30 C
Phnom Penh

លោក ហ៊ុន សែន និង​បណ្ឌិត យ៉ង សាំងកុមារ ពិភាក្សា​គ្នា​ក្រោយ​ការ​ស្នើសុំ​ចូលរួម​ជីវភាព​នយោបាយ

ដោយ ឌឹ ខេមបូឌា ដេលី

បទវិភាគ

លោក​នាយករដ្ឋមន្ត្រី ហ៊ុន សែន ជួប​ពិភាក្សា​ជាមួយ​អតីត​ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យ​មូលដ្ឋាន បណ្ឌិត យ៉ង សាំងកុមារ និង​មន្ត្រី​ម្នាក់​ទៀត និយាយ​អំពី​ការងារ​កសិកម្ម ក្រោយពី​ស្នើសុំ​ចូលរួម​ជីវភាព​នយោបាយ​ជាមួយ​គណបក្ស​ប្រជាជន​កម្ពុជា។

លោក​នាយករដ្ឋមន្ត្រី ហ៊ុន សែន បាន​សរសេរ​លើ​ទំព័រ​ហ្វេសប៊ុក​អម​នឹង​រូបភាព​ជាច្រើន​សន្លឹក​ជាមួយ​រដ្ឋមន្ត្រី​ក្រសួង​កសិកម្ម រុក្ខាប្រមាញ់ និង​នេសាទ លោក ឌិត ទីណា និង​បណ្ឌិត យ៉ង សាំងកុមារ ព្រមទាំង​លោក ឡឹក សុធារ នៅ​ថ្ងៃទី​២៨ ខែ​វិច្ឆិកា នេះ។

លោក ហ៊ុន សែន ថា​ទើប​ជួប​ពិភាក្សា​ជាមួយ​រដ្ឋមន្ត្រី​កសិកម្ម លោក ឌិត ទីណា និង​បណ្ឌិត យ៉ង សាំងកុមារ ព្រមទាំង​លោក ឡឹក សុធារ លើ​ការងារ​កសិកម្ម​ដែល​លោក​ទាំង​ពីរ​នាក់​ទើប​មក​រួម​រស់​ជាមួយ​គណបក្ស​ប្រជាជន​កម្ពុជា។

ក្នុង​លិខិត​ដាច់ដោយឡែក​ពី​គ្នា​ដែល​មាន​ឈ្មោះ​ប្រធាន​គណៈកម្មាធិការ​នាយក​គណបក្ស​ប្រជាធិបតេយ្យ​មូលដ្ឋាន លោក យ៉ង សាំងកុមារ និង​អ្នក​នាំពាក្យ​គណបក្ស​ប្រជាធិបតេយ្យ​មូលដ្ឋាន លោក ឡឹក សុធារ ដែល​ត្រូវ​បាន​ផ្សព្វផ្សាយ​ថា កាលពី​ថ្ងៃទី​២៧ ខែ​វិច្ឆិកា ឆ្នាំ​២០២២ អ្នក​ទាំង​ពីរ​បាន​ស្នើសុំ​លោក ហ៊ុន សែន ប្រធាន​គណបក្ស​ប្រជាជន​កម្ពុជា ដើម្បី​ចូលរួម​ជីវភាព​នយោបាយ​ជាមួយ​គណបក្ស​ដែល​កំពុង​កាន់​អំណាច​ជិត ៤០​ឆ្នាំ​មក​នេះ។

ការ​ដាក់​លិខិត​សុំ​ចូលរួម​ជាមួយ​គណបក្ស​ប្រជាជន​កម្ពុជា​នេះ ដោយ​លោក យ៉ង សាំងកុមារ សំអាង​ថា ក្នុង​គោលបំណង​បាន​បម្រើ​ការងារ​ជាមួយ​រាជរដ្ឋាភិបាល ដើម្បី​អភិវឌ្ឍ​វិស័យ​កសិកម្ម ពិសេស​ស្រូវ​អង្ករ។

លោក យ៉ង សាំងកុមារ បាន​សរសេរ​លើ​ទំព័រ​របស់​លោក​នៅ​ថ្ងៃទី​២៨ ខែ​វិច្ឆិកា ឆ្នាំ​២០២២ ថា គ្រួសារ​កសិករ​ខ្មែរ​ដែល​ភាគច្រើន​បំផុត​ជា​កសិករ​អ្នក​ធ្វើ​ស្រែ​កំពុង​ជួប​ការ​លំបាក​ជាច្រើន ដែល​បញ្ហា​នេះ​នាំមក​នូវ​ផល​ប៉ះពាល់​អវិជ្ជមាន​ដល់​សង្គម​ជាតិ​ទាំងមូល ដូច្នេះ​តម្រូវ​ឲ្យ​មាន​ការ​សហការ​គ្នា​ដើម្បី​ចូលរួម​ដោះស្រាយ​បញ្ហា​កសិករ​តាម​គោលការណ៍ ទុក្ខវេទនា​របស់​កសិករ​ជា​ទុក្ខវេទនា​របស់​ជាតិ​ទាំងមូល។

ក្រោយពី​មាន​ការ​សម្រេច​ចុះចូល​ជាមួយ​គណបក្ស​ប្រជាជន​កម្ពុជា​របស់​លោក យ៉ង សាំងកុមារ អ្នក​ប្រើប្រាស់​បណ្ដាញ​សង្គម​បាន​សរសេរ​លើ​ហ្វេសប៊ុក​បែប​ចំអក​ថា បន្ទាប់ពី​លោក យ៉ង សាំងកុមារ ចូលរួម​ជីវភាព​នយោបាយ​ជាមួយ​គណបក្ស​ប្រជាជន​កម្ពុជា​ហើយ តម្លៃ​ស្រូវ​របស់​កសិករ និង​ផលិតផល​ផ្សេងៗ​មាន​ទីផ្សារ​ទៅ​ចុះ។

ចំណែក​ប្រធាន​គណបក្ស​ប្រជាធិបតេយ្យ​មូលដ្ឋាន (GDP) លោក យ៉េង វីរៈ បាន​ចេញ​សេចក្តី​ថ្លែងការណ៍​ផ្ទាល់​មាត់​មួយ​នៅ​ថ្ងៃទី​២៧ ខែ​វិច្ឆិកា ឆ្នាំ​២០២២ ក្រោយ​លោក យ៉ង សាំងកុមារ ប្រកាស​សុំ​ចុះចូល​គណបក្ស​ប្រជាជន​កម្ពុជា​នោះ។

លោក យ៉េង វីរៈ បាន​ប្រាប់​ឲ្យ​សមាជិក​សមាជិកា រួម​ទាំង​អ្នកគាំទ្រ​គណបក្ស​ទាំងអស់​រក្សា​ភាព​ស្ងៀមស្ងាត់​លើ​បញ្ហា​មន្ត្រី​ជាន់ខ្ពស់​របស់​ខ្លួន​ចូលរួម​ជីវភាព​នយោបាយ​ជាមួយ​បក្ស​កាន់​អំណាច​នេះ ដោយ​បន្ត​តាមដាន​លើ​ការ​វិវឌ្ឍ​បន្ថែម​ទៀត៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស