ​បក្ស​កាន់​អំណាច ងាយស្រួល​កំណត់​មុខសញ្ញា​អ្នក​ដែល​មាន​និន្នាការ​មិន​គាំទ្រ​បក្ស​កាន់​អំណាច​ប៉ុណ្ណោះ ហើយ​ការ​ចុះចូល​នេះ​អាច​នឹង​កើតមាន​ជា​បន្តបន្ទាប់​ទៀត។

ជុំវិញ​បញ្ហា​នេះ អ្នក​នាំពាក្យ​គណបក្ស​កាន់​អំណាច លោក សុខ ឥសាន បាន​សរសេរ​លើ​បណ្ដាញ​សង្គម​តេឡេក្រាម​កាលពី​ថ្ងៃ​២ ខែ​ឧសភា ឆ្នាំ​២០២២ ថា បេក្ខជន​បោះឆ្នោត​ក្រុមប្រឹក្សា​ឃុំ-សង្កាត់​គណបក្ស​ភ្លើង​ទៀន​ចំនួន ៧៨​រូប បាន​សុំ​ចូលរួម​ជីវភាព​នយោបាយ​ជាមួយ​បក្ស​កាន់​អំណាច​ដោយ​ស្មារតី​ភ្ញាក់​រឭក​នយោបាយ គ្មាន​ការ​បង្ខិតបង្ខំ​នោះ​ឡើយ។

លោក សុខ ឥសាន អះអាង​ថា គណបក្ស​ភ្លើង​ទៀន នឹង​រលត់​មុន​ការ​បោះឆ្នោត​ជាមិនខាន ព្រោះ​បេក្ខជន​បក្ស​ភ្លើង​ទៀន ២​រូប និង​សកម្មជន​ជាង ១​ពាន់​នាក់​នៅ​ខេត្ត​ត្បូងឃ្មុំ ក៏​បាន​មក​ចូលរួម​ជាមួយ​គណបក្ស​កាន់​អំណាច​ដែរ។

ទោះជា​យ៉ាងណាក៏ដោយ លោក ថាច់ សេដ្ឋា អនុប្រធាន​គណបក្ស​ភ្លើង​ទៀន បាន​ប្រាប់​សារព័ត៌មាន​ក្នុង​ស្រុក​ថា សារ​នយោបាយ​របស់​អ្នក​នាំពាក្យ​គណបក្ស​ប្រជាជន​កម្ពុជា ថា​វា​មិន​បាន​ឆ្លុះបញ្ចាំង​នូវ​ការពិត​ឡើយ។ លោក​បាន​ចំអក​ឱ្យ​លោក សុខ ឥសាន វិញ​ថា ពន្លឺ​ភ្លើង​ទៀន​ដែល​កើត​ចេញពី​ការ​គាំទ្រ​នៅ​តាម​មូលដ្ឋាន​នេះ វា​នឹង​ឆេះ​ឋាន​ទេវតា​ទៅវិញ ច្រើន​ជាង​ការ​ទស្សន៍ទាយ​ទុក​មុន​របស់​គណបក្ស​ប្រជាជន​កម្ពុជា។

កាលពី​ថ្ងៃ​ទី​២៩ ខែ​មេសា ឆ្នាំ​២០២២ គណៈកម្មាធិការ​ជាតិ​រៀបចំ​ការ​បោះឆ្នោត បាន​ចេញ​សេចក្តី​ប្រកាស​ព័ត៌មាន​ស្ដីពី​លទ្ធផល​នៃ​ការ​ចុះបញ្ជី​បេក្ខជន​នៃ​គណបក្ស​នយោបាយ​សម្រាប់​អាណត្តិ​ទី​៥ ឆ្នាំ​២០២២ នេះ ក្នុង​នោះ​បេក្ខជន​គណបក្ស​ភ្លើង​ទៀន​ត្រូវ គ.ជ.ប លុប​ចេញពី​បញ្ជី​បោះឆ្នោត​មាន​ចំនួន ៩​ឃុំ-សង្កាត់ បន្ទាប់ពី​ខ្លួន​បាន​ដាក់​បញ្ជី​បេក្ខជន ១៦៣២​ឃុំ-សង្កាត់​ដែល​បាន​ចេញ​ផ្សាយ​ដោយ គ.ជ.ប កាលពី​ពេល​កន្លង​ទៅ​នោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស