25 C
Phnom Penh

លោក ហ៊ុន ម៉ាណែត ច្រានចោល​ការ​ចោទ​ថា​លោក​នៅ​ពីក្រោយ​លោក ឡេង ណាវ៉ាត្រា ក្នុង​ការ​ដោះដូរ​ដី​ភ្នំ​តាម៉ៅ

ដោយ ឌឹ ខេមបូឌា ដេលី

បទវិភាគ

កូនប្រុស​ច្បង​របស់​លោក ហ៊ុន សែន គឺ​ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការ​រង​កង​យោធពល​ខេមរភូមិន្ទ និង​ជា​មេបញ្ជាការ​កងទ័ព​ជើងគោក បាន​ច្រានចោល​ការ​ចោទប្រកាន់​ថា ខ្លួន​នៅ​ពីក្រោយ​ឧកញ៉ា ឡេង ណាវ៉ាត្រា ដែល​ត្រូវ​ជា​ក្មួយ​ប្រសា​របស់​លោក ហ៊ីង ប៊ុនហៀង ដែល​ជា​មេ​អង្គរក្ស​លោក ហ៊ុន សែន ក្នុង​គម្រោង​ដោះដូរ​ដី​ភ្នំ​តាម៉ៅ។

ការ​ចេញ​បកស្រាយ​របស់​លោក ហ៊ុន ម៉ាណែត បន្ទាប់ពី​ស្ថាបនិក​អង្គការ​មាតា​ធម្មជាតិ លោក អាឡិច បាន​លើកឡើង​ក្នុង​បទសម្ភាសន៍​ជាមួយ​សារព័ត៌មាន​មួយ​កាលពី​ពេល​ថ្មីៗ​នេះ​ថា លោក ហ៊ុន ម៉ាណ៉ែត ជា​អ្នក​នៅ​ពីក្រោយ​ឧកញ៉ា ឡេង ណាវ៉ាត្រា ក្នុង​ការ​ដោះដូរ និង​ឈូស​ឆាយ​ដី​ព្រៃ​ភ្នំ​តាម៉ៅ ជិត ៦០០​ហិកតារ ក្រោយពី​ទទួល​បាន​ដី​ព្រៃ​ចំនួន ១៥០០​ហិកតារ​ដើម្បី​ធ្វើការ​អភិវឌ្ឍ។

លោក ហ៊ុន ម៉ាណែត ចាត់ទុក​ការ​ចោទប្រកាន់​នោះ​ថា​ជា​ចេតនា​ទុច្ចរិត​ក្នុង​គោលបំណង​កេង​ចំណេញ​នយោបាយ ទើប​បង្កើត និង​ប្រឌិត​រឿង​ដើម្បី​វាយប្រហារ​រូបលោក​ដោយ​គ្មាន​ភស្តុតាង ឬ​មួយ​ដឹង​ហើយ ប៉ុន្តែ​ធ្វើ​ភ្លើ​ទៅវិញ។ លោក​បន្ត​ថា លោក ឡេង ណាវ៉ាត្រា មាន​ទ្រព្យ​សម្បត្តិ និង​ក្លាយ​ជា​ឧកញ៉ា​ដោយសារ​ការ​រកស៊ី​ចំណេញ​ដីធ្លី បន្ទាប់ពី​ធ្វើជា​ពលករ​នៅ​ប្រទេស​កូរ៉េ មិនមែន​ដោយសារ​ចូលរួម​ក្នុង​ក្រុម​យុវជន​ដែល​ដឹកនាំ​ដោយ​រូបលោក ទើប​មាន​ទ្រព្យ​សម្បត្តិ​ឡើយ។

គួរ​កត់សម្គាល់​ថា ឧកញ៉ា ឡេង ណាវ៉ាត្រា ធ្លាប់​ធ្វើ​ដំណើរ​ទៅ​កាន់​ប្រទេស​អូស្ត្រាលី ចេញ​លុយ​ចាយវាយ រៀបចំ​កម្មវិធី​ជួបជុំ​ជប់លៀង​នៃ​ក្រុម​ការងារ​រៀបចំ​អង្គការ​ចាត់តាំង​យុវជន​គណបក្ស​ប្រជាជន​កម្ពុជា​ក្រៅ​ប្រទេស។

លោក ហ៊ុន ម៉ាណែត បកស្រាយ​ថា ខ្លួន​មិន​ដែល​ធ្វើ​ជា​អ្នក​រត់ការ​ដី​រដ្ឋ​សូម្បី​តែ ១​ការ៉េ ឬ​តិច​ជាង ១០០០​ការ៉េ ក៏​ខ្លួន​មិន​ដែល​ប៉ះពាល់​ដែរ ទោះបី​កន្លងមក​មាន​ឧកញ៉ា​មួយ​បាន​មក​ពឹងពាក់​ខ្លួន​ក៏ដោយ។

ប្រធាន​វេទិកា​ពលរដ្ឋ និង​ជា​អ្នកវិភាគ​នយោបាយ លោក គឹម សុខ យល់​ថា លោក ហ៊ុន ម៉ាណែត ធ្វើ​ជា​ប្រឹង​ការពារ​ឧកញ៉ា ឡេង ណាវ៉ាត្រា ដែល​គ្រាន់តែ​ជា​អ្នក​ចាំ​ធ្វើ​តាម​គ្រួសារ ហ៊ុន ប៉ុន្តែ​ខ្លឹមសារ​ពិត​ខំ​និយាយ​ការពារ​លោក ហ៊ុន សែន ជា​ឪពុក ការពារ​ខ្លួនឯង និង​ប្រយោជន៍​គ្រួសារ​ហ៊ុន ព្រោះ​ករណី​ឧក្រិដ្ឋកម្ម​ព្រៃ​ធម្មជាតិ​ភ្នំ​តាម៉ៅ​នេះ លោក ហ៊ុន សែន សារភាព​កាលពី​ថ្ងៃទី​១៧ សីហា ថា​ជា​កំហុស​របស់​គាត់។

លោក​បន្ត​ថា រឿង​ព្រៃ​ភ្នំ​តាម៉ៅ ត្រូវតែ​នាំ​ខ្លួន​លោក ហ៊ុន សែន ឲ្យ​ទៅ​ប្រឈម​ចំពោះ​មុខ​ច្បាប់​ដោយ​ផ្អែក​លើ​ហេតុផល​ពីរ៖

  • ទី​១ លោក ហ៊ុន សែន សារភាព​ថា គាត់​មាន​កំហុស​ដែល​ត្រូវ​កាត់ទោស
  • ទី​២ លោក ហ៊ុន សែន តែងតែ​អួត​ថា ប្រទេស​កម្ពុជា​ជា​នីតិរដ្ឋ។

លោក គឹម សុខ ថា​ប្រទេស​មាន​នីតិរដ្ឋ ត្រូវតែ​ហ៊ាន​អនុវត្ត​ច្បាប់​នាំ​ខ្លួន​ជនល្មើស​ទៅ​ផ្ដន្ទាទោស ទោះ​អ្នក​នោះ​មាន​ឋានៈ​ប៉ុនណា​ក្នុង​តំណែង​ក៏ដោយ។ ជា​ឧទាហរណ៍ ដូច​គំរូ​ប្រទេស​នីតិរដ្ឋ​កូរ៉េ​ខាងត្បូង ដែល​ចាប់​ខ្លួន​ប្រធានាធិបតី​ក្នុង​តំណែង​ទៅ​កាត់ទោស។

កាលពី​ថ្ងៃទី​៧ ខែ​សីហា ឆ្នាំ​២០២២ លោក ហ៊ុន សែន ក៏​សម្រេច​លុប​ចោល​វិញ និង​បាន​ឲ្យ​ក្រុមហ៊ុន ឡេង ណាវ៉ាត្រា ទទួល​ខុសត្រូវ​ដោយ​ដាំ​ដើមឈើ​ឡើងវិញ ក្រោយពី​ក្រុមហ៊ុន​នេះ​បាន​ឈូស​ឆាយ​ដី​ព្រៃ​ភ្នំ​តាម៉ៅ​ជិត ៦០០​ហិកតារ។ ការ​សម្រេច​របស់​លោក ហ៊ុន សែន ក្រោយពី​មាន​ប្រតិកម្ម​ខ្លាំង​ពី​ប្រជាពលរដ្ឋ និង​សាធារណជន​ពាក់ព័ន្ធ​នឹង​ការ​កាត់​ដី​ព្រៃ​តំបន់​ភ្នំ​តាម៉ៅ​ឲ្យ​ក្រុមហ៊ុន​ឯកជន​ឈូស​ឆាយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស