សកម្មជនគណបក្សសង្គ្រោះជាតិ ថាផែនការរបស់បណ្ឌិត យ៉ង សាំងកុមារ ចង់កែប្រែតម្លៃស្រូវ និងតម្លៃសត្វចិញ្ចឹមក្នុងស្រុក គឺជាផែនការដែលប្រៀបបាននឹងដេកយល់សប្តិចែវទូកក្នុងពាងទឹក។
លោក ហ៊ុន កុសល បានសរសេរលើគណនីហ្វេសប៊ុករបស់កាលពីថ្ងៃចន្ទ ទី២៨ វិច្ឆិកា ថា គំនិតទាំង ១២ខ របស់គាត់ជាផែនការល្អចំពោះយុទ្ធសាស្ត្រជួយលើកស្ទួយវិស័យកសិកម្មខ្មែរ ប៉ុន្តែនឹងមិនមានកិច្ចសហការពីក្រសួងពាក់ព័ន្ធទេ ព្រោះរឿងដែលល្អចំពោះពលរដ្ឋ នឹងធ្វើឱ្យប៉ះពាល់ផលប្រយោជន៍ផ្ទាល់ខ្លួនរបស់មន្ត្រីរដ្ឋាភិបាលជាមិនខាន។ ដូច្នេះ ពួកគេនឹងមិនយកទៅអនុវត្តដាច់ខាត ព្រោះនេះគឺជាទម្លាប់របស់មន្ត្រីទាំងនោះជាង ៤០ឆ្នាំមកហើយ។
សកម្មជនគណបក្សសង្គ្រោះជាតិរូបនេះលើកឡើងថា ពិតមែនតែបណ្ឌិត យ៉ង សាំងកុមារ ជាអ្នកជំនាញខាងកសិកម្ម ប៉ុន្តែបក្សកាន់អំណាចនឹងទុកគាត់ឱ្យធ្វើតាមតែបញ្ជាគេប៉ុណ្ណោះ ហើយគាត់នឹងមិនអាចធ្វើតាមផែនការរបស់គាត់បានទេ។ លោក ហ៊ុន កុសល បញ្ជាក់ថា គាត់មានមនសិការល្អ ប៉ុន្តែគាត់បានយកមនសិការនេះទៅប្រើជាមួយរដ្ឋាភិបាលដែលគ្មានឆន្ទៈ។
កាលពីថ្ងៃទី២៧ ខែវិច្ឆិកា ឆ្នាំ២០២២ ប្រធានគណៈកម្មាធិការនាយកគណបក្សប្រជាធិបតេយ្យមូលដ្ឋាន បណ្ឌិត យ៉ង សាំងកុមារ បានដាក់លិខិតមួយច្បាប់រួមជាមួយសហការីរបស់លោក គឺលោក ឡឹក សុធា បានស្នើសុំចូលរួមជីវភាពនយោបាយជាមួយបក្សប្រជាជនកម្ពុជា ក្នុងគោលបំណងដើម្បីចូលរួមលើកស្ទួយវិស័យកសិកម្មនៅកម្ពុជាឱ្យមានភាពប្រសើរឡើងជាងពេលបច្ចុប្បន្ន។
ក្រោយប្រកាសចូលរួមជីវភាពនយោបាយជាមួយបក្សកាន់អំណាចបានពីរថ្ងៃ គឺនៅថ្ងៃទី២៩ ខែវិច្ឆិកា ឆ្នាំ២០២២ នេះ បណ្ឌិត យ៉ង សាំងកុមារ ត្រូវបានតែងតាំងជារដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការក្រសួងកសិកម្ម រុក្ខាប្រមាញ់ និងនេសាទ ខណៈលោក ឡឹក សុធា អតីតអ្នកនាំពាក្យគណបក្សប្រជាធិបតេយ្យមូលដ្ឋាន ក៏ត្រូវបានតែងតាំងជាអនុរដ្ឋលេខាធិការក្រសួងកសិកម្មផងដែរ។
ពាក់ព័ន្ធនឹងបញ្ហានេះ ប្រធានប្រតិបត្តិរាជធានីភ្នំពេញ និងជាសមាជិកគណៈកម្មាធិការនាយកនៃគណបក្សប្រជាធិបតេយ្យមូលដ្ឋាន លោក ខាត់ សុធី ក៏បានដាក់លិខិតលាលែងពីគណបក្សប្រជាធិបតេយ្យមូលដ្ឋាន កាលពីថ្ងៃទី២៨ ខែវិច្ឆិកា ឆ្នាំ២០២២ និងស្នើសុំចូលរួមជីវភាពនយោបាយជាមួយបក្សកាន់អំណាច ដែលត្រូវបានផ្សព្វផ្សាយនៅថ្ងៃនេះក្រោមហេតុផលថា ដើម្បីចូលរួមបម្រើជាតិមាតុភូមិជាមួយគណបក្សប្រជាជនកម្ពុជាទៅថ្ងៃមុខ។
ប្រធានវេទិកាពលរដ្ឋ លោក គឹម សុខ បានសរសេរលើគណនីហ្វេសប៊ុករបស់លោកនៅថ្ងៃទី២៩ វិច្ឆិកា នេះថា មធ្យោបាយរួបរួមតែមួយគត់ពីក្រុមអ្នកមាននិន្នាការប្រជាធិបតេយ្យ ទើបអាចជួយសង្គ្រោះប្រទេសកម្ពុជាបាន ចំណែកឯវិធីចូលរួមបម្រើបក្សកាន់អំណាចដើម្បីលើកស្ទួយជីវភាពពលរដ្ឋ គ្រាន់តែជាលេសប៉ុណ្ណោះ ហើយវិធីនេះមិនអាចជួយអ្វីដល់ពលរដ្ឋបានទេ ប៉ុន្តែជាវិធីជួយបក្សកាន់អំណាចទៅវិញ៕