29 C
Phnom Penh

អតីត​មន្ត្រី​CNRPO៖ លោក សម រង្ស៊ី និង​លោក ហ៊ុន ម៉ាណែត បង្ក​ជម្លោះ​ជា​ល្បែង​បង្កើត​ឥទ្ធិពល​ឱ្យ​គ្នា​ទៅ​វិញ​ទៅ​មក

ដោយ ឌឹ ខេមបូឌា ដេលី

បទវិភាគ

អតីត​មន្ត្រី​ជាន់ខ្ពស់​គណបក្ស​សង្គ្រោះ​ជាតិ​នៅ​ក្រៅ​ប្រទេស CNRPO ព្រមាន​ថា យុទ្ធសាស្ត្រ​នយោបាយ​បង្ក​ជម្លោះ​ឆ្លើយឆ្លង​គ្នា​ទៅវិញ​ទៅមក​រវាង​លោក សម រង្ស៊ី និង​លោក ហ៊ុន ម៉ាណែត គឺ​ល្បែង​បង្កើត​ឥទ្ធិពល​នយោបាយ​ឱ្យ​គ្នា​ទៅវិញ​ទៅមក ប៉ុន្តែ​ការ​ឆ្លើយឆ្លង​របស់​អ្នក​ទាំង​ពីរ​នេះ​គ្មាន​ប្រយោជន៍​សម្រាប់​ជាតិ​នោះ​ទេ។

លោក ប៉ុន សៅរី បាន​សរសេរ​លើ​គណនី​ហ្វេសប៊ុក​របស់​លោក​នៅ​មុន​នេះ​បន្តិច​ថា ការណ៍​ដែល​លោក សម រង្ស៊ី បន្ត​រិះគន់​វាយប្រហារ​ទៅ​លើ​លោក ហ៊ុន ម៉ាណែត កាន់តែ​ខ្លាំង គឺជា​មធ្យោបាយ​ក្នុង​ការ​ជួយ​ឱ្យ​កូនប្រុស​ច្បង​លោក ហ៊ុន សែន រូប​នេះ​កាន់តែ​មាន​ឥទ្ធិពល កាន់តែ​ខ្លាំង​ឡើងៗ​នៅ​ក្នុង​ផ្ទៃក្នុង​របស់​គណបក្ស​ប្រជាជន​កម្ពុជា​ប៉ុណ្ណោះ។

លោក​អះអាង​ថា ការ​ឆ្លើយឆ្លង​ពី​លោក ហ៊ុន ម៉ាណែត ទៅ​កាន់​លោក សម រង្ស៊ី វិញ​ក៏​ជា​ការ​ជួយ​ឱ្យ​អតីត​មេដឹកនាំ​ប្រឆាំង​រូប​នេះ​អាច​នៅ​មាន​ឥទ្ធិពល​នយោបាយ​ខ្លះៗ​របស់​គាត់​ទៅ​ថ្ងៃ​មុខ​បន្ត​ទៀត​ដែរ ហើយ​ល្បែង​នយោបាយ​បែប​នេះ​កំពុងតែ​បិទ​ផ្លូវ​អ្នក​ប្រជាធិបតេយ្យ​ជំនាន់​ក្រោយ​នៅ​កម្ពុជា​យ៉ាង​ធ្ងន់ធ្ងរ។

អតីត​មន្ត្រី​ជាន់ខ្ពស់​គណបក្ស​សង្គ្រោះ​ជាតិ​ក្រៅ​ប្រទេស CNRPO លោក ប៉ុន សៅរី បញ្ជាក់​ថា ល្បែង​នយោបាយ​របស់​លោក ហ៊ុន សែន ព្រមទាំង​កូនប្រុស​របស់​គាត់ គឺ​លោក ហ៊ុន ម៉ាណែត ជាមួយ​នឹង​លោក សម រង្ស៊ី នៅ​ពេលនេះ​នឹង​ជួយ​ឱ្យ​លោក ហ៊ុន ម៉ាណែត អាច​ស្នង​តំណែង​បន្ត​ត្រកូល​របស់​គាត់​ដោយ​រលូន​ផង និង​អាច​ជួយ​ឱ្យ​លោក ហ៊ុន ម៉ាណែត បន្ត​កាន់​តំណែង​ដឹកនាំ​កម្ពុជា​បាន​យ៉ាង​រឹងមាំ​ទៅ​ថ្ងៃ​អនាគត​ផង​ដែរ។

ការ​អះអាង​នេះ ធ្វើឡើង​បន្ទាប់ពី​អតីត​មេដឹកនាំ​ប្រឆាំង​លោក សម រង្ស៊ី និង​បេក្ខជន​នាយករដ្ឋមន្ត្រី​បក្ស​កាន់​អំណាច​លោក ហ៊ុន ម៉ាណែត បាន​ឈ្លោះ​ឆ្លើយឆ្លង​គ្នា​ទៅវិញ​ទៅមក ដែល​ត្រូវ​បាន​ផ្សព្វផ្សាយ​នៅ​លើ​បណ្ដាញ​ទំនាក់ទំនង​សង្គម​ហ្វេសប៊ុក​ព្រោងព្រាត​នៅ​ពេលនេះ។

កាលពី​ថ្ងៃទី​១៦ ខែ​វិច្ឆិកា អតីត​មេដឹកនាំ​ប្រឆាំង លោក សម រង្ស៊ី បាន​ហៅ​កូនប្រុស​ច្បង​បុរស​ខ្លាំង​កម្ពុជា លោក ហ៊ុន សែន គឺ​លោក ហ៊ុន ម៉ាណែត ថា​ជា​មនុស្ស​ពាល​ដូច​ឪពុក​របស់​ខ្លួន​ដែរ ដែល​ហ៊ាន​យក​ជីវិត​នយោបាយ​របស់​ខ្លួន​មក​ភ្នាល់​គ្នា​ជាមួយ​នឹង​រូបលោក។

អតីត​មេដឹកនាំ​ប្រឆាំង​រូប​នេះ​លើកឡើង​ថា អ្នក​នយោបាយ​ដែល​មាន​ការ​ទទួល​ខុសត្រូវ គេ​មិន​ដែល​បបួល​គ្នា​ភ្នាល់​នោះ​ទេ ប៉ុន្តែ​ការ​ដែល​លោក ហ៊ុន ម៉ាណែត ចង់​តែ​ភ្នាល់​បែប​នេះ គ្រាន់តែ​បង្ហាញ​ពី​សារជាតិ​ជា​ជនពាល​ដែល​កើត​ចេញ​មកពី​ត្រកូល​បាត​ផ្សារ​ប៉ុណ្ណោះ។

ការ​លើកឡើង​របស់​លោក សម រង្ស៊ី បែប​នេះ ធ្វើឡើង​បន្ទាប់ពី​លោក ហ៊ុន ម៉ាណែត បបួល​លោក សម រង្ស៊ី ភ្នាល់​គ្នា​ដាក់​ជីវិត​នយោបាយ​បន្ទាប់ពី​លោក សម រង្ស៊ី បាន​ចោទ​ថា លោក ហ៊ុន ម៉ាណែត បាន​បន្លំ​យក​លុយ ៥​លាន​ដុល្លារ​ទិញ​ទឹកចិត្ត​ពលរដ្ឋ​ខ្មែរ​ដែល​រស់នៅ​ប្រទេស​បារាំង និង​ទ្វីប​អឺរ៉ុប ដើម្បី​អាច​ចុះចូល​ជាមួយ​បក្ស​ប្រជាជន​កម្ពុជា។

លោក ហ៊ុន ម៉ាណែត លើកឡើង​ថា បើ​អ្វី​ដែល​លោក សម រង្ស៊ី និយាយ​គឺជា​ការ​ពិត​មែន​នោះ លោក​សុខចិត្ត​ចុះចេញ​ពី​ឆាក​នយោបាយ​អស់​មួយ​ជីវិត ប៉ុន្តែ​បើ​មិន​ពិត​វិញ លោក សម រង្ស៊ី ក៏​ត្រូវ​ដក​ខ្លួន និង​ឈប់​ធ្វើ​នយោបាយ​មួយ​ជីវិត​ដូច​គ្នា​ដែរ។

ជុំវិញ​បញ្ហា​នេះ ស្ថាបនិក​អង្គការ​អភិវឌ្ឍន៍​ផ្នត់គំនិត លោក សេក សុជាតិ បាន​សរសេរ​លើ​គណនី​ហ្វេសប៊ុក​របស់​លោក​នៅ​ថ្ងៃទី​១៧ វិច្ឆិកា នេះ​ថា មនុស្ស​អសមត្ថភាព​តែងតែ​យក​ជម្លោះ​បុគ្គល និង​គ្រួសារ​ដើម្បី​បង្ហាញ​ពី​ភាព​អស្ចារ្យ​រៀងៗ​ខ្លួន ខណៈ​ការ​ភ្នាល់​គ្នា​នេះ​វា​ជា​ចរិត​របស់​អ្នក​ចូលចិត្ត​លេង​ល្បែង​ស៊ីសង​ប៉ុណ្ណោះ ហើយ​ជំពូក​មនុស្ស​បែប​នេះ​មិន​ស័ក្តិសម​ធ្វើជា​អ្នក​នយោបាយ​ជាតិ ឬ​អ្នក​ដឹកនាំ​សង្គម​ឡើយ។

លោក សេក សុជាតិ បញ្ជាក់​ថា ជម្លោះ​អ្នក​នយោបាយ​ដែល​រក​ផលប្រយោជន៍​ឱ្យ​ជាតិ គឺ​គេ​យក​បញ្ហា​ជាតិ ដូចជា​អយុត្តិធម៌​សង្គម និង​បញ្ហា​ប្រឈម​នានា​ដែល​កំពុង​កើតមាន មក​ដាក់​លើ​តុ បបួល​ដៃគូ​នយោបាយ​មក​ជជែក​គ្នា​ដេញដោល​រក​ដំណោះស្រាយ​ជូន​ជាតិ និង​ពលរដ្ឋ មិនមែន​យក​រឿង​ផ្ទាល់ខ្លួន​មក​ឈ្លោះ​ដើម្បី​បង្ហាញ​ថា​ខ្លួន​អស្ចារ្យ​នោះ​ទេ។

ក្រុម​អ្នក​សង្កេតការណ៍​លើកឡើង​ថា កម្ពុជា​ជា​ប្រទេស​មួយ​ដែល​អភ័ព្វ​ដោយសារ​តែ​មាន​អ្នក​នយោបាយ​ដែល​គិតតែ​ពី​ប្រយោជន៍​ផ្ទាល់ខ្លួន ជាជាង​គិត​ពី​ប្រយោជន៍​ជាតិ​ជា​ធំ ហើយ​អ្នក​នយោបាយ​ជំពូក​នេះ​នឹង​បង្ក​បញ្ហា​ឱ្យ​ប្រទេស​ជាតិ​មិន​ចេះ​ចប់​នោះ​ឡើយ ឱ្យ​តែ​ពួកគេ​នៅតែ​មាន​ឥទ្ធិពល​លើ​ការ​ជឿ​ទុកចិត្ត​របស់​ពលរដ្ឋ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស