ពលរដ្ឋខ្មែរជាច្រើនគ្រួសារដែលរស់នៅឃុំគ្រួស ស្រុកស្វាយជ្រុំ ខេត្តស្វាយរៀង អះអាងថា អាជ្ញាធរមិនអើពើនឹងការឆ្លងដែនរបស់ជនជាតិវៀតណាម ដែលយកគោក្របីរបស់ពួកគេមកឃ្វាលនៅលើទឹកដីខ្មែរនោះឡើយ ខណៈអាជ្ញាធរខ្មែរនៅទីនោះអះអាងថា ដោយសារតែដីខាងជនជាតិវៀតណាមចង្អៀតពេក។
ពលរដ្ឋខ្មែរជាច្រើនគ្រួសារដែលរស់នៅឃុំគ្រួស ស្រុកស្វាយជ្រុំ ខេត្តស្វាយរៀង លើកឡើងកាលពីពេលថ្មីៗនេះថា ពលរដ្ឋវៀតណាមបាននាំគ្នាយកគោក្របីរបស់ពួកគេមកឃ្វាលនៅលើដីខ្មែររាប់សិបក្បាលជារៀងរាល់ថ្ងៃ ប៉ុន្តែពលរដ្ឋខ្មែរវិញមិនអាចលែងគោក្របីរបស់ខ្លួនឱ្យចូលទៅស៊ីស្មៅនៅក្នុងទឹកដីវៀតណាមបានឡើយ។ លើសពីនេះ មានតែខាងវៀតណាមចាប់យកគោក្របីរបស់ពួកគេទៅវិញ។
ពលរដ្ឋខ្មែរនៅទីនោះអះអាងថា ពួកគេបានរាយការណ៍ជូនអាជ្ញាធរដែរ ដូចជាខាងប៉ុស្តិ៍នគរបាលឃុំគ្រួស និងមេឃុំគ្រួសជាដើម ប៉ុន្តែពួកគេតែងឆ្លើយថាជាប់រវល់ និងគ្មានពេលមកមើលគោក្របីរបស់វៀតណាមឆ្លងចូលមកទឹកដីខ្មែរនោះទេ។
ប្រភពដដែលបញ្ជាក់ថា គោក្របីវៀតណាមដែលតែងតែត្រូវលែងឱ្យចូលមកស៊ីស្មៅក្នុងទឹកដីខ្មែរនោះ បានបំផ្លាញដំណាំរបស់ពលរដ្ឋខ្មែរមួយចំនួនថែមទៀត។ ក្រៅពីនេះ ប្រសិនបើគោ ឬក្របីរបស់ពលរដ្ឋខ្មែរណាដើរចូលហ្វូងគោក្របីរបស់ជនជាតិវៀតណាមទាំងនោះ គឺពួកគេកៀងយកទៅទាំងអស់តែម្តង មិនអាចតវ៉ាយកមកវិញបានឡើយ។
សមត្ថកិច្ចឃុំគ្រួស អះអាងកាលពីពេលថ្មីៗនេះថា ជនជាតិវៀតណាមដែលយកគោក្របីមកឃ្វាលក្នុងទឹកដីខ្មែរបែបនេះ គឺជារឿងធម្មតាប៉ុណ្ណោះ ព្រោះដីនៅខាងវៀតណាមចង្អៀតជាងដីខ្មែរ ដូច្នេះការលែងគោក្របីចូលមកទឹកដីខ្មែរពីសំណាក់ជនជាតិវៀតណាមទាំងនោះ គឺជាការយោគយល់អធ្យាស្រ័យគ្នាទៅវិញទៅមក ហើយមិនដែលមានបញ្ហាអ្វីនោះទេកន្លងមក។
ករណីវៀតណាមឆ្លងចូលទឹកដីខ្មែរដោយគ្មានការអើពើពីអាជ្ញាធរនេះ ក៏ធ្លាប់មានករណីស្រដៀងគ្នាម្តងរួចមកហើយកាលពីចុងឆ្នាំ២០២២ ដែលបានកើតឡើងនៅឃុំបាសាក់ ស្រុកស្វាយជ្រុំ ដដែល ក្នុងខេត្តស្វាយរៀង នេះ គឺជនជាតិវៀតណាមរាប់សិបនាក់តែងនាំគ្នាចូលនេសាទខុសច្បាប់ដោយប្រើឧបករណ៍ឆក់ត្រជាក់ ឬយាំងកាវ ដែលមានប្រវែងរាប់រយម៉ែត្រ ដោយគ្មានការអើពើពីអាជ្ញាធរខ្មែរឡើយ។
យ៉ាងណាក៏ដោយ បន្ទាប់ពីមានការផ្សព្វផ្សាយលើបណ្ដាញទំនាក់ទំនងសង្គមព្រោងព្រាត ទើបអាជ្ញាធរចុះអន្តរាគមន៍លើករណីនេះ ប៉ុន្តែអាជ្ញាធរខេត្តស្វាយរៀង បានត្រឹមសំណូមពរដល់អាជ្ញាធរវៀតណាមកុំអនុញ្ញាតឲ្យពលរដ្ឋរបស់ខ្លួនឆ្លងដែនខុសច្បាប់ចូលទៅនេសាទត្រីលើទឹកដីខ្មែរប៉ុណ្ណោះ ហើយពួកគេក៏មិនបានចាត់វិធានការច្បាប់ណាមួយលើជនជាតិវៀតណាមទាំងនោះដែរ។
ខេត្តស្វាយរៀង ស្ថិតនៅភាគអាគ្នេយ៍នៃរាជធានីភ្នំពេញ មានព្រំប្រទល់ខាងលិចនិងខាងជើងទល់នឹងខេត្តព្រៃវែង ខាងកើតនិងខាងត្បូង ទល់នឹងខេត្តតៃនីញ អតីតខេត្តរោងដំរី ក្នុងទឹកដីខ្មែរកម្ពុជាក្រោម និងខេត្តឡុងអាន ប្រទេសវៀតណាម ដែលមានប្រវែងប្រមាណ ២៥៨គីឡូម៉ែត្រ។
ទាក់ទិននឹងបញ្ហានេះ សារព័ត៌មាន The Cambodia Daily នៅមិនទាន់អាចទាក់ទងស្នងការនគរបាលខេត្តស្វាយរៀង លោក ពេជ្រ វីរៈ ដើម្បីសុំការបំភ្លឺជុំវិញបញ្ហានេះបាននៅឡើយទេរហូតមកទល់នឹងម៉ោងផ្សាយនេះ៕