 បណ្ដាលឱ្យរងរបួស ខណៈពួកគេបន្តចេញធ្វើកូដកម្មទាមទារឱ្យថៅកែក្រុមហ៊ុន និងស្ថាប័នពាក់ព័ន្ធដោះស្រាយវិវាទការងារជូនពួកគេនាល្ងាចថ្ងៃសុក្រនេះ។){kind=link}
អាជ្ញាធររាជធានីភ្នំពេញ បានប្រើអំពើហិង្សាលើស្ត្រីប្រមាណ ១០០នាក់ដែលជាកូដករក្រុមហ៊ុនណាហ្គាវើលដ៍ (Naga World) បណ្ដាលឱ្យរងរបួស ខណៈពួកគេបន្តចេញធ្វើកូដកម្មទាមទារឱ្យថៅកែក្រុមហ៊ុន និងស្ថាប័នពាក់ព័ន្ធដោះស្រាយវិវាទការងារជូនពួកគេនាល្ងាចថ្ងៃសុក្រនេះ។
ការចេញតវ៉ានេះ ត្រូវបានក្រុមសមត្ថកិច្ច និងសន្តិសុខជាច្រើននាក់បានដាក់របាំងរារាំង ដោយមិនឱ្យពួកគេទៅប្រមូលផ្ដុំនៅមុខក្រុមហ៊ុនណាហ្គាវើលដ៍។ ក្រៅពីរារាំង ក្រុមសន្តិសុខក៏បានប្រើប្រាស់អំពើហិង្សាលើក្រុមស្ត្រីដែលជាកូដករថែមទៀតផង។
បើតាមហ្វេសប៊ុកឈ្មោះ Kon Neang បានឡាយជាវីដេអូរៀបរាប់ថា អាជ្ញាធរឈ្មោះ ហោ នួន បានយកជើងធាក់ និងវាយទៅលើស្ត្រីជាកូដករបណ្ដាលឱ្យហូរឈាម ខណៈអ្នកខ្លះទៀតត្រូវបានអាជ្ញាធរវាយត្រូវមុខ និងដៃ ជាដើម។ កូដករបង្ហាញការសោកស្ដាយដែលក្រុមអាជ្ញាធរការពារថៅកែក្រុមហ៊ុនណាហ្គាវើលដ៍ ដោយមកប្រើប្រាស់អំពើហិង្សាលើពួកគាត់ជាស្ត្រីដូចសត្វ។
ក្រុមកូដករអះអាងថា ពួកគាត់មិនដែលមានវិវាទជាមួយអាជ្ញាធរទេ ហើយពួកគាត់ក៏មិនចង់ចេញធ្វើកូដកម្មរាល់ថ្ងៃដែរ ប៉ុន្តែដោយសារថៅកែក្រុមហ៊ុនមិនដោះស្រាយវិវាទការងារជូនពួកគាត់។
វិវាទការងារក្រុមហ៊ុនណាហ្គាវើលដ៍នេះ បានកើតឡើងអស់រយៈពេលជាង ១ឆ្នាំមកហើយ ក្រោយពេលដែលក្រុមហ៊ុននេះបានបញ្ឈប់បុគ្គលិកចំនួន ១៣២៩នាក់ក្នុងចំណោមបុគ្គលិកសរុបជាង ៨ពាន់នាក់ពីការងារ ក្រោមហេតុផលថា ជួបវិបត្តិហិរញ្ញវត្ថុដោយសារតែបញ្ហាជំងឺកូវីដ-១៩។
ក្រោយពីកូដករចេញធ្វើកូដកម្មរយៈពេលជាង ៦ខែមកនេះ គឺពុំមានដំណោះស្រាយនោះ ក្រុមកូដករបាននាំគ្នាបន្តការតវ៉ា និងស្វែងរកការអន្តរាគមន៍ពីស្ថាប័នពាក់ព័ន្ធនានា រួមទាំងលោក ហ៊ុន សែន ដើម្បីទាមទារឱ្យមានដំណោះស្រាយ។
នៅក្នុងឆ្នាំ២០១៩ ក្រុមហ៊ុនល្បែងស៊ីសងប្រចាំទីក្រុងភ្នំពេញមួយនេះ ក៏បានបង្ហាញរបាយការណ៍ប្រាក់ចំណេញរបស់ខ្លួនបន្ថែមទៀតថា ប្រាក់ចំណេញសរុបរបស់ក្រុមហ៊ុនបានកើនឡើងជិតដល់ ៣២១,២លានដុល្លារក្នុងរយៈពេល ៣ខែដំបូងក្នុងឆ្នាំ២០១៩ ដែលបានកើនឡើង ៣២% បើធៀបនឹងរយៈពេលដូចគ្នាកាលពីឆ្នាំ២០១៨។ ចំណែកនៅដើមឆ្នាំ២០២១ កន្លងទៅ ក្រុមហ៊ុននេះទទួលបានប្រាក់ចំណេញសុទ្ធចំនួនជាង ១២០លានដុល្លារផងដែរ៕