អ្នកវិភាគឯករាជ្យ និងជាប្រធានវេទិកាពលរដ្ឋ លោក គឹម សុខ អះអាងថាលោកនឹងលាឈប់ពីការងារជាអ្នកវិភាគនយោបាយ បើមន្ត្រីជាន់ខ្ពស់គណបក្សប្រជាជនកម្ពុជាបង្ហាញថា កម្ពុជាមានច្បាប់ចែងអនុញ្ញាតឱ្យតែងតាំងមន្ត្រីកងកម្លាំងនៃកងយោធពលខេមរភូមិន្ទឱ្យធ្វើជាបេក្ខជននាយករដ្ឋមន្ត្រីនៃគណបក្សនយោបាយណាមួយ។
លោក គឹម សុខ លើកឡើងក្នុងកម្មវិធី Idea Talk នៃសារព័ត៌មាន The Cambodia Daily កាលពីរាត្រីថ្ងៃអង្គារ ទី៣១ មករា ថា គ្មានច្បាប់ណាមួយរបស់ប្រទេសកម្ពុជា ដូចជាច្បាប់ស្ដីពីគណបក្សនយោបាយ ច្បាប់ស្ដីពីការបោះឆ្នោត ច្បាប់ស្ដីពីលក្ខន្តិកៈនៃកងយោធពលខេមរភូមិន្ទ និងសូម្បីតែរដ្ឋធម្មនុញ្ញរបស់ប្រទេសកម្ពុជាក៏ដោយ បានចែងអនុញ្ញាតឱ្យតែងតាំងមន្ត្រីកងកម្លាំងនៃកងយោធពលខេមរភូមិន្ទឱ្យកាន់តួនាទីនយោបាយជាន់ខ្ពស់នៃគណបក្សណាមួយនោះទេ។
លោកបន្ថែមថា ដូច្នេះការតែងតាំងលោក ហ៊ុន ម៉ាណែត ជាបេក្ខជននាយករដ្ឋមន្ត្រី ឬជាបេក្ខភាពនាយករដ្ឋមន្ត្រីនៅថ្ងៃអនាគតរបស់គណបក្សប្រជាជនកម្ពុជា ទាំងដែលខ្លួនកំពុងកាន់តំណែងជាអគ្គមេបញ្ជាការកងទ័ពជើងគោក និងជាអគ្គមេបញ្ជាការរងនៃកងយោធពលខេមរភូមិន្ទសព្វថ្ងៃនេះ គឺជាការរំលោភបំពានច្បាប់របស់ប្រទេសកម្ពុជាយ៉ាងធ្ងន់ធ្ងរ។
អ្នកវិភាគឯករាជ្យរូបនេះលើកឡើងថា ច្បាប់ស្ដីពីគណបក្សនយោបាយ ច្បាប់ស្ដីពីការបោះឆ្នោត និងច្បាប់ស្ដីពីលក្ខន្តិកៈនៃកងយោធពលខេមរភូមិន្ទក៏ដោយ ចែងត្រឹមតែថា មន្ត្រីកងកម្លាំងនៃកងយោធពលខេមរភូមិន្ទអាចចូលត្រឹមតែជាសមាជិកគណបក្សនយោបាយប៉ុណ្ណោះ។ ជាងនេះទៀត ប្រសិនបើពួកគេចង់ធ្វើសកម្មភាពឃោសនាគាំទ្រគណបក្សណាមួយ គឺត្រូវធ្វើសកម្មភាពនៅពេល គ.ជ.ប បើកឱ្យមានយុទ្ធនាការឃោសនាបោះឆ្នោត និងនៅក្រៅម៉ោងធ្វើការងាររដ្ឋប៉ុណ្ណោះ។
លោក គឹម សុខ រិះគន់ថា ការតែងតាំងលោក ហ៊ុន ម៉ាណែត ជាបេក្ខភាពនាយករដ្ឋមន្ត្រីនៅថ្ងៃអនាគតរបស់គណបក្សប្រជាជនកម្ពុជាជាការរំលោភច្បាប់រួចទៅហើយ ប៉ុន្តែការយកវេទិកានានាក្នុងនាមខ្លួនជាអគ្គមេបញ្ជាការកងទ័ពជើងគោក និងជាអគ្គមេបញ្ជាការរងនៃកងយោធពលខេមរភូមិន្ទឃោសនានយោបាយឱ្យគណបក្សប្រជាជនកម្ពុជា នៅមុនយុទ្ធនាការបោះឆ្នោតដូចសព្វថ្ងៃនេះ គឺជាទង្វើដែលកាន់តែរំលោភច្បាប់ថែមមួយកម្រិតទៀត។
កាលពីទី៣០ ខែមករា ឆ្នាំ២០២៣ លោក ហ៊ុន ម៉ាណែត យល់ស្របថា មាត្រា១៥ នៃច្បាប់ស្ដីពីគណបក្សនយោបាយ បានចែងថា កងយោធពលខេមរភូមិន្ទ និងកងកម្លាំងនគរបាលជាតិនានាអាចចូលជាសមាជិកគណបក្សនយោបាយបាន តែមិនត្រូវធ្វើសកម្មភាពប្រឆាំង ឬគាំទ្រគណបក្សនយោបាយណាមួយពិតប្រាកដមែន។
ប៉ុន្តែអនាគតបេក្ខភាពនាយករដ្ឋមន្ត្រីបក្សកាន់អំណាចរូបនេះបកស្រាយថា បើយោងតាមមាត្រា៨៣ នៃច្បាប់ស្ដីពីការបោះឆ្នោតជ្រើសតាំងតំណាងរាស្ត្រ បានបើកច្រកសម្រាប់ច្បាប់ខាងលើដែលចែងថា បន្ទាប់ពីបញ្ចប់ម៉ោងធ្វើការ ឬស្ថិតនៅក្រៅម៉ោងការងារ ឬមិនស្ថិតនៅក្នុងម៉ោងបំពេញការងារ កងយោធពលខេមរភូមិន្ទ និងមន្ត្រីនគរបាលជាតិ ជាដើម អាចចូលរួមក្នុងសកម្មភាពឃោសនាគាំទ្រចំពោះគណបក្សនយោបាយណាមួយបាន ដូច្នេះលោកបញ្ជាក់ថា ដោយយោងខ្លឹមសារច្បាប់នេះ លោកមិនប្រព្រឹត្តខុសច្បាប់អ្វីទាំងអស់។
ទាក់ទិននឹងបញ្ហានេះ ក្រុមអ្នកសង្កេតការណ៍លើកឡើងថា ការប្រើតួនាទីរបស់ខ្លួនក្នុងនាមជាមន្ត្រីរាជការ ជាពិសេសក្នុងនាមជាអគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក ឃោសនានយោបាយឱ្យគណបក្សប្រជាជនកម្ពុជានៅមុនពេលយុទ្ធនាការឃោសនាបោះឆ្នោតមកដល់ដូចដែលលោក ហ៊ុន ម៉ាណែត ធ្វើកន្លងមកនេះ គឺជាការរំលោភលើច្បាប់នានា និងរដ្ឋធម្មនុញ្ញរបស់ប្រទេសកម្ពុជាយ៉ាងធ្ងន់ធ្ងរ។
ជាក់ស្តែង ក្នុងរយៈពេលចុងក្រោយនេះ ត្រូវគេសង្កេតឃើញថា លោក ហ៊ុន ម៉ាណែត បានយកវេទិកាសាធារណៈដែលត្រូវធ្វើឡើងក្នុងតួនាទីមន្ត្រីរាជការរបស់ខ្លួន ឃោសនានយោបាយឱ្យគណបក្សប្រជាជនកម្ពុជាជាបន្តបន្ទាប់ ដែលបញ្ហានេះត្រូវគេរិះគន់ថា បក្សកាន់អំណាចបានកេងចំណេញនយោបាយគ្រប់រូបភាពដើម្បីឈ្នះឆ្នោត ទោះសកម្មភាពទាំងនោះរំលោភបំពានលើច្បាប់ក៏ដោយ។
មាត្រា១៥ នៃច្បាប់ស្ដីពីគណបក្សនយោបាយ បានចែងថា កងយោធពលខេមរភូមិន្ទ និងកងកម្លាំងនគរបាលជាតិនានា អាចចូលជាសមាជិកគណបក្សនយោបាយបាន តែមិនត្រូវធ្វើសកម្មភាពប្រឆាំង ឬគាំទ្រគណបក្សនយោបាយណាមួយឡើយ៕