25 C
Phnom Penh

លោក ទៀ បាញ់ កំពុង​ទប់ទល់​នឹង​ផែនការ​ផ្ទេរ​អំណាច​របស់​លោក ហ៊ុន សែន

ដោយ ឌឹ ខេមបូឌា ដេលី

បទវិភាគ

រដ្ឋមន្ត្រី​ក្រសួង​ការពារ​ជាតិ លោក ទៀ បាញ់ កំពុង​ទប់ទល់​នឹង​ផែនការ​ផ្ទេរ​អំណាច​របស់​លោក ហ៊ុន សែន ឱ្យ​ទៅ​កូនប្រុស​ខ្លួនឯង គឺ​លោក ហ៊ុន ម៉ាណែត ខណៈ​រដ្ឋាភិបាល​កុម្មុយនីស្ត​ចិន​ពុំ​មាន​ជំនឿ​លើ​លោក ហ៊ុន ម៉ាណែត និង​ចង់​ចាប់​យក​ក្រសួង​ការពារ​ជាតិ ធ្វើ​ជា​បង្អែក​យោធា​របស់​ខ្លួន​ទៅ​ថ្ងៃ​ក្រោយ។

សារព័ត៌មាន​បរទេស Asia Times បាន​ចុះផ្សាយ​កាលពី​ថ្ងៃទី​៧ ខែ​មីនា ឆ្នាំ​២០២៣ នេះ​ថា ក្រសួង​ការពារ​ជាតិ​ដែល​កំពុង​គ្រប់គ្រង​ដោយ​លោក ទៀ បាញ់ បាន​ក្លាយ​ជា​ច្រក​ដ៏​សំខាន់​សម្រាប់​ឥទ្ធិពល​របស់​ក្រុង​ប៉េកាំង នៅ​ប្រទេស​កម្ពុជា ដែល​រដ្ឋាភិបាល​ចិន​ចង់​រក្សា​ក្រសួង​មួយ​នេះ​ជា​មូលដ្ឋាន​អំណាច​របស់​ខ្លួន​ទៅ​ថ្ងៃ​មុខ ដោយសារតែ​ចិន​គ្មាន​ជំនឿ​លើ​លោក ហ៊ុន ម៉ាណែត ថា​នឹង​អាច​ដឹកនាំ​ប្រទេស​កម្ពុជា​បន្ត​ពី​លោក ហ៊ុន សែន បាន។

ប្រភព​ដដែល​លើកឡើង​ថា រដ្ឋាភិបាល​ក្រុង​ប៉េកាំង មិន​គិត​ថា​លោក ហ៊ុន ម៉ាណែត មាន​សិទ្ធិ និង​អំណាច​ពេញលេញ​ក្នុង​ការ​ដឹកនាំ​កម្ពុជា​នោះ​ទេ ផ្ទុយទៅវិញ ចិន​មាន​ការ​ជឿជាក់​លើ​កង​កម្លាំង​នៃ​ក្រសួង​ការពារ​ជាតិ​របស់​លោក ទៀ បាញ់ ជាង ដោយសារតែ​ចិន​ធ្លាប់​បាន​សហការ​ជាមួយ​លោក ទៀ បាញ់ ជុំវិញ​ការ​អភិវឌ្ឍ​មូលដ្ឋាន​ទ័ព​ជើងទឹក​រាម​កន្លងមក។

Asia Times បន្ថែម​ថា ការ​ទុកចិត្ត​នេះ​គឺ​នៅ​ត្រង់​ថា បើ​ទោះបីជា​លោក ទៀ វិញ ប្អូនប្រុស​បង្កើត​របស់​លោក ទៀ បាញ់ ដែល​ជា​មេបញ្ជាការ​កងទ័ព​ជើងទឹក​ត្រូវ​បាន​សហរដ្ឋ​អាមេរិក​ដាក់​ទណ្ឌកម្ម​កាលពី​ចុង​ឆ្នាំ​២០២១ ក៏ដោយ តែ​រហូត​ដល់​ពេលនេះ សហរដ្ឋ​អាមេរិក​ក៏​មិនទាន់​មាន​ភស្តុតាង​ដើម្បី​ចោទ​ប្រទេស​កម្ពុជា​អំពី​បញ្ហា​នេះ​នៅឡើយ​ដែរ។

សារព័ត៌មាន​ខាងលើ​បញ្ជាក់​ថា លោក ហ៊ុន សែន បាន​បញ្ចុះបញ្ចូល​រដ្ឋមន្ត្រី​ក្រសួង​ការពារ​ជាតិ លោក ទៀ បាញ់ និង​រដ្ឋមន្ត្រី​ក្រសួង​មហាផ្ទៃ លោក ស ខេង ឱ្យ​គាំទ្រ​ផែនការ​ស្នង​តំណែង​របស់​ខ្លួន​ទៅ​លោក ហ៊ុន ម៉ាណែត ដោយ​ធានា​ថា កូនៗ​របស់​ពួកគេ​នឹង​គ្រប់គ្រង​ក្រសួង​ដែល​ខ្លួន​កំពុង​ដឹកនាំ​នៅ​ពេលនេះ​ទៅ​ថ្ងៃ​ខាងមុខ​ទាំងអស់​គ្នា។

អតីត​មេដឹកនាំ​បក្ស​ប្រឆាំង លោក សម រង្ស៊ី បាន​សរសេរ​លើ​ទំព័រ​ហ្វេសប៊ុក​របស់​លោក​នៅ​ថ្ងៃទី​៨ មីនា នេះ​ថា បើ​យោង​តាម​ព័ត៌មាន​ចុះផ្សាយ​ក្នុង​ទស្សនាវដ្ដី​អន្តរជាតិ Asia Times នេះ លោក ហ៊ុន សែន អាច​បញ្ជា​ឲ្យ​គេ​ចាប់​លោក ទៀ បាញ់ ជាមិនខាន បើ​គាត់​អាច​ធ្វើ​ទៅ​រួច។

លោក សម រង្ស៊ី បញ្ជាក់​ថា លោក ទៀ បាញ់ ដែល​មាន​ឋានៈ​ជា​រដ្ឋមន្ត្រី​ក្រសួង​ការពារ​ជាតិ​សព្វថ្ងៃ​នេះ​មាន​កងកម្លាំង​ប្រដាប់​អាវុធ​ក្រោម​បញ្ជា​គាត់​ពេញ​ដៃ ដូច្នេះ​ពួកគេ​ច្បាស់​ជា​ការពារ​គាត់​មិន​ឲ្យ​លោក ហ៊ុន សែន ចាប់​ខ្លួន​លោក ទៀ បាញ់ ជាដាច់ខាត។

ចំណែក​ឯ​អ្នកវិភាគ​ឯករាជ្យ និង​ជា​ប្រធាន​វេទិកា​ពលរដ្ឋ លោក គឹម សុខ ប្រាប់​សារព័ត៌មាន The Cambodia Daily នៅ​ថ្ងៃទី​៨ មីនា នេះ​ថា ការ​ចុះផ្សាយ​របស់​សារព័ត៌មាន​អន្តរជាតិ Asia Times គឺ​មិនមែន​គ្រាន់តែ​មាន​ភស្តុតាង​បន្តិចបន្តួច​នោះ​ទេ ព្រោះ​ក្នុង​នាម​ជា​សារព័ត៌មាន​អន្តរជាតិ មិន​អាច​ចុះផ្សាយ​នូវ​រឿង​ដែល​ស៊ីជម្រៅ​មួយ​ដោយ​គ្មាន​ភស្តុតាង​ជាក់លាក់​នោះ​ឡើយ។

លោក គឹម សុខ លើកឡើង​ថា លោក ហ៊ុន សែន ពឹង​តែ​លើ​កង​កម្លាំង​អង្គរក្ស​ដែល​គាត់​បង្កើត​ឡើង​ប៉ុណ្ណោះ ចំណែក​លោក ទៀ បាញ់ មាន​កម្លាំង​កងទ័ព​នៅ​ក្រសួង​ការពារ​ជាតិ​មួយ​ផ្នែក​ធំ​ដែល​គាំទ្រ​គាត់ ដូច្នេះ​ទោះ​លោក ហ៊ុន សែន ចង់​ចាប់​លោក ទៀ បាញ់ ក៏​មិន​ស្រួល​ពេក​ដែរ។

អ្នកវិភាគ​ឯករាជ្យ​រូប​នេះ​គូស​បញ្ជាក់​ថា ផែនការ​លោក ហ៊ុន សែន គឺ​ក្តោប​ក្តាប់​អំណាច​ផ្ដាច់មុខ​តែ​ក្រុម​គ្រួសារ​គាត់​ប៉ុណ្ណោះ ដូច្នេះ​ប្រសិនបើ​លោក ទៀ បាញ់ លោក ស ខេង និង​អ្នកស្រី ម៉ែន សំអន មិន​រើបម្រះ​ពី​ពេលនេះ​ទេ ពួកគេ​នឹង​លែង​មាន​ឱកាស​ទៀត​ហើយ ព្រោះ​នៅ​ពេល​ដែល​គ្រួសារ​លោក ហ៊ុន សែន ក្តាប់​អំណាច​បាន​ពេញ​ដៃ សូម្បី​ពួកគេ​ចង់​ការពារ​ខ្លួន​ក៏​មិន​អាច​ការពារ​បាន​ដែរ។

កាលពី​ថ្ងៃទី​២៤ ខែ​ធ្នូ ឆ្នាំ​២០២១ គណបក្ស​ប្រជាជន​កម្ពុជា​បាន​សម្រេច​គាំទ្រ​លោក ហ៊ុន ម៉ាណែត ឱ្យ​ធ្វើ​ជា​បេក្ខភាព​នាយករដ្ឋមន្ត្រី​បន្ត​ពី​លោក ហ៊ុន សែន ប៉ុន្តែ​ការ​សម្រេច​នេះ​មាន​ការ​ទម្លាយ​ថា ដោយសារតែ​លោក ហ៊ុន សែន គំរាម និង​បញ្ចុះបញ្ចូល​ដោយ​ការ​ដំឡើង​តំណែង​មន្ត្រី​ក្នុង​បក្ស​របស់​ខ្លួន​ដែល​ចង់​ចូល​មក​កាន់​តំណែង​នេះ​គ្រប់ៗ​គ្នា។

ក្នុង​ពិធី​សន្និបាត​បក្ស​កាន់​អំណាច​ក្នុង​ការ​បោះឆ្នោត​ជ្រើសរើស​លោក ហ៊ុន ម៉ាណែត នៅ​ពេល​នោះ ក៏​មាន​ការ​បោះឆ្នោត​សម្រេច​ឲ្យ​លោក ទៀ បាញ់ និង​អ្នកស្រី ម៉ែន សំអន ធ្វើ​ជា​អនុប្រធាន​គណបក្ស​ប្រជាជន​កម្ពុជា​ផង​ដែរ ដែល​បញ្ហា​នេះ​ត្រូវ​គេ​កត់សម្គាល់​ឃើញ​ថា គឺជា​ថ្នូរ​ដើម្បី​ឲ្យ​ពួកគេ​គាំទ្រ​លោក ហ៊ុន ម៉ាណែត ទៅ​ថ្ងៃ​ក្រោយ។ នេះ​ស​ឲ្យ​ឃើញ​ថា ពួកគេ​ខ្វល់​រឿង​អំណាច​ផ្ទាល់ខ្លួន​ជាង​អាយុ​ជាតិ​សាសន៍​ខ្មែរ។

កាលពី​ដើម​ខែ​ធ្នូ ឆ្នាំ​២០២១ មេដឹកនាំ​បក្ស​កាន់​អំណាច​ដែល​វៀតណាម​លើក​បន្តុប​ដំបូង លោក ហ៊ុន សែន គំរាម​ថា​អ្នក​ដែល​ចង់​ដណ្តើម​តំណែង​ធ្វើ​ជា​បេក្ខភាព​នាយករដ្ឋមន្ត្រី​ពី​កូនប្រុស​របស់​លោក ត្រូវតែ​ធ្វើ​ឃាត​លោក​ជា​មុន​សិន ប៉ុន្តែ​បុរស​ខ្លាំង​នៅ​ប្រទេស​កម្ពុជា​រូប​នេះ​គំរាម​ថា អ្នក​ដែល​ប៉ុនប៉ង​ធ្វើ​ឃាត​លោក ពួកគេ​ក៏​មិន​មាន​ជីវិត​រស់នៅ​ដែរ ហើយ​សង្គ្រាម​ច្បាស់​ជា​នឹង​ផ្ទុះ​ឡើង​ជា​មិនខាន។

ជុំវិញ​បញ្ហា​នេះ ក្រុម​អ្នក​សង្កេតការណ៍​អះអាង​ថា សមាជិក​បក្ស​កាន់​អំណាច​ដែល​គាំទ្រ​បេក្ខភាព​លោក ហ៊ុន ម៉ាណែត ជា​នាយករដ្ឋមន្ត្រី​ថ្ងៃ​អនាគត​នោះ មិនមែន​ពួកគេ​ពេញចិត្ត​នឹង​លោក ហ៊ុន ម៉ាណែត ទេ គឺ​ដោយសារ​លោក ហ៊ុន សែន ទិញ​ទឹកចិត្ត​ពួកគេ​ដោយ​ការ​សន្យា​ផ្តល់​តំណែង​ខ្ពស់ៗ​ក្នុង​ជួរ​រដ្ឋាភិបាល​ដល់​កូន​របស់​ពួកគេ​តែប៉ុណ្ណោះ ដូចជា​លោក ស ខេង លោក សាយ ឈុំ លោក ទៀ បាញ់ និង​អ្នកស្រី ម៉ែន សំអន ជាដើម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស