ក្រុមអ្នកឃ្លាំមើលនិយាយថា ដំណើរទស្សនកិច្ចរបស់ប្រធានសភាសហរដ្ឋអាមេរិក អ្នកស្រី Nancy Pelosi ទៅកាន់កោះតៃវ៉ាន់ គឺជាការបង្ហាញអំពីគោលជំហររបស់អាមេរិកក្នុងការរៀបចំសណ្ដាប់ធ្នាប់ពិភពលោកក្នុងបរិបទថ្មី និងជាការព្រមានដោយផ្ទាល់ទៅកាន់ប្រធានាធិបតីចិន លោក ស៊ី ជិនពីង។
អនុប្រធានវេទិកាពលរដ្ឋ លោក ម៉ែន ណាត ប្រាប់ The Cambodia Daily នៅថ្ងៃទី៣ សីហា នេះថា ដំណើរទស្សនកិច្ចរបស់ប្រធានសភាសហរដ្ឋអាមេរិក អ្នកស្រី Nancy Pelosi ទៅកាន់កោះតៃវ៉ាន់នេះ ក៏ជាការបញ្ជាក់ទៅកាន់ចិន ឱ្យកាន់តែច្បាស់ថា អាមេរិកមិនបោះបង់សម្ពន្ធមិត្តរបស់ខ្លួនក្រោមការគំរាមកំហែងណាមួយនោះឡើយ ហើយបញ្ហានេះក៏ជាមូលហេតុដ៏សំខាន់មួយសម្រាប់អាស៊ាន និងប្រទេសក្នុងតំបន់ឥណ្ឌូ-ប៉ាស៊ីហ្វិក រួមទាំងសហគមន៍អឺរ៉ុបផង ដើម្បីរឹតចំណងសម្ពន្ធមិត្តជាមួយអាមេរិកឱ្យកាន់តែខ្លាំងបន្ថែមទៀត ខណៈចិនបានត្រឹមតែដើរតួជាខ្លាក្រដាសតែប៉ុណ្ណោះ។
អនុប្រធានវេទិកាពលរដ្ឋរូបនេះលើកឡើងថា មហាអំណាចកុម្មុយនីស្តចិន នឹងមិនហ៊ានប្រកាសសង្គ្រាមជាមួយសហរដ្ឋអាមេរិកលើបញ្ហានេះទេ ព្រោះថាសង្គ្រាមនេះមិនមែនចិនតទល់ជាមួយអាមេរិកដោយផ្ទាល់នោះឡើយ ប៉ុន្តែចិននឹងត្រូវប្រឈមមុខមុនគេជាមួយនឹងតៃវ៉ាន់ ដូច្នេះប្រសិនបើចិនហ៊ានប្រកាសសង្គ្រាមនេះ គឺចិនមានតែខាតបង់ប៉ុណ្ណោះ ជាពិសេសគឺខាតសេដ្ឋកិច្ចរបស់ខ្លួនតែម្តង។
លោក ម៉ែន ណាត លើកឡើងថា នៅពេលដែលចិនដកខ្លួនថយមិនប្រកាសសង្គ្រាមជាមួយអាមេរិកដូចដែលខ្លួនបានគំរាមកាលពីពេលថ្មីៗនេះ គឺជាលទ្ធផលបង្ហាញឱ្យឃើញថា ចិននៅតែមានការកោតញញើតសហរដ្ឋអាមេរិកដដែល។ ដូច្នេះ វាជាសញ្ញាមួយប្រាប់ប្រទេសមួយចំនួនក្នុងតំបន់អាស៊ានឱ្យសម្រេចចិត្តកាន់តែច្បាស់ថា ពួកគេគួរតែនៅប្រកាន់ជំហរនៅរណបជាមួយចិន ឬគួរប្រកាន់ជំហរលទ្ធិប្រជាធិបតេយ្យតាមសហរដ្ឋអាមេរិក ខណៈចិនបានបាក់មុខចំពោះប្រទេសក្នុងតំបន់អាស៊ានអំពីការដកថយនៃការប្រកាសសង្គ្រាមជាមួយអាមេរិកនៅពេលនេះ។
កាលពីថ្ងៃទី២ ខែសីហា ឆ្នាំ២០២២ អ្នកនាំពាក្យក្រសួងការបរទេសចិន លោក Zhao Lijian បានព្រមានថា ការធ្វើដំណើររបស់អ្នកស្រី Nancy Pelosi នឹងមានផលប៉ះពាល់យ៉ាងធ្ងន់ធ្ងរដល់ទំនាក់ទំនងចិន-អាមេរិក ក្នុងនោះខ្លួនអាចនឹងឆ្លើយតបផ្នែកយោធា ប្រសិនបើប្រធានសភាអាមេរិករូបនេះធ្វើដំណើរទស្សនកិច្ចទៅកាន់កោះតៃវ៉ាន់មែននោះ។
អ្នកនាំពាក្យក្រសួងការបរទេសចិនរូបនេះបញ្ជាក់ថា ប្រសិនបើអាមេរិកទទូចចង់ដើរតាមផ្លូវខុស ចិននឹងចាត់វិធានការយ៉ាងម៉ឺងម៉ាត់ និងរឹងមាំជាទីបំផុត ដើម្បីការពារអធិបតេយ្យភាព និងបូរណភាពទឹកដីរបស់ខ្លួន ហើយផលវិបាកដែលកើតឡើងទាំងអស់ត្រូវទទួលខុសត្រូវដោយភាគីអាមេរិកទាំងស្រុង។
យ៉ាងណាក៏ដោយ ប្រធានសភាអាមេរិក អ្នកស្រី ណាន់ស៊ី ផេឡូស៊ី បានទៅដល់តៃវ៉ាន់នៅយប់ថ្ងៃទី២ ខែសីហា ដូចការគ្រោងទុក ប៉ុន្តែគេនៅមិនឃើញមហាអំណាចកុម្មុយនីស្តចិន ចេញមុខប្រកាសសង្គ្រាមដូចដែលខ្លួនបានអះអាងនៅឡើយទេ ក្រៅតែពីការរិះគន់ពីរដ្ឋមន្ត្រីការបរទេសចិន លោក វ៉ាង យី ដែលបានអះអាងថា ដំណើរទស្សនកិច្ចនេះ គឺជាការបំពានយ៉ាងធ្ងន់ធ្ងរលើអធិបតេយ្យភាពចិន ដែលជាការបង្កហេតុនយោបាយដោយចំហរបស់អាមេរិក។
ជុំវិញបញ្ហានេះ ចិនបានប្រកាសភ្លាមៗក្រោយពីការមកដល់របស់ប្រធានរដ្ឋសភាអាមេរិក អ្នកស្រី Nancy Pelosi លើកោះតៃវ៉ាន់ ថាខ្លួននឹងធ្វើសមយុទ្ធយោធាចាប់ពីថ្ងៃព្រហស្បតិ៍ រហូតដល់ថ្ងៃអាទិត្យ ចុងសប្តាហ៍នេះ ក្នុងដែនទឹកទាំង៦ ដែលនៅជុំវិញកោះតៃវ៉ាន់ ខណៈក្រសួងការពារជាតិតៃវ៉ាន់ រិះគន់ថា សមយុទ្ធយោធារបស់ចិន បានបំពានច្បាប់របស់អង្គការសហប្រជាជាតិ (UN) យ៉ាងធ្ងន់ធ្ងរ។
នៅថ្ងៃទី៣ ខែសីហា ឆ្នាំ២០២២ នេះ ទីភ្នាក់ងារសារព័ត៌មាន Reuters បានចុះផ្សាយថា ប្រធានរដ្ឋសភាសហរដ្ឋអាមេរិក អ្នកស្រី ណាន់ស៊ី ផេឡូស៊ី បានចាកចេញពីកោះតៃវ៉ាន់ហើយក្រោយពីបានជួបជាមួយប្រធានាធិបតីនៃកោះតៃវ៉ាន់ អ្នកស្រី សាយ អ៊ឹងវិន។ អ្នកស្រី Nancy Pelosi បញ្ជាក់យ៉ាងច្បាស់ថា សហរដ្ឋអាមេរិកនឹងមិនបោះបង់ចោលតៃវ៉ាន់ជាដាច់ខាត៕