ទីបំផុត ប្រទេសចិនដែលអួតអាងថាជាអ្នកបានរកឃើញ និងផលិតវ៉ាក់សាំងប្រឆាំងជំងឺកូវីដ-១៩ មុនគេបង្អស់ នៅពេលនេះបានសម្រេចសុំចរចាទិញវ៉ាក់សាំង Moderna ពីក្រុមហ៊ុនសាជីវកម្មវ៉ាក់សាំង Moderna របស់អាមេរិកាំង ដើម្បីយកទៅប្រើប្រាស់ជាបន្ទាន់នៅក្នុងប្រទេសចិន។
ទីភ្នាក់ងារសារព័ត៌មាន Reuters បានចុះផ្សាយនៅថ្ងៃទី១៤ ខែកញ្ញា ថា ក្រុមហ៊ុនសាជីវកម្មវ៉ាក់សាំង Moderna បានទទួលយកការចរចាជាមួយរដ្ឋាភិបាលចិន ដើម្បីជួយផលិតវ៉ាក់សាំងការពារជំងឺកូវីដ-១៩ Moderna លក់មកឲ្យចិន។ តែបើតាមប្រភពព័ត៌មានដដែលនេះ បានស្រង់សម្ដីលោក Stephane Bancel នាយកប្រតិបត្តិក្រុមហ៊ុនសាជីវកម្មវ៉ាក់សាំង Moderna បានឲ្យដឹងថា ការចរចាពិតជាបានធ្វើឡើង តែសេចក្ដីសម្រេចណាមួយនៅពុំទាន់មាននៅឡើយទេ។
ចិនជាប្រភពផ្ទុះមេរោគជំងឺកូវីដ-១៩ មុនគេ ហើយប្រទេសនេះក៏ជាអ្នកផលិតវ៉ាក់សាំងមុនគេដែរ និងបានចែកចាយទៅដល់ប្រទេសក្រីក្រ និងប្រទេសណាធ្លាក់ក្នុងបំណុលរបស់ខ្លួនពាន់លានដុល្លារ ក្នុងនោះរួមមានទាំងកម្ពុជាផងដែរដែលបានប្រើវ៉ាក់សាំងចិនច្រើនជាងគេក្នុងចំណោមប្រទេសដទៃទៀតក្នុងសមាគមអាស៊ានទាំង ១០ប្រទេស។
ឥឡូវនេះ វ៉ាក់សាំងរបស់ចិន ពីរប្រភេទ គឺសីណូវ៉ាក់ និងស៊ីណូហ្វាម មានភាពសម្បូរហូរហៀរនៅកម្ពុជា ឡាវ និងភូមា ដោយបានចាក់ស្ទើរគ្រប់កុមារ ជាពិសេសនៅកម្ពុជា បើទោះជាវ៉ាក់សាំងប្រភេទនេះមិនសូវមានប្រសិទ្ធភាពក៏ដោយ។ តែចុងក្រោយ ពលរដ្ឋកម្ពុជាភាគច្រើនមិននិយមចាក់វ៉ាក់សាំងចិនទៀតទេ គឺគេនិយមចាក់វ៉ាក់សាំងអាមេរិក និងអង់គ្លេស ព្រោះពួកគេបារម្ភអំពីប្រសិទ្ធភាពរបស់វា និងផលប៉ះពាល់ទៅថ្ងៃមុខ។
ចំពោះកោះតៃវ៉ាន់ ដែលមានសាច់ឈាមនឹងចិន បានប្រកាសមិនទទួលយកជំនួយវ៉ាក់សាំងរបស់ចិនជាដាច់ខាត។ អាជ្ញាធរតៃវ៉ាន់ មិនត្រឹមប្រកាន់ជំហរដូចនេះទេ គឺហាមដាច់ខាតមិនឲ្យក្រុមហ៊ុនក្នុងស្រុក ឬក្រុមហ៊ុនណាមួយនាំចូលវ៉ាក់សាំងរបស់ចិនទៀតផង។
យ៉ាងណា នៅក្នុងប្រទេសចិន ដែលល្បីថាចាក់វ៉ាក់សាំងរបស់ខ្លួនសឹងអស់មនុស្សទៅហើយ បែរជាប្រទេសនេះកំពុងផ្ទុះរាលដាលជំងឺប្រភេទនេះយ៉ាងខ្លាំងមកទល់នឹងពេលនេះ ហើយសូម្បីនៅទីក្រុងប៉េកាំង ទីក្រុងសៀងហៃ និងបណ្ដាខេត្តផ្សេងៗទៀត គឺជំងឺឆ្លងប្រភេទនេះនៅផ្ទុះជាខ្លាំងដោយបង្ខំបិទក្រុងបិទសង្កាត់ទៀតផង។ នៅពេលផ្ទុះម្ដងៗ ប្រជាជនតែងតែផ្ទុះកំហឹងដោយសារតែពួកគេត្រូវបានសមត្ថកិច្ចរាំងខ្ទប់មិនឱ្យចាកចេញពីផ្ទះ។
