25 C
Phnom Penh

បុរស​ខ្លាំង​ថា​បើ​លោក ហ៊ុន ម៉ាណែត ចង់​ធ្វើ​ជា​នាយករដ្ឋមន្ត្រី​គឺ​ត្រូវតែ​ដឹកនាំ​ឲ្យ​ដូច​រូបលោក

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​កម្ពុជា​សល់​ពី​របប​យង់ឃ្នង​ក្រាញ​អំណាច លោក ហ៊ុន សែន អះអាង​ថា បើ​លោក ហ៊ុន ម៉ាណែត ចង់​ធ្វើ​ជា​នាយករដ្ឋមន្ត្រី គឺ​ត្រូវតែ​ដឹកនាំ​ឲ្យ​ដូច​រូបលោក ហើយ​អាច​នឹង​បណ្តេញ​ចេញពី​បក្ស បើ​ធ្វើ​ខុស​ពី​គោលការណ៍​របស់​បក្ស​ប្រជាជន​កម្ពុជា ព្រោះ​លោក​នឹង​មិន​បណ្តោយ​ឲ្យ​កម្ពុជា និង​គណបក្ស​ប្រជាជន​កម្ពុជា​ត្រូវ​បំផ្លាញ​ដោយ​ស្នាដៃ​របស់​លោក ហ៊ុន ម៉ាណែត ឡើយ។

មេដឹកនាំ​ដែល​វៀតណាម​លើក​បន្តុប​ជាង ៤​ទសវត្សរ៍ លោក ហ៊ុន សែន បាន​លើកឡើង​ក្នុង​ពិធី​ប្រគល់​សញ្ញាបត្រ​ដល់​និស្សិត​នៃ​សាកលវិទ្យាល័យ​អាស៊ី-អឺរ៉ុប កាលពី​ថ្ងៃទី​២៣ ខែ​សីហា ឆ្នាំ​២០២២ ថា ប្រសិនបើ​កូនប្រុស​របស់​គាត់ គឺ​លោក ហ៊ុន ម៉ាណែត មិន​មាន​លក្ខណៈ​សម្បត្តិ​គ្រប់​លក្ខខណ្ឌ​អាច​ធ្វើ​ជា​បេក្ខជន​នាយករដ្ឋមន្ត្រី​បាន​ទេ នោះ​ក៏​លោក​មិន​អនុញ្ញាត​ឲ្យ​ធ្វើ​ជា​នាយករដ្ឋមន្ត្រី​ដែរ ព្រោះ​ថា​លោក​នឹង​មិន​ឲ្យ​កម្ពុជា និង​គណបក្ស​កាន់​អំណាច​សព្វថ្ងៃ​នេះ​ត្រូវ​បំផ្លាញ​ដោយ​ស្នាដៃ​របស់​លោក ហ៊ុន ម៉ាណែត ដែល​ជា​កូនប្រុស​បង្កើត​របស់​លោក​នោះ​ឡើយ។

បុរស​ខ្លាំង​កម្ពុជា លោក ហ៊ុន សែន អះអាង​ថា លោក​មិនមែន​អប់រំ​កូន​ឲ្យ​ធ្វើ​ចោរ​នោះ​ទេ គឺ​ឲ្យ​កូន​របស់​លោក​ធ្វើ​ជា​អ្នកធំ ប៉ុន្តែ​បើ​លោក ហ៊ុន ម៉ាណែត មិន​មាន​លក្ខណៈ​សម្បត្តិ​គ្រប់គ្រាន់ ទោះ​ជា​បក្ស​ប្រជាជន​ កម្ពុជា​ព្រម​ឲ្យ​ធ្វើ​ជា​នាយករដ្ឋមន្ត្រី ក៏​លោក​មិន​ព្រម​ដែរ ព្រោះ​ថា​លក្ខណៈ​សម្បត្តិ​របស់​មេដឹកនាំ​ខ្មែរ គឺ​ត្រូវតែ​ធានា​ឱ្យ​កម្ពុជា​មាន​ស្ថិរភាព​បន្ត​ពី​ការ​ដឹកនាំ​របស់​លោក។

ទោះជា​យ៉ាងណាក៏ដោយ ក្រុម​អ្នក​រិះគន់​បាន​ចោទប្រកាន់​លោក ហ៊ុន ម៉ាណែត ថា​ធ្លាប់​ទៅ​ធ្វើ​ទស្សនកិច្ច​នៅ​ប្រទេស​វៀតណាម ដើម្បី​សុំ​ការ​គាំទ្រ​ពី​វៀតណាម ឲ្យ​បាន​ធ្វើ​ជា​បេក្ខភាព​ជា​នាយករដ្ឋមន្ត្រី។ ត្រង់​ចំណុច​នេះ លោក ហ៊ុន សែន បាន​បដិសេធ​ថា​ជា​រឿង​មិន​ពិត។

លោក ហ៊ុន សែន អះអាង​ថា កម្ពុជា​មិន​មាន​តម្រូវការ​ទៅ​សុំ​ការ​គាំទ្រ​ពី​បរទេស​ជិតខាង​ណា​មួយ ដើម្បី​ឲ្យ​គាំទ្រ​ខ្លួន​ធ្វើ​ជា​បេក្ខភាព​នាយករដ្ឋមន្ត្រី​នៅ​កម្ពុជា​នោះ​ឡើយ ប៉ុន្តែ​គឺ​ត្រូវ​មាន​ការ​គាំទ្រ​ពី​គណបក្ស​ប្រជាជន​កម្ពុជា​ខ្លួនឯង​តែប៉ុណ្ណោះ។

ទោះជា​យ៉ាងណាក៏ដោយ អតីត​អ្នកទោស​នយោបាយ និង​ជា​មន្ត្រី​ជាន់ខ្ពស់​បក្ស​ប្រឆាំង លោក មាជ សុវណ្ណារ៉ា បាន​ប្រាប់​សារព័ត៌មាន The Cambodia Daily នៅ​ថ្ងៃទី​២៤ សីហា នេះ​ថា នៅ​ពេល​ដែល​លោក ហ៊ុន សែន ចង់​ឲ្យ​កូនប្រុស​របស់​គាត់ គឺ​លោក ហ៊ុន ម៉ាណែត ឲ្យ​ដឹកនាំ​ដូច​រូបលោក តើ​លោក ហ៊ុន សែន មាន​គំរូ​នយោបាយ​ល្អ​សម្រាប់​កូនប្រុស​របស់​គាត់​ឲ្យ​អនុវត្ត​តាម​ដែរ​ឬ​ទេ ស្រប​ពេល​ដែល​ការ​ដឹកនាំ​របស់​គាត់​សព្វថ្ងៃ​នេះ រង​នូវ​ការ​រិះគន់​ជុំ​ទិស​ពី​មជ្ឈដ្ឋាន​ជាតិ និង​អន្តរជាតិ​យ៉ាង​ធ្ងន់ធ្ងរ។

លោក មាជ សុវណ្ណារ៉ា លើកឡើង​ថា ការ​ដឹកនាំ​របស់​លោក ហ៊ុន សែន សព្វថ្ងៃ​នេះ ត្រូវ​គេ​មើល​ឃើញ​ថា​កំពុងតែ​ដឹកនាំ​កម្ពុជា​ទៅ​រក​ការ​ជិះជាន់​សិទ្ធិ​ពលរដ្ឋ ជាន់ឈ្លី​លទ្ធិប្រជាធិបតេយ្យ បង្កើត​ឲ្យ​មាន​អំពើ​និទ្ទណ្ឌភាព​ក្នុង​សង្គម ប្រព្រឹត្ត​អំពើពុករលួយ និង​ដឹកនាំ​ឆ្ពោះ​ទៅ​រក​ការ​ជំពាក់​បំណុល​បរទេស​វ័ណ្ឌក ដែល​អាច​នឹង​ធ្វើ​ឲ្យ​កម្ពុជា​បាត់បង់​អធិបតេយ្យ​ជាតិ​របស់​ខ្លួន​នៅ​ថ្ងៃ​អនាគត​ផង​ដែរ។

កម្ពុជា​នៅ​ក្រោម​ការ​ដឹកនាំ​របស់​បុរស​ខ្លាំង​ដើរ​បញ្ច្រាស​ទិស លោក ហ៊ុន សែន ជាង ៤០​ឆ្នាំ​មក​នេះ ត្រូវ​គេ​មើល​ឃើញ​ថា​កំពុង​បោះ​ជំហាន​ធ្លាក់​ក្នុង​ជ្រោះ​មរណៈ​ដ៏​សែន​ជ្រៅ ដែល​គ្មាន​សង្ឃឹម​នឹង​អាច​ស្រោចស្រង់​វិញ​បាន​នោះ​ទេ ពីព្រោះ​លោក ហ៊ុន សែន បាន​ចុះ​កិច្ចព្រមព្រៀង​ខុស​ច្បាប់​ដែល​សុទ្ធសឹងតែ​ជា​សន្ធិសញ្ញា​កាត់​ទឹកដី​ខ្មែរ​ឲ្យ​ទៅ​វៀតណាម​ដោយ​ស្រប​ច្បាប់​រហូត​មក។ ជាង​នេះ​ទៀត ក៏​បើក​ផ្លូវ​ឲ្យ​និគមជន​វៀតណាម​ខុស​ច្បាប់​ចូល​ទៅ​រស់នៅ​កម្ពុជា​យ៉ាង​អនាធិបតេយ្យ​ថែម​ទៀត ជា​ថ្នូរ​នឹង​ការ​ជ្រោមជ្រែង​អំណាច​ពី​រដ្ឋាភិបាល​វៀតណាម។

កាលពី​ថ្ងៃទី​២ ខែ​ធ្នូ ឆ្នាំ​២០២១ លោក ហ៊ុន សែន ប្រកាស​ជា​សាធារណៈ​ថា លោក​គាំទ្រ​កូនប្រុស​ច្បង​របស់​លោក គឺ​លោក ហ៊ុន ម៉ាណែត ធ្វើ​ជា​បេក្ខជន​មួយ​រូប​ក្នុង​ចំណោម​បេក្ខជន​ផ្សេង​ទៀត​ដែល​នឹង​ឈរ​ឈ្មោះ​ធ្វើ​ជា​នាយករដ្ឋមន្ត្រី​បន្ទាប់ពី​លោក ព្រោះ​ថា​ក្នុង​នាម​លោក​ជា​ឪពុក មាន​តួនាទី​គាំទ្រ​កូន​របស់​ខ្លួន​ឲ្យ​ធ្វើ​ជា​អ្នកធំ មិនមែន​ជា​រឿង​ដែល​ខុស​នោះ​ឡើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស