រដ្ឋមន្ត្រីក្រសួងមហាផ្ទៃ លោក ស ខេង ថាមន្ត្រីមានសមត្ថកិច្ចទាំងអស់ត្រូវតែខិតខំដោះស្រាយកង្វល់របស់ប្រជាពលរដ្ឋឲ្យអស់ពីលទ្ធភាព និងមិនត្រូវលាក់ទុកបញ្ហាណាមួយចោលឡើយ ព្រោះរាល់បណ្ដឹង សំណើរបស់ប្រជាពលរដ្ឋ គឺជាកញ្ចក់សម្រាប់មន្ត្រីឆ្លុះមើលបញ្ហា ដើម្បីកែលំអ ខណៈការកើនឡើងនៃបណ្ដឹងករណីជួញដូរមនុស្សដែលអន្តរជាតិកំពុងយកចិត្តទុកដាក់។
អនុប្រធានបក្សកាន់អំណាច និងជារដ្ឋមន្ត្រីក្រសួងមហាផ្ទៃ លោក ស ខេង បានលើកឡើងក្នុងពិធីប្រកាសផ្ទេរភារកិច្ច និងតែងតាំងមុខតំណែងអគ្គាធិការនៃអគ្គាធិការដ្ឋានក្រសួងមហាផ្ទៃ ដល់មន្ត្រីថ្មីរបស់ខ្លួនកាលពីថ្ងៃទី៧ ខែកញ្ញា ឆ្នាំ២០២២ ដោយបញ្ជាក់ថា ការខិតខំប្រមូល និងទទួលយកសំណើ និងសំណូមពរ រួមទាំងក្ដីកង្វល់នានារបស់ប្រជាពលរដ្ឋដែលពាក់ព័ន្ធនឹងសមត្ថកិច្ចក្រសួងមហាផ្ទៃ ទោះមានប្រភពចេញពីប្រជាពលរដ្ឋដោយផ្ទាល់ ឬចេញពីប្រព័ន្ធផ្សព្វផ្សាយ និងមកតាមច្រកណាក៏ដោយ គឺត្រូវបង្កើនការយកចិត្តទុកដាក់ដោះស្រាយបញ្ហានេះឲ្យបានលឿន រហ័ស និងប្រកបដោយប្រសិទ្ធភាព ត្បិតមានបណ្ដឹង សំណើ និងសំណូមពរជាច្រើនទៀតនៅមិនទាន់បានដោះស្រាយចប់នៅឡើយ។
លោកបន្ថែមថា ក្រសួងមហាផ្ទៃមានភារកិច្ចធំៗពីរ គឺត្រូវរក្សាសន្តិសុខ សណ្ដាប់ធ្នាប់សាធារណៈជូនប្រជាពលរដ្ឋពីអំពើខុសច្បាប់ផ្សេងៗ ដូចជាអំពើជួញដូរមនុស្ស និងត្រូវផ្តល់នូវកិច្ចការរដ្ឋបាលមូលដ្ឋាន ឬរដ្ឋបាលថ្នាក់ក្រោមជាតិដល់ប្រជាពលរដ្ឋផងដែរ។
កាលពីថ្ងៃទី៦ ខែកញ្ញា ឆ្នាំ២០២២ ក្រសួងមហាផ្ទៃបានបញ្ចេញសេចក្តីរាយការណ៍របស់ខ្លួនថា ចាប់ពីថ្ងៃទី១៨ ខែសីហា ដល់ថ្ងៃទី៦ ខែកញ្ញា ឆ្នាំ២០២២ នេះ ក្រសួងបានទទួលពាក្យបណ្តឹងសរុបចំនួន ១២៥បណ្តឹងពាក់ព័ន្ធនឹងការស្នើសុំអន្តរាគមន៍ជួយសង្គ្រោះជនបរទេស ដែលត្រូវបានគេអះអាងថាបង្ខាំង និងជួញដូរកម្លាំងពលកម្មក្នុងប្រទេសកម្ពុជា។
ជុំវិញអំពើជួញដូរមនុស្សនេះ ប្រទេសកម្ពុជាត្រូវបានដាក់បញ្ចូលទៅក្នុងបញ្ជីខ្មៅកម្រិត៣ (Tier 3 Watch List) ដោយក្រសួងការបរទេសសហរដ្ឋអាមេរិក ក្នុងសេចក្តីរាយការណ៍ប្រចាំឆ្នាំ២០២២ ស្ដីពីការជួញដូរមនុស្សដែលមានកម្រិតធ្ងន់ធ្ងរ កាលពីថ្ងៃទី១៩ ខែកក្កដា ឆ្នាំ២០២២ កន្លងទៅ។
ទាក់ទិននឹងបញ្ហានេះ សារព័ត៌មាន The Australian បានចេញផ្សាយកាលពីពេលថ្មីៗនេះថា ប្រទេសកម្ពុជាកំពុងរងនូវការសង្ស័យថាកំពុងប្រព្រឹត្តអំពើជួញដូរមនុស្សយ៉ាងធំដែលគ្រប់គ្រងដោយក្រុមឧក្រិដ្ឋជនលាងលុយជនជាតិចិន ដោយជាប់ពាក់ព័ន្ធយ៉ាងខ្លាំងជាមួយនឹងក្មួយប្រុសរបស់មេដឹកនាំផ្ដាច់ការកម្ពុជា លោក ហ៊ុន សែន គឺលោក ហ៊ុន តូ។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី បានប្រាប់សារព័ត៌មានក្នុងស្រុកថា ការដោះស្រាយបញ្ហាពលរដ្ឋ រួមទាំងបញ្ហាសង្គមប្រកបដោយប្រសិទ្ធភាព ដើម្បីជំរុញចរន្តសេដ្ឋកិច្ចសង្គមជាចំណុចអាទិភាព និងជាការទទួលខុសត្រូវរបស់បក្សកាន់អំណាច។ លោកថា ការជំរុញជាថ្មីទៀតរបស់ថ្នាក់ដឹកនាំកំពូលនៅក្រសួងមហាផ្ទៃអំពីបញ្ហានេះ អាចជាការតានតឹងចិត្តចំពោះមន្ត្រីផ្តល់សេវាដែលមិនទាន់អនុវត្តឱ្យមានប្រសិទ្ធភាពនៅឡើយ។
លោកថា ដើម្បីពង្រឹងប្រសិទ្ធភាពទប់ស្កាត់បទល្មើសនានា រួមទាំងការផ្តល់សេវាសាធារណៈប្រកបដោយគុណភាព ក្រសួងគួរតែបង្កើតយន្តការតាមដានប្រសិទ្ធភាពការងាររបស់មន្ត្រីពីថ្នាក់ជាតិរហូតឃុំ-សង្កាត់ និងត្រូវភ្ជាប់នូវវិធានការវះកាត់មន្ត្រីអសកម្ម និងមន្ត្រីពុករលួយផងដែរ ព្រមទាំងពង្រឹងធនធានមនុស្សជំនាន់ថ្មីដែលមានសមត្ថភាព ជាដើម៕