34 C
Phnom Penh

អ្នក​នាំ​ពាក្យ៖ តុលាការ​ចោទ​តែ​លោក កឹម សុខា មិន​ចោទ​រដ្ឋ​បរទេស​ណា​មួយ​ឡើយ

ដោយ ឌឹ ខេមបូឌា ដេលី

បទវិភាគ

អ្នក​នាំពាក្យ​ក្រសួង​យុត្តិធម៌ លោក ជិន ម៉ាលីន បាន​បកស្រាយ​ជា​ថ្មី​ថា តុលាការ​ចោទប្រកាន់​តែ​លោក កឹម សុខា ពី​បទ «សន្ទិដ្ឋភាព​ជាមួយ​រដ្ឋ​បរទេស» ប៉ុន្តែ​តុលាការ​មិន​បាន​ចោទប្រកាន់​រដ្ឋ​បរទេស​ណា​មួយ​ក្នុង​សំណុំរឿង​លោក កឹម សុខា ឡើយ។

លោក ជិន ម៉ាលីន បាន​សរសេរ​លើ​ហ្វេសប៊ុក​កាលពី​ថ្ងៃ​ទី​១៥ ឧសភា បកស្រាយ​ថា ក្រុម​មេធាវី​របស់​លោក កឹម សុខា បាន​លើកឡើង​ដោយ​ព្យាយាម​ទាញ​រដ្ឋ​បរទេស​ឱ្យ​ចូល​ខ្លួន​ក្នុង​សំណុំរឿង និង​បាន​និយាយ​ថា បើសិនជា​មិន​ចោទប្រកាន់​ទេ តុលាការ​គួរតែ​បញ្ចប់​នីតិវិធី​ក្នុង​រឿងក្ដី​លោក កឹម សុខា ឱ្យ​បាន​ឆាប់ ជាដើម។

លោក​ចាត់ទុក​ការ​ការ​លើកឡើង​របស់​ក្រុម​មេធាវី​របស់​លោក កឹម សុខា ថា​អាច​ធ្វើ​ឱ្យ​មាន​ការ​ភាន់ច្រឡំ​ចំពោះ​ប្រសាសន៍​របស់​លោក ហ៊ុន សែន ដែល​បាន​ថ្លែង​នៅ​សហរដ្ឋ​អាមេរិក ដោយ​ថា​តុលាការ​កម្ពុជា​ចោទប្រកាន់​តែ​លោក កឹម សុខា ពី​បទ «សន្ទិដ្ឋភាព​ជាមួយ​រដ្ឋ​បរទេស» ប៉ុន្តែ​មិន​បាន​ចោទប្រកាន់​ទៅ​លើ​រដ្ឋ​បរទេស​ណា​មួយ​ក្នុង​សំណុំរឿង​នេះ​ទេ។

លោក ជិន ម៉ាលីន អះអាង​ថា អ្វី​ដែល​លោក ហ៊ុន សែន បាន​លើកឡើង​នៅ​សហរដ្ឋ​អាមេរិក គឺ​គ្រាន់តែ​ចង់​បញ្ជាក់​ឱ្យ​សាធារណជន​បាន​ដឹង​ច្បាស់​ថា កន្លងមក​នេះ ទាំង​រាជរដ្ឋាភិបាល​ក្តី ទាំង​តុលាការ​ក្តី មិនមែន​ជា​អ្នក​ដែល​ភ្ជាប់​សហរដ្ឋ​អាមេរិក ឬ​ចោទប្រកាន់​សហរដ្ឋ​អាមេរិក ឬ​រដ្ឋ​បរទេស​ណា​មួយ​នៅ​ក្នុង​សំណុំរឿង​ដែល​ចោទប្រកាន់​លើ​លោក កឹម សុខា នោះ​ទេ។

ការ​អះអាង​របស់​លោក ជិន ម៉ាលីន នា​ពេល​នេះ ធ្វើឡើង​បន្ទាប់ពី​ក្រុម​មេធាវី​របស់​លោក កឹម សុខា បាន​ប្រាប់​អ្នក​សារព័ត៌មាន​ថា ពួកគេ​នឹង​ស្នើ​ឱ្យ​តុលាការ​កោះហៅ​ទូត​បរទេស​ចូល​សវនាការ​ក្នុង​សំណុំរឿង​ត្រូវរ៉ូវ​ជាមួយ​បរទេស​នេះ។

លោក​បាន​ចាត់ទុក​ការ​ស្នើ​របស់​ក្រុម​មេធាវី​របស់​លោក កឹម សុខា ថា​គ្រាន់តែ​ជា​ល្បិច​របស់​ភាគី​ជន​ជាប់ចោទ​ទាញ​រដ្ឋ​បរទេស​ចូល​ក្នុង​សំណុំរឿង​ជាមួយ​លោក កឹម សុខា ដើម្បី​ប្រើប្រាស់​បរទេស​ឱ្យ​ជួយ​គាត់​រួច​ចេញពី​សំណុំរឿង​ព្រហ្មទណ្ឌ ឬ​ពី​ដំណើរការ​កាត់ក្តី​របស់​តុលាការ តាមរយៈ​ឱ្យ​បរទេស​ប្រើ​ឥទ្ធិពល​ដាក់​សម្ពាធ​លើ​កម្ពុជា​តែប៉ុណ្ណោះ។

កាលពី​ពេល​ថ្មីៗ​នេះ អំឡុង​ពេល​ចូលរួម​កិច្ចប្រជុំ​កំពូល​ពិសេស​អាស៊ាន-អាមេរិក នៅ​រដ្ឋធានី​វ៉ាស៊ីនតោន លោក ហ៊ុន សែន បាន​បដិសេធ​ថា លោក​មិន​បាន​ចោទ​អាមេរិក​ពាក់ព័ន្ធ​សំណុំរឿង​សន្ទិដ្ឋភាព​ជាមួយ​រដ្ឋ​បរទេស​របស់​លោក កឹម សុខា ដើម្បី​ផ្តួល​រំលំ​រាជរដ្ឋាភិបាល​កម្ពុជា​នោះ​ទេ ប៉ុន្តែ​លោក កឹម សុខា ជា​អ្នក​លើកឡើង​ដោយ​ខ្លួនឯង។ ករណី​នេះ លោក​បាន​ជំរុញ​ឱ្យ​អាមេរិក​គួរ​ទៅ​និយាយ​រឿង​នេះ​ជាមួយ​លោក កឹម សុខា ព្រោះ​លោក កឹម សុខា ជា​អ្នក​លើកឡើង។

ក្រោយពី​លោក ហ៊ុន សែន បដិសេធ​បែប​នេះ ក្រុម​មេធាវី និង​សាធារណជន​បាន​នាំគ្នា​រិះគន់ ដោយ​ចាត់ទុក​ការ​អះអាង​របស់​លោក ហ៊ុន សែន គ្រាន់តែ​ជា​លេស និង​ការ​ដោះសា​យក​រួច​ខ្លួន​តែប៉ុណ្ណោះ។

ក្នុង​លិខិត​មួយ​ដែល​មេធាវី​តំណាង​ដោយ​រដ្ឋាភិបាល ដាក់​ចូល​ទៅ​តុលាការ​ក្នុង​ដំណាក់កាល​នៃ​នីតិវិធី​សួរ​ដេញដោល​កាលពី​ពេល​កន្លងមក បាន​បង្ហាញ​ថា ប្រទេស​ជាប់​ពាក់ព័ន្ធ​នឹង​បទ​ចោទប្រកាន់​របស់​លោក កឹម សុខា មាន៖

  • សហរដ្ឋ​អាមេរិក
  • អូស្ត្រាលី
  • កាណាដា
  • តៃវ៉ាន់
  • សហភាព​អឺរ៉ុប (EU)
  • ឥណ្ឌា
  • ឥណ្ឌូនេស៊ី
  • ស៊ែប៊ី
  • និង​យូហ្គោស្លាវី។

នៅ​ក្នុង​បទ​ចោទ​នេះ​ដែរ សហ​មេធាវី​តំណាង​ដោយ​រដ្ឋាភិបាល​ដែល​ជា​ដើមចោទ បាន​ភ្ជាប់​ឈ្មោះ​អង្គការ​សង្គម​ស៊ីវិល​អន្តរជាតិ​ចំនួន ៨​ស្ថាប័ន រួម​មាន៖

  • យូអេសអេអាយឌី (USAID)
  • អ៊ិនឌីអាយ (NDI)
  • អាយអអាយ (IRI)
  • ភីសខប (Peace Corps)
  • ឌីស៊ីអេ (DCA)
  • អាក់ស៊ីល (ACILS)
  • និង​អង្គការ ខនរ៉ាត់ (Konrad) ជាដើម ក៏​ស្ថិត​នៅ​ក្នុង​សំណុំរឿង «សន្ទិដ្ឋភាព​ជាមួយ​រដ្ឋ​បរទេស» នេះ​ដែរ។

សហ​មេធាវី​ការពារ​ក្តី​លោក កឹម សុខា គឺ​លោក ផែង ហេង បាន​លើកឡើង​លើ​ទំព័រ​ហ្វេសប៊ុក​របស់​ខ្លួន​កាលពី​ថ្ងៃ​ទី​១២ ខែ​ឧសភា ថា បើ​អ្វី​ដែល​លោក​នាយករដ្ឋមន្ត្រី​អះអាង​ថា​មិន​បាន​ចោទ​សហរដ្ឋ​អាមេរិក​ក្នុង​សំណុំរឿង​ក្តី​ព្រហ្មទណ្ឌ​នេះ​មែន នោះ​សំណុំរឿង​លោក កឹម សុខា មិន​ពិបាក​សម្រាប់​តុលាការ​ដោះស្រាយ​ឡើយ។

លោក​បង្ហាញ​ក្ដី​សង្ឃឹម​ថា ខ្មែរ​នឹង​ងាក​មក​រក​ប្រជាធិបតេយ្យ​ដោយ​ដើរ​នៅ​លើ​ផ្លូវ​ត្រូវ​វិញ ហើយ​កម្ពុជា​មិន​បាត់បង់​មិត្តភ័ក្ដិ ព្រមទាំង​មិន​បាត់បង់​ប្រព័ន្ធ​អនុគ្រោះ​ពន្ធ EBA របស់​អឺរ៉ុប និង GSP របស់​អាមេរិក​នោះ​ទេ។

កាលពី​ដើម​ខែ​ឧសភា ឆ្នាំ​២០២២ តំណាង​ជាន់ខ្ពស់ និង​ជា​អនុប្រធាន​សហភាព​អឺរ៉ុប លោក ចូសឹប បូរ៉ែល (Josep Borrell) ជំរុញ​រដ្ឋាភិបាល​កម្ពុជា​បើក​លំហ​នយោបាយ និង​ផ្តល់​ដំណោះស្រាយ​លើ​សំណុំរឿង​ប្រធាន​គណបក្ស​សង្គ្រោះ​ជាតិ លោក កឹម សុខា ខណៈ​ការ​បោះឆ្នោត​ជិត​ចូល​មក​ដល់ ដោយ​ថា​ខ្លួន​នឹង​ពិចារណា​ផ្តល់​ប្រព័ន្ធ​អនុគ្រោះ​ពន្ធ EBA ឱ្យ​កម្ពុជា​វិញ ប្រសិនបើ​ស្ថានភាព​នយោបាយ និង​ប្រជាធិបតេយ្យ​នៅ​កម្ពុជា​ប្រសើរ​ឡើងវិញ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស