31 C
Phnom Penh

ឧបទ្វីប​កូរ៉េ​អាច​ស្ថិត​លើ​វិថី​នៃ​សង្គ្រាម​ជា​ថ្មី បន្ទាប់ពី​កូរ៉េ​ខាងជើង​បាញ់​មីស៊ីល​រំលង​ជប៉ុន

ដោយ ឌឹ ខេមបូឌា ដេលី

បទវិភាគ

នៅ​ថ្ងៃទី​៤ តុលា នេះ ស្ថានភាព​តានតឹង​នៅ​ឧបទ្វីប​កូរ៉េ​ឡើង​កំដៅ​យ៉ាង​ខ្លាំង បន្ទាប់ពី​កូរ៉េ​ខាងជើង​បាញ់​មីស៊ីល​ផ្លោង​ហោះ​រំលង​ប្រទេស​ជប៉ុន ដែល​ជា​ការ​គំរាម​ទាំង​ជប៉ុន និង​កូរ៉េ​ខាងត្បូង រួម​ទាំង​សហរដ្ឋ​អាមេរិក។

បើ​តាម​ការ​ចុះផ្សាយ​របស់​ទីភ្នាក់ងារ​សារព័ត៌មាន​បារាំង AFP ឲ្យ​ដឹង​ថា កូរ៉េ​ខាងជើង នៅ​ថ្ងៃ​អង្គារ​នេះ បាន​បាញ់​មីស៊ីល​ផ្លោង​មួយ​គ្រាប់​ហោះ​រំលង​ប្រទេស​ជប៉ុន ដែល​ជា​លើកដំបូង​ក្នុង​រយៈពេល​ជាង ៥​ឆ្នាំ​មក​នេះ។ ហេតុការណ៍​នេះ បាន​រុញ​ឲ្យ​រដ្ឋាភិបាល​ជប៉ុន ប្រកាស​អាសន្ន​ប្រាប់​ពលរដ្ឋ​របស់​ខ្លួន​ឲ្យ​រត់​រក​ទី​សុវត្ថិភាព ខណៈ​មីស៊ីល​មួយ​គ្រាប់​បាន​ហោះ​រំលង​ឆ្លងកាត់​ទឹកដី​របស់​ខ្លួន មុន​នឹង​ធ្លាក់​ចូល​មហាសមុទ្រ​ប៉ាស៊ីហ្វិក។

មីស៊ីល​ផ្លោង​ដែល​កូរ៉េ​ខាងជើង​បាន​បាញ់​សាកល្បង​ថ្មី​ទៀត​នេះ ត្រូវ​បាន​កងទ័ព​ជប៉ុន​អះអាង​ថា អាច​ហោះ​បាន​ចម្ងាយ​ពី ៤៥០០ ទៅ ៤៦០០​គីឡូម៉ែត្រ​ក្នុង​រយៈកម្ពស់ ១​ពាន់​គីឡូម៉ែត្រ។

ចំណែក​ឯ​កងទ័ព​កូរ៉េ​ខាងត្បូង ក៏​បាន​ឱ្យ​ដឹង​ដែរ​ថា កូរ៉េ​ខាងជើង​ពិត​ជា​បាន​បាញ់​មីស៊ីល​ផ្លោង​រយៈ​ចម្ងាយ​មធ្យម​ជា​ប្រភេទ​មីស៊ីល IRBM មួយ​គ្រាប់ ដោយ​បាញ់​ចេញពី​ខេត្ត Jagang របស់​កូរ៉េ​ខាងជើង។

រដ្ឋមន្ត្រី​ការពារ​ជាតិ​ជប៉ុន លោក Yasukazu Hamada និយាយ​ថា ជប៉ុន​កំពុង​ពិចារណា​អំពី​ជម្រើស​ទាំងអស់​រាប់​ទាំង​ការ​ឆ្លើយតប​ដោយ​អាវុធ​ផង​ដែរ។

ថ្លែង​នៅ​ក្នុង​សន្និសីទ​សារព័ត៌មាន​មួយ​នៅ​ថ្ងៃ​អង្គារ​នេះ លោក Hamada បាន​បញ្ជាក់​ថា៖ «ស្ថានភាព​នេះ ជប៉ុន​បន្ត​ត្រួតពិនិត្យ​លើ​គ្រប់​ជម្រើស​ទាំងអស់ ក្នុង​នោះ​រួម​មាន​ទាំង​សមត្ថភាព​វាយបក ដោយ​មិន​ច្រានចោល​នូវ​ជម្រើស​ណា​មួយ ខណៈ​ជប៉ុន​កំពុង​បន្ត​ពង្រឹង​សមត្ថភាព​ការពារ​ជាតិ»

ការ​ដែល​កូរ៉េ​ខាងជើង បាញ់​មីស៊ីល​ផ្លោង​ដោយ​បាញ់​ហោះ​រំលង​ប្រទេស​ជប៉ុន កំពុង​ទាញ​សញ្ញា​អាសន្ន​ថា ឧបទ្វីប​កូរ៉េ និង​ដែនដី​អាស៊ី​ខាងកើត អាច​ប្រឈមមុខ​នឹង​ការ​ផ្ទុះ​សង្គ្រាម​ជា​ថ្មី​ម្ដង​ទៀត ដែល​វា​បាន​បិទ​បញ្ចប់​កាលពី​ក្នុង​ឆ្នាំ​១៩៥៣ ម្តង​រួច​មក​ហើយ​នោះ។

សហរដ្ឋ​អាមេរិក​ដែល​ជា​ប្រទេស​មហាអំណាច​យោធា​លំដាប់​ទី​១ ពិភពលោក បាន​ធ្វើការ​ឆ្លើយតប​ភ្លាមៗ​ដោយ​ការ​បញ្ចេញ​យន្តហោះ​ចម្បាំង​ហោះ​ធ្វើ​សមយុទ្ធ​រួម​គ្នា​ជាមួយ​យន្តហោះ​កូរ៉េ​ខាងត្បូង។

ក្នុង​ការ​ធ្វើ​សមយុទ្ធ​នេះ យន្តហោះ​សហរដ្ឋ​អាមេរិក និង​កូរ៉េ​ខាងត្បូង បាន​ទម្លាក់​គ្រាប់បែក​ខ្នាត​ធំ​ចំនួន ២​គ្រាប់។ កងទ័ព​កូរ៉េ​ខាងត្បូង​និយាយ​ថា ការ​ទម្លាក់​គ្រាប់បែក​ត្រូវ​បាន​ធ្វើឡើង​នៅ​ទីលាន​អនុវត្ត​សមយុទ្ធ​មួយ​កន្លែង​ស្ថិត​នៅ​កោះ Jikdo ដែល​ពុំ​មាន​មនុស្ស​រស់នៅ លើ​ផ្ទៃសមុទ្រ​លឿង ដោយ​មាន​ការ​ចូលរួម​ពី​យន្តហោះ​ចម្បាំង F-15K ចំនួន ៤​គ្រឿង​របស់​កូរ៉េ​ខាងត្បូង ហើយ​និង​យន្តហោះ​ចម្បាំង F-16 ចំនួន ៤​គ្រឿង​របស់​សហរដ្ឋ​អាមេរិក។

កាលពី​សប្ដាហ៍​មុន​នេះ អ្នកស្រី​អនុ​ប្រធានាធិបតី​សហរដ្ឋ​អាមេរិក កាម៉ាឡា ហារីស បាន​ទៅ​កាន់​ប្រទេស​ជប៉ុន មុន​នឹង​ទៅ​កូរ៉េ​ខាងត្បូង។

នៅ​ក្រុង​តូក្យូ អ្នកស្រី ហារីស បាន​ជួប​ជាមួយ​នាយករដ្ឋមន្ត្រី​ជប៉ុន Fumio Kishida។ មួយ​ថ្ងៃ​ក្រោយ​មក អ្នកស្រី ហារីស បាន​ទៅ​ដល់​ក្រុង​សេអ៊ូល ដោយ​បាន​ជួប​ប្រធានាធិបតី​កូរ៉េ​ខាងត្បូង Yoon Suk-yeol។ ទោះបី​ជំនួប​ដាច់ដោយឡែក​ពី​គ្នា​មែន តែ​អ្នកស្រី ហារីស បាន​សន្យា​ជួយ​ប្រទេស​កូរ៉េ​ខាងត្បូង និង​ជប៉ុន នៅ​គ្រប់​ស្ថានការណ៍​ទាំងអស់​ដែល​កូរ៉េ​ខាងជើង​បង្ក​រឿង។

ចំពោះ​កូរ៉េ​ខាងជើង​បាញ់​មីស៊ីល​ផ្លោង​ហោះ​រំលង​ប្រទេស​ជប៉ុន សហរដ្ឋ​អាមេរិក ជប៉ុន និង​កូរ៉េ​ខាងត្បូង បាន​ថ្កោលទោស​យ៉ាង​ខ្លាំង។ ប្រធានាធិបតី​កូរ៉េ​ខាងត្បូង Yoon Suk-yeol បាន​ថ្លែង​ថា ការ​ឆ្លើយតប​របស់​កូរ៉េ​ខាងត្បូង គឺជា​រឿង​ត្រឹមត្រូវ។ លោក​បាន​ហៅ​ទង្វើ​របស់​កូរ៉េ​ខាងជើង​ថា​មិន​អាច​ទទួល​យក​បាន​ឡើយ។

ចំណែក​នាយករដ្ឋមន្ត្រី​ជប៉ុន Fumio Kishida ព្រមាន​ថា ជប៉ុន​មិន​ចង់​បង្ក​រឿង​ឆ្លើយតប​នោះ​ទេ។ តែ​លោក​ថា ជប៉ុន​មាន​ភាព​អត់ធ្មត់ តែ​ក៏​មាន​ព្រំដែន​កំណត់​ដែរ។ ជាមួយ​គ្នា​នេះ រដ្ឋមន្ត្រី​ការបរទេស​អាមេរិក Antony Blinken បាន​ហៅ​ទូរស័ព្ទ​ទៅ​សមភាគី​ជប៉ុន និង​កូរ៉េ​ខាងត្បូង។ នេះ​បើ​តាម​អ្នក​នាំពាក្យ​ក្រសួង​ការបរទេស​អាមេរិក លោក Ned Price។

បើ​តាម​អ្នក​នាំពាក្យ​រូប​នេះ អាមេរិក​បាន​បន្ត​សន្យា​ជួយ​ការពារ​ទាំង​កូរ៉េ​ខាងត្បូង និង​ប្រទេស​ជប៉ុន ប្រឆាំង​នឹង​ការ​គំរាម​ពី​សំណាក់​កូរ៉េ​ខាងជើង។

លោក​រដ្ឋមន្ត្រី​ការបរទេស​អាមេរិក បាន​ប្រាប់​ថា អាមេរិក​នឹង​ស្នើ​ឱ្យ​ក្រុមប្រឹក្សា​សន្តិសុខ​នៃ​អង្គការ​សហប្រជាជាតិ បើក​កិច្ចប្រជុំ​ជាបន្ទាន់​ដើម្បី​ពិនិត្យ​ស្ថានការណ៍​ចុងក្រោយ​នៅ​លើ​ឧបទ្វីប​កូរ៉េ​ដែល​កំពុង​រង​ការ​គំរាម​យ៉ាង​ខ្លាំង​ពី​សំណាក់​ក្រុង​ព្យុងយ៉ាង។

ចំពោះ​ស្ថានការណ៍​ចុងក្រោយ​នេះ ដែល​ឧបទ្វីប​កូរ៉េ​រង​ការ​បង្ក​សង្គ្រាម​ពី​សំណាក់​កូរ៉េ​ខាងជើង​ជា​រដ្ឋ​កុម្មុយនីស្ត​ផ្ដាច់ការ អ្នកជំនាញ​យោធា​ព្រមាន​ថា បើ​សង្គ្រាម​ផ្ទុះ​ឡើង គឺ​មិនមែន​ជា​សង្គ្រាម​លើ​ឧបទ្វីប​កូរ៉េ​នោះ​ទេ គឺ​វា​អាច​សង្គ្រាម ៣​ប្រទេស​រួម​គ្នា​វាយ​លើ​កូរ៉េ​ខាងជើង។ ប្រទេស​បី​នេះ គឺ​សហរដ្ឋ​អាមេរិក ជប៉ុន និង​កូរ៉េ​ខាងត្បូង។ ប្រទេស​បី​នេះ​បាន​កំពុង​ក្លាយ​ជា​សន្ធិសញ្ញា​យោធា​ត្រីភាគី​រួម​គ្នា៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស