ក្រសួងការងារ និងបណ្តុះបណ្តាលវិជ្ជាជីវៈ អំពាវនាវឱ្យពលករខ្មែរដែលកំពុងធ្វើការនៅក្រៅប្រទេស កុំបោះបង់ការងារ ហើយវិលត្រឡប់ទៅប្រទេសកម្ពុជាវិញតាមការឃោសនារបស់ប្រធានគណបក្សសម្ព័ន្ធដើម្បីប្រជាធិបតេយ្យ (LDP) លោក ខឹម វាសនា ដែលលោកនិយាយថាទឹកសមុទ្រនឹងលិចពិភពលោកនៅពេលដ៏ខ្លីខាងមុខនេះ។
រដ្ឋលេខាធិការក្រសួងការងារ និងបណ្តុះបណ្តាលវិជ្ជាជីវៈ លោក ហេង សួរ បានសរសេរលើគណនីហ្វេសប៊ុករបស់ខ្លួនកាលពីថ្ងៃទី២៥ ខែសីហា ឆ្នាំ២០២២ នេះថា ការបោះបង់ចោលការងារនៅប្រទេសកូរ៉េដែលមនុស្សជាច្រើនចង់ទៅ តែទៅមិនបាន គឺជាការបោះបង់ចោលប្រភពចំណូលដ៏ធំសម្រាប់ទ្រទ្រង់ជីវភាពគ្រួសាររបស់ខ្លួន ហើយការធ្វើបែបនេះ គឺមិនអាចធ្វើឱ្យពួកគេវិលត្រឡប់ទៅប្រទេសកូរ៉េវិញបានឡើយ នៅពេលដែលពួកគេភ្ញាក់ខ្លួន ហើយចង់ទៅធ្វើការងារនៅប្រទេសកូរ៉េវិញនោះ។
លោក ហេង សួរ អះអាងថា ពលករខ្មែរដែលនាំគ្នាត្រឡប់មកកម្ពុជាវិញនេះ គឺដឹងច្បាស់ហើយថា ពួកគេអាចទៅដល់ប្រទេសកូរ៉េ ដោយសារជិះយន្តហោះ មិនមែនដោយសារដើរលើខ្នងរបស់ព្រះព្រហ្ម ឬជ្រែកតាមឆ្អឹងជំនីររបស់បុគ្គល ខឹម វាសនា នោះឡើយ។ ដូច្នេះពួកគេត្រូវតែនាំគ្នាតាំងស្មារតីយកវិទ្យាសាស្ត្រជាគោល ហើយយកអនាគតរបស់ខ្លួន គ្រួសារខ្លួន និងសង្គមជាតិខ្លួនជាធំមកពិចារណាជំនួសវិញ ចៀសវាងនូវការជឿងប់ងុលទៅលើជំនឿដែលគ្មានហេតុផល។
រដ្ឋលេខាធិការក្រសួងការងាររូបនេះបញ្ជាក់ថា ប្រសិនបើពិភពលោកនេះនឹងជួបប្រទះនូវគ្រោះមហន្តរាយកើតទៅជាទឹកជំនន់ជន់លិចលង់គ្រប់ប្រទេសដូចបុគ្គលលោក ខឹម វាសនា បានអះអាងមែននោះ អ្នកវិទ្យាសាស្ត្រច្បាស់ជាប្រកាសអាសន្នទូទាំងពិភពលោកជាមិនខាន ហើយដីចម្ការរបស់លោក ខឹម វាសនា ក៏លិចដូចគ្នាដែរ មិនអាចនៅជាដីគោកមិនលិចទឹកដូចបុគ្គលរូបនេះបានអះអាងនោះឡើយ។
ការអំពាវនាវនេះ ធ្វើឡើងបន្ទាប់ពីពលករខ្មែរដែលកំពុងបម្រើការនៅប្រទេសកូរ៉េ និងប្រទេសជប៉ុន ជាដើម បាននាំគ្នាវិលត្រឡប់ទៅកម្ពុជាវិញទាំងមិនទាន់ចប់កុងត្រាជាមួយក្រុមហ៊ុន ដោយសារពួកគេខ្លាចទឹកសមុទ្រជន់លិចពិភពលោកតាមការអះអាងរបស់ប្រធានគណបក្សជួងដែលពួកគេកំពុងមានជំនឿនៅពេលនេះ។
ចំណែកឯអនុប្រធានអាជ្ញាធរទន្លេសាបនៃក្រសួងធនធានទឹក និងឧតុនិយម លោក ម៉ៅ ហាក់ អះអាងនៅថ្ងៃទី២៦ សីហា នេះថា គ្មានគ្រោះមហន្តរាយលិចលង់ពិភពលោកដូចការឃោសនារបស់ប្រធានបក្សជួង លោក ខឹម វាសនា នោះឡើយ។ លោកច្រានចោលពាក្យចចាមអារ៉ាមនេះ ដោយស្នើឲ្យពលរដ្ឋកុំជឿលើពាក្យឃោសនានេះ ក្រៅពីការព្យាករអាកាសធាតុរបស់ក្រសួង។
រយៈពេល ២ថ្ងៃចុងក្រោយនេះ គឺនៅថ្ងៃទី២៥ និងទី២៦ ខែសីហា មានការចែកចាយសកម្មភាពពលករដែលកំពុងបម្រើការងារនៅប្រទេសជប៉ុន និងប្រទេសកូរ៉េ រាប់រយនាក់នៅលើបណ្ដាញសង្គមហ្វេសប៊ុកដែលកំពុងនាំគ្នាវិលត្រឡប់ទៅប្រទេសកម្ពុជាវិញ ទាំងអ្នកទាំងនោះនៅជាប់កិច្ចសន្យាជាមួយក្រុមហ៊ុននៅឡើយ ខណៈថៅកែក្រុមហ៊ុនខ្លះបានដាក់ពាក្យបណ្តឹងទៅកាន់ក្រសួងពាក់ព័ន្ធ ដោយសារតែពលករទាំងនោះនាំគ្នាឈប់ពីការងារដោយរំលោភលើកិច្ចសន្យា។
ចាប់ពីខែសីហា ឆ្នាំ២០២២ មក ប្រធានគណបក្សជួង លោក ខឹម វាសនា បានបង្ហោះរូបភាពគ្រោះធម្មជាតិដែលបានកើតមាននៅតាមប្រទេសនានាលើគណនីហ្វេសប៊ុករបស់ខ្លួន ដោយភ្ជាប់ជាមួយនឹងការធ្វើអត្ថាធិប្បាយជាច្រើនដោយអះអាងថា ទឹកសមុទ្រនឹងលិចពិភពលោកនេះ រួមទាំងខេត្តក្រុងទាំងអស់នៅកម្ពុជាផងដែរ។
លោក ខឹម វាសនា កំពុងរស់នៅលើដីចម្ការមួយកន្លែងដែលមានទំហំប្រមាណជាង ១០ហិកតារ ស្ថិតក្នុងនៅភូមិថ្មជល់ ឃុំត្បែង ស្រុកបន្ទាយស្រី ខេត្តសៀមរាប ហើយនៅពេលនេះ អ្នកគាំទ្រដែលជឿតាមការអំពាវនាវរបស់លោក បាននាំគ្នាទៅស្នាក់នៅក្នុងដីចម្ការនេះមានចំនួនដល់ទៅរាប់រយនាក់ឯណោះ ដោយសារតែពួកគេបារម្ភខ្លាចគ្រោះធម្មជាតិដែលលោក ខឹម វាសនា បានលើកឡើងនោះ។
យ៉ាងណាក៏ដោយ លោក ខឹម វាសនា អះអាងថា សម្រាប់ទីតាំងដែលលោករស់នៅបច្ចុប្បន្ន នឹងមិនកើតមានគ្រោះធម្មជាតិនេះទេ ដោយសារតែលោកគឺជាព្រះព្រហ្ម។
ពាក់ព័ន្ធនឹងបញ្ហានេះ ពលរដ្ឋដែលរស់នៅក្បែរចម្ការរបស់លោក ខឹម វាសនា បានប្រាប់សារព័ត៌មាន The Cambodia Daily ក្នុងលក្ខខណ្ឌមិនបញ្ចេញឈ្មោះថា ពួកគាត់បានឮអ្នកគាំទ្រលោក ខឹម វាសនា និយាយគ្នាថា អ្នកខ្លះមករស់នៅលើដីចម្ការនេះជាគ្រួសារ ចំណែកអ្នកខ្លះទៀតមកតែម្នាក់ឯងប៉ុណ្ណោះ ដោយសារតែក្រុមគ្រួសាររបស់ពួកគេមិនជឿលើការឃោសនានេះ។
បញ្ហានេះ ក៏បានបង្កទៅជាការឈ្លោះប្រកែករហូតឈានដល់មានទំនាស់ក្នុងគ្រួសាររបស់ពួកគេទៀតផង៕