25 C
Phnom Penh

បក្ស​ខ្មែរ​ស្រឡាញ់​ជាតិ​បដិសេធ​ការ​ចោទ​ថា​បំពាន​​លក្ខន្តិកៈ​ដែល​តម្កល់​នៅ​ក្រសួង​មហាផ្ទៃ

ដោយ ឌឹ ខេមបូឌា ដេលី

បទវិភាគ

ប្រធាន​ស្តីទី​គណបក្ស​ខ្មែរ​ស្រឡាញ់​ជាតិ បដិសេធ​ទៅ​នឹង​លិខិត​របស់​ក្រសួង​មហាផ្ទៃ​ទាំងស្រុង​លើ​ករណី​ដែល​ចោទ​ថា គណបក្ស​នេះ​បាន​បំពាន​ទៅ​លើ​ប្រការ​មួយ​ចំនួន​នៃ​លក្ខន្តិកៈ​ដែល​បាន​តម្កល់​នៅ​ក្រសួង​មហាផ្ទៃ ដោយ​មិន​អនុញ្ញាត​ឱ្យ​មាន​ការ​រៀបចំ​ពិធី​សមាជ​ដើម្បី​ជ្រើសរើស​សមាភាព​អ្នក​ដឹកនាំ​គណបក្ស​ថ្មី។

ប្រធាន​ស្តីទី​គណបក្ស​ខ្មែរ​ស្រឡាញ់​ជាតិ លោក សៀវ វិសុទ្ធ បាន​ប្រាប់​សារព័ត៌មាន The Cambodia Daily នៅ​ថ្ងៃទី​៥ កញ្ញា នេះ​ថា លោក​នឹង​តស៊ូ​ស្វែងរក​យុត្តិធម៌​ឱ្យ​គណបក្ស​របស់​ខ្លួន​ឱ្យ​ដល់​ទីបំផុត ដើម្បី​ឱ្យ​ប្រាកដ​ថា តើ​គណបក្ស​របស់​លោក​មាន​កំហុស​ផ្លូវច្បាប់​ត្រង់​ចំណុច​ណា​ដែល​មិន​អាច​ដំណើរការ​ការងារ​របស់​ខ្លួន​បាន​នៅ​ពេលនេះ ខណៈ​ក្រុម​របស់​លោក​បាន​ពិនិត្យ​លើ​ប្រការ​ទាំងនោះ​រួចរាល់​ហើយ ដោយ​រក​ឃើញ​ថា ពួកគេ​មិន​មាន​កំហុស​ត្រង់​ចំណុច​ណា​មួយ​ឡើយ​ចំពោះ​លក្ខន្តិកៈ​របស់​ខ្លួន។

លោក សៀវ វិសុទ្ធ អះអាង​ថា លោក​កំពុង​ស្វែងរក​ការ​ពន្យល់​បកស្រាយ​ពី​ក្រសួង​មហាផ្ទៃ​ត្រង់​ប្រការ​មួយ​ចំនួន ដែល​ក្រសួង​បាន​អះអាង​ថា គណបក្ស​របស់​លោក​បាន​រំលោភ​បំពាន ហើយ​ប្រសិនបើ​ការ​បកស្រាយ​នោះ​បាន​បង្ហាញ​ថា គណបក្ស​ខ្មែរ​ស្រឡាញ់​ជាតិ​ពិត​ជា​បាន​បំពាន​លើ​ប្រការ​មួយ​ចំនួន​នៃ​លក្ខន្តិកៈ​ទាំងនោះ​មែន លោក​រួម​ទាំង​សមាជិក​ទាំងអស់​មិន​ជំទាស់​ទៅ​នឹង​ការ​អនុវត្ត​ច្បាប់​របស់​ក្រសួង​មហាផ្ទៃ​ឡើយ។

ប្រធាន​ស្តីទី​គណបក្ស​ក្រៅ​រដ្ឋាភិបាល​រូប​នេះ​បញ្ជាក់​ថា ក្នុង​ករណី​ដែល​រក​ឃើញ​ថា​គណបក្ស​របស់​លោក​គ្មាន​កំហុស ក្រសួង​ត្រូវតែ​បើក​ផ្លូវ​ឱ្យ​គណបក្ស​របស់​លោក​ដំណើរការ​កិច្ច​ការងារ​របស់​ខ្លួន​ដូច​ធម្មតា​តាម​ច្បាប់​ដែល​បាន​កំណត់​ឡើងវិញ​ផង​ដែរ។

កាលពី​ថ្ងៃទី​២ ខែ​កញ្ញា ឆ្នាំ​២០២២ ក្រសួង​មហាផ្ទៃ​បាន​ចេញ​លិខិត​មួយ​ច្បាប់​ជូនដំណឹង​ទៅ​កាន់​គណបក្ស​ខ្មែរ​ស្រឡាញ់​ជាតិ​ថា ក្រសួង​មិន​អនុញ្ញាត​ឱ្យ​មាន​ការ​រៀបចំ​ពិធី​សមាជ​ដើម្បី​កែប្រែ​លក្ខន្តិកៈ និង​ជ្រើសរើស​សមាសភាព​អ្នក​ដឹកនាំ​ថ្មី​នៃ​គណបក្ស​នេះ​បាន​ទេ ព្រោះ​ថា​ការ​ធ្វើ​បែប​នេះ គឺ​បាន​រំលោភ​ទៅ​លើ​ប្រការ​ទី​២១ ទី​២៥ និង​ទី​៣១ យ៉ាង​ធ្ងន់ធ្ងរ។

ប្រភព​ដដែល​បញ្ជាក់​ថា គណបក្ស​នេះ​មាន​សមាសភាព​គណៈកម្មាធិការ​អចិន្ត្រៃយ៍​ចំនួន ៨​រូប​ដែល​ក្នុង​នោះ សមាជិក​ចំនួន ៧​រូប​បាន​សម្រេច​លាឈប់​អស់​ហើយ ដូច្នេះ​គណបក្ស​នេះ​មិន​អាច​ដំណើរការ​ការងារ​របស់​ខ្លួន​ឱ្យ​ស្រប​ទៅ​នឹង​លក្ខន្តិកៈ​គណបក្ស​ទៀត​បាន​ទេ។

ការ​ចេញ​លិខិត​នេះ ធ្វើឡើង​បន្ទាប់ពី​សមាជិក​គណបក្ស​ខ្មែរ​ស្រឡាញ់​ជាតិ គ្រោង​រៀបចំ​ធ្វើ​ពិធី​សមាជ​វិសាមញ្ញ​របស់​ខ្លួន​ដើម្បី​កែប្រែ​លក្ខន្តិកៈ និង​ជ្រើសរើស​សមាសភាព​អ្នក​ដឹកនាំ​កំពូល​របស់​គណបក្ស​ឡើងវិញ បន្ទាប់ពី​សមាសភាព​ជាន់ខ្ពស់​ដែល​ជា​ប្រធាន អនុប្រធាន បាន​ដាក់​ពាក្យ​លាឈប់ និង​ប្រកាស​រំលាយ​គណបក្ស​នេះ​កាលពី​ចុង​ខែ​កក្កដា ឆ្នាំ​២០២២ កន្លងទៅ។

កាលពី​ថ្ងៃទី​២៩ ខែ​កក្កដា ឆ្នាំ​២០២២ ប្រធាន​គណបក្ស​ខ្មែរ​ស្រឡាញ់​ជាតិ លោក ជីវ កត្តា លោក ខឿយ ស៊ីនឿន លោក កង គឹមហាក់ និង​មន្ត្រី​ជាន់ខ្ពស់​មួយ​ចំនួន​ទៀត បាន​ចេញ​លិខិត​ប្រកាស​រំលាយ​គណបក្ស​ខ្មែរ​ស្រឡាញ់​ជាតិ​ដោយ​មិន​បាន​ឆ្លងកាត់​សមាជ​របស់​គណបក្ស​នោះ​ឡើយ ប៉ុន្តែ​ក្នុង​លិខិត​ទាំងនោះ​បាន​បញ្ជាក់​ថា ការ​ប្រកាស​រំលាយ​នេះ គឺ​ដោយសារ​មើល​ឃើញ​ការ​ដឹកនាំ​ល្អ​របស់​បក្ស​កាន់​អំណាច​សព្វថ្ងៃ​នេះ។

គណបក្ស​ខ្មែរ​ស្រឡាញ់​ជាតិ ត្រូវ​បាន​បង្កើត​ឡើង​កាលពី​ឆ្នាំ​២០២០ ក្រោម​ការ​ផ្ដួចផ្ដើម​របស់​អតីត​មន្ត្រី​ជាន់ខ្ពស់​គណបក្ស​សង្គ្រោះ​ជាតិ បន្ទាប់ពី​គណបក្ស​សង្គ្រោះ​ជាតិ​ត្រូវ​បាន​តុលាការ​ក្រុង​ភ្នំពេញ​ប្រកាស​រំលាយ​កាលពី​អំឡុង​ខែ​វិច្ឆិកា ឆ្នាំ​២០១៧ កន្លង​ទៅ​នោះ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស