អាជ្ញាធរកុម្មុយនីស្តក្រុងសៀងហៃ បានចាប់ឃុំខ្លួន និងផាកពិន័យប្រជាជនក្នុងទីក្រុងនេះរាប់ពាន់ករណី ដោយសារការរំលោភបម្រាមវិធានការបិទក្រុង ដែលទីក្រុងមួយនេះមានការឆ្លងរាលដាលជំងឺកូវីដ-១៩ ជាង ៦សប្ដាហ៍មកហើយ។ នេះបើតាមបណ្ដាញផ្សាយព័ត៌មាន CNN ដែលបានចុះផ្សាយកាលពីថ្មីៗនេះ។
រហូតមកទល់ពេលនេះ គេនៅមិនទាន់មានតួលេខជាក់លាក់ណាមួយត្រូវបានកត់ត្រាទុកថា មនុស្សប៉ុន្មានពាន់នាក់ត្រូវបានចាប់ខ្លួនករណីរំលោភច្បាប់ប្រឆាំងនឹងជំងឺកូវីដ-១៩ នៅឡើយទេ ប៉ុន្តែនៅតាមមហាវិថីរបស់ទីក្រុងដែលមានប្រជាជនជាង ២៥លាននាក់នេះ ឃើញថាស្ងាត់ជ្រងំ ខណៈប្រជាជនត្រូវហាមចាកចេញពីផ្ទះ ហើយវិធានការនេះអនុវត្តតាមបទបញ្ជារបស់លោកប្រធានាធិបតី ស៊ី ជីនពីង ដែលជាយុទ្ធសាស្ត្រសូន្យកូវីដ។
តែជាមួយគ្នា គេបានឃើញការបង្ហោះវីដេអូនៅលើបណ្ដាញសង្គម Youtube មួយនៃ Channel Wion នៃប្រទេសឥណ្ឌា ដោយបានឃើញប្រជាជន និងសមត្ថកិច្ចរបស់ទីក្រុងប៉ះទង្គិចគ្នា ហើយក្នុងនោះ សមត្ថកិច្ចពេទ្យចាប់បង្ខំពលរដ្ឋឲ្យធ្វើតេស្ដ។ ស្របពេលនោះ គេក៏ឃើញប្រជាជនលួចរត់ចេញពីផ្ទះដើម្បីស្វែងរកស្បៀងអាហារ ខណៈពួកគេរងការបិទខ្ទប់ដោយពុំមានស្បៀងគ្រប់គ្រាន់ក្នុងផ្ទះ។
តាមបណ្ដាញផ្សាយព័ត៌មាន CNN ពលរដ្ឋដែលត្រូវបានចាប់ខ្លួន គឺពួកគេត្រូវដឹកយកទៅធ្វើចត្តាឡីស័កនៅក្នុងមជ្ឈមណ្ឌលរបស់អាជ្ញាធរ។
ដោយអនុវត្តតាមផែនការសូន្យកូវីដ គេឃើញសមត្ថកិច្ចប៉ូលិសដើរល្បាតគ្រប់មហាវិថី ហើយបើពលរដ្ឋណារំលោភបម្រាម ត្រូវឃាត់ខ្លួនភ្លាម។ មិនតែប៉ុណ្ណោះ សមត្ថកិច្ចបង្ខំឲ្យម្ចាស់ផ្ទះត្រូវស្ថិតនៅក្នុងផ្ទះ ហើយអាជ្ញាធរបានចាក់សោរបងជាប់មិនឲ្យចេញឡើយ ប៉ុន្តែកំហឹងសាធារណជន គឺដោយសារតែពួកគេខ្វះស្បៀងអាហារគ្រប់គ្រាន់នៅពេលពួកគេហាមចាកចេញពីផ្ទះ។
យុទ្ធសាស្ត្រសូន្យកូវីដមានការបញ្ចូលវិធានការច្រើនយ៉ាង ដូចជា បិទខ្ទប់សង្កាត់ ឬក្រុងនៅពេលមានលេចករណីវិជ្ជមានកូវីដដំបូងភ្លាម ត្រូវធ្វើចត្តាឡីស័កអ្នកវិជ្ជមានកូវីដទោះគ្មានរោគសញ្ញាក៏ដោយ ឬធ្វើតេស្ដកូវីដទ្រង់ទ្រាយធំ។ តាមដំណឹងមកថា មួយថ្ងៃៗមនុស្សឆ្លងកូវីដថ្មី Omicron អាចមានជិត ៤ពាន់នាក់ ហើយចាប់តាំងពីជាងមួយខែមកហើយ មនុស្សស្លាប់មានចំនួន ៥៤៧នាក់។
មិនថាឡើយក្រុងសៀងហៃ ត្រូវបានប្រកាសថាមានការឆ្លងកូវីដថ្មី Omicron គឺជំងឺនេះក៏បានរីករាលដាលដល់ទីក្រុងប៉េកាំង ដែរ។ ក្នុងទីក្រុងនេះ សង្កាត់ខ្លះក៏ត្រូវបិទខ្ទប់ផងដែរ។ បន្ថែមលើសពីនេះ បណ្ដាខេត្តជាច្រើនទៀតក៏កំពុងតែឆ្លងជំងឺប្រភេទនេះ ដែលអាចប៉ះពាល់មនុស្សរាប់សិបលាននាក់។ ដោយសារស្ថានភាពបិទខ្ទប់នេះ បានបណ្ដាលឱ្យសេដ្ឋកិច្ចចិន រងផលប៉ះពាល់ខ្លាំង។
ការិយាល័យស្ថិតិជាតិប្រទេសចិន បានឲ្យដឹងថា ចាប់តាំងពីផ្ទុះករណីឆ្លងកូវីដ-១៩ជាង ១ខែមកនេះ អត្រាអ្នកអត់ការងារធ្វើបានហក់ឡើងខ្ពស់។ ការិយាល័យស្ថិតិជាតិឲ្យដឹងថា ទំនិញលើទីផ្សារបានធ្លាក់ចុះ ៣,៥% ក្នុងខែមីនា និងបន្តធ្លាក់ចុះ ១១,១% ក្នុងខែមេសា។ ចំណែកអត្រាអ្នកអត់ការងារធ្វើបានកើនពី ៥,៨% ក្នុងខែមីនា ហើយបន្តកើនឡើងដល់ទៅ ៦,១% ក្នុងខែមេសា។
ដោយប្រឈមនឹងបាត់បង់ការងារ របបក្រុងប៉េកាំង បានសម្រេចផ្ដល់ការងារចំនួន ១១លានការងារសម្រាប់ឆ្នាំ២០២២។ ចិនជាប្រភពសាយភាយមុនគេដែលបង្កឲ្យមានមេរោគជំងឺផ្លូវដង្ហើមនៃវីរុសកូរ៉ូណា។
ប្រភពដំបូងរបស់វាចេញពីក្រុង Wuhan នៃខេត្តអូបីយ ប្រទេសចិន ហើយប៉ុន្មានខែក្រោយមក វារីករាលដាលពាសពេញពិភពលោក។ លោក Tedros Adhanom Ghebreyesus ប្រធានអង្គការសុខភាពពិភពលោក (WHO) បានចេញមុខរិះគន់ជាសាធារណៈលើនយោបាយសូន្យកូវីដរបស់ចិន។ លោកថា ស្ថានភាពជំងឺឆ្លង Omicron គេអាចទប់ស្កាត់បានច្រើនដោយមធ្យោបាយធូរស្រាលជាងនេះ។ តាមការពន្យល់របស់អ្នកជំនាញរូបនេះ មនុស្សគ្រប់គ្នាបានសម្របខ្លួនទៅនឹងកូវីដ-១៩ ដោយរៀនរស់នៅជាមួយកូវីដ-១៩ ដោយបន្តអនុវត្តវិធានការសុខាភិបាល ដូចជាពាក់ម៉ាស់ លាងដៃញឹកញាប់ ឬមួយក៏រក្សាគម្លាតសុវត្ថិភាព ជាដើម។
អង្គការសុខភាពពិភពលោកយល់ថា ជាមួយនឹងអូមីក្រុងសព្វថ្ងៃ គេអាចកាត់បន្ថយអត្រាឆ្លងបាន តែគេមិនអាចបិទខ្ទប់ការឆ្លងទាំងស្រុងបានទេ។
ប៉ុន្តែអ្វីដែលចិនធ្វើរឿងនេះ ដូចចម្លែកជាងគេ គឺអាចមកពីកត្តាវ៉ាក់សាំង ព្រោះវ៉ាក់សាំងចិន ពុំមានប្រសិទ្ធភាពច្រើនទេក្នុងការទប់ស្កាត់ជំងឺផ្លូវដង្ហើមសាកលនោះទេ៕