ចំពោះសារព័ត៌មានរបស់ចិន តែងតែត្រូវអាជ្ញាធរចិនហាមឃាត់ការផ្សាយព័ត៌មានចេញទៅខាងក្រៅ អំពីការបន្តផ្ទុះជំងឺឆ្លងប្រភេទនេះ ប៉ុន្តែនៅតែមិនអាចបិទបាំងបានឡើយ។
សារព័ត៌មានអន្តរជាតិធំៗ ដូចជាទីភ្នាក់ងារសារព័ត៌មាន Reuters, AFP និង AP ជាដើម តែងតែទម្លាយព័ត៌មាននេះចេញមកក្រៅ ដោយសារតែប្រព័ន្ធផ្សព្វផ្សាយឯករាជ្យទាំងនេះទទួលបានការផ្ដល់ព័ត៌មានពីពលរដ្ឋចិនដែលរស់នៅតំបន់បិទខ្ទប់។
ទីភ្នាក់ងារសារព័ត៌មាន Reuters បានរាយការណ៍មកថា រហូតមកដល់ពេលនេះ ការបិទខ្ទប់នៅតែមាននៅតាមបណ្ដាខេត្ត និងក្រុងជាច្រើននៅចិន ព្រោះការឆ្លងមេរោគ Omicron នៅតែវាយលុកប្រទេសដែលមានប្រជាជនជាង ១៤០០លាននាក់នេះ ហើយការធ្វើតេស្ដរកឃើញអ្នកកើតជំងឺប្រភេទនេះ គឺរាប់ម៉ឺនរាប់សែននាក់ឯណោះ។
លោក Stephane Bancel នាយកប្រតិបត្តិក្រុមហ៊ុនសាជីវកម្មវ៉ាក់សាំង Moderna បានថ្លែងនៅក្នុងសន្និសីទសារព័ត៌មានមួយនៅក្រុងតូក្យូ ប្រទេសជប៉ុន ថា ក្រុមហ៊ុនរបស់លោកនឹងអនុម័តតាមការស្នើទិញរបស់ប្រទេសចិន នៅពេលដ៏ឆាប់ខាងមុខនេះ ប៉ុន្តែលោកថា ក្រុមហ៊ុននឹងមិនចែកចាយរូបមន្តវ៉ាក់សាំង ឬក៏លក់អាជ្ញាប័ណ្ណឱ្យចិននោះទេ។
តាមលោក Stephane Bancel នៅរដូវត្រជាក់ខាងមុខនេះ ការប្រែប្រួលមេរោគ Omicron អាចទៅជាប្រភេទថ្មីទៀត តែលោក Stephane Bancel បានថ្លែងថា ក្រុមហ៊ុនសាជីវកម្មវ៉ាក់សាំង Moderna អាចនឹងអនុញ្ញាតឱ្យជប៉ុន ទទួលបានសិទ្ធិក្នុងការផលិត ដើម្បីប្រើប្រាស់ក្នុងប្រទេស។ សម្រាប់ប្រទេសជប៉ុន បានទទួលការនាំចូលវ៉ាក់សាំង Moderna និង Pfizer នៅអំឡុងពិភពលោកផ្ទុះកូវីដប្រភេទ Omicron។
បច្ចុប្បន្ននេះ ប្រទេសជាច្រើនលែងស្នើទិញ ឬក៏ទទួលយកជំនួយវ៉ាក់សាំងរបស់ប្រទេសចិន គឺវ៉ាក់សាំងប្រភេទស៊ីណូហ្វាម និងស៊ីណូវ៉ាក់។ វ៉ាក់សាំងប្រភេទនេះបើនិយាយពីនៅអឺរ៉ុបវិញ គេមិនអនុញ្ញាតឱ្យនាំចូល ព្រោះតែប្រសិទ្ធភាពរបស់វាទាបបំផុត បើធៀបនឹងវ៉ាក់សាំងរបស់អាមេរិក គឺ Pfizer, Moderna, Johnson and Johnson និងវ៉ាក់សាំងរបស់អង់គ្លេស AstraZeneca។
តាមការកត់សម្គាល់របស់អ្នកជំនាញ ប្រទេសច្រើនណាស់នៅលើពិភពលោក បានកំពុងតែប្រើប្រាស់វ៉ាក់សាំងរបស់អាមេរិក ហើយបន្តស្នើទិញវ៉ាក់សាំងប្រភេទនេះថែមទៀត៕