បេក្ខភាពអនាគតនាយករដ្ឋមន្ត្រីរបស់គណបក្សប្រជាជនកម្ពុជា លោក ហ៊ុន ម៉ាណែត ស្នើទៅអ្នកវិភាគលោក គឹម សុខ ឲ្យសិក្សាច្បាប់ឡើងវិញសិន មុននឹងធ្វើការរិះគន់លោកថាការតែងតាំងលោកជាបេក្ខភាពនាយករដ្ឋមន្ត្រីបន្តវេនពីឪពុក ជាការបំពាន ឬជាការរំលោភច្បាប់ធ្ងន់ធ្ងរនោះ។
កូនប្រុសច្បងរបស់លោក ហ៊ុន សែន បានបង្ហោះវីដេអូឃ្លីបជាង ៧នាទីលើហ្វេសប៊ុករបស់ខ្លួន ដោយនិយាយថា រដ្ឋាភិបាលដែលដឹកនាំដោយគណបក្សប្រជាជនកម្ពុជា មិនបានធ្វើខុស និងរំលោភច្បាប់ដូចអ្នកវិភាគនយោបាយ លោក គឹម សុខ ចោទប្រកាន់ឡើយ ជាពិសេសគឺការតែងតាំង និងគាំទ្រលោកជាបេក្ខភាពនាយករដ្ឋមន្ត្រី ទោះបីបច្ចុប្បន្នខ្លួនកំពុងជាមេទ័ពជើងគោកនៃកងយោធពលខេមរភូមិន្ទក៏ដោយ។
លោក ហ៊ុន ម៉ាណែត អះអាងថា ឪពុករបស់លោកដែលជានាយករដ្ឋមន្ត្រីបានដឹកនាំប្រទេសកម្ពុជាឲ្យរីកចម្រើន និងគោរពច្បាប់ផងដែរ។
លោក ហ៊ុន ម៉ាណែត អះអាងថា ទោះបីលោកកំពុងកាន់តួនាទីជាមេទ័ពជើងគោកក៏ពិតមែន ប៉ុន្តែលោកមិនដែលស្លៀកពាក់ឯកសណ្ឋានមេទ័ពទៅឃោសនាឲ្យគណបក្សប្រជាជនកម្ពុជា ដោយរំលោភច្បាប់នោះឡើយ។ លើសពីនេះ លោកក៏បានទាមទារឲ្យលោក គឹម សុខ បង្ហាញរូបថតដែលថាលោកស្លៀកពាក់ឯកសណ្ឋាន ហើយទៅឃោសនាឲ្យគណបក្សប្រជាជនកម្ពុជានោះ។
លោក ហ៊ុន ម៉ាណែត ថាគណបក្សប្រជាជនកម្ពុជាគាំទ្រលោកជាបេក្ខភាពនាយករដ្ឋមន្ត្រី និងអ្នកបន្តវេននាពេលនេះ មិនខុសច្បាប់ ហើយក៏គ្មានច្បាប់ណាហាមឃាត់ ដោយសារការសម្រេចនេះដោយមានការឯកភាពពីផ្ទៃក្នុងបក្សប្រជាជនកម្ពុជា ខណៈច្បាប់ស្ដីពីការជ្រើសតាំងតំណាងរាស្ត្រក៏បានបើកផ្លូវឲ្យដាក់ពាក្យលាឈប់ពីតួនាទី បើសិនជាទៅឈរឈ្មោះជាបេក្ខភាពនាយករដ្ឋមន្ត្រីនោះ។
លោកស្នើសុំឲ្យលោក គឹម សុខ ពិនិត្យមើលច្បាប់ឡើងវិញ មុននឹងធ្វើការរិះគន់ខ្លួន ដោយថាកុំធ្វើជាអ្នកវិភាគបែបស៊ីអារម្មណ៍ ដោយដឹងដែរប៉ុន្តែធ្វើមិនដឹង។
លោក ហ៊ុន ម៉ាណែត ដែលត្រូវបានលោក ហ៊ុន សែន ជាឪពុកលើកបន្តុបឲ្យធ្វើជាបេក្ខជននាយករដ្ឋមន្ត្រីរូបនេះលើកឡើងថា ប្រសិនបើលោក គឹម សុខ នៅតែវិភាគបែបនេះទៀត នឹងធ្វើឲ្យពលរដ្ឋបាត់បង់ជំនឿ និងតម្លៃរបស់ខ្លួន ព្រមទាំងបាត់ប្រជាប្រិយភាព ហើយថែមទាំងមានបាបទៀត ដោយសារការនិយាយមិនពិត។
ទោះជាបែបនេះក្តី អ្នកវិភាគនយោបាយ និងជាប្រធានវេទិកាពលរដ្ឋ លោក គឹម សុខ កាលពីថ្ងៃទី២៧ ខែមករា បានបង្ហោះវីដេអូឃ្លីបរយៈពេលជាង ៨នាទី ដោយនិយាយថា ការតែងតាំងលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីជារឿងខុសច្បាប់ ហើយបក្សប្រជាជនកម្ពុជាគួរត្រូវរំលាយចេញផងដែរ។
មូលហេតុដែលលោកលើកឡើងដូច្នេះ ដោយសារគណបក្សប្រជាជនកម្ពុជា និងលោក ហ៊ុន សែន បានដឹង និងយល់ច្បាស់ពីច្បាប់ ប៉ុន្តែបែរជាបំពាន និងរំលោភច្បាប់ធ្ងន់ធ្ងរ។ លោក គឹម សុខ លើកឡើងថា ត្បិតច្បាប់ស្ដីពីគណបក្សនយោបាយមាត្រា១៥ អនុញ្ញាតឲ្យមន្ត្រីរាជការ កងកម្លាំងប្រដាប់អាវុធ និងមន្ត្រីតុលាការ អាចចូលរួមធ្វើនយោបាយជាមួយគណបក្សណាមួយក៏បានពិតមែន ប៉ុន្តែច្បាប់នេះក៏បានហាមមន្ត្រីមិនឲ្យធ្វើសកម្មភាពនយោបាយដែរ។
លោកថា លោក ហ៊ុន ម៉ាណែត កំពុងដឹកនាំសកម្មភាពឃោសនាឲ្យគណបក្សប្រជាជនកម្ពុជា ដោយបានរៀបចំផែនការ និងយុទ្ធសាស្ត្រទាំងដែលខ្លួននៅកាន់តួនាទីជាមេទ័ពជើងគោក៕