អធិការនគរបាលស្រុកទឹកផុស ខេត្តកំពង់ឆ្នាំង អះអាងថា យុវជនម្នាក់បានចងកសម្លាប់ខ្លួននៅនឹងដើមឈើក្បែរវាលស្រែ បន្ទាប់ពីអន់ចិត្តនឹងឪពុកម្ដាយដែលណែនាំមិនចង់ឲ្យត្រឡប់ទៅចម្ការរបស់ប្រធានគណបក្សសម្ព័ន្ធដើម្បីប្រជាធិបតេយ្យ លោក ខឹម វាសនា ក្នុងខេត្តសៀមរាប វិញ។
អធិការនគរបាលស្រុកទឹកផុស ខេត្តកំពង់ឆ្នាំង លោក ខែម វិបុល ត្រូវបានសារព័ត៌មានក្នុងស្រុកស្រង់សម្ដីនៅថ្ងៃទី៥ ខែកញ្ញា ឆ្នាំ២០២២ នេះថា យុវជន ម៉ាត ម៉ាន អាយុ ២០ឆ្នាំ មានទីលំនៅភូមិស្រែចាន ឃុំទួលខ្ពស់ ស្រុកទឹកផុស ខេត្តកំពង់ឆ្នាំង បានចងកសម្លាប់ខ្លួននៅនឹងដើមឈើក្បែរវាលស្រែ វេលាម៉ោង ៦ និង ៣០នាទី ព្រឹកថ្ងៃទី៥ ខែកញ្ញា ឆ្នាំ២០២២ នេះ។
ប្រភពដដែលអះអាងថា យុវជនរូបនេះបានទៅស្នាក់នៅចម្ការលោក ខឹម វាសនា ជាមួយនឹងមិត្តភ័ក្ដិដែលមកពីប្រទេសកូរ៉េ កាលថ្ងៃទី២៧ ខែសីហា និងបានត្រឡប់មកផ្ទះវិញនៅថ្ងៃទី៣០ ខែសីហា ឆ្នាំ២០២២ នេះ។ ក្រោយពេលមកដល់ផ្ទះ ឪពុកម្ដាយបានបានណែនាំ និងស្ដីបន្ទោសបន្តិចបន្តួច ប៉ុន្តែដោយសារខឹងឪពុកម្តាយស្ដីបន្ទោស រូបគេក៏បានសម្រេចចិត្តធ្វើអត្តឃាតខ្លួនឯងតែម្ដង។
អធិការនគរបាលស្រុកទឹកផុសរូបនេះអំពាវនាវទៅកាន់ពលរដ្ឋកុំឱ្យចាញ់បោក និងជឿតាមការអូសទាញរបស់ក្រុមមនុស្សមួយចំនួនឲ្យទៅស្នាក់នៅក្នុងចម្ការរបស់លោក ខឹម វាសនា ដើម្បីរក្សាជីវិតដោយសារតែមានទឹកលិចពិភពលោក។ លោកបន្ថែមថា ការជឿដោយភាពឆោតបែបនេះ បានធ្វើឲ្យអ្នកខ្លះចាកចោលផ្ទះសម្បែង និងចាកចោលក្រុមគ្រួសារអស់រយៈពេលជាច្រើនថ្ងៃ ជាមួយនឹងការខាតបង់ទ្រព្យសម្បត្តិយ៉ាងច្រើនផងដែរ។
នៅថ្ងៃទី៥ ខែកញ្ញា ឆ្នាំ២០២២ នេះ គឺជាថ្ងៃនៃការប្រមូលផ្ដុំលើដីចម្ការរបស់លោក ខឹម វាសនា ចុងក្រោយសម្រាប់អ្នកដែលជឿមេបក្សជួងថាមានទឹកលិចពិភពលោក បន្ទាប់ពីតំណាងគណបក្សសម្ព័ន្ធដើម្បីប្រជាធិបតេយ្យ បានចុះកិច្ចសន្យាជាមួយសមត្ថកិច្ចកាលពីថ្ងៃទី៣១ ខែសីហា ឆ្នាំ២០២២ ថាខ្លួននឹងប្រកាសរំសាយការប្រមូលផ្ដុំនៅថ្ងៃចន្ទដើមសប្តាហ៍នេះ។
ជុំវិញបញ្ហានេះ កាលពីថ្ងៃទី២ ខែកញ្ញា សាលាដំបូងខេត្តសៀមរាប បានសម្រេចឃុំខ្លួនសមាជិកគណបក្សសម្ព័ន្ធដើម្បីប្រជាធិបតេយ្យចំនួន ៦នាក់ជាបណ្ដោះអាសន្នដាក់នៅពន្ធនាគារខេត្តសៀមរាប ពីបទប្រឆាំងអ្នករាជការសាធារណៈតាមមាត្រា៥០៣ និង ៥០៥ នៃក្រមព្រហ្មទណ្ឌ បន្ទាប់ពីពួកគេបានបើករថយន្តគេចពីបារ៉ាស់ទី១ រួចឆ្ពោះទៅបុកបារ៉ាស់ទី២ របស់កម្លាំងសមត្ថកិច្ច និងប្រឆាំងសមត្ថកិច្ចកំពុងប្រតិបត្តិការ។
ក្រៅពីមានអ្នកស្លាប់ និងអ្នកជាប់ពន្ធនាគារដោយសារការជឿលោក ខឹម វាសនា ក៏មានពាក្យបណ្តឹងពីពលរដ្ឋពីតាមបណ្តាខេត្តផ្សេងៗទៅកាន់អាជ្ញាធរខេត្តសៀមរាប រហូតដល់ជាង ៧០០បណ្តឹងផងដែរ ដែលបានប្តឹងស្វែងរកសាច់ញាតិថាត្រូវបានគេពង្វក់ និងអូសទាញឱ្យទៅនៅក្នុងចម្ការរបស់លោក ខឹម វាសនា នៅពេលនេះ។
ក្រុមអ្នកសង្កេតការណ៍លើកឡើងថា បញ្ហានេះគឺបណ្តាលមកពីរដ្ឋាភិបាលមិនមានវិធានការទប់ស្កាត់ឱ្យបានទាន់ពេលវេលា ព្រោះថាការបណ្តែតបណ្តោយឱ្យមានការប្រមូលផ្ដុំខុសច្បាប់បែបនេះ គឺមានតែបង្កផលវិបាកដល់ពលរដ្ឋ និងរដ្ឋាភិបាលខ្លួនឯងប៉ុណ្ណោះ ដែលធ្វើឱ្យមានសោកនាដកម្មសម្រាប់ពលរដ្ឋរបស់ខ្លួនទៅថ្ងៃក្រោយ៕