25 C
Phnom Penh

មន្ត្រី LDP ស្នើ​អាជ្ញាធរ​ចាត់​វិធានការ​ច្បាប់​ចំពោះ​ពលរដ្ឋ​ដែល​មិន​ព្រម​ចេញពី​ដី​ចម្ការ​ត្រឡប់​ទៅ​ផ្ទះ​វិញ

ដោយ ឌឹ ខេមបូឌា ដេលី

បទវិភាគ

តំណាង​គណបក្ស​សម្ព័ន្ធ​ដើម្បី​ប្រជាធិបតេយ្យ និង​ជា​មនុស្ស​ជំនិត​របស់​លោក ខឹម វាសនា គឺ​លោក នី ចាន់ពិនិត្យ ហៅ​ជីង ស្នើ​ឱ្យ​អាជ្ញាធរ​ខេត្ត​សៀមរាប បណ្តេញ និង​ចាត់​វិធានការ​ច្បាប់​ចំពោះ​ពលរដ្ឋ​ដែល​បាន​ចូល​ទៅ​ស្នាក់នៅ​ក្នុង​ដី​ចម្ការ​របស់​លោក ខឹម វាសនា ហើយ​មិន​ព្រម​វិលត្រឡប់​ទៅ​ផ្ទះ​វិញ។

លោក នី ចាន់ពិនិត្យ ហៅ​ជីង បាន​ធ្វើ​លិខិត​មួយ​ច្បាប់​ទៅ​កាន់​អភិបាល​នៃ​គណៈ​អភិបាល​ខេត្ត​សៀមរាប ឱ្យ​ជួយ​អន្តរាគមន៍​ចំពោះ​ពលរដ្ឋ​ទាំងឡាយ​ណា​ដែល​មិន​ព្រម​ចេញ​ពី​ដី​ចម្ការ​របស់​លោក ខឹម វាសនា វិលត្រឡប់​ទៅ​ផ្ទះ​របស់​ពួកគេ​វិញ។

លោក នី ចាន់ពិនិត្យ អះអាង​ថា លោក​ធ្លាប់​បាន​ធ្វើ​កិច្ចសន្យា​ម្តង​រួច​មក​ហើយ​ថា នឹង​ប្រកាស​រំសាយ​ឱ្យ​ពលរដ្ឋ​ដែល​មក​ស្នាក់នៅ​លើ​ដី​ចម្ការ​របស់​លោក ខឹម វាសនា ទាំង​ពីរ​ទីតាំង​ដែល​ទីតាំង​ទី​១ មាន​ទំហំ​ដី ១២​ហិកតារ និង​ទីតាំង​ទី​២ មាន​ទំហំ​ដី ២៥​ហិកតារ ស្ថិត​ក្នុង​ភូមិ​ថ្មជល់ ឃុំ​ត្បែង ស្រុក​បន្ទាយស្រី ខេត្ត​សៀមរាប ឱ្យ​ពួកគេ​ត្រឡប់​ទៅ​ផ្ទះ​វិញ​រៀងៗ​ខ្លួន​កាលពី​ចុង​ខែ​សីហា កន្លងទៅ។

តំណាង​បក្ស​ជួង​រូប​នេះ​បញ្ជាក់​ថា រហូត​ដល់​ថ្ងៃទី​៦ ខែ​កញ្ញា មាន​ពលរដ្ឋ​មួយ​ចំនួន​ក្រៅពី​ក្រុម​ការងារ​របស់​គណបក្ស មិន​ព្រម​ចាកចេញ​ពី​ដី​ចម្ការ​របស់​លោក ខឹម វាសនា ត្រឡប់​ទៅ​ផ្ទះ​របស់​ពួកគេ​វិញ​នៅឡើយ​ទេ ដូច្នេះ​លោក​ស្នើ​ឱ្យ​អាជ្ញាធរ​ខេត្ត​ចាត់​វិធានការ​ច្បាប់ ដើម្បី​ឱ្យ​ពួកគេ​នាំគ្នា​ចេញពី​ដី​ចម្ការ​នេះ​ឱ្យ​អស់។

ការ​អះអាង​នេះ ធ្វើឡើង​បន្ទាប់ពី​ពលរដ្ឋ​ប្រមាណ ២​ម៉ឺន​នាក់​បាន​ចូល​ទៅ​ស្នាក់នៅ​លើ​ដី​ចម្ការ​មេ​បក្ស​ជួង តាម​ការ​អំពាវនាវ​របស់​លោក ខឹម វាសនា ដែល​ថា​នឹង​មាន​គ្រោះ​ទឹកជំនន់​លិច​ពិភពលោក​កាលពី​ចុង​ខែ​សីហា កន្លងទៅ​នេះ។

កាលពី​ថ្ងៃទី​៥ ខែ​កញ្ញា កន្លងទៅ​នេះ គឺ​ថ្ងៃ​នៃ​ការ​ប្រមូលផ្ដុំ​លើ​ដី​ចម្ការ​លោក ខឹម វាសនា ជា​លើក​ចុងក្រោយ​ហើយ​សម្រាប់​អ្នក​ដែល​ជឿ​មេ​បក្ស​ជួង​ថា​មាន​គ្រោះ​ទឹកជំនន់​លិច​ពិភពលោក បន្ទាប់ពី​តំណាង​គណបក្ស​សម្ព័ន្ធ​ដើម្បី​ប្រជាធិបតេយ្យ​បាន​ចុះ​កិច្ចសន្យា​ជាមួយ​សមត្ថកិច្ច​កាលពី​ថ្ងៃទី​៣១ ខែ​សីហា ឆ្នាំ​២០២២ ថា​ខ្លួន​នឹង​ប្រកាស​រំសាយ​ការ​ប្រមូលផ្ដុំ​នេះ ប៉ុន្តែ​ក្រុម​អ្នក​ជឿ​លោក ខឹម វាសនា ទាំងនោះ​នៅតែ​បន្ត​ការ​ប្រមូលផ្ដុំ​រហូត​ដល់​ថ្ងៃ​អង្គារ ទី​៦ កញ្ញា។

ជុំវិញ​ការ​ការ​ជឿ​ថា​មាន​គ្រោះ​ទឹកជំនន់​លិច​ពិភពលោក និង​នាំគ្នា​ទៅ​រស់នៅ​លើ​ដី​ចម្ការ​តាម​ការ​អំពាវនាវ​របស់​លោក ខឹម វាសនា នេះ ត្រូវ​គេ​ដឹង​ថា​មាន​ពលរដ្ឋ​ជាច្រើន​គ្រួសារ​បាន​លក់​ដី និង​ផ្ទះសម្បែង​របស់​ខ្លួន ខ្លះ​ទៀត​លក់​រថយន្ត លក់​គោ​ក្របី និង​អីវ៉ាន់​ដែល​ជា​មុខរបរ​ប្រចាំ​ថ្ងៃ​របស់​ខ្លួន​ក្នុង​តម្លៃ​ថោកៗ ដើម្បី​ប្រមូល​លុយ​យក​ទៅ​រស់នៅ​លើ​ដី​ចម្ការ​នោះ ព្រោះតែ​ពួកគេ​ជឿ​ថា​មាន​គ្រោះ​ទឹកជំនន់​តាម​ការ​អះអាង​របស់​លោក ខឹម វាសនា។

កាលពី​ថ្ងៃទី​២៣ ខែ​សីហា ឆ្នាំ​២០២២ កន្លងទៅ មេ​បក្ស​ជួង លោក ខឹម វាសនា បាន​បង្ហោះ​វីដេអូ និង​រូបភាព​ជាច្រើន​ជុំវិញ​គ្រោះថ្នាក់​ធម្មជាតិ​ដោយ​ទឹកជំនន់​ដែល​បាន​កើតមាន​នៅ​ប្រទេស​ផ្សេងៗ ដោយ​ភ្ជាប់​នឹង​ការ​បកស្រាយ​ថា គ្រោះ​ធម្មជាតិ​ទាំងនេះ​នឹង​កើតមាន​លើ​ពិភពលោក ប៉ុន្តែ​កន្លែង​ដែល​គេច​ផុត​ពី​គ្រោះ​ធម្មជាតិ​នេះ​បាន គឺ​មាន​តែ​ដី​ចម្ការ​របស់​គាត់​ប៉ុណ្ណោះ ព្រោះ​គាត់​គឺជា​ព្រះព្រហ្ម​ដែល​ថែរក្សា​នៅ​ទីនោះ ដែល​ធ្វើ​ឱ្យ​អ្នក​មាន​ជំនឿ​លើ​រូបលោក​នាំគ្នា​ទៅ​រស់នៅ​ទីនោះ​ប្រមាណ​ជា ២​ម៉ឺន​នាក់។

ជុំវិញ​បញ្ហា​នេះ កាលពី​ថ្ងៃទី​០៥ ខែ​កញ្ញា ឆ្នាំ​២០២២ លោក ហ៊ុន ម៉ាណែត ដែល​ជា​បេក្ខជន​នាយករដ្ឋមន្ត្រី​របស់​បក្ស​កាន់​អំណាច បាន​លើកឡើង​ថា ការ​សាបព្រោះ​មនោគមន៍វិជ្ជា​របស់​លោក ខឹម វាសនា រហូត​នាំ​ឱ្យ​មាន​ការ​កាត់កាល់​បងប្អូន និង​ឪពុកម្ដាយ​របស់​ខ្លួន គឺជា​រឿង​ហួស​ព្រំដែន​សីលធម៌​ដែល​ដូច​គ្នា​ទៅ​នឹង​របប​ខ្មែរក្រហម​ដែរ។

ជុំវិញ​ការ​ឃោសនា​របស់​មេ​បក្ស​ជួង​នេះ បាន​ធ្វើ​ឱ្យ​គ្រួសារ​ជាច្រើន​ដែល​មកពី​ខេត្ត​ចំនួន​១៩ បាន​ព្រាត់ប្រាស​ប្តី ប្រពន្ធ និង​កូន ជាដើម ក្នុង​នោះ​ក៏​មាន​ពាក្យ​បណ្តឹង​ពី​ប្រជាពលរដ្ឋ​ពី​តាម​បណ្តា​ខេត្ត​ផ្សេងៗ​ទៅ​កាន់​អាជ្ញាធរ​ខេត្ត​សៀមរាប រហូត​ដល់​ជាង ៧០០​បណ្តឹង​ឯណោះ​ដែល​បាន​ប្តឹង​ស្វែងរក​សាច់ញាតិ ថា​បាន​ធ្លាក់​ចូល​ទៅ​ក្នុង​ការ​អូស​ទាញ​ឱ្យ​ទៅ​រស់នៅ​ក្នុង​ចម្ការ​របស់​លោក ខឹម វាសនា កាលពី​ពេល​កន្លងទៅ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស