បុរសខ្លាំង លោក ហ៊ុន សែន ចោទដោយមិនចំឈ្មោះទៅកាន់ក្រុមកូដករនៃក្រុមហ៊ុនណាហ្គាវើលដ៍ ថាពួកគេមានប្រភពផ្គត់ផ្គង់លុយឱ្យធ្វើបាតុកម្ម ដូច្នេះហើយបានជាពួកគេអាចមានលទ្ធភាពធ្វើបាតុកម្មអស់រយៈពេលជាងមួយឆ្នាំទាំងដែលការងារត្រូវបានផ្អាកអស់រយៈពេលជាង ១ឆ្នាំដែរនោះ។
លោក ហ៊ុន សែន លើកឡើងក្នុងពិធីប្រគល់វិញ្ញាបនបត្រដល់និស្សិតវិទ្យាស្ថានខ្មែរជំនាន់ថ្មី នៅថ្ងៃទី៦ ខែមីនា ឆ្នាំ២០២៣ នេះថា ប្រសិនបើលោកទៅចាប់ប្រភពផ្គត់ផ្គង់លុយរបស់ពួកគេ លោកក៏អាចចាប់បានដែរ សូមកុំគិតស្មានថាលោកមិនដឹងរឿងនេះឱ្យសោះ។
លោក ហ៊ុន សែន បន្ថែមថា ជារឿងដែលមិនសមហេតុផលទាល់តែសោះនៅពេលដែលគ្មានការងារធ្វើហើយ បែរជាក្រុមកូដករទាំងនោះអាចមានអាហារហូបចុកបរិបូរណ៍អំឡុងពេលធ្វើបាតុកម្មទៅវិញ។
ការអះអាងនេះ ធ្វើឡើងក្នុងចេតនាចោទប្រកាន់ទៅកាន់ក្រុមកូដករនៃក្រុមហ៊ុនណាហ្គាវើលដ៍ ដែលត្រូវបានថៅកែក្រុមហ៊ុនបញ្ឈប់ពីការងារទាំងអយុត្តិធម៌ ដែលកំពុងបន្តធ្វើកូដកម្មទាមទារសិទ្ធិការងារអស់រយៈពេលជាង ១ឆ្នាំមកនេះ។
អ្នកគ្រប់គ្រងសិទ្ធិការងារនៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស (សង់ត្រាល់) លោក ឃុន ថារ៉ូ បានប្រាប់សារព័ត៌មាន The Cambodia Daily នៅថ្ងៃទី៦ មីនា នេះថា ការលើកឡើងរបស់លោក ហ៊ុន សែន ក្នុងន័យអវិជ្ជមានអំពីមូលនិធិដែលក្រុមសហជីពទ្រទ្រង់សិទ្ធិការងារបុគ្គលិកកម្មករខ្មែរនៃក្រុមហ៊ុនណាហ្គាវើលដ៍ទទួលបានកន្លងមក ទំនងជាគាត់មានការភាន់ច្រឡំលើបញ្ហានេះ។ លោកបន្ថែមថា បញ្ហានេះទំនងជាដោយសារតែការផ្តល់របាយការណ៍គ្មានមូលដ្ឋានពិតប្រាកដពីមន្ត្រីក្រោមឱវាទផងដែរ។
លោក ឃុន ថារ៉ូ លើកឡើងថា មូលនិធិទាំងនេះគឺជាមូលនិធិស្របច្បាប់ដែលមានគណនេយ្យភាព និងតម្លាភាពត្រឹមត្រូវ ស្របតាមប្រតិបត្តិការហិរញ្ញវត្ថុរបស់សហជីព ដែលមានចែងក្នុងលក្ខន្តិកៈរបស់ពួកគេ។
លោកបន្តថា ការទទួលយកជំនួយពីគ្រប់មជ្ឈដ្ឋានក្នុងក្របខ័ណ្ឌច្បាប់ដែលមានចែងក្នុងលក្ខន្តិកៈរបស់សហជីពនេះ គឺដើម្បីផ្គត់ផ្គង់លើការអប់រំ បណ្តុះបណ្តាលសមាជិករបស់ខ្លួនឱ្យយល់ដឹងពីផ្នែកច្បាប់ សិទ្ធិ និងសេរីភាពរបស់កម្មករនិយោជិតតែប៉ុណ្ណោះ មិនមែនជាមូលនិធិសម្រាប់ប្រព្រឹត្តរឿងខុសច្បាប់ណាមួយនោះឡើយ។
មន្ត្រីសង្គមស៊ីវិលរូបនេះបញ្ជាក់ថា ភស្តុតាងដែលបង្ហាញថាមន្ត្រីថ្នាក់ក្រោមផ្តល់របាយការណ៍គ្មានមូលដ្ឋាននោះ គឺនៅត្រង់ថា វិវាទការងារនៃកម្មករនិយោជិតនៅក្រុមហ៊ុនណាហ្គាវើលដ៍កើតឡើងដោយសារការរំលោភសិទ្ធិការងារ ការបញ្ឈប់ពីការងារទាំងបំពាន ហើយត្រូវបានបុគ្គលិកទាំងនោះធ្វើកូដកម្មទាមទាររកយុត្តិធម៌ប៉ុណ្ណោះ មិនមែនមានចេតនាអ្វីផ្សេងនោះទេ ប៉ុន្តែកូដករទាំងនោះបែរជាត្រូវអាជ្ញាធរចោទប្រកាន់ពីបទព្រហ្មទណ្ឌនានា ដែលនាំទៅដល់ការចាប់ឃុំខ្លួនរហូតដល់ពេលនេះទៅវិញ។
លោក ឃុន ថារ៉ូ គូសបញ្ជាក់ថា ប្រសិនបើលោក ហ៊ុន សែន ទទួលបានរបាយការណ៍អំពីរឿងនេះក្នុងន័យវិជ្ជមាន ដែលគ្រាន់តែជាការតវ៉ាដើម្បីទាមទាររកយុត្តិធម៌ពីការរំលោភសិទ្ធិការងារ នោះបញ្ហានេះនឹងត្រូវបានដោះស្រាយយ៉ាងងាយជាទីបំផុត។
កាលពីខែមេសា ឆ្នាំ២០២១ ក្រុមហ៊ុនណាហ្គាវើលដ៍បានបញ្ឈប់បុគ្គលិកពីការងារទាំងអយុត្តិធម៌ជាង ១៣០០នាក់។
បញ្ហានេះ ត្រូវបានកម្មករធ្វើកូដកម្មតវ៉ាជាមួយក្រុមហ៊ុនអស់រយៈពេលជាង ១ឆ្នាំមកហើយ បើគិតមកទល់នឹងពេលនេះ ប៉ុន្តែមិនត្រូវបានក្រសួងពាក់ព័ន្ធរកដំណោះស្រាយជូនកម្មករឡើយ។ ផ្ទុយទៅវិញ ក្រុមកូដករ ៩នាក់ត្រូវរងនូវការចោទប្រកាន់តាមផ្លូវតុលាការពីបទព្រហ្មទណ្ឌ ខណៈតំណាងកម្មករ កញ្ញា ឈឹម ស៊ីថរ ត្រូវបានតុលាការចាប់ខ្លួនដាក់គុកលើកទី២ កាលពីថ្ងៃទី២៦ ខែវិច្ឆិកា ឆ្នាំ២០២២ កន្លងទៅ និងបន្តឃុំខ្លួនរហូតដល់ពេលនេះ។
មាត្រា៣៥ នៃរដ្ឋធម្មនុញ្ញ ចែងថា ពលរដ្ឋខ្មែរមានសិទ្ធិចូលរួមយ៉ាងសកម្មក្នុងជីវភាពនយោបាយ សេដ្ឋកិច្ច សង្គម និងវប្បធម៌របស់ប្រទេសជាតិ ខណៈសេចក្តីស្នើទាំងឡាយរបស់ពលរដ្ឋ ត្រូវបានដោះស្រាយ និងពិនិត្យយ៉ាងហ្មត់ចត់ពីអង្គការរដ្ឋ ប៉ុន្តែរដ្ឋាភិបាលក្រោមការគ្រប់គ្រងរបស់បក្សកាន់អំណាចសព្វថ្ងៃនេះ ត្រូវគេមើលឃើញថាបានអនុវត្តផ្ទុយពីមាត្រាដែលបានចែងក្នុងរដ្ឋធម្មនុញ្ញទាំងស្រុង៕