ឯកអគ្គរដ្ឋទូតអាមេរិកប្រចាំកម្ពុជា លោក Partick Murphy អះអាងថា សហរដ្ឋអាមេរិកមានគោលបំណងចង់ឲ្យរដ្ឋាភិបាលកម្ពុជាផ្ដល់សិទ្ធិដល់លោក កឹម សុខា ធ្វើនយោបាយពេញលេញ ដើម្បីស្ដារលទ្ធិប្រជាធិបតេយ្យនៅប្រទេសកម្ពុជាឡើងវិញ។
លោក Partick Murphy បានសរសេរលើបណ្ដាញធ្វីតធឺរបស់លោក បន្ទាប់ពីជួបពិភាក្សាជាមួយមេដឹកនាំគណបក្សសង្គ្រោះជាតិ លោក កឹម សុខា កាលពីថ្ងៃទី២៤ ខែតុលា ឆ្នាំ២០២២។
លោក Partick Murphy បន្តថា វាដល់ពេលហើយដែលត្រូវផ្ដល់សិទ្ធិនយោបាយ និងសិទ្ធិជាពលរដ្ឋដល់លោក កឹម សុខា ឲ្យបានពេញលេញឡើងវិញ ក្រោយរយៈពេល ៥ឆ្នាំនៃការឃុំឃាំង និងកាត់ក្តីលោកនោះ។ លោកបន្តថា ការផ្តល់សិទ្ធិជូនលោក កឹម សុខា មេដឹកនាំគណបក្សសង្គ្រោះជាតិឡើងវិញនេះ វានឹងអាចផ្តល់ប្រយោជន៍ដល់ប្រទេសកម្ពុជា។
ឯកអគ្គរដ្ឋទូតអាមេរិកបញ្ជាក់ថា លោក និងលោក កឹម សុខា បានប្ដេជ្ញាចិត្តចំពោះសេចក្តីប្រាថ្នារបស់ពលរដ្ឋខ្មែរ ដោយចង់ឲ្យប្រទេសរីកចម្រើន និងមានប្រជាធិបតេយ្យ។
ចំណែកលោក កឹម សុខា វិញក៏បានបង្ហោះសារលើទំព័រហ្វេសប៊ុកថា រូបលោកបានជួបពិភាក្សាការងារជាមួយលោក Partick Murphy នៅគេហដ្ឋានរបស់លោក ដោយមានសហការីចូលរួមផងដែរ។ ក្នុងជំនួបពិភាក្សានោះ លោក និងលោក Partick Murphy បានផ្លាស់ប្ដូរព័ត៌មាន និងទស្សនៈគ្នាអំពីការវិវឌ្ឍនៃដំណើរការសវនាការ និងសិទ្ធិសេរីភាពរបស់លោក ព្រមទាំងលំហប្រជាធិបតេយ្យនៅកម្ពុជា ស្របពេលកិច្ចប្រជុំកំពូលអាស៊ាន និងកិច្ចប្រជុំថ្នាក់អន្តរជាតិសំខាន់ៗផ្សេងទៀត នឹងធ្វើឡើងក្នុងខែវិច្ឆិកា និងខែធ្នូ ខាងមុខនៅកម្ពុជា។
ជាងនេះទៅទៀត ភាគីទាំងពីរក៏បានពិភាក្សាអំពីកិច្ចប្រជុំកំពូលអាស៊ាននៅកម្ពុជា ប្រជុំ APEC នៅថៃ និងប្រជុំ G20 នៅឥណ្ឌូនេស៊ី ផងដែរ។
លោក កឹម សុខា បន្តថា មេដឹកនាំប្រទេសមហាអំណាចដែលបានជួប និងគ្រោងជួបពិភាក្សាជាមួយលោក លើកយកប្រធានបទសំខាន់ៗដែលមិនមែនតែជាប្រយោជន៍ដល់លោកនោះទេ ប៉ុន្តែវាក៏បានផ្ដល់ផលប្រយោជន៍ដល់កម្ពុជាផងដែរ។
ជំនួបរវាងលោក Partick Murphy ជាមួយលោក កឹម សុខា បានធ្វើឡើងបន្ទាប់ពីតុលាការក្រុងភ្នំពេញប្រកាសបិទបញ្ចប់ការសួរដេញដោលលើសំណុំរឿងរបស់លោក កឹម សុខា កាលពីថ្ងៃទី១៩ ខែតុលា ឆ្នាំ២០២២ ក្រោយពីបើកសវនាការជំនុំជម្រះអស់ ៦៣លើក។
ក្រោយពីសវនាការចំនួន ៦៣លើកមក តុលាការបានប្រកាសយកថ្ងៃទី២១ ខែធ្នូ ឆ្នាំ២០២២ ខាងមុខនេះ ដើម្បីធ្វើសេចក្តីសន្និដ្ឋានលើសំណុំរឿង «សន្ទិដ្ឋភាពត្រូវរ៉ូវដោយសម្ងាត់ជាមួយរដ្ឋបរទេស ឬភ្នាក់ងារបរទេស» ចង់ផ្តួលរំលំរដ្ឋាភិបាល។
គិតមកដល់បច្ចុប្បន្ននេះ សំណុំរឿងលោក កឹម សុខា បានអូសបន្លាយអស់រយៈពេលជាង ៥ឆ្នាំ ប៉ុន្តែតុលាការមិនបានរកឃើញកំហុសលោក កឹម សុខា ទោះបីបើកសវនាការជាង ៦០លើក ហើយឈានទៅធ្វើសេចក្ដីសន្និដ្ឋាននៅខែធ្នូ ខាងមុខក្ដី៕