36 C
Phnom Penh

ក្រុម​អ្នកវិភាគ​ថា​ផែនការ​ផ្ទេរ​អំណាច​ទៅ​លោក ហ៊ុន ម៉ាណែត អាច​នឹង​ត្រូវ​ធ្វើឡើង​នៅ​ឆ្នាំ​២០២៥

ដោយ ឌឹ ខេមបូឌា ដេលី

បទវិភាគ

ក្រុម​អ្នកវិភាគ​ឯករាជ្យ លើកឡើង​ថា ការ​សម្រេច​តែងតាំង​លោក ហ៊ុន ម៉ាណែត ជា​បេក្ខជន​ឈរ​ឈ្មោះ​តំណាងរាស្ត្រ​នៅ​ពេលនេះ​ជា​សញ្ញា​ប្រាប់​ថា ការ​ផ្ទេរ​អំណាច​អាច​នឹង​ត្រូវ​ធ្វើឡើង​យ៉ាង​យូរ​ត្រឹម​ឆ្នាំ​២០២៥ ប៉ុណ្ណោះ។

អ្នកវិភាគ​ឯករាជ្យ និង​ជា​ប្រធាន​វេទិកា​ពលរដ្ឋ លោក គឹម សុខ ប្រាប់​សារព័ត៌មាន The Cambodia Daily នៅ​ថ្ងៃទី​៣ មេសា នេះ​ថា ការ​សម្រេច​តែងតាំង​ឱ្យ​លោក ហ៊ុន ម៉ាណែត ឈរ​ឈ្មោះ​ជា​បេក្ខជន​តំណាងរាស្ត្រ​នៅ​ទីក្រុង​ភ្នំពេញ គឺជា​ផែនការ​រៀបចំ​មូលដ្ឋាន​បក្ខពួក​កសាង​អំណាច​នៅ​ភ្នំពេញ​ឱ្យ​រឹងមាំ ក្នុង​ផែនការ​ក្តោប​ក្តាប់​មន្ទីរ​ឃុំឃាំង​ព្រៃស ដើម្បី​កម្ចាត់​អ្នក​ដែល​ត្រូវ​គេ​សង្ស័យ​ថា​ជា​ឆ្អឹង​ទទឹង​ក​ក្នុង​ផែនការ​ស្នង​អំណាច​របស់​ខ្លួន។

លោក​បន្ត​ថា ផែនការ​នេះ​គឺ​ដូច​គ្នា​នឹង​ផែនការ ប៉ុល ពត ដែល​ក្តោប​ក្តាប់​មន្ទីរ​ឃុំឃាំង «ស​២១» ឬ «គុក​ទួលស្លែង» កណ្តាល​ទីក្រុង​ភ្នំពេញ ដើម្បី​កម្ចាត់​មេ​កម្មាភិបាល​ខ្មែរក្រហម​ដែល​ជា​ឧបសគ្គ​ក្នុង​ការ​ក្តោប​ក្តាប់​អំណាច​របស់​ខ្លួន​ដូច្នោះ​ដែរ។

លោក គឹម សុខ លើកឡើង​ថា ការ​តែងតាំង​លោក ហ៊ុន ម៉ាណែត ជា​បេក្ខជន​តំណាងរាស្ត្រ​នៅ​ពេលនេះ គឺ​បំពាន​យ៉ាង​ធ្ងន់ធ្ងរ​លើ​ច្បាប់​ស្ដីពី​ការ​បោះឆ្នោត​ជ្រើសតាំង​តំណាងរាស្ត្រ​ដែល​បាន​ហាមឃាត់​មិន​ឱ្យ​មន្ត្រី​កងកម្លាំង​ប្រដាប់​អាវុធ​ឈរ​ឈ្មោះ​ជា​បេក្ខជន​តំណាងរាស្ត្រ ខណៈ​លោក ហ៊ុន ម៉ាណែត នៅ​ពេលនេះ​កំពុង​កាន់​តួនាទី​ជាច្រើន​ក្នុង​ជួរ​កងទ័ព​ទៅ​ហើយ​នោះ។

កាលពី​ថ្ងៃទី​៣០ ខែ​មីនា ឆ្នាំ​២០២៣ ប្រធាន​គណបក្ស​ប្រជាជន​កម្ពុជា លោក ហ៊ុន សែន បាន​ចេញ​សេចក្តី​សម្រេច​តែងតាំង​កូនប្រុស​ច្បង​របស់​លោក គឺ​លោក ហ៊ុន ម៉ាណែត ដែល​ជា​បេក្ខជន​អនាគត​នាយករដ្ឋមន្ត្រី​បក្ស​កាន់​អំណាច​ដ៏​ចម្រូងចម្រាស ឱ្យ​ឈរ​ឈ្មោះ​ជា​បេក្ខជន​តំណាងរាស្ត្រ​សម្រាប់​អាណត្តិ​ទី​៧ ក្នុង​ឆ្នាំ​២០២៣ លំដាប់​លេខ​រៀង​ទី​១ នៅ​មណ្ឌល​ភ្នំពេញ ក្នុង​ចំណោម​បេក្ខជន​ពេញ​សិទ្ធិ ១១​រូប​ផ្សេង​ទៀត ដូចជា​លោក ប៉ា សុជាតិវង្ស ស្ថិត​ក្នុង​ជួរ​លេខ​រៀង​ទី​២ លោក អ៊ិត សំហេង ស្ថិត​ក្នុង​ជួរ​លេខ​រៀង​ទី​៣ និង​លោក ម៉ម ប៊ុនហេង ស្ថិត​ក្នុង​ជួរ​លេខ​រៀង​ទី​៤ ជាដើម។

ក្រៅពី​សម្រេច​តែងតាំង​លោក ហ៊ុន ម៉ាណែត ឱ្យ​ឈរ​ឈ្មោះ​ជា​បេក្ខជន​តំណាងរាស្ត្រ​នៅ​មណ្ឌល​ភ្នំពេញ លោក ហ៊ុន សែន ដែល​ជា​ឪពុក បាន​ចេញ​សេចក្ដី​សម្រេច​ផ្សេង​មួយ​ទៀត​នៅ​ថ្ងៃទី​៣០ ខែ​មីនា ដដែល ផ្លាស់ប្ដូរ​លោក ហ៊ុន ម៉ាណែត ពី​អនុប្រធាន​ក្រុម​ការងារ​ចុះ​មូលដ្ឋាន​ខេត្ត​កំពង់ចាម មក​ជា​អនុប្រធាន​ក្រុម​ការងារ​ចុះ​មូលដ្ឋាន​នៅ​រាជធានី​ភ្នំពេញ​វិញ​ផង​ដែរ។

ច្បាប់​ស្ដីពី​ការ​ជ្រើសតាំង​តំណាងរាស្ត្រ​មាត្រា​២៤ ចែង​ថា មន្ត្រី​រាជការ​ស៊ីវិល មន្ត្រី​តុលាការ កងកម្លាំង​នគរបាល​ជាតិ កងយោធពល​ខេមរភូមិន្ទ​ក្នុង​មុខតំណែង មិន​ត្រូវ​បាន​អនុញ្ញាត​ឱ្យ​ឈរ​ឈ្មោះ​ជា​បេក្ខជន​តំណាងរាស្ត្រ​ឡើយ។

ចំណែក​មាត្រា​២៥ ចែង​ថា មន្ត្រី​រាជការ​ស៊ីវិល មន្ត្រី​តុលាការ កងកម្លាំង​នគរបាល​ជាតិ កងយោធពល​ខេមរភូមិន្ទ បើ​ចង់​ឈរ​ឈ្មោះ​ជា​បេក្ខជន​តំណាងរាស្ត្រ ត្រូវតែ​សុំ​ច្បាប់​ឈប់​ពិសេស​ជា​កំហិត។

លោក ហ៊ុន ម៉ាណែត នៅ​ពេលនេះ​ក្រៅពី​មាន​តំណែង​ជាន់ខ្ពស់​នៅ​ក្នុង​ជួរ​គណបក្ស​ប្រជាជន​កម្ពុជា ក៏​កាន់​តំណែង​ជាន់ខ្ពស់​នៅ​ក្នុង​ជួរ​យោធា​ផង​ដែរ ដែល​មាន​តួនាទី​ជា​អគ្គមេបញ្ជាការរង​នៃ​កងយោធពល​ខេមរភូមិន្ទ​ផង ជា​មេបញ្ជាការ​កងទ័ព​ជើងគោក​ផង ជា​មេបញ្ជាការ​កងកម្លាំង​ពិសេស​ប្រឆាំង​ភេរវកម្ម​ផង និង​ជា​មេបញ្ជាការរង​កង​អង្គរក្ស​ផង​ដែរ។ ជាង​នេះ​ទៀត លោក ហ៊ុន ម៉ាណែត ក៏​ទើប​តែ​ត្រូវ​ដំឡើង​ឋានៈ​ជា​ថ្នាក់​នាយ​ឧត្តមសេនីយ៍​ផ្កាយ​មាស​៤ កាលពី​ពេល​ថ្មីៗ​នេះ​ថែម​ទៀត។

ទាក់ទិន​នឹង​បញ្ហា​នេះ អង្គការ គ្លប៊ល វីនេស អះអាង​ថា ក្រុម​គ្រួសារ​លោក​នាយករដ្ឋមន្ត្រី ហ៊ុន សែន សព្វថ្ងៃ​នេះ​បាន​បែងចែក​គ្នា​កាន់​តួនាទី​ធំៗ​ក្នុង​ជួរ​រដ្ឋាភិបាល​ឯក​បក្ស​របស់​លោក​ទាំងអស់ ដូចជា៖

  • លោក ហ៊ុន សែន កាន់​តំណែង​ជា​នាយករដ្ឋមន្ត្រី
  • អ្នកស្រី ប៊ុន រ៉ានី កាន់​តំណែង​ជា​ប្រធាន​កាកបាទក្រហម
  • លោក ហ៊ុន ម៉ាណែត កាន់​តំណែង​ជា​អគ្គមេបញ្ជាការ​កងទ័ព​ជើងគោក
  • លោក ហ៊ុន ម៉ានី កាន់​តួនាទី​ជា​ប្រធាន​គណៈកម្មការ​ទី​៧ នៃ​រដ្ឋសភា
  • និង​លោក ហ៊ុន ម៉ានិត កាន់​តួនាទី​ជា​ប្រធាន​នាយកដ្ឋាន​ស្រាវជ្រាវ​ចារកិច្ច​ក្រសួង​ការពារ​ជាតិ ជាដើម។

ជុំវិញ​បញ្ហា​នេះ កាលពី​ថ្ងៃទី​២២ ខែ​មីនា ឆ្នាំ​២០២៣ មេដឹកនាំ​ខ្មែរ​កាង​អំណាច​ត​ត្រកូល លោក ហ៊ុន សែន អះអាង​ថា ការ​ដំឡើង​ឋានន្តរស័ក្តិ​ឱ្យ​កូនប្រុស​បង្កើត​ខ្លួនឯង​ដែល​ត្រៀម​ស្នង​មរតក​អំណាច​ពី​ខ្លួន គឺ​លោក ហ៊ុន ម៉ាណែត គឺជា​ផែនការ​ឆ្ពោះ​ទៅ​រក​ការ​ក្តោប​ក្តាប់​អំណាច​ដើម្បី​គ្រប់គ្រង​អំណាច​ជា​នាយករដ្ឋមន្ត្រី​នា​ពេល​ខាងមុខ​នេះ។

លោក ហ៊ុន សែន គំរាម​ថា គ្មាន​នរណា​អាច​រារាំង​ផែនការ​នេះ​បាន​ឡើយ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស