ចិនដែលជាមហាអំណាចអាស៊ីនៅពេលនេះ កំពុងបង្ហាញកម្លាំងទ័ពដ៏ក្ដៅគគុកដោយធ្វើសមយុទ្ធបាញ់គ្រាប់ពិតៗ ហើយឡោមព័ទ្ធកោះតៃវ៉ាន់ ដែលនាំឱ្យតៃវ៉ាន់ប្រកាសឱ្យទ័ពប្រមូលផ្ដុំគ្នា ហើយចាកចេញពីបន្ទាយទៅកាន់ទីតាំងដំឡើងកាំភ្លើង។
បើតាមការផ្សព្វផ្សាយរបស់ទូរទស្សន៍ CCTV របស់ចិន ឲ្យដឹងថា ការធ្វើសមយុទ្ធទ្រង់ទ្រាយធំរបស់កងទ័ពចិន ក៏បានបាញ់មីស៊ីលជាច្រើនគ្រាប់ធ្លាក់នៅក្បែរកោះតៃវ៉ាន់ ហើយយ៉ាងតិចមីស៊ីល ១១គ្រាប់បានហោះរំលងដែនកោះនេះដោយធ្លាក់ទៅក្នុងសមុទ្រចិនខាងកើត។
ការធ្វើសមយុទ្ធរបស់កងទ័ពរំដោះប្រជាជនចិន ដែលឡោមព័ទ្ធកោះតៃវ៉ាន់ គឺពិតណាស់ពាក់ព័ន្ធនឹងដំណើរទស្សនកិច្ចដ៏កម្ររបស់ប្រធានរដ្ឋសភា អ្នកស្រី ណាន់ស៊ី ប៉េឡូស៊ី ដែលបានដឹកនាំប្រតិភូសភាសហរដ្ឋអាមេរិកទៅកាន់កោះតៃវ៉ាន់ កាលពីថ្ងៃទី២ សីហា ដែលក្រុងប៉េកាំងចាត់ទុកក្រុងវ៉ាស៊ីនតោន ជាអ្នករំលោភធ្ងន់ធ្ងរដល់ដែនអធិបតេយ្យរបស់ចិន ព្រោះតៃវ៉ាន់ គឺជាខេត្តមួយរបស់ចិន។
ដោយបង្ហាញការឈឺចាប់ដូចនេះ គេសង្កេតឃើញរដ្ឋមន្ត្រីចិនសឹងតែគ្រប់ក្រសួងបានចេញសេចក្ដីថ្លែងការណ៍យ៉ាងព្រោងព្រាត ថ្កោលទោសអ្នកស្រី ប៉េឡូស៊ី និងថ្កោលទោសរដ្ឋាភិបាលតៃវ៉ាន់ ដែលស្ថិតនៅក្រោមការដឹកនាំរបស់អ្នកស្រី សាយ អ៊ឹងវិន ដែលបានទទួលស្វាគមន៍យ៉ាងរាក់ទាក់ប្រតិភូសភារបស់អ្នកស្រី ប៉េឡូស៊ី។
គ្រប់ស្ថាប័ន និងមន្ត្រីរបស់ចិន ចេញមុខផ្ញើសារធ្ងន់ៗមានរូបភាពជាការតវ៉ា ជាការព្រមាន ជាការក្រើនរំឭកដល់សហរដ្ឋអាមេរិកឲ្យព្យាយាមគោរពគោលនយោបាយចិនតែមួយ។
ក្រសួងការបរទេសចិន នៅថ្ងៃទី៤ ខែសីហា បានចេញសេចក្ដីថ្លែងការណ៍ថា លោកស្រី Pelosi ប្រធានសភាតំណាងរាស្ត្រអាមេរិកបានទៅបំពេញទស្សនកិច្ចនៅតំបន់តៃវ៉ាន់របស់ចិន ដោយមិនអើពើនឹងការប្រឆាំងយ៉ាងខ្លាំងក្លា និងការតវ៉ាយ៉ាងម៉ឺងម៉ាត់របស់ភាគីចិន គឺជាការល្មើសយ៉ាងធ្ងន់ធ្ងរនូវគោលការណ៍ចិនតែមួយ និងការកំណត់នៃសេចក្តីប្រកាសរួមទាំង៣ រវាងចិន និងអាមេរិក។ ក្រសួងការបរទេសចិនបន្តថា តាមរយៈទស្សនកិច្ចរបស់អ្នកស្រី ប៉េឡូស៊ី គឺជាការវាយប្រហារយ៉ាងធ្ងន់ធ្ងរចំពោះមូលដ្ឋាននយោបាយនៃទំនាក់ទំនងរវាងចិន និងអាមេរិក។
សេចក្ដីថ្លែងការណ៍បន្តថា អាមេរិកបានបំពានយ៉ាងធ្ងន់ធ្ងរលើអធិបតេយ្យភាព និងបូរណភាពទឹកដីរបស់ចិន ហើយជាការបំផ្លាញយ៉ាងធ្ងន់ធ្ងរចំពោះសន្តិភាព និងស្ថិរភាពក្នុងតំបន់ច្រកសមុទ្រតៃវ៉ាន់ ដែលជាការបញ្ចេញសញ្ញាខុសដ៏ធ្ងន់ធ្ងរដល់កម្លាំងអបគមន៍ដែលប៉ុនប៉ងចង់ឱ្យតៃវ៉ាន់ឯករាជ្យ ហើយថានៅលើពិភពលោកនេះមានប្រទេសចិនតែមួយប៉ុណ្ណោះ។ ចំពោះតៃវ៉ាន់ គឺជាចំណែកមួយរបស់ទឹកដីចិន ដែលមិនអាចបំបែកបានឡើយ។
ក្រសួងការបរទេសចិន បានបញ្ជាក់ថា សេចក្តីសម្រេចលេខ២៧៥៨ នៃមហាសន្និបាតអង្គការសហប្រជាជាតិក្នុងឆ្នាំ១៩៧១ បានទទួលស្គាល់ចិនជាប្រទេសមានដីរហូតដល់កោះតៃវ៉ាន់។ បើដូចនេះ ប្រទេសចិនសូមបន្តដាស់តឿនយ៉ាងម៉ឺងម៉ាត់ឱ្យភាគីអាមេរិក ឈប់លេង «សន្លឹកបៀតៃវ៉ាន់» ដែល «ប្រើតៃវ៉ាន់ជាកូនអុកប្រឆាំងចិន ប្រទេសចិន» និងត្រូវបញ្ឈប់លូកដៃក្នុងកិច្ចការចិន និងតៃវ៉ាន់ ហើយអាមេរិកត្រូវអនុវត្តនូវគោលការណ៍ចិនតែមួយ។
ឥឡូវនេះ បើតាមការផ្សព្វផ្សាយរបស់ទូរទស្សន៍ CCTV ចិនបើកការធ្វើសមយុទ្ធយោធាព័ទ្ធជុំវិញកោះតៃវ៉ាន់ទៅហើយ។
ទូរទស្សន៍រដ្ឋ CCTV បានឲ្យដឹងថា ចាប់ពីម៉ោង ១២ថ្ងៃត្រង់នេះដល់ម៉ោង ១២អាធ្រាត្រ នៅថ្ងៃទី៧ ខែសីហា កងទ័ពរំដោះប្រជាជនចិន នឹងធ្វើសមយុទ្ធយោធាដ៏សំខាន់មួយ ក្នុងនោះរួមទាំងសមយុទ្ធបាញ់គ្រាប់ពិត ហើយអំឡុងនៃការធ្វើសមយុទ្ធប្រយុទ្ធនេះ គឺតំបន់សំខាន់ៗចំនួន៦ នៅជុំវិញកោះត្រូវបានជ្រើសរើសក្នុងការឡោមព័ទ្ធ ហើយនាវា និងយន្តហោះស៊ីវិលទាំងអស់ ត្រូវបានព្រមានមិនឱ្យចូលទៅក្បែរតំបន់ដែនទឹក និងដែនអាកាសនៃច្រកសមុទ្រតៃវ៉ាន់។
តំបន់ដែលបានកំណត់អត្តសញ្ញាណចំនួន៦ នៅជុំវិញកោះតៃវ៉ាន់នេះ ក៏មានមួយចំនួនក៏នៅជិតកំពង់ផែសំខាន់ៗផងដែរ ខណៈអាជ្ញាធរតៃវ៉ាន់បានចោទប្រកាន់កងទ័ពរំដោះប្រជាជនចិន ថាបានធ្វើការបិទផ្លូវឆ្លងកាត់អន្តរជាតិ។
តែទន្ទឹមគ្នានេះ កងទ័ពជើងទឹកអាមេរិក បានឱ្យដឹងនៅថ្ងៃព្រហស្បតិ៍នេះថា នាវាផ្ទុកយន្តហោះចម្បាំង USS Ronald Reagan កំពុងធ្វើប្រតិបត្តិការតាមការគ្រោងទុកនៅលើផ្ទៃសមុទ្រហ្វីលីពីន ដែលស្ថិតក្នុងតំបន់ភាគខាងលិចនៃមហាសមុទ្រប៉ាស៊ីហ្វិក ដើម្បីតាមឃ្លាំមើលការធ្វើសមយុទ្ធរបស់ចិន។
អ្នកនាំពាក្យនៃកងនាវាទី៧ របស់ទ័ពជើងទឹកអាមេរិក បានឱ្យដឹងថា នាវាផ្ទុកយន្តហោះចម្បាំងនេះហើយដែលសហរដ្ឋអាមេរិកបានចល័តទៅក្បែរកោះតៃវ៉ាន់ កាលពីថ្ងៃអង្គារ សប្តាហ៍នេះ នៅពេលប្រធានរដ្ឋសភាសហរដ្ឋអាមេរិក អ្នកស្រី ណាន់ស៊ី ប៉េឡូស៊ី បានធ្វើដំណើរទៅបំពេញទស្សនកិច្ចនៅទីក្រុងតៃប៉ិ កាលពីថ្ងៃទី២ ខែសីហា នៅចំពោះមុខការព្រមានយ៉ាងធ្ងន់ធ្ងរពីទីក្រុងប៉េកាំង៕