លោក ហ៊ុន សែន បញ្ជាឱ្យរដ្ឋមន្ត្រីក្រសួងការពារជាតិ ជ្រើសរើសពលទាហានថ្មីចំនួន ៦០០នាក់បន្ថែមទៀតដើម្បីបំពេញក្របខ័ណ្ឌឱ្យ ៣កងវរសេនាតូចដែលទើបបង្កើតថ្មី។
សេចក្ដីសម្រេចមួយដែលចុះហត្ថលេខាដោយបុរសខ្លាំង លោក ហ៊ុន សែន កាលពីថ្ងៃទី២ ខែមិថុនា ឆ្នាំ២០២២ ឱ្យដឹងថា រូបលោកអនុញ្ញាតឱ្យរដ្ឋមន្ត្រីក្រសួងការពារជាតិ លោក ទៀ បាញ់ ជ្រើសរើសពលទាហានថ្មីចំនួន ៦០០នាក់ទៀត ដើម្បីបំពេញក្របខ័ណ្ឌឱ្យកងវរសេនាតូចចំនួន៣ ដែលទើបបង្កើតថ្មីចំណុះឱ្យអគ្គបញ្ជាការដ្ឋានកាំភ្លើងធំ។
លោកអះអាងថា ករណីនេះ រដ្ឋមន្ត្រីទទួលបន្ទុកទីស្ដីការគណៈរដ្ឋមន្ត្រី រដ្ឋមន្ត្រីក្រសួងការពារជាតិ រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ អគ្គមេបញ្ជាការនៃកងយោធពលខេមរភូមិន្ទ រដ្ឋមន្ត្រី រដ្ឋលេខាធិការគ្រប់ក្រសួងស្ថាប័នដែលពាក់ព័ន្ធ ត្រូវអនុវត្តតាមសេចក្ដីសម្រេចចាប់ពីថ្ងៃចុះហត្ថលេខានេះតទៅ។
សេចក្ដីសម្រេចដដែលថា ការសម្រេចបែបនេះធ្វើឡើងតាមសំណើរបស់រដ្ឋមន្ត្រីក្រសួងការពារជាតិ លោក ទៀ បាញ់។
ប្រធានវេទិកាពលរដ្ឋ និងជាអ្នកវិភាគ លោក គឹម សុខ ចាត់ទុកការជ្រើសរើសនេះថាជាល្បែងរៀបក្រឡាផ្ទេរអំណាច បន្ទាប់ពីមានគណបក្សភ្លើងទៀនចូលរួមជួយបំពេញមុខមាត់ឲ្យឃើញសំឡេងចម្រុះខ្លះ ហើយលោក ហ៊ុន សែន ក៏ត្រូវបង្កើនល្បឿនរៀបសំណាញ់ទ័ពជួយពង្រឹងកម្លាំងជ្រោមជ្រែងលោក ហ៊ុន ម៉ាណែត។
លោកបន្តថា ការបង្កើតកងវរសេនាតូចចំនួន៣ ដោយរើសទាហាន ៦០០នាក់បន្ថែមនេះ គឺជាផ្នែកតូចមួយនៃបណ្ដាញសំណាញ់ការពារអំណាចលោក ហ៊ុន ម៉ាណែត ពីព្រោះកងវរសេនាតូចទាំង៣ នេះ ចំណុះបញ្ជាការដ្ឋានកាំភ្លើងធំដែលមានមេបញ្ជាការជាមនុស្សហ៊ានស្លាប់ការពារអំណាចរបស់លោក ហ៊ុន ម៉ាណែត។
លោកយល់ថា ការជ្រើសរើសពលទាហានថ្មីនេះ គ្រាន់តែជារូបភាពខាងក្រៅប៉ុណ្ណោះ ដោយសារតែពលទាហាន ៦០០នាក់ដែលត្រូវបញ្ចូលក្នុងកងវរសេនាតូចទាំង៣ នោះ ត្រូវលោក ហ៊ុន ម៉ាណែត សម្រិតសម្រាំងពីកងអង្គរក្សធ្វើជាកម្លាំងយុទ្ធសាស្ត្ររួចហើយ។
ការសម្រេចរបស់លោក ហ៊ុន សែន ដែលអនុញ្ញាតឱ្យក្រសួងការពារជាតិជ្រើសរើសពលទាហានថ្មី ធ្វើឡើងបន្ទាប់ពីកម្ពុជាបានបោះឆ្នោតជ្រើសរើសក្រុមប្រឹក្សាឃុំ-សង្កាត់អាណត្តិទី៥ នៅឆ្នាំ២០២២ ហើយនឹងបោះឆ្នោតជ្រើសតាំងតំណាងរាស្ត្រនៅឆ្នាំ២០២៣។
កាលពីថ្ងៃទី២៦ ខែមេសា ឆ្នាំ២០២២ បុរសខ្លាំងក្រាញអំណាច លោក ហ៊ុន សែន បានអនុញ្ញាតឱ្យក្រសួងការពារជាតិ ជ្រើសរើសពលទាហានថ្មីចំនួន ៤០២នាក់ ដើម្បីរៀបចំកងកាំជ្រួចការពារដែនអាកាសរយៈកម្ពស់មធ្យមចំណុះបញ្ជាការដ្ឋានការពារអាកាស។
ពាក់ព័ន្ធនឹងការកងកម្លាំងនេះ កាលពីថ្ងៃទី១២ ខែមេសា កន្លងទៅ ក្រសួងការបរទេសអាមេរិក បានបង្ហាញថា សមាជិកនៃកងកម្លាំងរបស់រដ្ឋាភិបាលកម្ពុជាមួយចំនួនបានជាប់ពាក់ព័ន្ធនឹងអំពើរំលោភសិទ្ធិមនុស្សធ្ងន់ធ្ងរ ដែលជំរុញឱ្យអំពើនិទ្ទណ្ឌភាពនៅតែបន្តកើតមានឡើងនៅកម្ពុជា។
គួរបញ្ជាក់ផងដែរថា បើតាមលិខិតចុះថ្ងៃទី២៥ ខែមីនា ឆ្នាំ២០២២ ចុះហត្ថលេខាដោយរដ្ឋមន្ត្រីក្រសួងមុខងារសាធារណៈ លោក ព្រុំ សុខា ឲ្យដឹងថា ក្នុងឆ្នាំ២០២២ នេះ រាជរដ្ឋាភិបាលបានយល់ព្រមជាគោលការណ៍ឱ្យជ្រើសរើសមន្ត្រីជាប់កិច្ចសន្យាជិត ៤ម៉ឺន ៦ពាន់នាក់ សម្រាប់បម្រើការងារនៅតាមក្រសួងស្ថាប័ននានា ប៉ុន្តែមិនអនុញ្ញាតឱ្យជ្រើសរើសក្របខ័ណ្ឌថ្មីជំនួសអ្នកចូលនិវត្តន៍ឡើយ លើកលែងតែក្រសួងស្ថាប័នដែលមានគោលការណ៍ដោយឡែកពីប្រមុខរាជរដ្ឋាភិបាល៕