អ្នកឃ្លាំមើលស្ថានការណ៍កម្ពុជា អះអាងថា មន្ត្រីគណបក្សប្រជាជនកម្ពុជាថាលោក ហ៊ុន សែន កំពុងរៀបល្បិចកលនយោបាយកម្ចាត់បណ្ដាញសមាជិកបក្សគាំទ្រគ្រួសារលោក ស ខេង និងបណ្ដាញសមាជិកបក្សដែលគាំទ្រលោក ទៀ បាញ់ ដើម្បីឱ្យត្រកូលហ៊ុនអាចក្តោបក្តាប់អំណាចផ្ដាច់មុខនៅថ្ងៃអនាគត។
ប្រធានវិទ្យុផ្សាយសំឡេងប្រជាធិបតេយ្យ វីអូឌី លោក ប៉ា ងួនទៀង បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃទី០១ ខែតុលា ថា លោក ហ៊ុន សែន ជាមនុស្សដែលមានប្រវត្តិប្លន់អំណាចពីអ្នកដទៃដើម្បីផលប្រយោជន៍ខ្លួនឯង និងក្រុមគ្រួសាររបស់គាត់រហូតមក ដូច្នេះមន្ត្រីគណបក្សប្រជាជនកម្ពុជា សូមកុំសង្ឃឹមថាមេបក្សរបស់ខ្លួនរូបនេះធ្វើអ្វីៗដើម្បីផលប្រយោជន៍គណបក្ស និងសមាជិកបក្សនេះឱ្យសោះ។
លោក ប៉ា ងួនទៀង រំលឹកថា អំឡុងទសវត្សរ៍១៩៨០ លោក ហ៊ុន សែន បានប្លន់អំណាចពីលោក ប៉ែន សុវណ្ណ និងលោក ចាន់ ស៊ី ដើម្បីឱ្យខ្លួនគាត់ឡើងកាន់តំណែងជានាយករដ្ឋមន្ត្រី ហើយក្រោយមកនៅទសវត្សរ៍១៩៩០ គាត់ក៏បានប្លន់អំណាចពីសម្តេចក្រុមព្រះ នរោត្តម រណឫទ្ធិ ម្តងទៀតដែរ។
លោកថា ក្នុងពេលដែលបង្ក្រាបដៃគូនយោបាយឱ្យចុះខ្សោយ លោក ហ៊ុន សែន ក៏ឆ្លៀតប្លន់អំណាចផ្ទៃក្នុងគណបក្សប្រជាជនកម្ពុជាដែរ គឺប្លន់អំណាចពីលោក ជា ស៊ីម អំឡុងឆ្នាំ២០០០ ដែលនៅពេលនោះ លោក ជា ស៊ីម គឺជាប្រធានគណបក្សប្រជាជនកម្ពុជា។
អ្នកឃ្លាំមើលស្ថានការណ៍កម្ពុជារូបនេះលើកឡើងថា ប្រវត្តិដ៏អាក្រក់របស់លោក ហ៊ុន សែន ក្នុងការប្រើល្បិចកលនយោបាយបែបនេះ ក៏បង្ហាញឱ្យឃើញដែរថា លោក ហ៊ុន សែន នឹងប្រមូលអំណាចក្នុងគណបក្សប្រជាជនកម្ពុជាយកមកគ្រប់គ្រងទាំងអស់ នៅពេលដែលគាត់អាចបង្ក្រាបអ្នករិះគន់ និងអ្នកប្រឆាំងការដឹកនាំរបស់គាត់បានជោគជ័យហើយនោះ។
លោកបន្តថា ការបង្ក្រាបអ្នករិះគន់ និងអ្នកប្រឆាំងការដឹកនាំរបស់គាត់បានជោគជ័យ មិនមែនមានន័យថាជាជោគជ័យរបស់គណបក្សប្រជាជនកម្ពុជាទេ គឺជាជោគជ័យរបស់គាត់តែម្នាក់គត់ ព្រោះផែនការបន្ទាប់ គាត់នឹងបង្ក្រាបផ្ទៃក្នុងគណបក្សប្រជាជនកម្ពុជាដូចដែលគាត់ធ្លាប់ធ្វើកន្លងមកដែរ ដើម្បីកាន់កាប់អំណាចផ្ដាច់មុខនៅកម្ពុជាសម្រាប់តែគ្រួសាររបស់គាត់ប៉ុណ្ណោះ។
លោក ប៉ា ងួនទៀង បញ្ជាក់ថា មន្ត្រី និងសមាជិកគណបក្សប្រជាជនកម្ពុជា តែងតែនាំគ្នាសើចសប្បាយលើគំនរទុក្ខរបស់ក្រុមប្រឆាំងដែលលោក ហ៊ុន សែន បានបង្ក្រាប ប៉ុន្តែសំណើចទាំងនេះនឹងប្រែទៅជាទឹកភ្នែកវិញ នៅពេលដែលលោក ហ៊ុន សែន បង្ក្រាបពួកគេវិញម្តងនៅពេលក្រោយ។
ជុំវិញបញ្ហានេះ ប្រធានក្រុមប្រឹក្សាឃ្លាំមើលកម្ពុជា និងជាអនុប្រធានវេទិកាពលរដ្ឋ លោក ម៉ែន ណាត ប្រាប់សារព័ត៌មាន The Cambodia Daily នៅថ្ងៃទី១ តុលា នេះថា អំណាច និងតំណែងជានាយករដ្ឋមន្ត្រីរបស់លោក ហ៊ុន សែន គឺជាតំណែង និងអំណាចដែលបានមកពីការប្លន់អ្នកដទៃដែលមានវៀតណាម ជាខ្នងបង្អែកប៉ុណ្ណោះ។
លោក ហ៊ុន សែន ធ្លាប់បានលើកឡើងកាលពីពេលកន្លងទៅថា អ្នកដែលចង់ជីករំលើងឫសគល់ត្រកូលហ៊ុន ទាល់តែពួកគេយកឈ្នះគណបក្សប្រជាជនកម្ពុជាជាមុនសិន ខណៈមន្ត្រីជាន់ខ្ពស់បក្សកាន់អំណាចក៏គ្មាននរណាម្នាក់ហ៊ានជីករំលើងឫសគល់ត្រកូលហ៊ុនដែរ ក្នុងនោះ អនុប្រធានបក្សកាន់អំណាច លោក ស ខេង ក៏មិនមានបំណងដណ្តើមអំណាចពីត្រកូលហ៊ុនផងដែរ៕
© 2024, ឌឹ ខេមបូឌា ដេលី. All rights reserved.