សង្គមស៊ីវិលអះអាងថា បើទោះបីលោក ហ៊ុន សែន បង្ហាញវត្តមាននៅក្នុងស្ថានទូតសហរដ្ឋអាមេរិកប្រចាំកម្ពុជា ដែលជាវត្តមានដ៏កម្រក៏ដោយ ក៏នៅមិនទាន់អាចវាយតម្លៃបានថា ទំនាក់ទំនងរវាងកម្ពុជា និងអាមេរិកមានភាពល្អជាងមុននៅពេលនេះដែរ។
អ្នកនាំពាក្យសមាគមការពារសិទ្ធិមនុស្សអាដហុក លោក ស៊ឹង សែនករុណា ប្រាប់សារព័ត៌មាន The Cambodia Daily នៅថ្ងៃទី២៦ ធ្នូ នេះថា ដើម្បីឱ្យគេទទួលស្គាល់ដោយពិតប្រាកដជុំវិញទំនាក់ទំនងកម្ពុជា និងអាមេរិក ថានឹងមានភាពល្អប្រសើរជាងពេលកន្លងមកនោះ លុះត្រាកម្ពុជាបង្ហាញពីការអនុវត្តរបស់ខ្លួនតាមការស្នើសុំរបស់អាមេរិក ជុំវិញការគោរពសិទ្ធិមនុស្ស ដូចជាការដោះលែងកញ្ញា សេង ធារី និងដោះលែងកញ្ញា ឈឹម ស៊ីថរ ដែលខ្លួនបានចាប់ដាក់ពន្ធនាគារនាពេលកន្លងមក ជាដើម។
លោក ស៊ឹង សែនករុណា លើកឡើងថា ក្រៅពីការគោរពសិទ្ធិមនុស្ស កម្ពុជាក៏ត្រូវបើកលំហសេរីភាពនយោបាយជុំវិញការចាប់ឃុំខ្លួនសកម្មជននយោបាយ ដើម្បីធានានូវការបោះឆ្នោតជាតិឆ្នាំ២០២៣ ខាងមុខនេះឱ្យប្រព្រឹត្តទៅដោយសេរី ត្រឹមត្រូវ និងយុត្តិធម៌ដែរ។ ជាងនេះទៀត កម្ពុជាក៏ត្រូវបង្ហាញជំហររបស់ខ្លួនប្រកបដោយតម្លាភាព ជុំវិញឯកភាពរបស់កម្ពុជាទាក់ទិននឹងមូលដ្ឋានយោធាទ័ពជើងទឹករាមថែមទៀត។
អ្នកនាំពាក្យសមាគមការពារសិទ្ធិមនុស្សរូបនេះបញ្ជាក់ថា បើទោះបីជាការធ្វើទស្សនកិច្ចនេះបង្ហាញពីរូបភាពវិជ្ជមានជុំវិញទំនាក់ទំនងរបស់កម្ពុជាជាមួយសហរដ្ឋអាមេរិកក៏ដោយ ប៉ុន្តែមកទល់នឹងពេលនេះ កម្ពុជាមិនទាន់បានអនុវត្តតាមការស្នើសុំ និងការអំពាវនាវណាមួយរបស់សហរដ្ឋអាមេរិកនៅឡើយទេ ទាក់ទិននឹងការបើកលំហសេរីភាពនយោបាយ និងការដោះលែងសកម្មជននានា។
កាលពីថ្ងៃទី២៣ ខែធ្នូ ឆ្នាំ២០២២ មេដឹកនាំបក្សកាន់អំណាច លោក ហ៊ុន សែន បានធ្វើទស្សនកិច្ចនៅស្ថានទូតអាមេរិកប្រចាំនៅកម្ពុជាជាមួយមន្ត្រីរបស់ខ្លួន និងកូនប្រុសរបស់លោកផងដែរ។
ក្នុងដំណើរទស្សនកិច្ចនេះ ឯកអគ្គរដ្ឋទូតសហរដ្ឋអាមេរិក លោក Patrick Murphy និងលោក ហ៊ុន សែន បានពិភាក្សាលើវិធីកែលំអទំនាក់ទំនងទ្វេភាគីរវាងកម្ពុជា-អាមេរិក ឱ្យកាន់តែល្អ និងបន្តការខិតខំក្នុងការពង្រឹងមិត្តភាពរវាងពលរដ្ឋអាមេរិកាំង និងប្រជាជនកម្ពុជាថែមទៀត។
ដំណើរទស្សនកិច្ចដ៏កម្ររបស់មេដឹកនាំកម្ពុជានេះ ធ្វើឡើងស្របពេលដែលគេមើលឃើញថា ទំនាក់ទំនងកម្ពុជា-អាមេរិកស្ថិតក្នុងភាពរកាំរកូសជុំវិញការជំរុញរបស់អាមេរិកឱ្យកម្ពុជាធានាឱ្យបាននូវការអនុវត្តលទ្ធិប្រជាធិបតេយ្យ និងការគោរពសិទ្ធិមនុស្សដែលកំពុងធ្លាក់ចុះយ៉ាងខ្លាំងសព្វថ្ងៃនេះ ជាពិសេសជុំវិញការជំរុញឱ្យកម្ពុជាធ្វើឱ្យមានតម្លាភាពលើមូលដ្ឋានទ័ពជើងទឹករាមរបស់ខ្លួនផងដែរ។
កាលពីថ្ងៃទី១២ ខែវិច្ឆិកា ឆ្នាំ២០២២ សេតវិមានបានចេញសេចក្តីថ្លែងការណ៍ថា ប្រធានាធិបតីអាមេរិក លោក ចូ បៃដិន បានជំរុញឲ្យលោក ហ៊ុន សែន បើកលំហសិទ្ធិនយោបាយសម្រាប់ពលរដ្ឋខ្មែរឡើងវិញមុនការបោះឆ្នោតឆ្នាំ២០២៣ ខាងមុខនេះ និងអំពាវនាវឲ្យមានការដោះលែងសកម្មជនដែលត្រូវបានឃុំខ្លួនពីបទចោទប្រកាន់ពាក់ព័ន្ធនឹងរឿងនយោបាយ ព្រមទាំងអំពាវនាវឱ្យដោះលែងពលរដ្ឋខ្មែរអាមេរិកាំង កញ្ញា សេង ធារី ផងដែរ។
ទោះជាបែបនេះក្តី លោក ហ៊ុន សែន អះអាងកាលពីថ្ងៃទី២២ ខែវិច្ឆិកា ឆ្នាំ២០២២ កន្លងទៅថា លោកមិនបានឮប្រធានាធិបតីអាមេរិក លោក ចូ បៃដិន លើកឡើងអំពីការជំរុញឱ្យលោកដោះលែងសកម្មជនដែលកំពុងជាប់ពន្ធនាគារនោះទេក្នុងជំនួបទ្វេភាគីជាមួយរូបលោក អំឡុងពេលកិច្ចប្រជុំកំពូលអាស៊ានកាលពីពាក់កណ្តាលខែវិច្ឆិកា កន្លងទៅនេះ។
កាលពីថ្ងៃទី១១ ខែឧសភា ឆ្នាំ២០២២ ព្រឹទ្ធសភាសហរដ្ឋអាមេរិកបានធ្វើសេចក្តីសម្រេចចិត្តមួយ ដែលបានកំណត់ឱ្យរដ្ឋាភិបាលកម្ពុជាត្រូវតែលើកស្ទួយការគោរពសិទ្ធិមនុស្សដូចមានចែងក្នុងរដ្ឋធម្មនុញ្ញរបស់កម្ពុជា និងធម្មនុញ្ញអង្គការសហប្រជាជាតិ ជាដើម ព្រមទាំងបានកំណត់អនុវត្តឱ្យបានតាមកិច្ចព្រមព្រៀងសន្តិភាពទីក្រុងប៉ារីសឆ្នាំ១៩៩១ ដើម្បីធានានូវដំណើរការប្រជាធិបតេយ្យនៅកម្ពុជាសព្វថ្ងៃនេះ៕