រដ្ឋមន្ត្រីក្រសួងការពារជាតិកម្ពុជា ប្ដេជ្ញាធ្វើការឱ្យកាន់តែជិតស្និទ្ធថែមទៀតរវាងកម្ពុជា និងវៀតណាម ដោយបន្តរួមគ្នាអនុវត្តទៅតាមលទ្ធផលដែលមេដឹកនាំប្រទេសទាំងពីរបានឯកភាពគ្នាក្នុងអំឡុងពេលស្នាក់អាស្រ័យនៅសហរដ្ឋអាមេរិក ដើម្បីសម្រេចឱ្យបានជោគជ័យថែមទៀតលើគ្រប់វិស័យអាទិភាពទាំងអស់។
រដ្ឋមន្ត្រីក្រសួងការពារជាតិកម្ពុជា លោក ទៀ បាញ់ បានឡើងក្នុងកិច្ចពិភាក្សាជាមួយរដ្ឋមន្ត្រីក្រសួងការពារជាតិនៃសាធារណរដ្ឋសង្គមនិយមវៀតណាម លោក ហ្វាន វ៉ាន់ហ្សាង កាលពីថ្ងៃទី១៥ ខែឧសភា ឆ្នាំ២០២២ នៅខេត្តប៊ិញភឿក ប្រទេសវៀតណាម ដែលត្រូវបានផ្សព្វផ្សាយនៅថ្ងៃទី២៣ ឧសភា នេះថា ការចុះអនុសារណៈយោគយល់ នឹងនាំមកនូវផលប្រយោជន៍ទៅវិញទៅមកដល់ប្រជាជន និងកងទ័ពនៃប្រទេសទាំងពីរក្នុងការរួមចំណែកដល់សន្តិភាព ស្ថិរភាព និងវិបុលភាពផងដែរ។
រដ្ឋមន្ត្រីក្រសួងការពារជាតិកម្ពុជារូបនេះអះអាងថា ប្រទេសទាំងពីរនឹងបន្តរួមគ្នាអនុវត្តទៅតាមលទ្ធផលដែលមេដឹកនាំបក្សកាន់អំណាច លោក ហ៊ុន សែន និងមេដឹកនាំវៀតណាម លោក ផាម មិញជីញ (Phạm Minh Chính) បានឯកភាពគ្នាក្នុងអំឡុងពេលស្នាក់អាស្រ័យនៅរដ្ឋធានីវ៉ាស៊ីនតោន សហរដ្ឋអាមេរិក ឱ្យកាន់តែប្រសើរឡើង និងសម្រេចឱ្យបានជោគជ័យថែមទៀតលើកិច្ចសហប្រតិបត្តិការសេដ្ឋកិច្ច ពាណិជ្ជកម្ម ទេសចរណ៍ និងប្រវត្តិសាស្ត្រ។
កាលពីថ្ងៃទី១២ ខែឧសភា ឆ្នាំ២០២២ លោក ហ៊ុន សែន បានជួបពិភាក្សាជាលក្ខណៈទ្វេភាគីជាមួយមេដឹកនាំវៀតណាម លោក ផាម មិញជីញ មុនកិច្ចប្រជុំកំពូលអាស៊ាន-អាមេរិក ថាកម្ពុជា និងវៀតណាមបានបោះបង្គោលព្រំដែនកើនឡើងដល់ ៩០% ហើយក្នុងនោះគឺនៅសល់តែ ១០% ទៀតប៉ុណ្ណោះ។ ប្រទេសទាំងពីរក៏កំពុងតែចរចាដើម្បីបោះបង្គោលបញ្ចប់ដែរ។
បុរសខ្លាំងកម្ពុជា លោក ហ៊ុន សែន បញ្ជាក់ថា កាលពីឆ្នាំ២០១៩ កម្ពុជា និងវៀតណាមបានបោះបង្គោលព្រំដែនបានត្រឹមតែ ៨៤% ប៉ុណ្ណោះ ប៉ុន្តែរយៈពេល ២ឆ្នាំមកនេះ ប្រទេសទាំងពីរបានបោះបង្គោលព្រំដែនបានចំនួន ៦% បន្ថែមទៀត ដែលភាគីទាំងពីរបានឯកភាពគ្នា និងបានចុះហត្ថលេខាទទួលស្គាល់នៅឆ្នាំ២០២២ នេះស្ថិតក្នុងតំបន់ដាក់ដាំ និងដាក់ហ៊ូត ខេត្តមណ្ឌលគិរី។
កម្ពុជាមានផ្ទៃដីសរុបទំហំ ១៨១០៣៥គីឡូម៉ែត្រការ៉េ ដែលមានព្រំដែនគោកជាប់ប្រទេសវៀតណាម ប្រវែង ១២៧០គីឡូម៉ែត្រ។
ជុំវិញបញ្ហានេះ មានមតិរិះគន់ថា ផ្ទៃក្រឡារបស់ប្រទេសកម្ពុជាបានបាត់បង់អស់ខ្លះទៅហើយ ប្រសិនបើមានការវាស់វែងជាក់ស្តែងនោះ ប៉ុន្តែលោក ហ៊ុន សែន អះអាងថា លោកមិនបានលក់ដីឱ្យវៀតណាមដូចការចោទប្រកាន់ឡើយ។
មាត្រា២ នៃរដ្ឋធម្មនុញ្ញកម្ពុជា ចែងថា បូរណភាពទឹកដីរបស់ព្រះរាជាណាចក្រកម្ពុជា មិនអាចរំលោភបានដាច់ខាតក្នុងព្រំដែនរបស់ខ្លួន ដែលមានកំណត់លើផែនទីមាត្រដ្ឋានខ្នាត ១/១០០០០០ ដែលធ្វើនៅចន្លោះឆ្នាំ១៩៣៣-១៩៥៣ ហើយត្រូវបានទទួលស្គាល់ជាអន្តរជាតិនៅចន្លោះឆ្នាំ១៩៦៣-១៩៦៩។
ចំណែកមាត្រា៥៥ ចែងថា សន្ធិសញ្ញា និងកិច្ចព្រមព្រៀងទាំងឡាយណាដែលមិនស្របនឹងឯករាជ្យ អធិបតេយ្យ បូរណភាពទឹកដី អព្យាក្រឹតភាព និងឯកភាពជាតិរបស់កម្ពុជា ត្រូវលុបចោលទាំងអស់៕