35 C
Phnom Penh

បទវិភាគ៖ តើ​អ្វី​ទៅ​ជា​អាថ៌កំបាំង​នៃ​ការ​បិទ​វិទ្យុ​សំឡេង​ប្រជាធិបតេយ្យ VOD?

ដោយ ឌឹ ខេមបូឌា ដេលី

បទវិភាគ

សាធារណជន​ខ្មែរ​បាន​សម្ដែង​ប្រតិកម្ម​ផ្សេងៗ​គ្នា​ចំពោះ​ការ​សម្រេច​តក់ក្រហល់​បិទ​សារព័ត៌មាន​សំឡេង​ប្រជាធិបតេយ្យ វីអូឌី។

អ្នក​មាន​និន្នាការ​គាំទ្រ​មាន​ប្រយោជន៍​នឹង​របប​គ្រប់គ្រង​បែប​សព្វថ្ងៃ នាំគ្នា​រីករាយ​នឹង​ការ​បិទ ព្រោះ​គេ​ថា​ជា​សារព័ត៌មាន​ប្រឆាំង និយាយ​រឿង​មិន​ពិត។ ពលរដ្ឋ​ស្នេហា​យុត្តិធម៌ ស្នេហា​សិទ្ធិ​សេរីភាព សោកស្តាយ​ឥតឧបមា​ព្រោះ​ថា​នឹង​លែង​មាន​សារព័ត៌មាន​ដែល​ហ៊ាន​និយាយ​ប្រាប់​ការពិត​ហើយ​នៅ​ប្រទេស​កម្ពុជា ប៉ុន្តែ​មិន​ដឹង​ធ្វើ​ដូចម្តេច។

តើ​ឫសគល់​នៃ​រឿង​ហេតុ​បិទ វីអូឌី អាច​ចេញ​មកពី​រឿង​អ្វី?

មតិ​ប្រជាពលរដ្ឋ​ខ្មែរ មតិ​ជនបរទេស ទាំង​រដ្ឋាភិបាល​លោក​សេរី ទាំង​ក្រុម​អង្គការ​សង្គម​ស៊ីវិល បាន​ត្រឹមតែ​សម្ដែង​ក្តី​សោកស្តាយ​ចំពោះ​សេចក្តី​សម្រេច​ចិត្ត​របស់​ប្រមុខ​រាជរដ្ឋាភិបាល​លោក ហ៊ុន សែន បញ្ជា​ឲ្យ​បិទ​សារព័ត៌មាន​ឯករាជ្យ​ចុងក្រោយ​សេសសល់​ក្នុង​រាជាណាចក្រ​កម្ពុជា គឺ​សំឡេង​ប្រជាធិបតេយ្យ (VOD) តែ​ពុំ​មាន​នីតិវិធី​អ្វី​ដែល​អាច​យក​ទៅ​តតាំង​គ្នា​ក្នុង​តុលាការ​នោះ​ទេ។ នេះ​មកពី​ប្រទេស​កម្ពុជា អំណាច​ស្ថិត​ក្នុង​ដៃ​បុគ្គល​តេជវន្ត មិន​ស្ថិត​ក្នុង​ស្ថាប័ន​ដូច​ប្រទេស​ប្រកាន់​ប្រជាធិបតេយ្យ។

បើ​គេ​យក​រឿង​ហ្នឹង​មក​វិភាគ បូក​សង គុណ​ចែក វា​ពុំ​មែន​ជា​រឿង​ធ្វើ​ឲ្យ​អាម៉ាស់​មុខ​រាជរដ្ឋាភិបាល ឬ​ការ​ដឹកនាំ​ដូច​គោ​អ្វី​នោះ​ទេ ហើយ​ក៏​មិន​បាន​ធ្វើ​ឲ្យ​ខូច​ប្រយោជន៍​អ្វី​មួយ​ដល់​រាជរដ្ឋាភិបាល ឬ​មន្ត្រី​កំពូលៗ ទាំង​លោក ហ៊ុន សែន ជា​ឪពុក ទាំង​ឧត្តមសេនីយ៍ឯក ហ៊ុន ម៉ាណែត ជា​កូន​នោះ​ដែរ។

រឿង​នេះ​ជា​រឿង​នយោបាយ​ទាក់ទង​នឹង​អំណាច ឥទ្ធិពល តំណែង មុខនាទី​នៃ​បុគ្គល​ម្នាក់ៗ​ក្នុង​រដ្ឋាភិបាល និង​ក្នុង​បក្ស ជា​រឿង​ថា​អ្នក​ណា​ជា​កម្មាភិមុខ ឬ​មេការ​ដឹកនាំ ជា​រឿង​ព្យាយាម​ដើរ​វាង​បែបបទ​រដ្ឋបាល​មិន​បាន​សម្រេច។ មុន​នឹង​ជូន​ខ្លឹមសារ​វិភាគ​ព័ត៌មាន​ពី​ការ​បិទ វីអូឌី យើង​សូម​ជូន​ចំណុច​ខ្លះ​ក្នុង​ខ្លឹមសារ​អត្ថបទ​ផ្សាយ​ក្នុង វីអូឌី នៅ​ថ្ងៃទី​៩ ខែ​កុម្ភៈ កន្លងទៅ រាយការណ៍​ដោយ​កញ្ញា ប៉ា សុខេង។

លោក ផៃ ស៊ីផាន អ្នក​ពាំនាំ​ពាក្យ​រដ្ឋាភិបាល​ពី​កង​ប្រតិកម្ម​រហ័ស​នៃ​ទីស្ដីការ​គណៈរដ្ឋមន្ត្រី ដែល​ជា​មនុស្ស​យល់ដឹង​ច្បាស់​អំពី​គោលការណ៍​នយោបាយ និង​ក្បួន​ខ្នាត​ដំណើរការ​រដ្ឋាភិបាល ថ្លែង​ប្រាប់​សារព័ត៌មាន វីអូឌី ជា​ភាសា​ពាក្យ​ពេចន៍​ខ្មែរ គួរ​យល់​បាន គ្មាន​បង្កប់​អ្វី គ្មាន​ន័យ​អត្ថបដិរូប​អ្វី​នោះ​ឡើយ។

តទៅ​នេះ​ជា​សម្រង់​ផ្នែក​ខ្លះ​នៃ​អត្ថបទ វីអូឌី សរសេរ​ផ្សាយ​ដោយ​ស្រង់​សម្ដី​លោក ផៃ ស៊ីផាន ដែល​លោក ហ៊ុន សែន ថា​ជា​បញ្ហា​វាយប្រហារ​កូនប្រុស​ច្បង​របស់​លោក។

អ្នក​នាំពាក្យ​រាជរដ្ឋាភិបាល​កម្ពុជា លោក ផៃ ស៊ីផាន

មន្ត្រី​រដ្ឋាភិបាល​ថា ការ​ដែល​លោក ហ៊ុន ម៉ាណែត ដើរ​តួនាទី​ជំនួស​ឪពុក ដោយ​ចុះហត្ថលេខា​ផ្តល់​ជំនួយ​ថវិកា​ទៅ​ឱ្យ​ប្រទេស​តួកគី ដែល​កំពុង​រងគ្រោះ​រញ្ជួយ​ដី​នោះ មិនមែន​ជា​រឿង​ខុសឆ្គង​ទេ ដោយសារ​លោក​នាយករដ្ឋមន្ត្រី ហ៊ុន សែន ដែល​ជា​ឪពុក​កំពុង​មាន​ធុរៈ រីឯ​អ្នក​ឃ្លាំមើល​យល់​ថា បើ​អនុលោម​តាម​ច្បាប់ គឺ​នាយករដ្ឋមន្ត្រី​ស្តីទី ឬ​ឧបនាយករដ្ឋមន្ត្រី គួរ​ជា​អ្នក​បំពេញ​ភារកិច្ច​នេះ​នៅ​ពេល​នាយករដ្ឋមន្ត្រី​ខកខាន។”

ការ​លើកឡើង​ផ្ទុយ​គ្នា​នេះ ធ្វើឡើង​ក្រោយពី​រដ្ឋាភិបាល​កម្ពុជា​ប្រកាស​ផ្ដល់​ជំនួយ​មនុស្សធម៌​ចំនួន ១០​ម៉ឺន​ដុល្លារ​ដល់​ប្រទេស​តួកគី ដែល​កំពុង​រងគ្រោះ​រញ្ជួយ​ដី ដោយ​ក្នុង​នោះ លោក ហ៊ុន ម៉ាណែត បាន​តំណាង​ឱ្យ​លោក​នាយករដ្ឋមន្ត្រី ហ៊ុន សែន ក្នុង​ការ​ចុះហត្ថលេខា​ផ្តល់​ជំនួយ ខណៈ​លោក ហ៊ុន សែន កំពុង​កាន់​មរណទុក្ខ​ចំពោះ​ការ​បាត់បង់​ប្អូនថ្លៃ​ស្រី។

ប្រធាន​អង្គភាព​អ្នក​នាំពាក្យ​រាជរដ្ឋាភិបាល លោក ផៃ ស៊ីផាន មាន​ប្រសាសន៍​ថា អ្នក​សារព័ត៌មាន និង​អង្គការ​មិនមែន​រដ្ឋាភិបាល​មួយ​ចំនួន ឆ្ងល់ និង​បាន​វាយប្រហារ​លោក ហ៊ុន ម៉ាណែត ពាក់ព័ន្ធ​ការ​ចុះហត្ថលេខា​តំណាង​ឱ្យ​លោក​នាយករដ្ឋមន្ត្រី ហ៊ុន សែន ក្នុង​ការ​ផ្តល់​ជំនួយ​ទៅ​ប្រទេស​តួកគី ដែល​កំពុង​រងគ្រោះ​រញ្ជួយ​ដី។

លោក​ថ្លែង​ថា៖ «អ្នក​សារព័ត៌មាន ហើយ​សមាសភាព​អង្គការ​មិនមែន​រដ្ឋាភិបាល គាត់​ឆ្ងល់ ហើយ​គាត់​វាយប្រហារ​ទៅ​លើ​ឯកឧត្តម​បណ្ឌិត ហ៊ុន ម៉ាណែត ដែល​ដូចជា​ចុះហត្ថលេខា​តំណាង​សម្តេច​តេជោ ក្នុង​ការ​ផ្តល់​ជំនួយ​ហ្នឹង។ [តើ​គេ​ឆ្ងល់ ឬ​វាយប្រហារ​ថា​យ៉ាង​ណា​ដែរ? គេ​ថា] ហេតុ​ដូចម្តេច​បាន​ជា​រដ្ឋាភិបាល​មិន​ប្រើប្រាស់​តួនាទី​របស់​សម្តេច​អគ្គមហាសេនាបតី​តេជោ ហ៊ុន សែន ដែល​ជា​នាយករដ្ឋមន្ត្រី​ក្នុង​ការ​ផ្តល់​ជំនួយ​ហ្នឹង? ហេតុ​អី​បាន​ដាក់​ឱ្យ​ឯកឧត្ដម​បណ្ឌិត ហ៊ុន ម៉ាណែត ជា​អ្នក​ផ្តល់​ទៅវិញ? អា​ហ្នឹង គឺ​ដែល​គេ​មិន​សប្បាយ​ចិត្ត​ហ្នឹង។»

យ៉ាងណា មន្ត្រី​រដ្ឋាភិបាល​រូប​នេះ​សុំ​មិន​បញ្ចេញ​អត្តសញ្ញាណ​អ្នក​ដែល​លោក​អះអាង​ថា​បាន​វាយប្រហារ​លោក ហ៊ុន ម៉ាណែត នោះ​ទេ។ លោក ផៃ ស៊ីផាន ប្រាប់​ថា លោក ហ៊ុន ម៉ាណែត ជា​អគ្គមេបញ្ជាការ​នៃ​ឥស្សរជន​របស់​កងយោធពល​ខេមរភូមិន្ទ ខណៈ​ស្ថាប័ន​នេះ​ជា​អ្នក​នាំមុខ​ដើរ​តួ​ចូលរួម​ក្នុង​ប្រតិបត្តិការ​សន្តិភាព​លើ​ពិភពលោក ដូច្នេះ​នេះ​មិនមែន​ជា​រឿង​ខុសឆ្គង​ទេ​ដែល​លោក​ត្រូវ​បំពេញ​តួនាទី​នេះ។

លោក ផៃ ស៊ីផាន បន្ត​ថា៖ «ការ​ជួយ​ពេលនេះ​ជាមួយ​តួកគី ហ្នឹង គឺ​ក្នុង​របៀប​ប្រតិបត្តិការ​សន្តិភាព​ជួយ​សង្គ្រោះ​ប្រជាពលរដ្ឋ​តួកគី ដែល​ជួបប្រទះ​មហន្តរាយ​រញ្ជួយ​ធរណី ដូចជា​ការ​ជួយ​សង្គ្រោះ​ប្រជាពលរដ្ឋ​ដោយ​ភ្លើង បាក់​អគារ​បាក់​អី​ហ្នឹង ជា​ក្រុម​របស់​ឯកឧត្តម ហ៊ុន ម៉ាណែត ហើយ​ដែល​ចេញ​ទៅ​ធ្វើ​ប្រតិបត្តិការ​នោះ។»

ក្រៅពី​នោះ លោក​ថា​នាយករដ្ឋមន្ត្រី​កំពុង​មាន​ធុរៈ ដូច្នេះ​ទើប​អនុញ្ញាត​ឱ្យ​លោក ហ៊ុន ម៉ាណែត ដែល​ជា​អ្នក​ទទួល​បន្ទុក​អន្តរាគមន៍​នៃ​សកម្មភាព​មនុស្សធម៌​អន្តរជាតិ តំណាង​រឿង​នេះ​វិញ។

អម្បាញ់មិញ​នេះ​ជា​ខ្លឹមសារ​នៃ​អត្ថបទ​ក្នុង វីអូឌី។

លោក ហ៊ុន ម៉ាណែត កូនប្រុស​ច្បង​របស់​លោក​នាយករដ្ឋមន្ត្រី ហ៊ុន សែន។

បន្តិច​ក្រោយ​មក វីអូឌី បាន​ផ្សាយ​ព័ត៌មាន​ថ្មី​ចុងក្រោយ​បញ្ជាក់​សាច់រឿង ដោយ​ស្រង់​សេចក្តី​ថ្លែង​ពី​ឧត្តមសេនីយ៍ឯក ហ៊ុន ម៉ាណែត ថា៖ «អគ្គមេបញ្ជាការ​រង​កង​យោធពល​ខេមរភូមិន្ទ និង​មេបញ្ជាការ​កងទ័ព​ជើងគោក លោក ហ៊ុន ម៉ាណែត បាន​អះអាង​នៅ​ថ្ងៃទី​១១ ខែ​កុម្ភៈ ថា លោក​មិន​បាន​ចុះហត្ថលេខា​ជំនួស​លោក​នាយករដ្ឋមន្ត្រី ហ៊ុន សែន ផ្តល់​ជំនួយ​មនុស្សធម៌​ចំនួន ១០​ម៉ឺន​ដុល្លារ​ទៅ​ឱ្យ​ប្រទេស​តួកគី ដែល​កំពុង​រងគ្រោះ​ដោយ​ការ​រញ្ជួយ​ដី​នោះ​ទេ។ លោក ហ៊ុន ម៉ាណែត បញ្ជាក់​បន្ថែម​ថា លោក​មិន​មាន​សិទ្ធិ​ក្នុង​ការ​ចុះហត្ថលេខា​លើ​ឯកសារ​របស់​រាជរដ្ឋាភិបាល​នោះ​ទេ។»

រឿង​ខឹង​គោ​វ៉ៃ​រទេះ​ផ្តើម​ពី​លោក ផៃ ស៊ីផាន ដែល​រៀបរាប់​ប្រាប់​អ្នក​កាសែត​ច្បាស់លាស់​ក្នុង​នាម​ជា​អ្នក​ពាំនាំ​ពាក្យ​រដ្ឋាភិបាល។ ត្រង់​នេះ៖

  • តើ​លោក​បាន​ព័ត៌មាន​អំពី​អ្នក​ចុះហត្ថលេខា​ផ្តល់​ជំនួយ​ជំនួស​នាយករដ្ឋមន្ត្រី ហ៊ុន សែន ពី​ណា​មក?
  • ហេតុ​អ្វី​លោក​ហ៊ាន​អះអាង​ថា បើ​ទោះបីជា​ឧត្តមសេនីយ៍ ហ៊ុន ម៉ាណែត ស៊ីញេ ក៏​មិន​ខុស​អ្វី​ដែរ ព្រោះ​ថា​នាយករដ្ឋមន្ត្រី​មាន​ធុរៈ ហើយ​លោក ហ៊ុន ម៉ាណែត ក៏​មាន​ភារកិច្ច​ផ្តល់​ជំនួយ និង​កិច្ចការ​បរទេស​ផង​ដែរ។
  • បើ​រឿង​ហ្នឹង​ជា​វា​ជា​រឿង​ធម្មតា តាម​ការ​ចាត់តាំង​ពី​នាយករដ្ឋមន្ត្រី​ដល់​មន្ត្រី​ក្រោម​ឱវាទ​ឲ្យ​បំពេញ​បេសកកម្ម​អ្វី​មួយ មិន​ខុស​នីតិក្រម​រដ្ឋបាល តើ​ហេតុ​អ្វី​លោក ហ៊ុន ម៉ាណែត ចាំបាច់​ចេញ​មក​បកស្រាយ​ថា​លោក​មិន​បាន​ស៊ីញេ​ទៅវិញ?
  • តើ​មាន​រឿង​អ្វី​ត្រូវ​ភ័យ​ដល់​ម្ល៉ឹង?
  • តើ​ការពិត អ្នក​ណា​ជា​អ្នក​ស៊ីញេ​ផ្តល់​ជំនួយ ១​សែន​ដុល្លារ​សហរដ្ឋ​អាមេរិក ជួយ​ជនរងគ្រោះ​ពី​រញ្ជួយ​ព្រះធរណី​នៅ​ប្រទេស​តួកគី​ពី​ដំបូង​ដៃ?

លទ្ធផល​ពី​ការ​ត្រិះរិះ​ពិចារណា គេ​រក​ឃើញ​ថា លោក ហ៊ុន ម៉ាណែត អាច​ធ្វើ​តាម​បញ្ជា​ឪពុក ហើយ​មិន​ចង់​ឲ្យ​អ្នក​កាសែត​ដឹង​សព្វសាយ ដល់ វីអូឌី ចុះផ្សាយ​ពាសពេញ​នគរ ឪ​កូន​ក៏​នាំគ្នា​ព្យាយាម​បង្វែរ​សាច់រឿង រួច​ទម្លាក់​រឿង​ចោទប្រកាន់​លើ​អ្នក​កាសែត​រហូត​ដល់​ទៅ​បញ្ជា​បិទ វីអូឌី។

តាម​ពិត លោក ផៃ ស៊ីផាន ទំនង​ជា​ប្រាប់​រឿង​ពិត​តាម​ការ​ណែនាំ​ពី​មេកោយ ប៉ុន្តែ​អកុសល​ដូច​ពាក្យ​ចាស់​ពោល​ថា “ពាក្យ​ពិត​រែង​ស្លែង។”

ម្យ៉ាង​វិញ​ទៀត ក្នុង​របប​កុម្មុយនីស្ត​ផ្ដាច់ការ អ្នក​នាំពាក្យ​មិន​អាច​ពាំ​ពាក្យ​ទៅ​និយាយ​ខុស​ប្រាប់​សាធារណជន​នោះ​ឡើយ សូម្បីតែ​អាន​អក្សរ​ក៏​មិន​ឲ្យ​ខុស​មួយ​តួ មួយ​ពាក្យ​ផង។

ក្រៅ​តែ​ពី​យក វីអូឌី ដែល​ជា​អ្នក​នាំសារ នាំ​ពាក្យ នាំ​ដំណឹង​ពី​រាស្ត្រ​ទៅ​រដ្ឋ ពី​រដ្ឋ​ទៅ​រាស្ត្រ​ឲ្យ​ដឹង​សុខទុក្ខ​ក្នុង​សង្គម​ជាតិ ធ្វើ​ជា​កូន​ចៀម​រងគ្រោះ​កណ្តាល​ហ្វូង​ខ្លា​ក្នុង​ដំណើរការ​អនុវត្ត​ផែនការ​សន្តតិវង្ស​ត្រកូល ហ៊ុន តើ​អាច​មាន​អ្វី​ទៀត​នៅ​ពីក្រោយ​វាំងនន​ងងឹត​នៃ​បក្ស​ប្រជាជន​កម្ពុជា?

រឿង​ជំនួយ​មនុស្សធម៌ ១​សែន​ដុល្លារ​សហរដ្ឋ​អាមេរិក ឲ្យ​ប្រទេស​តួកគី មិន​ដឹង​ជា​អ្នក​ណា​ស៊ីញេ​ពិតប្រាកដ មាន​បញ្ហា​បន្ទាប់ពី​លោក ហ៊ុន សែន ដឹកនាំ​គណៈប្រតិភូ​ទៅ​ជួប​ប្រធានាធិបតី​ចិន ស៊ី ជីនពីង នៅ​ថ្ងៃទី​១០ ខែ​កុម្ភៈ អម​ដំណើរ​ដោយ​កូនប្រុស​ពីរ​នាក់ គឺ​ឧត្តមសេនីយ៍ឯក ហ៊ុន ម៉ាណែត និង​សមាជិក​រដ្ឋសភា ហ៊ុន ម៉ានី។ ទាំង​ក្នុង​បក្ស ទាំង​ក្រៅ​បក្ស​ប្រជាជន​កម្ពុជា គេ​ដឹង​ថា​លោក ហ៊ុន សែន បាន​យក​កូន​នាំ​ដើរ​ទៅ​បង្ហាញ​មេដឹកនាំ​បរទេស​ជា​ហូរហែ ឲ្យ​ស្គាល់​គ្នា​មុន ដើម្បី​ងាយស្រួល​នៅ​ពេល​ឡើង​កាន់​អំណាច។

លោក​នាយករដ្ឋមន្ត្រី ហ៊ុន សែន កូនប្រុស​ទាំង​ពីរ​របស់​លោក គឺ​លោក ហ៊ុន ម៉ាណែត និង​លោក ហ៊ុន ម៉ានី ជួប​សម្ដែង​ការ​គួរសម​លោក ស៊ី ជីនពីង (Xi Jinping) ប្រធានាធិបតី​នៃ​សាធារណរដ្ឋ​ប្រជាមានិត​ចិន កាលពី​ថ្ងៃទី​១០ ខែ​កុម្ភៈ ឆ្នាំ​២០២៣ នៅ​ទីក្រុង​ប៉េកាំង ប្រទេស​ចិន។

ការ​ព្យាយាម​ដំឡើង​កូន​ដើម្បី​ស្នង​អំណាច​ទៅ​អនាគត ជា​ដំណើរ​បញ្ច្រាស​ទិស​បក្ស ហើយ​បង្ក​ឲ្យ​មាន​ភាព​ល្អក់កករ សៅហ្មង រង្កៀស ឃ្នើស​ចិត្ត​ពី​សំណាក់​មន្ត្រី​ចាស់ទុំ ទាំង​ផ្នែក​ស៊ីវិល ទាំង​ផ្នែក​យោធា ដែល​ធ្លាប់​មាន​ភក្ដីភាព គោរព បម្រើ ការពារ​បក្ស និង​លោក ហ៊ុន សែន យូរ​លង់​ណាស់​មក​ហើយ​នោះ។

ក្នុង​កិច្ចការ​រដ្ឋបាល​រដ្ឋ មុខងារ​នាយករដ្ឋមន្ត្រី​នឹង​ប្រគល់​ទៅ​នាយករដ្ឋមន្ត្រី​ស្តីទី ឬ​ឧបនាយករដ្ឋមន្ត្រី​មាន​លំដាប់​ខ្ពស់​តាម​ឋានានុក្រម ពេល​នាយករដ្ឋមន្ត្រី​អវត្តមាន ឬ​អសមត្ថភាព​ដោយ​ប្រការ​ណា​មួយ ដែល​គេ​ដឹង​ថា​មាន​លោក ស ខេង ជំនួស។ ចំពោះ​រឿង​ជំនួយ​មនុស្សធម៌ សប្បុរសធម៌ ជា​ការ​ប្រពៃ​គប្បី​ឲ្យ​កាកបាទ​ក្រហម​កម្ពុជា​ចេញ​មុខ​ទើប​ត្រឹមត្រូវ មិន​គួរ​ឲ្យ​មេទ័ព​ចេញ​មុខ​នោះ​ទេ ទោះ​ជា​លោក ផៃ ស៊ីផាន អះអាង​ថា​លោក ហ៊ុន ម៉ាណែត ធ្លាប់​បំពេញ​បេសកកម្ម​មនុស្សធម៌​ក្រៅ​ប្រទេស​ក៏ដោយ។

ការ​ចាត់តាំង​ឲ្យ​លោក ហ៊ុន ម៉ាណែត ធ្វើ​ការងារ​អ្វី​មួយ អាច​មិនមែន​ជា​រឿង​ធំ ឬ​ខុស​ច្បាប់ ប៉ុន្តែ​វា​ជា​រឿង​បង្ក​ឲ្យ​មនុស្ស​ជុំវិញ​លោក ហ៊ុន សែន មាន​ទោមនស្ស តឹងទ្រូង។ ទី​មួយ លោក​កាន់​អំណាច​ម្នាក់​ឯង​យូរ​ពេក​ហើយ ទី​ពីរ លោក​ចង់​ឲ្យ​កូន​លោក​ឡើង​បន្ត​កាន់​អំណាច​ទៀត។ ដូច្នេះ​សូម​អ្នក​សង្កេតការណ៍ អ្នក​ប្រាជ្ញ​ទាំងឡាយ​កុំ​គិត​ថា បក្ស​ប្រជាជន​កម្ពុជា​គ្មាន​បញ្ហា​ផ្ទៃក្នុង​នោះ។ ការ​ប៉ុនប៉ង​ឲ្យ​ឧត្តមសេនីយ៍ឯក ហ៊ុន ម៉ាណែត ឡើង​ជា​អនាគត​នាយករដ្ឋមន្ត្រី​នៃ​រាជរដ្ឋាភិបាល​ប្រទេស​កម្ពុជា បន្ទាប់ពី​លោក ហ៊ុន សែន នោះ​ជា​ការ​ព្យាយាម​រំលង​សមាជិក​សមាជិកា​ចាស់ទុំ​ដទៃ​ទៀត​ជាច្រើន​រូប​ក្នុង​ជួរ​បក្ស​ប្រជាជន​កម្ពុជា ដែល​មាន​ប្រវត្តិ​តស៊ូ​ដ៏​យូរ​លង់​ដូចជា​លោក ស ខេង លោក ទៀ បាញ់ លោក កែ គឹមយ៉ាន លោក ហ៊ីង ប៊ុនហៀង ជាដើម។ល។

ប្រភព​ផ្ទៃក្នុង​ខ្លះ​ឲ្យ​ដឹង​ថា មាន​ពេល​ខ្លះ​លោក​ឧត្តមសេនីយ៍ ហ៊ីង ប៊ុនហៀង ត្អូញ​ប្រាប់​គេ​ឯង​ថា កូនប្រុស​លោក ហ៊ុន សែន ទាំង ៣​នាក់​គ្មាន​ចរិយា​សម្បត្តិ​សីលធម៌​គួរ​ឡើង​ជា​មេដឹកនាំ​ប្រទេស​ទេ ព្រោះ​ថា​ពួកគេ​មាន​ប្រវត្តិ​មិន​ល្អ ជាពិសេស​ទាក់ទង​នឹង​បញ្ហា​រំលោភ​សិទ្ធិ​ស្ត្រី។ រឿង​នេះ លោក ហ៊ុន សែន ក៏​ធ្លាប់​បាន​ត្អូញត្អែរ​ស្ងាត់ៗ​ឆ្លើយតប​វិញ​ថា “រឿង​ក្មេងក្មាង​កន្លង​ទៅ​យូរ​ហើយ បើ​ល្មម​ឈប់​និយាយ​បាន ឈប់​ទៅ!!!”

កាលពី​ដើម​ខែ​វិច្ឆិកា ឆ្នាំ​២០២២ ភរិយា​លោក​ឧត្តមសេនីយ៍ ហ៊ីង ប៊ុនហៀង បាន​នាំ​កូន​ចូល​ទៅ​ក្នុង​ប្រទេស​ថៃឡង់ដ៍ ពេល​យប់ ដោយ​មិន​បោះ​ត្រា​ទិដ្ឋាការ​ទៅ​សម្រាក​នៅ​មន្ទីរពេទ្យ ពិយ៉ាវ៉ាថ (PIYAVATE) ក្រុង​បាងកក រួច​វិល​ចូល​ប្រទេស​កម្ពុជា​វិញ​ក៏​ពេល​យប់ មិន​ដឹង​ជា​មាន​ការ​អ្វី។ ប្រភព​ភ្នាក់ងារ​តាម​ព្រំដែន ខ្សឹប​ប្រាប់​ថា “ទៅ​ដឹក​ប្រាក់​ពី​ថៃ។”

ទោះ​ជា​មាន​ហេតុការណ៍​ដូច្នេះ​ក្តី គេ​សង្កេត​ឃើញ​លោក ហ៊ុន ម៉ាណែត ខំ​ប្រឹង​ពង្រីក​សមាជិក​បក្ស​ដោយ​យក​បក្ស​ជា​បង្អែក ទាំង​ក្នុង​ទាំង​ក្រៅ​ប្រទេស ដើម្បី​ឲ្យ​ឃើញ​ចំនួន​មនុស្ស​គាំទ្រ​លោក​ច្រើន​សម្រាប់​ឲ្យ​បាន​ឡើង​កាន់​តំណែង​សិន ហើយ​អ្នក​ខំ​ជួយ​លោក ហ៊ុន ម៉ាណែត បំពេញ​គុណូបការៈ គឺ​មាន​ដូចជា៖

  • កូនប្រសា​លោក ជាម យៀប គឺ​លោក គឹម សន្តិភាព រដ្ឋលេខាធិការ​ក្រសួង​យុត្តិធម៌
  • លោក ម៉ឹង ពន្លក កូន​លោក​ឧត្តមសេនីយ៍ ម៉ឹង សំផន
  • លោក ហេង សួរ រដ្ឋលេខាធិការ​ក្រសួង​ការងារ និង​បណ្តុះបណ្តាល​វិជ្ជាជីវៈ
  • និង​ឯកអគ្គរាជទូត​ប្រចាំ​អាមេរិក​ខាងជើង អឺរ៉ុប អាស៊ី ជាដើម។

ប្រភព​ផ្ទៃក្នុង​ឲ្យ​ដឹង​ទៀត​ថា ក្នុង​ជួរ​បក្ស អ្នក​គាំទ្រ​បេក្ខភាព​លោក ហ៊ុន សែន និង​លោក ហ៊ុន ម៉ាណែត ជា​នាយករដ្ឋមន្ត្រី​មាន​មិន​ដល់ ៥០% ផង។ ក្នុង​ជួរ​កងទ័ព ជាពិសេស​ក្នុង​កង​អង្គភាព​អង្គរក្ស​នាយករដ្ឋមន្ត្រី កងពល​តូច​លេខ​៧០ មាន​សមាជិក​ភាគច្រើន​មិន​គាំទ្រ​ឡើយ។

ជាមួយ​គ្នា​នេះ ឧត្តមសេនីយ៍ឯក ហ៊ុន ម៉ាណែត រំពឹង​ជំនួយ​មួយ​ផ្នែក​ធំ​ពី​ឪពុកធម៌ ឧត្តមសេនីយ៍ឯក សៀក សុជាតិ មេបញ្ជាការ​ការងារ​ព្រំដែន​ខ្មែរ-ថៃ ដែល​ធ្លាប់​ធ្វើ​ឲ្យ​ឧត្តមសេនីយ៍ ហ៊ីង ប៊ុនហៀង ក្តៅ​ក្រហាយ​រហូត​ដល់​ប្រមាថ​ជីវិត​ក្រោយពី​លោក សៀក សុជាតិ ទៅ​ជួប​ចាប់​ដៃ​ជាមួយ​ប្រធានាធិបតី​ចិន ស៊ី ជីនពីង ស្ងាត់ៗ​កាលពី​ប៉ុន្មាន​ឆ្នាំ​កន្លងទៅ​ថ្មីៗ​នេះ។ នេះ​មិន​ទាំង​រាប់​អំពី​រឿង​ប្រជែង​គ្នា​សង់​មន្ទីរពេទ្យ​យក​ប្រជាប្រិយភាព​រវាង​កូនប្រុស​លោក ស ខេង គឺ​លោក ស សុខា និង​មន្ទីរពេទ្យ​លោក ហ៊ុន ម៉ាណែត នោះ​ផង។

តាម​ការ​ពិនិត្យ​មើល​ជ្រុង​ធំៗ តាម​ការ​វិភាគ និង​សេចក្តី​សន្និដ្ឋាន​ចុងក្រោយ ការ​បិទ​សារព័ត៌មាន​សំឡេង​ប្រជាធិបតេយ្យ VOD ផុស​ចេញពី​រឱសឋាន ភាព​មិន​ចុះ​សម្រុង​គ្នា​ផ្ទៃក្នុង​បក្ស​ប្រជាជន​កម្ពុជា ដោយ​ភាគី​នីមួយៗ​បារម្ភ​អំពី​ការ​បាត់បង់​អនាគត​រៀងៗ​ខ្លួន ហើយ​ប្រឹងប្រែង​តាម​សមត្ថភាព​ដើម្បី​រក្សា​មុខងារ និង​នាទី​របស់​គេ។

ព្រះពុទ្ធ​បរមគ្រូ​ដាស់តឿន​មនុស្ស​លោក​ថា៖ “គ្មាន​អ្វី​អមតៈ​ឡើយ អ្វីៗ​ប្រែប្រួល”។ ចំណែកឯ​អ្នក​កាសែត​អង់គ្លេស​ជំទាស់​នឹង​របប​ផ្ដាច់ការ​ឈ្មោះ Eric Arthur Blair រហស្សនាម George Orwell (១៩០៣-១៩៥០) រំឭក​ថា៖ “ទោះបីជា​អ្នក​ខំ​បដិសេធ​ការពិត​ប៉ុនណា​ក៏ដោយ ការពិត​នៅតែ​មាន​ជីវិត​រាល់​ថ្ងៃ ហាក់បីដូចជា​វា​នៅ​ជាប់​ពីក្រោយ​ខ្នង​អ្នក​អ៊ីចឹង”

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស