30 C
Phnom Penh

មន្ត្រី​ជាន់ខ្ពស់​កម្ពុជា​ថា​អ្នក​ខាតបង់​ធ្ងន់ធ្ងរ​គឺជា​ចិន​បើ​សង្គ្រាម​ផ្ទុះ​ឡើង​នៅ​តៃវ៉ាន់

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​កម្ពុជា អះអាង​ថា មហាអំណាច​កុម្មុយនីស្ត​ចិន មិន​អាច​គ្រប់គ្រង​កោះ​តៃវ៉ាន់​ដោយ​ការ​បំផ្ទុះ​សង្គ្រាម​បាន​ឡើយ ព្រោះ​ថា​បើ​សង្គ្រាម​ផ្ទុះ​ឡើង អ្នក​ខាតបង់​ធ្ងន់ធ្ងរ​គឺជា​ចិន ហើយ​ចិន​ក៏​មិន​អាច​ធ្វើ​ជា​មហាអំណាច​សេដ្ឋកិច្ច​របស់​ពិភពលោក​នៅ​ថ្ងៃ​អនាគត​តាម​បំណង​របស់​ខ្លួន​បាន​នោះ​ទេ។

ប្រធាន​រាជបណ្ឌិត្យសភា​កម្ពុជា បណ្ឌិត សុខ ទូច បាន​បង្ហោះ​វីដេអូ​លើ​គណនី​ហ្វេសប៊ុក​របស់​លោក​កាលពី​ថ្ងៃទី​៤ ខែ​សីហា ឆ្នាំ​២០២២ នេះ​ថា ចិន​មិន​ដែល​ប្រកាស​ធ្វើ​សង្គ្រាម​ដោយ​ចំ​មុខ​នោះ​ទេ តែ​ចិន​ចូលចិត្ត​នៅ​ពីក្រោយ​គ្រប់​សង្គ្រាម​ទាំងអស់ ព្រោះ​ថា​ចិន​មាន​ផែនការ​រក្សា​ទុក​លុយ ជាជាង​ប្រើ​លើ​សង្គ្រាម។ ដូច្នេះ​ហើយ បាន​ជា​ចិន​ប្រើ​យុទ្ធសាស្ត្រ​កៀងគរ​សេដ្ឋកិច្ច​គ្រប់​បែប​យ៉ាង ដើម្បី​ប្រមូល​លុយ ដូចជា​ការ​ជីក​រ៉ែ និង​ការ​បង្កើត​សេដ្ឋកិច្ច​តាម​បណ្តា​ប្រទេស​នានា គ្រប់​រូបភាព ដើម្បី​កសាង​សេដ្ឋកិច្ច​របស់​ខ្លួន​ឱ្យ​កាន់តែ​រឹងមាំ​ទៅ​ថ្ងៃ​ក្រោយ។

បណ្ឌិត សុខ ទូច លើកឡើង​ថា ដើម្បី​ជំហរ​រឹងមាំ​លើ​សេដ្ឋកិច្ច​របស់​ខ្លួន ចិន​ព្យាយាម​ចងមិត្ត​ជាច្រើន​ចូល​ក្នុង​តំបន់​អាស៊ាន ក្នុង​នោះ ចិន​បាន​ប្រើ​គោលជំហរ​មួយ គឺ​គ្មាន​មិត្ត គ្មាន​សត្រូវ តែ​ត្រូវ​គិត​លើ​ផល​ប្រយោជន៍។ ដូច្នេះ ប្រទេស​ដែល​អាច​ផ្តល់​ផលប្រយោជន៍​ឱ្យ​ចិន ពួកគេ​នឹង​បង្កើត​ជា​មិត្តភាព​ភ្លាមៗ ក្នុង​នោះ ចិន​អាច​ទម្លាក់​កម្ចី​គ្រប់​បែប​យ៉ាង ទោះ​ប្រទេស​ដែល​ខ្ចី​លុយ​ទាំងនោះ​យក​ទៅ​ប្រើប្រាស់​ដោយ​គ្មាន​តម្លាភាព ឬ​មិន​គោរព​តាម​គោលការណ៍​សិទ្ធិមនុស្ស​ក៏ដោយ។ ដែល​ត្រង់​ចំណុច​នេះ គឺ​ខុស​គ្នា​ទៅ​នឹង​សហរដ្ឋ​អាមេរិក​ទាំងស្រុង ដែល​អាមេរិក​តែង​តម្រូវ​ឱ្យ​ប្រទេស​ដែល​ជា​កូនបំណុល​យកចិត្ត​ទុកដាក់​លើ​សិទ្ធិមនុស្ស ប្រជាធិបតេយ្យ និង​តម្លាភាព​របស់​ខ្លួន។

ប្រធាន​រាជបណ្ឌិត្យសភា​កម្ពុជា​រូប​នេះ​បញ្ជាក់​ថា ដោយសារតែ​ចិន​ប្រើ​គោលការណ៍​បែប​នេះ​ហើយ ទើប​ចិន​អាច​ចងមិត្ត​ជាមួយ​បណ្តា​ប្រទេស​មួយ​ចំនួន​ក្នុង​តំបន់​អាស៊ាន​ជា​បន្តបន្ទាប់​សព្វថ្ងៃ​នេះ ប៉ុន្តែ​បើ​ចិន​ហ៊ាន​បំផ្ទុះ​សង្គ្រាម​ជាមួយ​អាមេរិក នោះ​ប្រទេស​ក្នុង​តំបន់​អាស៊ាន​នឹង​ងាក​ទៅ​ចង​សម្ពន្ធមិត្ត​ជាមួយ​អាមេរិក​វិញ​ជាមិនខាន ហើយ​បញ្ហា​នេះ នឹង​ធ្វើ​ឱ្យ​ចិន​ខាត​ទាំង​លុយ បាត់បង់​ទាំង​មិត្ត ហើយ​ជាង​នេះ​ទៀត សង្គ្រាម​នេះ​មិន​មែន​ផ្ទុះ​លើ​ទឹកដី​អាមេរិក​នោះ​ទេ គឺ​ផ្ទុះ​នៅ​លើ​ទឹកដី​ចិន​ខ្លួនឯង​ផ្ទាល់​តែម្តង។

បណ្ឌិត សុខ ទូច គូស​បញ្ជាក់​ថា ដំណើរ​ទស្សនកិច្ច​របស់​ប្រធាន​សភា​សហរដ្ឋ​អាមេរិក អ្នកស្រី Nancy Pelosi ទៅកាន់​កោះ​តៃវ៉ាន់​នៅ​ពេលនេះ គឺ​បាន​បញ្ជាក់​ទៅ​កាន់​ពិភពលោក​ថា អាមេរិក​មិន​ញញើត​នឹង​ការពារ​សម្ពន្ធមិត្ត​របស់​ខ្លួន​នោះ​ឡើយ ហើយ​ប្រសិនបើ​សង្គ្រាម​នៅ​តៃវ៉ាន់​នេះ​ពិត​ជា​ផ្ទុះ​ឡើង​ដោយ​ការ​ប្រឈមមុខ​ដាក់​គ្នា​ជាមួយ​ចិន​ដោយសារតែ​បញ្ហា​នេះ ចិន​នឹង​ធ្លាក់​ខ្លួន​ចូល​ក្នុង​សង្គ្រាម​ដែល​នឹង​ប្រឈមមុខ​ជាមួយ​សម្ពន្ធមិត្ត​របស់​អាមេរិក​ជាច្រើន ដូចជា​ជប៉ុន តៃវ៉ាន់ និង​កូរ៉េ​ខាងត្បូង ជាដើម ស្របពេល​ដែល​ចិន​មិន​ដែល​បាន​ធ្វើ​សង្គ្រាម​ទាល់តែសោះ​ក្នុង​រយៈពេល​ជាង ៧០​ឆ្នាំ​មក​នេះ​ចាប់តាំងពី​ឆ្នាំ​១៩៤៩ មក។

កាលពី​ថ្ងៃទី​២ ខែ​សីហា ឆ្នាំ​២០២២ ប្រធាន​សភា​អាមេរិក អ្នកស្រី Nancy Pelosi បាន​ធ្វើ​ដំណើរ​ទស្សនកិច្ច​ទៅកាន់​កោះ​តៃវ៉ាន់​ដូច​ដែល​បាន​គ្រោងទុក បើ​ទោះបីជា​ចិន​គំរាម​ពី​ដំណើរ​ទស្សនកិច្ច​នេះ​តាម​ផ្នែក​យោធា​ក៏ដោយ។

លោក អែនតូនី ប្លីងខិន (Antony Blinken) រដ្ឋមន្ត្រី​ការបរទេស​អាមេរិក ថ្លែង​ក្នុង​សន្និសីទ​សារព័ត៌មាន​នៅ​ក្រុង​ភ្នំពេញ នា​ថ្ងៃទី​៥ ខែ​សីហា ថ្លែង​ថា រវាង​ចិន និង​តៃវ៉ាន់ គួរតែ​ដោះស្រាយ​ដោយ​សន្តិវិធី ប៉ុន្តែ​មិន​មែន​ដោយ​ការ​គំរាម ឬ​ដោយ​កម្លាំង​យោធា​ឡើយ។ លោក​ថា អ្វី​ដែល​អាមេរិក​ឃើញ​ក្នុង​ប៉ុន្មាន​ឆ្នាំ​ចុងក្រោយ គឺ​ចិន​កំពុង​ស្ថិត​លើ​ចំណាត់ការ​ប្រើប្រាស់​កម្លាំង ដើម្បី​វាយ​សង្គ្រុប​តៃវ៉ាន់។

លោក ប្លីងខិន បាន​បន្ត​ថា អ្វី​ដែល​អាមេរិក​មិន​ចង់​បាន គឺ​ការ​បង្អាក់ សន្តិភាព និង​សន្តិសុខ​អន្តរជាតិ ដោយសារ​វា​មាន​ភាព​គ្រោះថ្នាក់ និង​បំពាន​គោលការណ៍​នៃ​មូលដ្ឋាន​ទំនាក់ទំនង​រវាង​ប្រទេស និង​ប្រទេស ក្នុង​នោះ​រួម​មាន​អធិបតេយ្យភាព បូរណភាព​ដែនដី និង​ឯករាជ្យ។

ទាក់ទិន​នឹង​បញ្ហា​នេះ ទីភ្នាក់ងារ​សារព័ត៌មាន Reuters បាន​ចុះផ្សាយ​នៅ​ថ្ងៃទី​៥ ខែ​សីហា ឆ្នាំ​២០២២ នេះ​ថា នៅ​ថ្ងៃ​សុក្រ នេះ ជប៉ុន និង​សហរដ្ឋ​អាមេរិក​បាន​ព្រមព្រៀង​ធ្វើការ​ជាមួយ​គ្នា​លើ​ការ​រក្សា​សន្តិភាព ស្ថិរភាព​នៅ​ក្នុង​តំបន់​ច្រក​សមុទ្រ​តៃវ៉ាន់ ដែល​កំពុង​មាន​ភាព​តានតឹង​កាន់តែ​ខ្លាំង​ឡើង​នៅ​ពេលនេះ​ផង​ដែរ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស