28 C
Phnom Penh

មន្ត្រី​បក្ស​ប្រឆាំង​រិះគន់​បេក្ខជន​នាយករដ្ឋមន្ត្រី​បក្ស​កាន់​អំណាច​ថា​ចេះ​ត្រឹម​អួត​ពី​សន្តិភាព

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​របស់​គណបក្ស​សង្គ្រោះ​ជាតិ រិះគន់​ថា បេក្ខជន​អនាគត​នាយករដ្ឋមន្ត្រី​របស់​បក្ស​កាន់​អំណាច លោក ហ៊ុន ម៉ាណែត ចេះ​ត្រឹម​តែ​អួត​ពី​សន្តិភាព និង​នយោបាយ​ឈ្នះ​ឈ្នះ​បន្ត​ពី​ឪពុក ដែល​បង្ហាញ​ថា​ជា​បុគ្គល​គ្មាន​ចំណេះដឹង​ផ្ទាល់ខ្លួន​ក្នុង​ការ​ដឹកនាំ​ប្រទេស ក្រៅតែ​ពី​ការ​គូសវាស​របស់​ឪពុក​ដែល​កាង​ពីក្រោយ​តែប៉ុណ្ណោះ។

អតីត​អ្នកទោស​នយោបាយ និង​ជា​មន្ត្រី​ជាន់ខ្ពស់​បក្ស​ប្រឆាំង លោក មាជ សុវណ្ណារ៉ា បាន​ប្រាប់​សារព័ត៌មាន The Cambodia Daily នៅ​ថ្ងៃទី​៨ វិច្ឆិកា នេះ​ថា ក្នុង​នាម​ជា​បេក្ខជន​អនាគត​នៃ​អ្នក​ដឹកនាំ​របស់​គណបក្ស​មួយ គួរតែ​បង្ហាញ​ពី​សមត្ថភាព​ដឹកនាំ​ដោយ​ខ្លួនឯង ដើម្បី​បង្ហាញ​ពលរដ្ឋ​ម្ចាស់​ឆ្នោត មិនមែន​គ្រាន់តែ​ចេះ​និយាយ​ត្រឹមតែ​សមិទ្ធផល​របស់​អ្នក​ដទៃ​ទាំង​ដែល​ខ្លួន​មិន​បាន​ចូល​ប្រឡូក​ជាមួយ​សូម្បីតែ​បន្តិច​នោះ​ទេ។

លោក មាជ សុវណ្ណារ៉ា លើកឡើង​ថា ប្រសិនបើ​សន្តិភាព និង​នយោបាយ​ឈ្នះ​ឈ្នះ​នោះ គឺជា​សមិទ្ធផល​ពិតប្រាកដ​ដែល​ពលរដ្ឋ​ខ្មែរ​ទទួលស្គាល់​គ្រប់​គ្នា នោះ​គ្រាន់តែ​ជា​សមិទ្ធផល​របស់​បក្ស​កាន់​អំណាច​ដែល​អ្នក​ដឹកនាំ​ចាស់ៗ​បាន​ធ្វើ​ប៉ុណ្ណោះ មិនមែន​ជា​លទ្ធផល​ដែល​កើត​ចេញពី​ការ​ខិតខំ​ប្រឹងប្រែង​របស់​ខ្លួន​នោះ​ឡើយ។ ប៉ុន្តែ​បើ​សន្តិភាព និង​នយោបាយ​ឈ្នះ​ឈ្នះ​នេះ​ពលរដ្ឋ​មិន​ទទួលស្គាល់​វិញ នោះ​មាន​ន័យ​ថា លោក ហ៊ុន ម៉ាណែត កំពុងតែ​យក​សមិទ្ធផល​របស់​អ្នក​ដទៃ​មក​ដុត​បំផ្លាញ​ខ្លួនឯង​តែប៉ុណ្ណោះ។

មន្ត្រី​ជាន់ខ្ពស់​គណបក្ស​សង្គ្រោះ​ជាតិ​រូប​នេះ​បញ្ជាក់​ថា ដើម្បី​ក្លាយ​ជា​មេដឹកនាំ​ដែល​ទទួល​បាន​ការ​គាំទ្រ​ពី​ពលរដ្ឋ ត្រូវតែ​មាន​សមត្ថភាព​ក្នុង​ការ​គ្រប់គ្រង​ប្រទេស​ជាតិ​ដោយ​ពិតប្រាកដ នោះ​ទើប​ប្រទេស​ជាតិ​រីកចម្រើន​ទៅ​មុខ ប៉ុន្តែ​បើ​គ្រាន់​ចាំ​ថា​តាម​គេ ឬ​ធ្វើ​អ្វី​តាម​គេ​ដែល​ប្រាប់​ពីក្រោយ​ខ្នង​នោះ ប្រទេស​នឹង​មិន​អាច​លូតលាស់ ឬ​មាន​ការ​អភិវឌ្ឍ​បាន​ទេ។ លើស​ពី​នេះ នឹង​បង្ក​ទៅ​ជា​វិបត្តិ​ដល់​ប្រទេស​ជាតិ​ដូច​សព្វថ្ងៃ​នេះ​ថែម​ទៀត​ផង។

កាលពី​ថ្ងៃទី​៧ ខែ​វិច្ឆិកា ឆ្នាំ​២០២២ លោក ហ៊ុន ម៉ាណែត ដែល​ជា​បេក្ខជន​អនាគត​នាយករដ្ឋមន្ត្រី​របស់​បក្ស​កាន់​អំណាច បាន​លើកឡើង​ក្នុង​ពិធី​បើក​សិក្ខាសាលា​ប្រវត្តិសាស្ត្រ​យោធា​ស្ដីពី​នយោបាយ​ឈ្នះ​ឈ្នះ និង​សន្តិភាព ថា​សន្តិភាព​មិន​អាច​ទទួល​បាន​ដោយ​ងាយៗ​នោះ​ទេ ជាពិសេស​ក្នុង​បរិបទ​ដែល​កម្ពុជា​ជា​ប្រទេស​ធ្លាប់​ទទួល​រង​នូវ​សង្គ្រាម និង​ជម្លោះ​បែកបាក់​នា​ពេល​កន្លងមក។

លោក ហ៊ុន ម៉ាណែត លើកឡើង​ថា នយោបាយ​ឈ្នះ​ឈ្នះ​នៅ​កម្ពុជា​មាន​អត្ថន័យ​យ៉ាង​ទូលំទូលាយ​ដែល​គ្របដណ្ដប់​លើ​គ្រប់​វិស័យ​នៃ​សង្គម​ជាតិ​ទាំងមូល និង​នាំមក​នូវ​សន្តិភាព​ពេញលេញ ឯកភាព​ជាតិ ឯកភាព​ទឹកដី រដ្ឋាភិបាល​តែ​មួយ កងកម្លាំង​ប្រដាប់​អាវុធ​តែ​មួយ ដែល​ជា​កត្តា​អំណោយ​ផល​ដល់​ការ​ធានា​ការពារ​ឯករាជ្យ អធិបតេយ្យ បូរណភាព​ទឹកដី​ដូច​សព្វថ្ងៃ​នេះ។

កាលពី​ដើម​ខែ​ធ្នូ ឆ្នាំ​២០២១ កន្លងទៅ លោក ហ៊ុន ម៉ាណែត ត្រូវ​បាន​ឪពុក​របស់​ខ្លួន គឺ​លោក ហ៊ុន សែន ប្រកាស​គាំទ្រ​ជា​បេក្ខភាព​អនាគត​នាយករដ្ឋមន្ត្រី ខណៈ​បក្ស​កាន់​អំណាច​បាន​បោះឆ្នោត​គាំទ្រ​បេក្ខភាព​នេះ​កាលពី​ថ្ងៃទី​២៤ ខែ​ធ្នូ ឆ្នាំ​២០២១ កន្លងទៅ​ផង​ដែរ ប៉ុន្តែ​ការ​ជាប់​ជា​បេក្ខភាព​នាយករដ្ឋមន្ត្រី​បន្ត​ពី​ឪពុក​នេះ ត្រូវ​បាន​គេ​រិះគន់​ថា ធ្វើឡើង​ក្រោម​ការ​គំរាមកំហែង និង​ការ​ទិញ​ទឹកចិត្ត​ពី​សមាជិក​បក្ស​ប្រជាជន​កម្ពុជា​របស់​ខ្លួន​ប៉ុណ្ណោះ មិនមែន​ព្រោះ​តែ​លោក ហ៊ុន ម៉ាណែត មាន​សមត្ថភាព​ដឹកនាំ​ប្រទេស​នោះ​ទេ។

ទាក់ទិន​នឹង​បញ្ហា​នេះ ក្រុម​អ្នក​សង្កេតការណ៍​សម្ដែង​ការ​សោកស្តាយ​ដែល​កម្ពុជា​នឹង​ទទួល​បាន​នាយករដ្ឋមន្ត្រី​ដឹកនាំ​ប្រទេស​ដែល​គ្មាន​សមត្ថភាព និង​គ្មាន​ការ​គាំទ្រ​ពី​ពលរដ្ឋ ផ្ទុយទៅវិញ​ជា​អនាគត​នាយករដ្ឋមន្ត្រី​ដែល​ឡើង​កាន់​តំណែង​ដោយសារ​ឪពុក​ជា​អ្នក​រៀបចំ​ឲ្យ​ប៉ុណ្ណោះ។

ប្រភព​ដដែល​អះអាង​ថា សមាជិក​បក្ស​កាន់​អំណាច​ដែល​គាំទ្រ​បេក្ខភាព​លោក ហ៊ុន ម៉ាណែត ជា​នាយករដ្ឋមន្ត្រី​អនាគត​នោះ មិនមែន​ដោយសារ​មើល​ឃើញ​ពី​គុណសម្បត្តិ ឬ​សមត្ថភាព​ដឹកនាំ​ប្រទេស​របស់​លោក​នោះ​ទេ គឺ​ដោយសារ​លោក ហ៊ុន សែន ទិញ​ទឹកចិត្ត​ពួកគេ​តែប៉ុណ្ណោះ ដែល​បាន​សន្យា​ថា​នឹង​ផ្តល់​តំណែង​ខ្ពស់ៗ​ក្នុង​ជួរ​រដ្ឋាភិបាល​ដល់​កូន​មន្ត្រី​សំខាន់ៗ​មួយ​ចំនួន ដូចជា​កូន​របស់​លោក ស ខេង កូន​លោក សាយ ឈុំ កូន​លោក ទៀ បាញ់ និង​កូន​របស់​អ្នកស្រី ម៉ែន សំអន ជាដើម៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស