26 C
Phnom Penh

សកម្មជន​ចាត់ទុក​ជម្លោះ​ក្រុមប្រឹក្សា​សង្កាត់​អូរចារ​គឺ​បំផ្លាញ​ផល​ប្រយោជន៍​ពលរដ្ឋ​នៅ​មូលដ្ឋាន

ដោយ ឌឹ ខេមបូឌា ដេលី

បទវិភាគ

សកម្មជន​គណបក្ស​សង្គ្រោះ​ជាតិ ចាត់ទុក​ជម្លោះ​ដែល​កើតឡើង​រវាង​ក្រុមប្រឹក្សា​សង្កាត់​បក្ស​ភ្លើង​ទៀន និង​ក្រុមប្រឹក្សា​សង្កាត់​គណបក្ស​ប្រជាជន​កម្ពុជា នៅ​សង្កាត់​អូរចារ ក្រុង​បាត់ដំបង ខេត្ត​បាត់ដំបង ថា​ជា​ទង្វើ​បំផ្លាញ​ផលប្រយោជន៍​របស់​ពលរដ្ឋ​នៅ​មូលដ្ឋាន។

សកម្មជន​បក្ស​ប្រឆាំង លោក ហ៊ុន កុសល បាន​ប្រាប់​សារព័ត៌មាន The Cambodia Daily នៅ​ថ្ងៃទី​៣ វិច្ឆិកា នេះ​ថា គ្រប់​ភាគី​ដែល​បង្ហាញ​ឥរិយាបថ​គ្មាន​ក្រមសីលធម៌​ជា​អ្នក​តំណាង​របស់​ពលរដ្ឋ ដែល​ម្នាក់​បង្ហាញ​ពី​ទង្វើ​ហិង្សា ខណៈ​ម្នាក់​ទៀត​ព្យាយាម​បញ្ឆេះ​កំហឹង​ឱ្យ​បង្ក​ឡើង​ជា​ជម្លោះ​ក្នុង​ចេតនា​ទាក់ទាញ​ចំណាប់​អារម្មណ៍​ពី​ពលរដ្ឋ​បែប​នេះ គ្រាន់តែ​ជា​ស្ទីល​នយោបាយ​ចាស់​គំរិល​ដែល​ធ្វើ​ឲ្យ​សង្គម​ជាតិ​បែកបាក់​ប៉ុណ្ណោះ។

លោក ហ៊ុន កុសល លើកឡើង​ថា ការ​ដណ្តើម​យក​ឈ្នះ​គ្នា​ដើម្បី​ប្រជាប្រិយភាព​ខ្លួនឯង ដោយ​មិន​គិត​ពី​ផលប្រយោជន៍​របស់​ពលរដ្ឋ​នៅ​មូលដ្ឋាន គឺជា​សកម្មភាព​មួយ​ដែល​បង្កើត​កំហឹង​ដាក់​គ្នា​ទៅវិញ​ទៅមក​មិន​ចេះ​ចប់​ប៉ុណ្ណោះ។

លោក​បន្ត​ថា ទង្វើ​បែប​នេះ​នឹង​កាន់តែ​ពង្រីក​ខ្លួន​ចូល​ទៅ​ក្នុង​សង្គម​ខ្មែរ​ឥត​ឈប់​ឈរ ដោយសារតែ​សមាជិក​បក្ស​នយោបាយ​ទាំងនោះ​គិតតែ​ពី​ផលប្រយោជន៍​បក្ស និង​ប្រយោជន៍​បុគ្គល​ផ្ទាល់ខ្លួន ជាជាង​ប្រយោជន៍​របស់​ពលរដ្ឋ​ដែល​បាន​បោះឆ្នោត​គាំទ្រ​ខ្លួន។

សកម្មជន​បក្ស​ប្រឆាំង​រូប​នេះ​រិះគន់​ថា បើ​ជម្លោះ​នោះ​គឺជា​ការ​ប្រកួតប្រជែង​គ្នា​ដើម្បី​រក​ភាព​រីកចម្រើន​ឱ្យ​ពលរដ្ឋ​នៅ​មូលដ្ឋាន វា​គឺជា​រឿង​ល្អ ប៉ុន្តែ​បើ​ជម្លោះ​នេះ​គ្រាន់តែ​ដើម្បី​ផលប្រយោជន៍​បក្ស​នយោបាយ​រៀង​ខ្លួន​បែប​នេះ វា​ជា​រឿង​ដែល​គួរ​ឱ្យ​អាម៉ាស់​បំផុត​ដែល​ពួកគេ​ក្នុង​ឋានៈ​ជា​អ្នក​តំណាង​ឆន្ទៈ​របស់​ពលរដ្ឋ។

កាលពី​ពេល​ថ្មីៗ​នេះ ជំទប់​ទី​២ សង្កាត់​អូរចារ របស់​គណបក្ស​ភ្លើង​ទៀន អ្នកស្រី ស៊ិន ចាន់ពៅរ៉ូហ្សេត បាន​ដាក់​ពាក្យ​បណ្តឹង​ទៅ​សាលាដំបូង​ខេត្ត​បាត់ដំបង ហើយ​បន្ទាប់ពី​សមាជិក​បក្ស​ភ្លើង​ទៀន​រូប​នេះ​អះអាង​ថា ខ្លួន​បាន​រង​នូវ​ការ​ប្រើ​អំពើ​ហិង្សា​ពី​សមាជិក​ក្រុមប្រឹក្សា​សង្កាត់​អូរចារ លេខ​រៀង​ទី​៦ មកពី​គណបក្ស​ប្រជាជន​កម្ពុជា អ្នកស្រី យាន រ៉ាស៊ីន កាលពី​ចុងខែ​តុលា ឆ្នាំ​២០២២ កន្លងទៅ​នោះ។

ជុំវិញ​បញ្ហា​នេះ ចៅសង្កាត់​អូរចារ ដែល​មកពី​គណបក្ស​ប្រជាជន​កម្ពុជា លោក ឯម សុផល បាន​លើកឡើង​ពី​មូលហេតុ​នៃ​ជម្លោះ​នេះ​ថា ការ​ទាស់​ពាក្យ​សម្ដី​គ្នា​រហូត​ឈាន​ដល់​ការ​ប្តឹងផ្តល់​នេះ កើតឡើង​បន្ទាប់ពី​អ្នកស្រី យាន រ៉ាស៊ីន បាន​ស្នើ​ឱ្យ​ភ្នាក់ងារ​សង្កេតការណ៍​បោះឆ្នោត​មកពី​គណបក្ស​ភ្លើង​ទៀន ធ្វើជា​សាក្សី​សម្រាប់​ពលរដ្ឋ​មួយ​រូប​ដែល​សុំ​ធ្វើ​សំបុត្រ​កំណើត ប៉ុន្តែ​អ្នកស្រី ស៊ិន ចាន់ពៅរ៉ូហ្សេត មិន​ព្រម ទើប​បង្ក​ទៅ​ជា​ការ​ប៉ះទង្គិច​គ្នា​បែប​នេះ។

ចំណែក​អ្នកស្រី ស៊ិន ចាន់ពៅរ៉ូហ្សេត បាន​អះអាង​ក្នុង​ការ​ផ្សាយ​របស់​ខ្លួន​កាលពី​ពេល​ថ្មីៗ​នេះ​ថា ពលរដ្ឋ​ដែល​ស្នើសុំ​ធ្វើ​សំបុត្រ​កំណើត​នោះ គឺជា​ស្ត្រី​ចំណាស់​មួយ​រូប​ដែល​ត្រូវ​បាន​ស្គាល់​ថា​ជា​អ្នក​ដែល​មាន​សតិ​មិន​ប្រក្រតី ខណៈ​មន្ត្រី​សង្កាត់​មិន​គួរ​យក​ករណី​បែប​នេះ​មក​លេង​សើច​លើ​ស្ត្រី​រូប​នោះ​ទេ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស