 រូបនេះបានចុះចូលជាមួយគណបក្សប្រជាជនកម្ពុជា។){kind=link}
លោក ហ៊ុន សែន ស្នើសុំព្រះមហាក្សត្រតែងតាំងលោក សាម អ៊ីន ជារដ្ឋលេខាធិការក្រសួងបរិស្ថាន បន្ទាប់ពីប្រធានគណៈកម្មាធិការនាយកស្ដីទីគណបក្សប្រជាធិបតេយ្យមូលដ្ឋាន (GDP) រូបនេះបានចុះចូលជាមួយគណបក្សប្រជាជនកម្ពុជា។
បើតាមលោក សាម អ៊ីន បានសរសេរលើហ្វេសប៊ុករបស់លោកនាថ្ងៃទី២ ខែមេសា ឆ្នាំ២០២៣ ថា លោកសម្រេចចិត្តលាឈប់ពីតួនាទីប្រធានគណៈកម្មាធិការនាយក (ស្តីទី) និងពីសមាជិកភាពគណបក្សប្រជាធិបតេយ្យមូលដ្ឋានជាផ្លូវការ បន្ទាប់ពីវាយតម្លៃស្ថានការណ៍គ្រប់ជ្រុងជ្រោយ និងសួរបេះដូងខ្លួនឯងជាច្រើនដងនោះ។
លោក សាម អ៊ីន បញ្ជាក់ថា ការលាឈប់នេះមានសុពលភាពចាប់ពីថ្ងៃទី៣១ ខែមីនា ឆ្នាំ២០២៣ «Goodbye my love GDP»។
បើតាមលិខិតរបស់លោក សាម អ៊ីន ដែលផ្ញើទៅកាន់លោក ហ៊ុន សែន កាលពីថ្ងៃទី២ ខែមេសា ឆ្នាំ២០២៣ ឲ្យដឹងថា ការដែលលោកចូលរួមជីវភាពនយោបាយជាមួយគណបក្សប្រជាជនកម្ពុជា ដើម្បីទទួលបានឱកាសចូលបម្រើការងារជួយរាជរដ្ឋាភិបាលក្នុងក្រសួងបរិស្ថាន និងរួមចំណែកលើការងារគាំទ្រសហគមន៍តំបន់ការពារ ការអភិវឌ្ឍអេកូទេសចរណ៍ និងការគ្រប់គ្រងតំបន់ការពារធម្មជាតិ។ មួយវិញទៀត ដោយលោកមើលឃើញអំពីគោលនយោបាយចតុកោណរបស់រាជរដ្ឋាភិបាលដែលដឹកនាំដោយលោក ហ៊ុន សែន ល្អ ជាពិសេសពាក់ព័ន្ធនឹងការងាររបស់ក្រសួងបរិស្ថានលើការគ្រប់គ្រងតំបន់ និងការកាត់បន្ថយភាពក្រីក្រនៅតំបន់ជនបទដាច់ស្រយាលការពារធម្មជាតិទូទាំងប្រទេស រួមទាំងការងារជួយគាំទ្រសហគមន៍តំបន់ការពារធម្មជាតិផងដែរ។
ក្រោយពីបានចុះចូលជាមួយគណបក្សប្រជាជនកម្ពុជាហើយ បុរសខ្លាំងកាន់អំណាចតពូជនៅកម្ពុជា គឺលោក ហ៊ុន សែន បានស្វាគមន៍លោក សាម អ៊ីន ហើយថានឹងស្នើសុំទៅព្រះមហាក្សត្រឲ្យតែងតាំងលោក សាម អ៊ីន ជារដ្ឋលេខាធិការក្រសួងបរិស្ថាន ឲ្យស្របតាមជំនាញដែលលោកមាននិងអាចធ្វើបាន បន្ទាប់ពីចូលរួមជីវភាពនយោបាយជាមួយគណបក្សរបស់លោក។
ប្រធានគណបក្សប្រជាធិបតេយ្យមូលដ្ឋាន លោក យ៉េង វីរៈ បានសរសេរលើហ្វេសប៊ុកថា លោកមិនធ្វើការបកស្រាយទាក់ទងនឹងសមាសភាពរបស់សមាជិកថ្នាក់ដឹកនាំរបស់គណបក្សនេះឡើយ ដោយសារគណបក្សប្រជាធិបតេយ្យមូលដ្ឋានគោរពសិទ្ធិមនុស្ស សិទ្ធិបុគ្គលក្នុងការធ្វើនយោបាយ។ មួយវិញទៀត ទោះបីជាសមាជិកថ្នាក់ដឹកនាំរបស់គណបក្សនេះចាកចេញជាបន្តបន្ទាប់ក្ដី ប៉ុន្តែគណបក្សមិនជេរ មិនលាបពណ៌ មិនយករឿងផ្ទាល់ខ្លួនដើម្បីមកលេងល្បែងនយោបាយទេ។
លោកបង្ហាញការសោកស្ដាយចំពោះការចាកចេញពីគណបក្សប្រជាធិបតេយ្យមូលដ្ឋានរបស់លោក សាម អ៊ីន ហើយទៅចូលរួមជីវភាពនយោបាយជាមួយគណបក្សប្រជាជនកម្ពុជា តែការចាកចេញនេះ លោក យ៉េង វីរៈ ថាវាក៏ជាការជំរុញឲ្យលោកខិតខំប្រឹងប្រែងទ្វេដងក្នុងការបំពេញតួនាទីជាប្រធានគណបក្ស ដើម្បីសម្រេចគោលបំណង និងគោលនយោបាយ គឺស្ដារឡើងវិញនូវគោលការណ៍ប្រជាធិបតេយ្យនៅកម្ពុជា ចាប់ផ្តើមពីការបង្កើតសំឡេងរបស់គណបក្សនៅតាមក្រុមប្រឹក្សាឃុំ-សង្កាត់ និងសភាជាតិ។
លើសពីនេះទៅទៀត លោកអំពាវនាវឲ្យសមាជិកនៅក្នុងគណបក្សប្រជាធិបតេយ្យមូលដ្ឋានទាំងអស់ ត្រូវរក្សាជំហរឲ្យរឹងមាំសម្រាប់បេក្ខជនដែលមានស្នាដៃនៅតាមក្រុមប្រឹក្សាឃុំដែលទើបជាប់ឆ្នោត និងអនុវត្តតួនាទីយ៉ាងខ្ជាប់ខ្ជួនក្នុងអាណត្តិទី៥ នេះ។
គិតមកដល់បច្ចុប្បន្ន ថ្នាក់ដឹកនាំគណបក្សប្រជាធិបតេយ្យមូលដ្ឋានចំនួន ២នាក់ និងសមាជិកម្នាក់ ក្នុងនោះអតីតមេដឹកនាំគណបក្សប្រជាធិបតេយ្យមូលដ្ឋាន គឺបណ្ឌិត យ៉ង សាំងកុមារ លោក សាម អ៊ីន និងលោក ឡឹក សុធារ បានចុះចូលជាមួយគណបក្សប្រជាជនកម្ពុជាដឹកនាំដោយលោក ហ៊ុន សែន ស្របពេលដែលបុរសខ្លាំងក្រាញអំណាចរូបនេះកំពុងតែរៀបចំផ្ទេរអំណាចឲ្យលោក ហ៊ុន ម៉ាណែត កូនប្រុសច្បងជានាយករដ្ឋមន្ត្រីបន្តវេន៕