27 C
Phnom Penh

លោក សុន ឆ័យ ថា​បក្ស​នឹង​មិន​ធ្វើ​បាតុកម្ម​ទាមទារ​ដោះលែង​លោក ថាច់ សេដ្ឋា ទេ ប៉ុន្តែ​ស្វែងរក​ការ​ចរចា​វិញ

ដោយ ឌឹ ខេមបូឌា ដេលី

បទវិភាគ

អនុប្រធាន​គណបក្ស​ភ្លើង​ទៀន លោក សុន ឆ័យ ប្រកាស​ជំហរ​ថា​គណបក្ស​ភ្លើង​ទៀន​សម្រេច​ចិត្ត​ជ្រើសរើស​យន្តការ​ជជែក​ចរចា​ជាមួយ​គណបក្ស​កាន់​អំណាច ដោយ​មិន​យក​យន្តការ​ធ្វើ​បាតុកម្ម​តាម​ដងផ្លូវ ដើម្បី​ស្វែងរក​ដំណោះស្រាយ​នយោបាយ និង​ទាមទារ​ឱ្យ​ដោះលែង​លោក ថាច់ សេដ្ឋា ឡើយ ទោះបី​រង​ការ​គំរាមកំហែង​ពី​បក្ស​កាន់​អំណាច​យ៉ាងណាក៏ដោយ។

ការ​ប្រកាស​ជំហរ​របស់​គណបក្ស​ភ្លើង​ទៀន​នេះ ធ្វើឡើង​ក្នុង​សន្និសីទ​សារព័ត៌មាន​នា​ថ្ងៃទី​១៧ ខែ​មករា ឆ្នាំ​២០២៣ បន្ទាប់ពី​មាន​ការ​ចាប់​ខ្លួន​អនុប្រធាន​គណបក្ស​ភ្លើង​ទៀន លោក ថាច់ សេដ្ឋា កាលពី​ថ្ងៃទី​១៦ មករា។

លោក សុន ឆ័យ អះអាង​ថា ទោះបី​គណបក្ស​ភ្លើង​ទៀន​រង​ការ​គំរាមកំហែង ការ​ធ្វើ​ទុក្ខបុកម្នេញ​រហូត​មាន​មាន​ការ​ចាប់​ខ្លួន​ថ្នាក់​ដឹកនាំ​គណបក្ស លោក ថាច់ សេដ្ឋា ក៏ដោយ ក៏​គណបក្ស​នេះ​មិន​ធ្វើ​បាតុកម្ម​តាម​ដងផ្លូវ​ដូច​កាលពី​ពេល​កន្លងទៅ​នោះ​ឡើយ។

លោក​ថា គណបក្ស​នេះ​សម្រេច​ជ្រើសរើស​យក​យន្តការ​ជជែក​ជាមួយ​គណបក្ស​កាន់​អំណាច ដើម្បី​ស្វែងរក​ដំណោះស្រាយ​នយោបាយ និង​ឱ្យ​មាន​ការ​ដោះលែង​អនុប្រធាន​គណបក្ស​ភ្លើង​ទៀន​វិញ។

លោក សុន ឆ័យ បញ្ជាក់​ថា គណបក្ស​ភ្លើង​ទៀន​ក៏​មិន​បាន​ជ្រើសរើស​យក​យន្តការ​ជេរ​ប្រមាថ​លើ​គូប្រជែង​ដែរ ដើម្បី​បញ្ចៀស​កុំ​ឲ្យ​មាន​ការ​បង្ក​ភាព​ឈឺចាប់​ដល់​គ្នា​នឹង​គ្នា​នោះ​ដែរ។

តែ​យ៉ាងណា លោក​ចាត់ទុក​ការ​ចាប់​ខ្លួន​លោក ថាច់ សេដ្ឋា កាលពី​ថ្ងៃទី​១៦ មករា ថា​ជា​រឿង​នយោបាយ​ច្រើន​ជាង​ការ​អនុវត្ត​ច្បាប់ ដោយសារ​គិត​ត្រឹម​ថ្ងៃ​នេះ​មាន​ថ្នាក់​ដឹកនាំ​បក្ស​ភ្លើង​ទៀន​ចំនួន ៣​រូប​ហើយ​ដែល​ត្រូវ​បាន​គណបក្ស​ប្រជាជន​កម្ពុជា​ប្ដឹង​ទៅ​តុលាការ។

អ្នកវិភាគ​នយោបាយ និង​ជា​ប្រធាន​វេទិកា​ពលរដ្ឋ លោក គឹម សុខ លើកឡើង​ថា គណបក្ស​ភ្លើង​ទៀន​មិន​គួរ​ដើរ​តាម​គន្លង​គណបក្ស​សង្គ្រោះ​ជាតិ​ឡើយ។ លោក​បន្ត​ថា ពេល​ចាប់​លោក កឹម សុខា គណបក្ស​សង្គ្រោះ​ជាតិ​បាន​សម្ងំ​ដោយ​មិន​ធ្វើ​សកម្មភាព​តវ៉ា​អ្វី​ឡើយ ខណៈ​នេះ​ក៏​មាន​ការ​ចាប់​ខ្លួន​លោក ថាច់ សេដ្ឋា ទៀត។ លោក​ថា តើ​គណបក្ស​នេះ​គួរ​បន្ត​នៅ​ស្ងៀម​ទៀត​ដែរ​ឬ​ទេ?

លោក គឹម សុខ អះអាង​ថា បើ​គេ​បិទ​ផ្លូវ​ជិត​អស់​ទៅ​ហើយ ទោះបី​ចូលរួម​ការ​បោះឆ្នោត​ក៏​គ្មាន​ខ្លឹមសារ​អ្វី​នោះ​ដែរ។

បន្ទាប់ពី​មាន​ការ​ចាប់​ខ្លួន​លោក ថាច់ សេដ្ឋា គណបក្ស​ភ្លើង​ទៀន​ក៏​បាន​ចេញ​សេចក្ដី​ថ្លែងការណ៍​មួយ​ដោយ​ទាមទារ​ឲ្យ​រដ្ឋាភិបាល និង​តុលាការ​កម្ពុជា​ដោះលែង​លោក ថាច់ សេដ្ឋា ជាបន្ទាន់​ដោយ​ឥត​លក្ខខណ្ឌ និង​បញ្ឈប់​ការ​ចាប់​ឃុំ​ខ្លួន រួម​ទាំង​ការ​គំរាមកំហែង​គ្រប់​រូបភាព​លើ​ថ្នាក់​ដឹកនាំ និង​សកម្មជន​បន្ត​ទៀត ដើម្បី​ធានា​ដល់​ដំណើរការ​បោះឆ្នោត​ខាងមុខ។

សេចក្ដី​ថ្លែងការណ៍​កាលពី​ថ្ងៃ​ទី​១៦ ខែ​មករា ឆ្នាំ​២០២៣ គណបក្ស​ភ្លើង​ទៀន​បាន​ថ្កោលទោស​ចំពោះ​ការ​ចាប់​ឃុំ​ខ្លួន​អនុប្រធាន​គណបក្ស​ភ្លើង​ទៀន លោក ថាច់ សេដ្ឋា ហើយ​ចាត់ទុក​ការ​ចាប់​ខ្លួន​នេះ​ថា​ជា​ចលនា​នៃ​ការ​បំភិតបំភ័យ និង​គំរាមកំហែង​ពី​សំណាក់​អ្នក​មាន​អំណាច​មក​លើ​ថ្នាក់​ដឹកនាំ និង​សកម្មជន​របស់​បក្ស​នេះ ហើយ​ករណី​នេះ​នឹង​ធ្វើ​ឲ្យ​បរិយាកាស​នយោបាយ​មុន​ការ​បោះឆ្នោត​ជ្រើសតាំង​តំណាងរាស្ត្រ​នីតិកាល​ទី​៧ ឆ្នាំ​២០២៣ ខាងមុខ រឹតតែ​មាន​ភាព​អាប់អួរ​ថែម​ទៀត។

សាលាដំបូង​រាជធានី​ភ្នំពេញ កាលពី​ថ្ងៃទី​១៦ ខែ​មករា បញ្ជាក់​ថា ការ​ចាប់ និង​ឃុំ​ខ្លួន​លោក ថាច់ សេដ្ឋា គឺ​ដោយសារ​លោក​មិន​បាន​បំពេញ​កាតព្វកិច្ច​ចំពោះ​ឧបករណ៍​អាច​ជួញដូរ​បាន ឬ​ការ​ចេញ​សែក​ដោយ​គ្មាន​សាច់ប្រាក់​ចំនួន ៥​សន្លឹក ដែល​ប្រព្រឹត្ត​នៅ​រាជធានី​ភ្នំពេញ​កាលពី​អំឡុង​ឆ្នាំ​២០១៩។ តុលាការ​អះអាង​ថា លោក ថាច់ សេដ្ឋា បាន​ខកខាន​ក្នុង​ការ​ចូល​បំភ្លឺ​ចំនួន ២​លើក​កាលពី​អំឡុង​ឆ្នាំ​២០២១ កន្លងទៅ៕

© 2022, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស