30 C
Phnom Penh

មហា​អំណាច​កុម្មុយនីស្ត​ចិន​ប្រកាស​គាំទ្រ​លោក ហ៊ុន ម៉ាណែត ជា​អ្នក​បន្ត​វេន​របស់​កម្ពុជា

ដោយ ឌឹ ខេមបូឌា ដេលី

បទវិភាគ

មហាអំណាច​កុម្មុយនីស្ត​ចិន ប្រកាស​គាំទ្រ​កូនប្រុស​ច្បង​របស់​លោក ហ៊ុន សែន គឺ​លោក ហ៊ុន ម៉ាណែត ពេញ​ទំហឹង​ឱ្យ​ធ្វើ​ជា​អ្នក​បន្ត​វេន​របស់​កម្ពុជា ដោយសារ​មាន​ភាព​ចាស់ទុំ និង​មាន​ចក្ខុវិស័យ​វែង​ឆ្ងាយ​សម្រាប់​កម្ពុជា​ទៅ​ថ្ងៃ​អនាគត។

ទីប្រឹក្សា​រដ្ឋ និង​ជា​រដ្ឋមន្ត្រី​ការបរទេស​ចិន លោក វ៉ាង យី បាន​លើកឡើង​ក្នុង​ជំនួប​ពិភាក្សា​ជាមួយ​ប្រមុខ​រដ្ឋាភិបាល​កម្ពុជា លោក ហ៊ុន សែន កាលពី​ថ្ងៃទី​០៣ ខែ​សីហា ឆ្នាំ​២០២២ ក្នុង​អំឡុង​ដំណើរ​ទស្សនកិច្ច​របស់​ខ្លួន​ដែល​នឹង​ចូលរួម​ប្រជុំ​រដ្ឋមន្ត្រី​ការបរទេស​អាស៊ាន​លើក​ទី​៥៥ នេះ​ថា រដ្ឋាភិបាល​ចិន​បាន​ចាត់ទុក​លោក ហ៊ុន ម៉ាណែត ជា​អ្នក​បន្ត​វេន​ដែល​មាន​ភាព​ចាស់ទុំ និង​មាន​ចក្ខុវិស័យ​វែង​ឆ្ងាយ​សម្រាប់​កម្ពុជា​ទៅ​ថ្ងៃ​អនាគត។

លោក វ៉ាង យី អះអាង​ថា គោល​ជំហរ​របស់​រដ្ឋាភិបាល​ចិន គឺ​នៅតែ​បន្ត​គាំទ្រ​យ៉ាង​រឹងមាំ​ចំពោះ​នយោបាយ​ផ្ទៃក្នុង និង​បន្ទាត់​នយោបាយ​ការបរទេស​របស់​កម្ពុជា ហើយ​បន្ត​គាំទ្រ​យ៉ាង​ម៉ឺងម៉ាត់​ចំពោះ​ចក្ខុវិស័យ​ដ៏​យូរ​អង្វែង​របស់​កម្ពុជា ក្រោម​ការ​ដឹកនាំ​របស់​លោក ហ៊ុន សែន ជាពិសេស​លើ​ការ​ការពារ​អធិបតេយ្យភាព​ជាតិ និង​ឯករាជ្យ​របស់​កម្ពុជា​តែម្តង។

រដ្ឋមន្ត្រី​ការបរទេស​ចិន​រូប​នេះ​បញ្ជាក់​ថា ដោយសារតែ​កម្ពុជា​មាន​ទំនាក់ទំនង​ជា​ដៃគូ​យុទ្ធសាស្ត្រ​គ្រប់​ជ្រុងជ្រោយ និង​មាន​នយោបាយ​ជោគវាសនា​រួម​គ្នា​ជាមួយ​ចិន បាន​ធ្វើ​ឱ្យ​ទំនាក់ទំនង និង​កិច្ច​សហប្រតិបត្តិការ​កម្ពុជា-ចិន នៅតែ​រឹងមាំ ទោះបីជា​ប្រឈម​នឹង​ភាព​មិន​ច្បាស់លាស់ និង​ការ​វិវឌ្ឍ​យ៉ាង​ស្រួចស្រាល់​ចំពោះ​ស្ថានការណ៍​តំបន់ និង​ពិភពលោក​នៅ​ពេលនេះ​ក៏ដោយ។

ការ​អះអាង​នេះ ធ្វើឡើង​ស្រប​ពេល​ដែល​គេ​មើល​ឃើញ​ថា ចិន​តែងតែ​អូស​ទាញ​កម្ពុជា​គ្រប់​រូបភាព​ដើម្បី​ឱ្យ​កម្ពុជា​រក្សា​សម្ពន្ធមិត្ត​ជាមួយ​ខ្លួន ជាជាង​ការ​ចង​សម្ពន្ធមិត្ត​ជាមួយ​អាមេរិក និង​ស្រប​ពេល​ដែល​ចិន​កំពុង​មាន​ភាព​តានតឹង​លើ​នយោបាយ​ការទូត​របស់​ខ្លួន​ជាមួយ​អាមេរិក​នៅ​ពេលនេះ​ទៅ​ហើយ​នោះ។

ប្រធាន​វេទិកា​ពលរដ្ឋ លោក គឹម សុខ ប្រាប់ The Cambodia Daily នៅ​ថ្ងៃទី​៤ សីហា នេះ​ថា ការ​ប្រកាស​គាំទ្រ​លោក ហ៊ុន ម៉ាណែត ជា​អ្នក​បន្ត​វេន​របស់​រដ្ឋមន្ត្រី​ក្រសួង​ការបរទេស​ចិន គឺ​គ្រាន់តែ​ជា​ការ​ប្រើ​ល្បិចកល​ដើម្បី​ជំរុញ​ឱ្យ​មេដឹកនាំ​ខ្មែរ លោក ហ៊ុន សែន ជួយ​ទប់ទល់​នឹង​ជំហរ​ទាមទារ​នានា​របស់​សហរដ្ឋ​អាមេរិក​នូវ​លក្ខខណ្ឌ​មួយ​ចំនួន ដែល​ធ្វើ​ឱ្យ​ចិន​អស់​ឥទ្ធិពល​លើ​កម្ពុជា​ទៅ​ថ្ងៃ​ក្រោយ​ប៉ុណ្ណោះ។

លោក គឹម សុខ លើកឡើង​ថា ការ​ចេញ​សេចក្តី​ប្រកាស​ព័ត៌មាន​របស់​ក្រសួង​ការបរទេស​អាមេរិក ទាមទារ​ឲ្យ​រដ្ឋាភិបាល​លោក ហ៊ុន សែន ជម្រះ​មន្ទិល​អំពី​វត្តមាន​កងទ័ព​ចិន​នៅ​មូលដ្ឋាន​យោធា​រាម រួម​ទាំង​ការ​ស្ដារ​ប្រជាធិបតេយ្យ និង​ការ​គោរព​សិទ្ធិមនុស្ស គឺជា​វិធី​គន្លឹះ​ដ៏​សំខាន់​ដែល​ចិន​បារម្ភ​បំផុត ព្រោះ​ចិន​ដឹង​ថា ចិន​នឹង​អស់​ឥទ្ធិពល​លើ​កម្ពុជា បើ​រឿង​ទាំង​ពីរ​នេះ​ត្រូវ​ដោះស្រាយ​ឲ្យ​ប្រសើរ​ឡើងវិញ​នោះ។

លោក​បន្ត​ថា ការ​ទាមទារ​របស់​អាមេរិក​ម្តង​នេះ គឺ​ស្ទើរតែ​ជា​ការ​ព្យាយាម​ចុងក្រោយ​ហើយ​ក្នុង​កិច្ច​ខិតខំ​ប្រឹងប្រែង​ធ្វើ​ឲ្យ​ប្រសើរ​ឡើងវិញ​នៃ​ទំនាក់ទំនង​កម្ពុជា-អាមេរិក។ ចំណែក​ចិន​បារម្ភ​ថា លោក ហ៊ុន សែន អាច​បង្ហាញ​ជំហរ​ឃ្លីងឃ្លោង​រវាង​អាមេរិក និង​ចិន ដូច្នេះ​មាន​តែ​ប្រកាស​គាំទ្រ​ឱ្យ​ចំ​គោលដៅ​ផ្ទេរ​អំណាច​របស់​លោក ហ៊ុន សែន។

កាលពី​ដើម​ខែ​ធ្នូ ឆ្នាំ​២០២១ បុរស​ខ្លាំង​ក្រាញ​អំណាច​ត​ត្រកូល លោក ហ៊ុន សែន បាន​ប្រកាស​ជា​សាធារណៈ​ថា លោក​នឹង​គាំទ្រ​កូនប្រុស​ច្បង​របស់​លោក គឺ​លោក ហ៊ុន ម៉ាណែត ជា​បេក្ខភាព​នាយករដ្ឋមន្ត្រី​ទៅ​ថ្ងៃ​មុខ ក្នុង​នោះ​ក៏​បាន​ដាក់​ឱ្យ​សម្រេច​ពី​សន្និបាត​បក្ស​កាន់​អំណាច​ឱ្យ​ជ្រើសរើស​លោក ហ៊ុន ម៉ាណែត ជា​បេក្ខជន​នាយករដ្ឋមន្ត្រី​នា​ពេល​អនាគត​កាលពី​ចុង​ខែ​ធ្នូ ឆ្នាំ​២០២១ ផង​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស