បាតុករចិន កំពុងទាមទារឱ្យលោក ស៊ី ជីនពីង ចុះចេញពីតំណែង និងរំលាយបក្សកុម្មុយនីស្តករណីប្រឆាំងនឹងវិធានការកូវីដសូន្យនៅប្រទេសចិន ៥ថ្ងៃមកហើយ ខណៈពលរដ្ឋរាប់ពាន់នាក់ ទាំងយុវជន និស្សិត កម្មករ អាជីវករ មេផ្ទះ បាននាំគ្នាធ្វើបាតុកម្មប្រឆាំងរហូតទាមទារឲ្យលោក ស៊ី ចុះចេញពីតំណែង និងរំលាយបក្សកុម្មុយនីស្ត។
រូបភាព និងវីដេអូដែលបានបញ្ចេញដោយប្រព័ន្ធផ្សព្វផ្សាយខាងលោកសេរី មានដូចជាបណ្ដាញផ្សាយព័ត៌មាន BBC ជាដើម ត្រូវបានគេមើលឃើញនៅទូទាំងពិភពលោក ដោយឃើញប្រជាជនចិនប្រមូលផ្ដុំគ្នាប្រឆាំងនឹងរដ្ឋអំណាច និងរបបកុម្មុយនីស្ត ដែលព្យាយាមបិទសិទ្ធិប្រជាជនក្រោមហេតុផលអនុវត្តគោលនយោបាយកូវីដសូន្យ ឬមិនឲ្យមានកូវីដរបស់លោក ស៊ី ជីនពីង។
កាលពីថ្ងៃអាទិត្យ បាតុកម្មរៀបចំធ្វើនៅទីក្រុងសៀងហៃ នៅក្រុងប៉េកាំង និងនៅតាមសាកលវិទ្យាល័យនានានៅក្រុងជាច្រើននៅទូទាំងប្រទេស។
តាមដំណឹងពី BBC បាតុកម្មបានអូសពេល ៥ថ្ងៃហើយ គិតត្រឹមថ្ងៃចន្ទ ទី២៨ វិច្ឆិកា ដែលការតវ៉ានៅបន្ត ហើយកាន់តែរីករាលដាលដល់ទីក្រុងជាច្រើនទៀត។
យោងតាមប្រភពដដែលនេះ មូលហេតុដែលនាំឲ្យប្រជាជនចិនងើបឡើងប្រឆាំងរដ្ឋអំណាចរបស់ខ្លួន គឺដោយសារតែមនុស្សស្លាប់ ១០នាក់ដោយអគ្គិភ័យលេបត្របាក់ផ្ទះរបស់ពួកគាត់។ អគ្គិភ័យនេះបានឆេះលំនៅឋានមួយកន្លែងក្នុងតំបន់ស៊ីនជាំង គឺនៅក្រុង Urumqi តំបន់ដែលជនជាតិអ៊ុយហ្គឺររស់នៅកាលពីថ្ងៃព្រហស្បតិ៍សប្ដាហ៍មុននេះ។
ករណីស្លាប់មនុស្សដែលក្រុមអគ្គិភ័យមិនអាចចូលបាញ់ទឹកពន្លត់ទាន់ហេតុការណ៍នេះ គឺដោយសារតំបន់នោះបិទខ្ទប់ក្នុងការចាត់វិធានការកូវីដ បណ្ដាលឲ្យរថយន្តពន្លត់អគ្គិភ័យពុំអាចចូលទៅដល់។
ក្រុមបាតុករបានរិះគន់វិធានការកូវីដសូន្យរបស់រដ្ឋាភិបាលលោក ស៊ី ជីនពីង ដែលដាក់ចំណាត់ការតឹងតែងពេក និងបង្ខំឲ្យមនុស្សនៅក្នុងផ្ទះរហូតអាជ្ញាធរចាក់សោរបង និងលំនៅឋានពលរដ្ឋទៀតផង។
រថយន្តនៃក្រុមពន្លត់អគ្គិភ័យបានបើកចូលទៅកន្លែងកើតហេតុ តែមិនទាន់សភាពការណ៍ ហើយម្យ៉ាងទៀតនៅម្តុំកន្លែងភ្លើងឆេះ គឺមានរថយន្តចតច្រើនពេកដែលជារថយន្តរបស់ម្ចាស់ផ្ទះ និងកន្លែងធ្វើចត្តាឡីស័ក បណ្ដាលឲ្យរថយន្តពន្លត់អគ្គិភ័យពុំអាចរុលចូលទាន់សភាពការណ៍។
បាតុករបានហៅវិធានការនេះថាជាការធ្វេសប្រហែសក្នុងការសង្គ្រោះអាយុជីវិតមនុស្សគ្រោះថ្នាក់ក្នុងករណីអគ្គិភ័យ ហើយទម្លាក់កំហុសលើយុទ្ធនាការកូវីដសូន្យរបស់លោក ស៊ី។ មរណភាពរបស់មនុស្ស ១០នាក់នេះ បានរុញកំហឹងចិត្តរបស់ប្រជាជនចិនផ្ទុះឡើង។ ពលរដ្ឋចិនបានសម្ដែងក្តីសោកស្តាយជាខ្លាំង។ ពួកគេបញ្ចេញកំហឹងនៅក្នុងបណ្ដាញសង្គម ហើយក៏សម្រេចចេញពីផ្ទះមកប្រមូលផ្ដុំតាមផ្លូវ និងទីសាធារណៈ តវ៉ាទាមទារឲ្យរដ្ឋាភិបាលលុបចោលគោលនយោបាយកូវីដសូន្យ។
តាមការផ្ដល់រូបភាពពី BBC ពលរដ្ឋចិននៅក្នុងតំបន់នោះបានយកផ្កា និងអុជទៀនទៅដាក់នៅកន្លែងអគ្គិភ័យ ដើម្បីឧទ្ទិសដល់វិញ្ញាណក្ខន្ធជនរងគ្រោះ និងរំលែកទុក្ខសោកជាមួយគ្រួសារសព។
នៅពេលរូបភាពបង្ហោះពេញបណ្ដាញសង្គមអំពីប្រជាជនចេញពីផ្ទះតវ៉ាប្រឆាំងនឹងរដ្ឋាភិបាល គេសង្កេតឃើញការផ្ទុះការតវ៉ានៅតាមខេត្តផ្សេងៗជាច្រើន។ បាតុកម្មធ្វើឡើងនៅតំបន់ស៊ីនជាំង ទីបេ ណាន់នីង វូហាន់ គាន់តុង សៀងហៃ និងប៉េកាំង។
នៅក្រុងប៉េកាំង និងនៅសៀងហៃ ក្រុមនិស្សិតនៅសាកលវិទ្យាល័យបានចេញធ្វើការតវ៉ាទ្រង់ទ្រាយធំ។ ក្រុមនិស្សិត បាតុករបានច្រៀងចម្រៀងជាតិចិន ដែលមានសេចក្ដីថា យើងត្រូវតែងើបឡើង គឺមិនត្រូវធ្វើជាទាសករនៃរបបផ្ដាច់ការទេ។
អ្នកតវ៉ារាប់ពាន់បានស្រែកថា ឈប់ធ្វើតេស្ដកូវីដទៅ ឈប់ធ្វើចត្តាឡីស័កទៅ បញ្ឈប់ទៅយុទ្ធនាការកូវីដសូន្យ គឺវាគ្មានសារសំខាន់អ្វីទៀតទេ។ ពិភពលោកគេលែងបារម្ភហើយករណីកូវីដនេះ។ បាតុករបានស្រែកទាមទារសេរីភាព។ មិនតែប៉ុណ្ណោះ បាតុករខ្លះក៏ស្រែកខ្លាំងៗទាមទារឲ្យប្រធានាធិបតីចិន ស៊ី ជីនពីង ចុះចេញពីតំណែង ហើយថាត្រូវរំលាយបក្សកុម្មុយនីស្តចោលទៅ។
អ្នកចូលរួមបាតុកម្មភាគច្រើនជាយុវជន និងនិស្សិតបញ្ញវន្ត គឺដូចគ្នានឹងចលនានិស្សិតនៅទីលានធានអានម៉ិន កាលថ្ងៃទី៤ ខែមិថុនា ឆ្នាំ១៩៨៩។ ព្រឹត្តិការណ៍ពេលនោះ គឺយុវជនបាតុករទាមទារឲ្យមានការកែទម្រង់ប្រព័ន្ធដឹកនាំនៃរបបបក្សកុម្មុយនីស្ត តែត្រូវបានប៉ូលិស និងកងទ័ពបក្សកុម្មុយនីស្តចិន បាញ់បង្ក្រាបយ៉ាងព្រៃផ្សៃដោយការបើករថក្រោះបុកកិនបាតុករទៀតផង។
បាតុករស្លាប់យ៉ាងរង្គាលជិតមួយម៉ឺននាក់។ ពិភពលោក ជាពិសេសពួកលោកសេរីថ្កោលទោសរបបផ្ដាច់ការចិនយ៉ាងខ្លាំង។ ចំពោះការតវ៉ាលើកនេះ ដែលចិននៅក្រោមការដឹកនាំរបស់លោក ស៊ី ជីនពីង ថាតើអាចមានការបង្ក្រាបដែរឬទេ។ ប៉ុន្តែបើតាមបណ្ដាញផ្សាយព័ត៌មាន BBC បាតុករជាច្រើនរយនាក់ត្រូវបានចាប់ខ្លួន ដោយពួកប៉ូលិសលើកបាតុករបោះចូលរថយន្ត ហើយដឹកយកទៅបាត់។
ចិនជាប្រភពផ្ទុះកូវីដមុនគេនៅចុងឆ្នាំ២០១៩ ដែលត្រូវបានអ្នកជំនាញសង្ស័យថាវាផ្ទុះចេញពីមន្ទីរពិសោធន៍នៅក្រុងវូហាន់ ហើយប្រទេសនេះក៏ជាអ្នកផលិតវ៉ាក់សាំងកូវីដបានមុនគេដែរ តែវ៉ាក់សាំងចិនពុំមានប្រសិទ្ធភាពច្រើនទេ បើប្រៀបធៀបនឹងវ៉ាក់សាំងពីសហរដ្ឋអាមេរិក និងអង់គ្លេស។
រដ្ឋអំណាចក្រុងប៉េកាំង មិនអនុញ្ញាតឲ្យនាំចូលថ្នាំចាក់បង្ការ ឬវ៉ាក់សាំងពីសហរដ្ឋអាមេរិក ដូចជា Pfizer Moderna ឬ Johnson & Johnson ជាដើម៕