26 C
Phnom Penh

អនុ​ប្រធានាធិបតី​អាមេរិក​ទៅ​ដល់​កូរ៉េ​ខាងត្បូង​មួយ​ថ្ងៃ​បន្ទាប់​ពី​កូរ៉េ​ខាងជើង​បាញ់​មីស៊ីល​គំរាម​សន្តិសុខ​ឧបទ្វីប

ដោយ ឌឹ ខេមបូឌា ដេលី

បទវិភាគ

អនុប្រធានាធិបតី​សហរដ្ឋ​អាមេរិក អ្នកស្រី កាម៉ាឡា ហារីស បាន​ធ្វើ​ដំណើរ​ទៅ​ដល់​កូរ៉េ​ខាងត្បូង​ហើយ​នៅ​ថ្ងៃ​ព្រហស្បតិ៍ ទី​២៩ កញ្ញា នេះ ដើម្បី​ពង្រឹង​សម្ពន្ធភាព​របស់​ទីក្រុង​វ៉ាស៊ីនតោន ជាមួយ​ទីក្រុង​សេអ៊ូល។

ទស្សនកិច្ច​របស់​អនុប្រធានាធិបតី​នៃ​ប្រទេស​មហាអំណាច​នេះ ធ្វើឡើង​មួយ​ថ្ងៃ​ប៉ុណ្ណោះ​បន្ទាប់ពី​កូរ៉េ​ខាងជើង​បាញ់​សាកល្បង​មីស៊ីល​ផ្លោង ដែល​ជា​សញ្ញា​នៃ​ការ​ព្រមាន​ចំពោះ​វត្តមាន​អ្នកស្រី ហារីស។ នេះ​បើ​តាម​ការ​ចេញ​ផ្សាយ​ដោយ​ទីភ្នាក់ងារ​សារព័ត៌មាន Reuters នៅ​ថ្ងៃ​ព្រហស្បតិ៍ ទី​២៩ ខែ​កញ្ញា នេះ។

ប្រភព​ដដែល​ឲ្យ​ដឹង​ថា អ្នកស្រី ហារីស បាន​ធ្វើ​ដំណើរ​ទៅ​ដល់​មូលដ្ឋាន​ទ័ព​អាកាស Osan ក្រោយពី​បញ្ចប់​ទស្សនកិច្ច​នៅ​ជប៉ុន ដោយ​បាន​ចូលរួម​ពិធី​បុណ្យសព​ថ្នាក់​ជាតិ​នៃ​សព​អតីត​នាយករដ្ឋមន្ត្រី​ជប៉ុន លោក ស៊ិនហ្សូ អាបេ។ នៅ​ក្នុង​ដំណើរ​ទស្សនកិច្ច​នេះ អ្នកស្រី​ត្រូវ​ជួប​ពិភាក្សា​ការងារ​ជាមួយ​ប្រធានាធិបតី​កូរ៉េ​ខាងត្បូង លោក យូន ស៊ុក យុល។

តាម​ដំណឹង​មក​ថា អនុប្រធានាធិបតី​សហរដ្ឋ​អាមេរិក អ្នកស្រី ហារីស ត្រូវ​ធ្វើ​ទស្សនកិច្ច​ទៅ​កាន់​តំបន់​គ្មាន​យោធា​នៅ​ព្រំដែន​រវាង​ប្រទេស​កូរ៉េ​ខាងត្បូង និង​ប្រទេស​កូរ៉េ​ខាងជើង នៅ​ថ្ងៃ​ព្រហស្បតិ៍​នេះ។ នេះ​បើ​តាម​ការ​បញ្ជាក់​របស់​មន្ត្រី​សេតវិមាន។

ដំណើរ​ទស្សនកិច្ច​របស់​អ្នកស្រី ហារីស ទៅ​កាន់​តំបន់​គ្មាន​យោធា​នេះ នឹង​ក្លាយ​ជា​ដំណើរ​ទស្សនកិច្ច​ដែល​មាន​ការ​ចាប់អារម្មណ៍​ខ្លាំង​នៃ​មន្ត្រី​សហរដ្ឋ​អាមេរិក​ទៅ​កាន់​កូរ៉េ​ខាងត្បូង ធ្វើឡើង​បន្ទាប់ពី​ប្រធាន​រដ្ឋសភា អ្នកស្រី ណាន់ស៊ី ប៉េឡូស៊ី បាន​ទៅ​កាន់​ប្រទេស​អាស៊ី​ខាងត្បូង​នេះ​កាលពី​ថ្ងៃទី​៣ សីហា។

អនុប្រធានាធិបតី​សហរដ្ឋ​អាមេរិក អ្នកស្រី កាម៉ាឡា ហារីស (Kamala Harris) និង​ប្រធានាធិបតី​កូរ៉េ​ខាងត្បូង លោក យូន ស៊ុក យុល (Yoon Suk Yeol) ក្នុង​កិច្ចប្រជុំ​នៅ​ទីក្រុង​សេអ៊ូល ប្រទេស​កូរ៉េ​ខាងត្បូង ថ្ងៃទី​២៩ ខែ​កញ្ញា ឆ្នាំ​២០២២។

អ្នកស្រី ហារីស បាន​ចំណាយ​ពេល​ទស្សនកិច្ច​របស់​អ្នកស្រី​នៅ​សប្ដាហ៍​នេះ​នៅ​ក្នុង​ប្រទេស​ជប៉ុន។

ទាំង​ប្រទេស​ជប៉ុន និង​កូរ៉េ​ខាងត្បូង គឺជា​ប្រទេស​នៅ​តំបន់​អាស៊ី​ខាងកើត​ដែល​រដ្ឋការ​របស់​ប្រធានាធិបតី​សហរដ្ឋ​អាមេរិក លោក ចូ បៃដិន (Joe Biden) យល់​ឃើញ​ថា​ជា​សម្ពន្ធមិត្ត​ដ៏​សំខាន់​នៅ​ក្នុង​តំបន់​នៅ​ចំ​ពេល​ដែល​ចិន កំពុង​បង្ហាញ​ឥរិយាបថ​អនុត្តរភាព​ខ្លាំង​ជាង​មុន។

វត្តមាន​របស់​អ្នកស្រី ហារីស នៅ​លើ​ទឹកដី​នៃ​ប្រទេស​ជប៉ុន ស្ថិត​ក្នុង​ចំណោម​ឥស្សរជន​បរទេស​ជាច្រើន​រូប​ដែល​ចូលរួម​ក្នុង​ពិធី​បុណ្យសព​ផ្លូវរដ្ឋ​របស់​អតីត​នាយករដ្ឋមន្ត្រី​ជប៉ុន លោក ស៊ិនហ្សូ អាបេ កាលពី​ថ្ងៃ​អង្គារ នៅ​ក្នុង​ទីក្រុង​តូក្យូ ប្រទេស​ជប៉ុន។

នៅ​ក្នុង​ដំណើរ​ទស្សនកិច្ច​របស់​អ្នកស្រី​នៅ​ក្នុង​ប្រទេស​ជប៉ុន អ្នកស្រី​បាន​សង្កត់​ធ្ងន់​អំពី​សារសំខាន់​នៃ​សម្ពន្ធភាព​រវាង​សហរដ្ឋ​អាមេរិក និង​ប្រទេស​ជប៉ុន នៅ​ចំ​ពេល​ដែល​មាន​ការ​ប្រឈម​នឹង​ឥទ្ធិពល​របស់​ប្រទេស​ចិន។ អ្នកស្រី​បញ្ជាក់​ថា៖ «សម្ពន្ធភាព​រវាង​ជប៉ុន និង​សហរដ្ឋ​អាមេរិក គឺជា​គ្រឹះ​នៃ​អ្វី​ដែល​ប្រទេស​ទាំង​ពីរ​ជឿ​ថា​មាន​សារសំខាន់​ចំពោះ​សន្តិភាព ស្ថិរភាព និង​វិបុលភាព​នៅ​ក្នុង​តំបន់​ឥណ្ឌូ​ប៉ាស៊ីហ្វិក»

នេះ​គឺជា​អាទិភាព​នៃ​ការ​ផ្ដល់​ប្រយោជន៍​ខ្ពស់​បំផុត​ដល់​ពលរដ្ឋ​អាមេរិកាំង​ទាក់ទិន​នឹង​សន្តិសុខ និង​វិបុលភាព​របស់​ពួកគេ ហើយ​សម្រាប់​អាមេរិក​ក៏​ជឿជាក់​ថា បាន​ផ្ដល់​ប្រយោជន៍​ដល់​ពលរដ្ឋ​ជប៉ុន​ដូច​គ្នា​ដែរ។

ជាមួយ​គ្នា​នេះ អនុប្រធានាធិបតី​សហរដ្ឋ​អាមេរិក​រូប​នេះ​បាន​វាយប្រហារ​គោលនយោបាយ​ការបរទេស​របស់​ចិន នៅ​ក្នុង​សុន្ទរកថា​មួយ​នៅ​ក្នុង​ប្រទេស​ជប៉ុន ដោយ​អ្នកស្រី​និយាយ​ថា ឥរិយាបថ​បែប​គឃ្លើន​របស់​ចិន កំពុង​គំរាមកំហែង​ដល់​សណ្ដាប់ធ្នាប់​អន្តរជាតិ។

អ្នកស្រី ហារីស បាន​លើកឡើង​ដូច្នេះ​នៅ​ក្នុង​ការ​ថ្លែង​ទៅ​កាន់​កងទ័ព​អាមេរិក​នៅ​លើ​នាវា​ពិឃាត USS Howard នៃ​កងទ័ព​ជើងទឹក​សហរដ្ឋ​អាមេរិក​ដែល​ចត​នៅ​ឯ​មូលដ្ឋាន​កងទ័ព​ជើងទឹក Yokosuka ដែល​ជា​មូលដ្ឋាន​កងទ័ព​ជើងទឹក​ធំ​ជាងគេ​បង្អស់​របស់​អាមេរិក​នៅ​លើ​ពិភពលោក ហើយ​វត្តមាន​របស់​អ្នកស្រី ហារីស ក៏​ដើម្បី​សួរ​សុខទុក្ខ​កងទ័ព​អាមេរិក​ដែរ។

ថ្លែង​នៅ​ចំពោះ​មុខ​ទ័ព​អាមេរិក អ្នកស្រី​សង្កត់​ធ្ងន់​ថា៖ «ចិន​បាន​បង្ក​ឱ្យ​មាន​បញ្ហា​ប្រឈម​ចំពោះ​សេរីភាព​ដែនសមុទ្រ ហើយ​ចិន​បាន​ដំឡើង​អំណាច​យោធា និង​សេដ្ឋកិច្ច​របស់​ខ្លួន​ដើម្បី​បង្ខិតបង្ខំ និង​គំរាមកំហែង​ប្រទេស​ជិតខាង​របស់​ខ្លួន»

អ្នកស្រី ហារីស បន្ត​វាយប្រហារ​ប្រទេស​ចិន ថា​មាន​ឥរិយាបថ​បែប​បង្ក​ជម្លោះ​នៅ​សមុទ្រ​ចិន​ខាងកើត និង​សមុទ្រ​ចិន​ខាងត្បូង និង​ការ​បង្កហេតុ​កាលពី​ពេល​ថ្មីៗ​នេះ​នៅ​ទូទាំង​ច្រក​សមុទ្រ​តៃវ៉ាន់។

បើ​តាម​អ្នកស្រី ហារីស សហរដ្ឋ​អាមេរិក​ជឿ​ថា សន្តិភាព និង​ស្ថិរភាព​នៅ​ច្រក​សមុទ្រ​តៃវ៉ាន់ គឺជា​កត្តា​សំខាន់​មួយ​របស់​តំបន់​ឥណ្ឌូ​ប៉ាស៊ីហ្វិក​ដែល​មាន​លក្ខណៈ​សេរី និង​បើកចំហ ហើយ​ចំពោះ​អាមេរិក​នឹង​បន្ត​ធ្វើ​ការ​ហោះហើរ ធ្វើ​នាវាចរណ៍​ដោយ​មិន​ញញើត និង​ខ្លបខ្លាច​អ្វី​នោះ​ទេ ព្រោះ​ធ្វើឡើង​ស្រប​តាម​ច្បាប់​អន្តរជាតិ។

សហរដ្ឋ​អាមេរិក ជប៉ុន និង​កូរ៉េ​ខាងត្បូង នៅ​ថ្ងៃ​សុក្រ​ក្នុង​សប្ដាហ៍​នេះ នឹង​បើក​ធ្វើ​សមយុទ្ធ​រួម​គ្នា​នៅ​សមុទ្រ​ចិន​ខាងកើត។ សមយុទ្ធ​នេះ​មាន​ទាំង​នាវាចម្បាំង នាវាមុជទឹក និង​យន្តហោះ​ចម្បាំង។ សមយុទ្ធ​ត្រីភាគី​នេះ គឺ​ដើម្បី​ឆ្លើយតប​កូរ៉េ​ខាងជើង​ដែល​បន្ត​បាញ់​មីស៊ីល​ផ្លោង​គំរាម​កូរ៉េ​ខាងត្បូង និង​ជប៉ុន។

តាម​ដំណឹង​មក​ថា អ្នកស្រី ហារីស បាន​ទៅ​ដល់​តំបន់​ព្រំដែន​កូរ៉េ​ខាងត្បូង ដែល​ជាប់​នឹង​ព្រំដែន​កូរ៉េ​ខាងជើង ជា​តំបន់​ដែល​គ្មាន​កងទ័ព។ អ្នកស្រី​បាន​ឡើង​លើ​ប៉ម​យាម​ព្រំដែន ដោយ​សម្លឹង​ទៅ​រក​ទឹកដី​កូរ៉េ​ខាងជើង។ ក្នុង​ឱកាស​នោះ អ្នកស្រី​និយាយ​ថា មិន​ខ្លាច​ញញើត​ការ​គំរាមកំហែង​ពី​សំណាក់​កូរ៉េ​ខាងជើង​នោះ​ទេ។ អ្នកស្រី​ទទូច​ថា រដ្ឋ​ផ្ដាច់ការ​មួយ​នេះ​គួរ​បោះបង់​ចោល​កម្មវិធី​នុយក្លេអ៊ែរ ហើយ​លើកស្ទួយ​ជីវភាព​របស់​ប្រជាជន គឺជា​ការ​ចាំបាច់។

វត្តមាន​របស់​អនុប្រធានាធិបតី​អាមេរិក​រូប​នេះ​នៅ​តំបន់​ព្រំដែន​គ្មាន​កងទ័ព បន្ទាប់ពី​អ្នកស្រី​បាន​ជួប​ជាមួយ​លោក​ប្រធានាធិបតី​កូរ៉េ​ខាងត្បូង លោក យូន ស៊ុក យុល នៅ​ទីក្រុង​សេអ៊ូល រួច​ទៅ​ហើយ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស