36 C
Phnom Penh

អ្នក​ឃ្លាំមើល៖ ពលរដ្ឋ​នឹង​មិន​អាច​រស់​នៅ​សុខសាន្ត​ទេ ល្គឹកណា​អ្នក​នយោបាយ​ចេះ​តែ​បង្ក​ជម្លោះ​បុគ្គល

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​គណបក្ស​សង្គ្រោះ​ជាតិ រិះគន់​ថា បើ​នៅតែ​មាន​មេដឹកនាំ​នយោបាយ​ដែល​ចេះ​តែ​ត្រឹម​បង្ក​ជម្លោះ​ដើម្បី​ដោះស្រាយ​គំនុំ​ផ្ទាល់ខ្លួន​ដូច​លោក សម រង្ស៊ី និង​លោក ហ៊ុន សែន ឆ្លើយឆ្លង​គ្នា​ទៅវិញ​ទៅមក គឺ​នឹង​មិន​អាច​ផ្តល់​ក្តី​សុខ​ដល់​ពលរដ្ឋ​បាន​ឡើយ។

លោក មាជ សុវណ្ណារ៉ា ប្រាប់​សារព័ត៌មាន The Cambodia Daily នៅ​ថ្ងៃទី​១៣ មីនា នេះ​ថា ការ​ដឹកនាំ​នយោបាយ​គឺ​ដើម្បី​រក​ភាព​រីកចម្រើន​ឲ្យ​ប្រទេស​ជាតិ និង​រក​សេចក្តី​សុខ​ជូន​ពលរដ្ឋ។ លោក​បន្ត​ថា អ្នក​នយោបាយ​កំពូលៗ​គួរតែ​នាំគ្នា​បញ្ចប់​នូវ​វប្បធម៌​សងសឹក​គ្នា​ក្នុង​ការ​ដោះស្រាយ​គំនុំ​ផ្ទាល់ខ្លួន ដោយ​ងាក​មក​ធ្វើ​ជា​គំរូ​ល្អ​ដល់​អ្នក​នយោបាយ​ជំនាន់​ក្រោយ ជាពិសេស​សម្រាប់​អ្នក​បន្ត​វេន ដើម្បី​ឲ្យ​ពួកគេ​អាច​ដឹកនាំ​ប្រទេស​ជាតិ​ឲ្យ​បាន​ល្អ​ទៅ​ថ្ងៃ​មុខ។

លោក មាជ សុវណ្ណារ៉ា បញ្ជាក់​ថា ការ​វាយប្រហារ ការ​លាប​ពណ៌ ការ​បង្ក​ជម្លោះ គឺ​សុទ្ធសឹងតែ​ជា​ហេតុ​ធ្វើ​ឲ្យ​មាន​វិបត្តិ​កាន់តែ​ច្រើន​សម្រាប់​ប្រទេស​កម្ពុជា និង​ធ្វើ​ឲ្យ​ខាតបង់​ផល​ប្រយោជន៍​ជាតិ​យ៉ាង​ធ្ងន់ធ្ងរ ដូច្នេះ​ពួកគេ​គួរតែ​បញ្ចប់​នយោបាយ​សងសឹក​ជាតិ​សាសន៍​ឯង​នៅ​ពេលនេះ ប្រសិនបើ​ពួកគេ​ពិត​ជា​គិតគូរ​ពី​ផល​ប្រយោជន៍​ជាតិ​មែន​នោះ។

ការ​អះអាង​នេះ ធ្វើឡើង​បន្ទាប់ពី​អតីត​មេដឹកនាំ​បក្ស​ប្រឆាំង លោក សម រង្ស៊ី អំពាវនាវ​ឱ្យ​ពលរដ្ឋ​គាំទ្រ​លោក ទៀ សីហា ដែល​ត្រូវ​ជា​កូនប្រុស​របស់​លោក ទៀ បាញ់ ធ្វើ​ជា​បេក្ខភាព​នាយករដ្ឋមន្ត្រី​របស់​បក្ស​កាន់​អំណាច​កាលពី​ពេល​ថ្មីៗ​នេះ។

កាលពី​ថ្ងៃទី​១០ ខែ​មីនា ឆ្នាំ​២០២៣ លោក សម រង្ស៊ី បាន​សរសេរ​លើ​ទំព័រ​ហ្វេសប៊ុក​របស់​ខ្លួន​ថា ពលរដ្ឋ​ខ្មែរ​ដែល​ចង់​បាន​សេរីភាព និង​យុត្តិធម៌ ត្រូវតែ​រួបរួម​គ្នា​ជាមួយ​លោក ទៀ សីហា លោក ទៀ បាញ់ និង​លោក ទៀ វិញ ដើម្បី​ជំរុញ​ឲ្យ​មាន​ការ​ផ្លាស់ប្ដូរ​តាម​បែប​ប្រជាធិបតេយ្យ​ដោយ​អហិង្សា និង​សន្តិវិធី​តាមរយៈ​នៃ​ការ​បោះឆ្នោត​ដោយ​សេរី និង​យុត្តិធម៌​នៅ​ពេល​ខាងមុខ។

លោក សម រង្ស៊ី លើកឡើង​ថា ការ​ផ្លាស់ប្ដូរ​បែប​នេះ នឹង​នាំ​ឲ្យ​កម្ពុជា​មាន​អ្នក​ដឹកនាំ​ថ្មី​ដែល​មិនមែន​ជា​ឃាតករ​នយោបាយ ព្រោះ​ថា​ពួកគេ​មិនមែន​ជា​ក្រុម​គ្រួសារ​ពុករលួយ​បំផ្លាញ​ជាតិ និង​ជា​ជន​ក្បត់​ជាតិ​ដូច​លោក ហ៊ុន សែន និង​ក្រុម​គ្រួសារ​របស់​គាត់​ឡើយ។

ការ​អំពាវនាវ​របស់​លោក សម រង្ស៊ី បែប​នេះ ធ្វើឡើង​បន្ទាប់ពី​សារព័ត៌មាន​បរទេស Asia Times បាន​ចុះផ្សាយ​កាលពី​ថ្ងៃទី​៧ ខែ​មីនា ឆ្នាំ​២០២៣ ថា រដ្ឋមន្ត្រី​ក្រសួង​ការពារ​ជាតិ លោក ទៀ បាញ់ កំពុង​ទប់ទល់​នឹង​ផែនការ​ផ្ទេរ​អំណាច​របស់​លោក ហ៊ុន សែន ឱ្យ​ទៅ​កូនប្រុស​បង្កើត​របស់​ខ្លួន គឺ​លោក ហ៊ុន ម៉ាណែត ស្រប​ពេល​ដែល​រដ្ឋាភិបាល​កុម្មុយនីស្ត​ចិន មិន​មាន​ជំនឿ​លើ​លោក ហ៊ុន ម៉ាណែត និង​ចង់​ចាប់​យក​ក្រសួង​ការពារ​ជាតិ​ធ្វើ​ជា​ខ្នង​បង្អែក​យោធា​របស់​ខ្លួន​ដ៏​រឹងមាំ​ទៅ​ថ្ងៃ​ក្រោយ។

ប្រភព​ដដែល​លើកឡើង​ថា រដ្ឋាភិបាល​ក្រុង​ប៉េកាំង មិន​គិត​ថា​លោក ហ៊ុន ម៉ាណែត មាន​សិទ្ធិ និង​អំណាច​ពេញលេញ​ក្នុង​ការ​ដឹកនាំ​កម្ពុជា​នោះ​ទេ ប៉ុន្តែ​ចិន​មាន​ការ​ជឿជាក់​ទៅ​លើ​កងកម្លាំង​នៃ​ក្រសួង​ការពារ​ជាតិ​របស់​លោក ទៀ បាញ់ ជាង ដោយសារតែ​ចិន​ធ្លាប់​បាន​សហការ​ជាមួយ​លោក ទៀ បាញ់ ជុំវិញ​ការ​អភិវឌ្ឍ​មូលដ្ឋាន​ទ័ព​ជើងទឹក​រាម​កន្លងមក។

យ៉ាងណាក៏ដោយ ក្រោយ​ការ​អំពាវនាវ​របស់​លោក សម រង្ស៊ី មន្ត្រី​ជាន់ខ្ពស់​នៃ​រដ្ឋាភិបាល​ឯក​បក្ស​របស់​លោក ហ៊ុន សែន បាន​នាំគ្នា​ចេញ​មក​ថ្កោលទោស​លោក សម រង្ស៊ី ព្រោងព្រាត ក្នុង​នោះ​រដ្ឋមន្ត្រី​ក្រសួង​ការពារ​ជាតិ លោក ទៀ បាញ់ ក៏​បាន​ច្រានចោល​លើ​ករណី​នេះ​ផង​ដែរ។

នៅ​ថ្ងៃទី​១៣ ខែ​មីនា ឆ្នាំ​២០២៣ នេះ កូនប្រុស​ច្បង​របស់​លោក ហ៊ុន សែន គឺ​លោក ហ៊ុន ម៉ាណែត សរសេរ​លើ​ទំព័រ​ហ្វេសប៊ុក​របស់​ខ្លួន​ថា ក្រុម​ប្រឆាំង​លែង​មាន​អ្វី​យក​មក​វាយប្រហារ​បក្ស​កាន់​អំណាច​ទៀត​ហើយ បាន​ជា​ខំប្រឹង​ប្រឌិត​រឿង​ប្លែកៗ​ក្នុង​បំណង​ព្យាយាម​បំបែក​បំបាក់​ផ្ទៃក្នុង​របស់​គណបក្ស​ប្រជាជន​កម្ពុជា​បែប​នេះ រហូត​ដល់​ថ្នាក់​យក​អត្ថបទ​មួយ​ដែល​សរសេរ​ដោយ​ជនបរទេស​ម្នាក់​គ្មាន​មូលដ្ឋាន​ពិតប្រាកដ​នោះ។

ក្នុង​រយៈពេល​ចុងក្រោយ​នេះ មជ្ឈដ្ឋាន​ជាច្រើន​មើល​ឃើញ​ថា កម្ដៅ​នយោបាយ​រវាង​លោក ហ៊ុន សែន និង​លោក សម រង្ស៊ី កាន់តែ​ពុះកញ្ជ្រោល​ឡើងៗ​បន្ទាប់ពី​មេដឹកនាំ​នយោបាយ​ទាំង​ពីរ​ជះ​កំហឹង​ដាក់​គ្នា​ទៅវិញ​ទៅមក ដែល​បង្ក​ទៅ​ជា​វិបត្តិ​សម្រាប់​ប្រទេស​ជាតិ​យ៉ាង​ធ្ងន់ធ្ងរ​បន្ថែម​ពី​លើ​វិបត្តិ​ដែល​កម្ពុជា​កំពុង​តែ​មាន​ស្រាប់​សព្វថ្ងៃ​នេះ ដូចជា​ការ​ធ្លាក់​ចុះ​នូវ​លទ្ធិប្រជាធិបតេយ្យ និង​ការ​គោរព​សិទ្ធិមនុស្ស ជាដើម៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស