លោក ហ៊ុន សែន គំរាមថា ប្រជាពលរដ្ឋខ្មែរមានជម្រើសតែមួយគត់ បើពិតជាចង់ឲ្យប្រទេសកម្ពុជាអាចធានានូវសន្តិភាព និងអាចរក្សានូវសន្តិភាពបានយូរអង្វែង គឺមានតែបោះឆ្នោតឲ្យគណបក្សប្រជាជនកម្ពុជា។
តើបុគ្គលបក្សពួកណាបង្កសង្គ្រាម?
លោក ហ៊ុន សែន បានលើកឡើងក្នុងពិធីជួបជាមួយប្រជាពលរដ្ឋក្នុងខេត្តបាត់ដំបង នៅថ្ងៃទី២៤ ខែតុលា ឆ្នាំ២០២២ នេះថា នៅពេលដែលគណបក្សប្រជាជនកម្ពុជាបន្តគ្រប់គ្រងអំណាចដូចសព្វថ្ងៃនេះ នោះគណបក្សនឹងអាចរកសន្តិភាពជូនប្រទេសជាតិបាន ដែលនឹងធ្វើឲ្យប្រជាពលរដ្ឋមានភាពសុខសាន្តពេញលេញទាំងអស់គ្នា។
មេដឹកនាំបក្សកាន់អំណាចដែលចូលចិត្តគំរាមបំផ្ទុះសង្គ្រាមលើពលរដ្ឋខ្លួនឯង លោក ហ៊ុន សែន អះអាងថា លោកនឹងមិនទៅណាចោលប្រជាពលរដ្ឋជាដាច់ខាត ហើយលោកនឹងបន្តថែរក្សាការពារសន្តិភាពដែលរកបានដ៏លំបាកនេះជូនប្រជាពលរដ្ឋបន្តទៀត។ មេបក្សកាន់អំណាចដែលសល់ពីរបបខ្មែរក្រហម លោក ហ៊ុន សែន ប្ដេជ្ញាការពារសន្តិភាពជូនប្រជាពលរដ្ឋខ្មែរឲ្យខាងតែបាន ទោះក្នុងតម្លៃណាក៏ដោយ ក្នុងនោះលោក ហ៊ុន សែន អំពាវនាវឲ្យប្រជាពលរដ្ឋបោះឆ្នោតឲ្យគណបក្សប្រជាជនកម្ពុជា ដើម្បីផ្តល់ឱកាសឲ្យគណបក្សរបស់លោកមានលទ្ធភាពបន្តការពារសន្តិភាពជូនប្រជាពលរដ្ឋទៅថ្ងៃមុខទៀត។
កាលពីថ្ងៃទី២៩ ខែមិថុនា ឆ្នាំ២០២២ ប្រមុខរដ្ឋាភិបាលកម្ពុជា លោក ហ៊ុន សែន បានចេញអនុក្រឹត្យស្ដីពីការកំណត់កាលបរិច្ឆេទនៃការបោះឆ្នោតជាតិអាណត្តិទី៧ ដែលបានកំណត់យកថ្ងៃអាទិត្យ ទី២៣ ខែកក្កដា ឆ្នាំ២០២៣ ដើម្បីបោះឆ្នោតជ្រើសតាំងតំណាងរាស្ត្រទៅតាមអាណត្តិរបស់ខ្លួនដែលមានរយៈពេល ៥ឆ្នាំម្តង និងមាន ២៥មណ្ឌលនៅទូទាំងប្រទេស។
កាលពីថ្ងៃទី២០ ខែតុលា ឆ្នាំ២០២២ គណៈកម្មាធិការជាតិរៀបចំការបោះឆ្នោត ដែលហៅកាត់ថា គ.ជ.ប ប្រកាសថា ការពិនិត្យបញ្ជីឈ្មោះ និងការចុះឈ្មោះបោះឆ្នោតសម្រាប់អាណត្តិទី៧ នៅខែកក្កដា ឆ្នាំ២០២៣ ខាងមុខនេះ គឺមានរយៈពេល ៥០ថ្ងៃគត់ ដោយគិតចាប់ពីថ្ងៃទី២០ ខែតុលា នេះ រហូតដល់ថ្ងៃទី៨ ខែធ្នូ ឆ្នាំ២០២២ ខាងមុខ ក្នុងនោះប្រជាពលរដ្ឋក៏អាចទៅចុះឈ្មោះនៅថ្ងៃសៅរ៍ និងថ្ងៃអាទិត្យបានដែរ។
មន្ត្រីជាន់ខ្ពស់របស់សមាគមការពារសិទ្ធិមនុស្សអាដហុក លោក ស៊ឹង សែនករុណា ធ្លាប់បានលើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីពេលថ្មីៗនេះថា ដើម្បីធានានូវការបោះឆ្នោតខាងមុខនេះមានភាពត្រឹមត្រូវស្របតាមខ្លឹមសាររដ្ឋធម្មនុញ្ញដែលមានចែង រដ្ឋាភិបាលកម្ពុជាត្រូវតែបើកសិទ្ធិសេរីភាពដល់អ្នកនយោបាយ សកម្មជននយោបាយ និងប្រជាពលរដ្ឋឱ្យមានសិទ្ធិពេញលេញក្នុងការចូលរួមប្រកួតប្រជែងដោយយុត្តិធម៌ និងមានសិទ្ធិអាចជ្រើសរើសគណបក្សនយោបាយដែលពួកគេពេញចិត្តដោយគ្មានការបង្ខិតបង្ខំ និងការបំភិតបំភ័យណាមួយនោះឡើយ។
លោក ស៊ឹង សែនករុណា ត្អូញត្អែរថា កម្ពុជាសព្វថ្ងៃនេះបានរងនូវការរិះគន់ជាច្រើនពីមជ្ឈដ្ឋានជាតិ និងអន្តរជាតិពីភាពមិនឯករាជ្យរបស់ស្ថាប័នមួយចំនួន ដូចជាស្ថាប័នគណៈកម្មាធិការជាតិរៀបចំការបោះឆ្នោត និងស្ថាប័នតុលាការ ជាដើម ជាពិសេសមន្ត្រីរាជការស្ទើរតែទាំងអស់ដែលគេមើលឃើញថា ត្រូវបានរងការគាបសង្កត់ឱ្យគាំទ្របក្សកាន់អំណាចសព្វថ្ងៃនេះ។
ក្រុមអ្នកសង្កេតការណ៍លើកឡើងថា បើពិនិត្យលើសកម្មភាពទុច្ចរិតក្នុងកិច្ចការនយោបាយរបស់លោក ហ៊ុន សែន ដែលប្រើឧបាយកលលួចសន្លឹកឆ្នោតកាលពីអាណត្តិកន្លងមកផង និងការរៀបចំផែនការលុបបំបាត់វត្តមានគណបក្សប្រឆាំង និងប្រធានគណបក្សសង្គ្រោះជាតិ លោក កឹម សុខា ក្នុងការបោះឆ្នោតជាតិខាងមុខនេះ គេអាចវាយតម្លៃបានថា ការបោះឆ្នោតនៅប្រទេសកម្ពុជាក្នុងឆ្នាំ២០២៣ នេះ គឺជាការរៀបផែនការប្លន់របស់គណបក្សកាន់អំណាចដែលកំពុងបញ្ជាដោយលោក ហ៊ុន សែន តែប៉ុណ្ណោះ៕