31 C
Phnom Penh

វៀតណាម-ឥណ្ឌា​បន្ត​ពង្រឹង​សាមគ្គី​វិស័យ​យោធា​ទ្វេភាគី​នៅ​ចំពោះ​មុខ​ឥទ្ធិពល​ចិន

ដោយ ឌឹ ខេមបូឌា ដេលី

បទវិភាគ

វៀតណាម និង​ឥណ្ឌា មាន​ដែនដី​ឆ្ងាយ​ដាច់​ពី​គ្នា​រាប់​ពាន់​គីឡូម៉ែត្រ។ ឥណ្ឌា ស្ថិត​នៅ​ជ្រោយ​នៃ​មហាសមុទ្រ​ឥណ្ឌា នៃ​ដែនដី​អាស៊ី​ខាងត្បូង ហើយ​ចំណែក​វៀតណាម ស្ថិតនៅ​ខាង​ជ្រោយ​សមុទ្រ​ចិន​ខាងត្បូង ក្នុង​ដែនដី​អាស៊ី​អាគ្នេយ៍។

ប៉ុន្តែ​ប្រទេស​ពីរ​នេះ​បែរជា​មក​រត់​ចង​សម្ពន្ធមិត្ត​នឹង​គ្នា​ផ្នែក​យោធា​ទៅវិញ ដែល​អ្នក​សង្កេតការណ៍​មើល​ឃើញ​ថា វៀតណាម និង​ឥណ្ឌា បន្ត​ពង្រឹង​សាមគ្គី​គ្នា​លើ​វិស័យ​យោធា​ទ្វេភាគី​នៅ​ចំពោះ​មុខ​ឥទ្ធិពល​ចិន។

បើ​និយាយ​ទៅ ទាំង​វៀតណាម និង​ឥណ្ឌា សុទ្ធតែ​ជា​ប្រទេស​ដែល​ត្រូវ​បាន​ចិន​លើក​ទ័ព​ឈ្លានពាន​ទាំងអស់ និង​ជា​ប្រទេស​ដែល​មាន​ស្លាកស្នាម​ប្រវត្តិសាស្ត្រ​ប្រហាក់ប្រហែល​គ្នា​ក្រោម​សង្គ្រាម​ពី​សំណាក់​ប្រទេស​ចិន។ ចិន និង​វៀតណាម មាន​ព្រំដែន​គោក​ជាប់​គ្នា​ជាច្រើន​រយ​គីឡូម៉ែត្រ ហើយ​ឥណ្ឌា មាន​ព្រំដែន​ជាប់​ចិន ជាង ៣​ពាន់​គីឡូម៉ែត្រ។

សង្គ្រាម​ព្រំដែន ដែល​ចិន លើក​ទ័ព​ចូល​ទឹកដី​វៀតណាម ឆ្នាំ​១៩៧៩ គឺជា​ដំបៅ​ដែល​ក្រុង​ហាណូយ មិន​បាន​លុបលាង​ចោល​បាន​នោះ​ទេ។

ចំណែក​ឥណ្ឌា មាន​សង្គ្រាម​នឹង​ចិន​នៅ​ឆ្នាំ​១៩៦២ និង​ឆ្នាំ​១៩៦៧ គឺ​ក្រុង​ញូវដែលី នៅ​កត់ត្រា​ទុក​ក្នុង​ប្រវត្តិសាស្ត្រ ដោយ​ចាត់ទុក​ថា​ជា​សង្គ្រាម​ចិន​ឈ្លានពាន​វាយ​កាន់កាប់​ទឹកដី​តាម​ព្រំដែន​នៃ​ប្រទេស​ដ៏​ធំ​នៅ​អាស៊ី​ខាងត្បូង​មួយ​នេះ។

យ៉ាងណា មិន​ថា​តែ​ក្នុង​អតីតកាល​ដែល​ប្រទេស​ឥណ្ឌា និង​វៀតណាម ប្រឈម​នឹង​ការ​ឈ្លានពាន​ពី​សំណាក់​ប្រទេស​ចិន ទេ គឺ​បច្ចុប្បន្ន​នេះ នៅតែ​បន្ត​នៅឡើយ។ កាលពី​ខែ​មិថុនា ឆ្នាំ​២០២០ កងទ័ព​ចិន និង​ឥណ្ឌា វាយ​ប្រយុទ្ធ​គ្នា​ជាច្រើន​ម៉ោង​បណ្ដាល​ឱ្យ​កងទ័ព​ប្រទេស​ទាំង​ពីរ​ស្លាប់ និង​របួស​ជាច្រើន​នាក់។

ក្នុង​ស្ថានការណ៍​បែប​នេះ ឥណ្ឌា​បាន​ស្ទុះ​ទៅ​រក​ការ​ចាប់​ដៃ​ជាមួយ​នឹង​សម្ពន្ធមិត្ត​ជាច្រើន ដើម្បី​ជា​កម្លាំង​សាមគ្គី​ទប់ទល់​នឹង​ចិន។ ចំណែក​វៀតណាម ក៏​មិន​ខុស​នឹង​ឥណ្ឌា​នោះ​ដែរ។ ក្រៅពី​សង្គ្រាម​ព្រំដែន គឺ​ចិន​ក៏​បាន​បង្ក​សង្គ្រាម​ដាក់​វៀតណាម​ដែរ គឺ​សង្គ្រាម​ដែនទឹក​សមុទ្រ​ដែល​នាំ​ឲ្យ​មាន​ការ​វាយ​ប្រយុទ្ធ​គ្នា​ទៀត​ផង ដូចជា​នៅ​ឆ្នាំ​១៩៧៤ ជាដើម។

នៅ​ឆ្នាំ​នោះ ចិន​លើក​ទ័ព​ចូល​វាយ​កាន់កាប់​កោះ​ជាច្រើន​របស់​វៀតណាម នៅ​សមុទ្រ​ចិន​ខាងត្បូង ហើយ​រហូត​មក​ដល់​ពេលនេះ ចិន​នៅតែ​ត្រូវ​បាន​វៀតណាម ចោទ​ថា​បាន​បន្ត​រំលោភ​ដែនទឹក​វៀតណាម​នៅឡើយ។ ប្រទេស​វៀតណាម និង​ចិន ពុំ​មាន​កិច្ចព្រមព្រៀង​សន្តិភាព​ជាមួយ​គ្នា​នោះ​ទេ។

ក្នុង​ស្ថានការណ៍​បែប​នេះ វៀតណាម​ដែល​ស្ថិត​ក្នុង​ស្ថានភាព​ខ្លាច​ចិន តែងតែ​រត់​ទៅ​រក​សម្ពន្ធមិត្ត​យោធា​ជាមួយ​ប្រទេស​ក្នុង​តំបន់​ផង និង​ជាមួយ​ប្រទេស​ក្រៅ​តំបន់​ផង គឺ​មាន​ដូចជា​សហរដ្ឋ​អាមេរិក ជប៉ុន អង់គ្លេស អូស្ត្រាលី និង​ឥណ្ឌា ជាដើម។ តែ​សម្រាប់​ឥណ្ឌា បាន​សម្រេច​បញ្ជូន​រដ្ឋមន្ត្រី​ការពារ​ជាតិ លោក Rajnath Singh ទៅ​ប្រទេស​វៀតណាម ដោយ​បាន​ជួប​ផ្ទាល់​សមភាគី​វៀតណាម លោក Phan Van Giang កាលពី​ថ្ងៃទី​៨ ខែ​មិថុនា។

រដ្ឋមន្ត្រី​ការពារ​ជាតិ​ឥណ្ឌា លោក Rajnath Singh (ស្ដាំ) ទៅ​ប្រទេស​វៀតណាម ជួប​ផ្ទាល់​សមភាគី​វៀតណាម លោក Phan Van Giang កាលពី​ថ្ងៃទី​៨ ខែ​មិថុនា ឆ្នាំ​២០២២។

សមភាគី​ទាំង​ពីរ​បាន​ឈាន​ដល់​កិច្ចព្រមព្រៀង​ជា​ថ្មី​ទៀត ដោយ​ឯកភាព​ពង្រីក​កិច្ច​សហប្រតិបត្តិការ​លើ​វិស័យ​ការពារ​ជាតិ​រួម​ជាមួយ​គ្នា។

បើ​តាម​បណ្ដាញ​ផ្សាយ​ព័ត៌មាន​របស់​ប្រទេស​ឥណ្ឌា គឺ​សារព័ត៌មាន The Hindu ទស្សនកិច្ច​រយៈពេល ៣​ថ្ងៃ​ដោយ​ចាប់ផ្តើម​ពី​ថ្ងៃ​ទី​៧ ខែ​មិថុនា លោក Rajnath Singh ស្វែងរក​ការ​ពង្រឹង​កិច្ច​សហប្រតិបត្តិការ ក៏ដូចជា​ទំនាក់ទំនង​ទ្វេភាគី​ដែល​ឈាន​ចូល​ដល់​រយៈពេល ៥០​ឆ្នាំ។

ក្នុង​ដំណើរ​ទស្សនកិច្ច​នេះ រដ្ឋមន្ត្រី​ការពារ​ជាតិ​វៀតណាម លោក Phan Van Giang និង​សមភាគី​ឥណ្ឌា លោក Singh បាន​ចុះហត្ថលេខា​លើ​សេចក្តី​ថ្លែងការណ៍​ចក្ខុវិស័យ​រួម​សម្រាប់​ភាព​ជា​ដៃគូ​ការពារ​ជាតិ​ដល់​ឆ្នាំ​២០៣០។ តាម​សេចក្តី​ថ្លែងការណ៍​រួម​នេះ នឹង​ពង្រីក​ទំហំ​កិច្ច​សហប្រតិបត្តិការ​ការពារ​ជាតិ​រវាង​វៀតណាម និង​ឥណ្ឌា កាន់តែ​រឹងមាំ​ថែម​ទៀត។

សមភាគី​ឥណ្ឌា បាន​បញ្ជាក់​អំពី​កិច្ច​សហប្រតិបត្តិការ​ការពារ​ជាតិ​នៃ​ភាព​ជា​ដៃគូ​យុទ្ធសាស្ត្រ​គ្រប់​ជ្រុងជ្រោយ​រវាង​ប្រទេស​ទាំង​ពីរ ដោយ​លើកឡើង​ថា រដ្ឋាភិបាល​ក្រុង​ញូវដែលី ចាត់ទុក​ក្រុង​ហាណូយ ជា​ដៃគូ​ដ៏​សំខាន់​មួយ​នៃ​គោល​នយោបាយ​មក​កាន់​ដែនដី​អាស៊ី​អាគ្នេយ៍។ ចំណែក​សមភាគី​វៀតណាម វិញ បាន​គាំទ្រ​ឥណ្ឌា​ដែល​ជួយ​វៀតណាម​លើ​វិស័យ​ការពារ​ជាតិ។

លោក Phan Van Giang បាន​ហៅ​ទស្សនកិច្ច​របស់​រដ្ឋមន្ត្រី​ការពារ​ជាតិ​ឥណ្ឌា ថា​មាន​អត្ថន័យ​សំខាន់​ណាស់​សម្រាប់​វៀតណាម​នា​ពេលនេះ ដែល​កំពុង​ប្រឈម​នឹង​ស្ថានការណ៍​សន្តិសុខ​ក្នុង​តំបន់។

ជាមួយ​គ្នា​នេះ ទាំង​លោក Phan Van Giang និង​លោក Rajnath Singh យល់ស្រប​នឹង​គ្នា​ថា នយោបាយ និង​សន្តិសុខ​ពិភពលោក និង​តំបន់​អាស៊ី-ប៉ាស៊ីហ្វិក កំពុង​ប្រឈម​នូវ​ភាព​ផុយ​ស្រួយ​ជា​ខ្លាំង។ សមភាគី​ទាំង​ពីរ​បាន​សន្យា​ក្នុង​ការ​ថែរក្សា​សន្តិភាព ស្ថិរភាព សន្តិសុខ សុវត្ថិភាព និង​នាវាចរណ៍​នៅក្នុង​សមុទ្រ​ចិន​ខាងត្បូង ដែល​អនុលោម​ទៅ​តាម​ច្បាប់​អន្តរជាតិ។

ទស្សនកិច្ច​របស់​រដ្ឋមន្ត្រី​ការពារ​ជាតិ​ឥណ្ឌា នៅ​វៀតណាម ត្រូវ​បាន​មើល​ឃើញ​ថា ជា​ការ​ពង្រឹង​ទំនាក់ទំនង​ទ្វេភាគី​នៅក្នុង​តំបន់​អាស៊ីអាគ្នេយ៍ ខណៈ​ចិន​បង្កើន​ឥទ្ធិពល​របស់​ខ្លួន​យ៉ាង​ខ្លាំង​សឹង​គ្រប់​វិស័យ​ក្នុង​តំបន់ ជាពិសេស​ចិន​ពង្រីក​អនុត្តរភាព​ជា​ខ្លាំង​លើ​វិស័យ​យោធា រហូត​ត្រូវ​បាន​ចោទ​ថា​បាន​រំលោភ​បំពាន​ដែនទឹក​ប្រទេស​ក្នុង​តំបន់​ទៀត​ផង ក្នុង​នោះ​ដែនទឹក​វៀតណាម ហ្វីលីពីន និង​ម៉ាឡេស៊ី កំពុង​ប្រឈមមុខ​ខ្លាំង​ជាងគេ​ពី​សំណាក់​អនុត្តរភាព​របស់​ចិន៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស