នាយករដ្ឋមន្ត្រីជប៉ុន លោក Fumio Kishida ដែលបានទៅធ្វើទស្សនកិច្ចនៅកូរ៉េខាងត្បូង កាលពីថ្ងៃអាទិត្យ ទី៧ ឧសភា ត្រូវបានមើលឃើញថា ទីក្រុងតូក្យូ និងក្រុងសេអ៊ូល ព្យាយាមផ្សះផ្សាទំនាក់ទំនងឡើងវិញនៅចំពោះមុខការគំរាមកំហែងកាន់តែខ្លាំងពីរដ្ឋកុម្មុយនីស្តផ្ដាច់ការនៅក្រុងព្យុងយ៉ាង។
ទីភ្នាក់ងារព័ត៌មាន AFP បានចុះផ្សាយថា យន្តហោះរបស់លោក Kishida បានចុះចតនៅឯអាកាសយានដ្ឋានក្នុងទីក្រុង Seongnam ក្បែររដ្ឋធានីសេអ៊ូល ដែលជាការចាប់ផ្តើមដំណើរបំពេញទស្សនកិច្ចផ្លូវការលើកដំបូង ធ្វើឡើងដោយនាយករដ្ឋមន្ត្រីជប៉ុន ទៅកាន់ប្រទេសកូរ៉េខាងត្បូង ក្នុងបំណងបង្ហាញកម្លាំងរួមគ្នាទប់ទល់នឹងការបង្ករឿងគំរាមផ្ទុះសង្គ្រាមពីសំណាក់កូរ៉េខាងជើង។
ការទៅដល់ក្រុងសេអ៊ូល របស់លោក Kishida ត្រូវបានទទួលស្វាគមន៍រាក់ទាក់ដោយក្រុមមន្ត្រីជាន់ខ្ពស់កូរ៉េខាងត្បូង មុនការបើកជំនួបកំពូលក្នុងថ្ងៃតែមួយជាមួយប្រធានាធិបតីកូរ៉េខាងត្បូង លោក Yoon Suk Yeol។
ថ្លែងប្រាប់អ្នកសារព័ត៌មានក្រោយកិច្ចប្រជុំកំពូលជាមួយលោក Yoon Suk Yeol លោក Kishida មិនបាននិយាយពីការសុំទោសជាផ្លូវការណាមួយក្នុងនាមលោកជានាយករដ្ឋមន្ត្រីជប៉ុន នោះទេចំពោះទង្វើខុសឆ្គងដែលទាហានជប៉ុន ប្រព្រឹត្តអំឡុងការគ្រប់គ្រងឧបទ្វីបកូរ៉េពីឆ្នាំ១៩១០ ដល់ឆ្នាំ១៩៤៥ ប៉ុន្តែលោកបានលើកឡើងថា រដ្ឋាភិបាលរបស់លោកបានប្រកាន់គោលជំហរដូចរដ្ឋាភិបាលជប៉ុនមុនៗដែរ ដែលបានធ្វើការសុំទោសរួចហើយ។
លោក Kishida បានបញ្ជាក់ថា ចំពោះរូបលោកផ្ទាល់ គឺបេះដូងរបស់លោកមានការឈឺចាប់ជាខ្លាំងនៅពេលនឹកគិតដល់ពលរដ្ឋកូរ៉េជាច្រើនដែលបានរងការឈឺចាប់ និងរងទុក្ខវេទនានៅក្នុងសម័យកាលដ៏លំបាកនៅពេលនោះ។
បន្ទាប់ពីជួបសមាជិកសភាកូរ៉េខាងត្បូង លោក Kishida បានប្រាប់ក្រុមអ្នកយកព័ត៌មានថា លោកចង់ពង្រឹងទំនាក់ទំនងដែលលោកមានជាមួយប្រធានាធិបតីកូរ៉េខាងត្បូង លោក Yoon Suk Yeol ក្នុងការសហការគ្នាបង្កើតយុគសម័យថ្មីមួយ។
តែទីក្រុងតូក្យូ និងក្រុងសេអ៊ូល ស្ថិតក្នុងការមិនចុះសម្រុងគ្នា ដែលបន្សល់ទុកពីសម័យអាណានិគមរបស់ជប៉ុន នៅឧបទ្វីបកូរ៉េ កាលពីចន្លោះឆ្នាំ១៩១០-១៩៤៥។
នៅពេលនេះ បញ្ហាប្រវត្តិសាស្ត្រអតីតកាល និងការមិនចុះសម្រុងគ្នាត្រូវទុកដោយឡែកសិន ដោយត្រូវសាមគ្គីរួមដៃគ្នាទប់ទល់នឹងសត្រូវ គឺកូរ៉េខាងជើង។
ប្រឈមមុខនឹងការកើនឡើងនៃការគំរាមកំហែងនុយក្លេអ៊ែរពីសំណាក់កូរ៉េខាងជើងជារដ្ឋកុម្មុយនីស្តសន្តតិវង្ស និងការប្រែប្រួលស្ថានការណ៍ភូមិសាស្ត្រនយោបាយពិភពលោកដោយសារសង្គ្រាមរុស្ស៊ីឈ្លានពានអ៊ុយក្រែន បានក្លាយជាការជំរុញឱ្យកូរ៉េខាងត្បូងក្រោមការដឹកនាំរបស់លោក Yoon Suk Yeol ជាអ្នកនយោបាយជំនាន់ក្រោយ និងជប៉ុន ក្រោមការដឹកនាំរបស់លោក Kishida បានឈានដល់ការឯកភាពគ្នាលើការផ្សះផ្សាទំនាក់ទំនងឡើងវិញ។
ចាប់តាំងពីឡើងកាន់តំណែងកាលពីខែឧសភា ឆ្នាំ២០២២ ជាប្រធានាធិបតីកូរ៉េខាងត្បូង លោក Yoon Suk Yeol បានប្រឹងប្រែងផ្សាទំនាក់ទំនងឡើងវិញជាមួយជប៉ុន ដែលលោកបានធ្វើដំណើរទៅកាន់ទីក្រុងតូក្យូ កាលពីខែមីនា។
កិច្ចប្រឹងប្រែងស្ដារទំនាក់ទំនងរវាងជប៉ុន និងកូរ៉េខាងត្បូង កើតឡើងចំពេលដែលមេដឹកនាំកូរ៉េខាងជើង លោក គីម ជុងអ៊ុន បានប្រកាសថានៅពេលនេះ ប្រទេសរបស់លោកជារដ្ឋនុយក្លេអ៊ែរដោយមិនអាចថយក្រោយបានឡើយ។ របបនៅក្រុងព្យុងយ៉ាង របស់លោក គីម ជុងអ៊ុន តែងតែគំរាមកម្ទេចទាំងជប៉ុន និងកូរ៉េខាងត្បូងឱ្យទៅជាផេះ ដោយការវាយប្រហារនឹងក្បាលគ្រាប់នុយក្លេអ៊ែរ។
ការគំរាមរបស់កូរ៉េខាងជើងនេះហើយដែលនាំឱ្យមេដឹកនាំប្រទេសទាំងពីរខិតជិតគ្នាកាន់តែស៊ីជម្រៅរហូតឈានដល់ការសម្រេចផ្អឹបចោលរឿងអតីតកាល ក៏ព្រោះតែមេដឹកនាំទាំងពីរបានស្វែងយល់រួមថា សត្រូវនៅកៀកបំផុតដ៏ភ័យខ្លាច គឺកូរ៉េខាងជើង។
រយៈពេលមួយឆ្នាំមកនេះ កូរ៉េខាងជើងបានបាញ់មីស៊ីលជាង ៧០គ្រាប់ ហើយមីស៊ីលមួយចំនួនបានហោះរំលងប្រទេសជប៉ុនធ្លាក់ទៅក្នុងសមុទ្រប៉ាស៊ីហ្វិកខាងលិច។ កូរ៉េខាងជើងព្រមានថានឹងបាញ់សាកល្បងក្បាលគ្រាប់នុយក្លេអ៊ែរនៅពេលឆាប់ៗនេះ។
ជាការឆ្លើយតប ទាំងសហរដ្ឋអាមេរិក កូរ៉េខាងត្បូង និងជប៉ុន ក៏បានគំរាមកូរ៉េខាងជើងវិញដែរ។ សហរដ្ឋអាមេរិកដឹកមុខគេដែលព្រមានបញ្ចប់របបក្រុងព្យុងយ៉ាង ឱ្យតែហ៊ានបង្កសង្គ្រាមនៅលើឧបទ្វីបកូរ៉េ។
យ៉ាងណា ទាំងនាយករដ្ឋមន្ត្រីជប៉ុន និងប្រធានាធិបតីកូរ៉េខាងត្បូង សុទ្ធតែបានទៅជួបលោក ចូ បៃដិន ប្រធានាធិបតីសហរដ្ឋអាមេរិកនៅសេតវិមាន។
ទោះបីជំនួបដាច់ដោយឡែកពីគ្នាក្ដី តែទាំងមេដឹកនាំជប៉ុន និងកូរ៉េខាងត្បូង បានទទួលការធានាដូចគ្នាពីលោក បៃដិន ដែលថាសហរដ្ឋអាមេរិកធានាដាច់ខាតជួយប្រទេសអាស៊ីខាងកើតពីរនេះក្នុងការពង្រឹងសមត្ថភាពកងទ័ព និងសព្វាវុធ ដើម្បីទប់ទល់ការគំរាមបង្កសង្គ្រាមពីសំណាក់កូរ៉េខាងជើង។ ឥឡូវប្រទេសទាំងបីនេះបានក្លាយជាសម្ព័ន្ធភាពសន្តិសុខត្រីភាគីតាមព្រឹត្តិន័យទៅហើយ ដែលនាំឱ្យមេដឹកនាំជប៉ុន និងកូរ៉េខាងត្បូងមើលឃើញពីទស្សនៈរួមគ្នា ដោយផ្អឹបចោលរឿងអតីតកាលដោយកំណត់យុទ្ធសាស្ត្ររួមក្នុងការទប់ទល់សត្រូវនៅជាប់ខ្លួន គឺកូរ៉េខាងជើង។
ប្រទេសដែលមានសក្ដានុពលទាំងសេដ្ឋកិច្ច និងយោធានៅក្នុងតំបន់អាស៊ីខាងកើតទាំងពីរនេះ គឺជាសម្ព័ន្ធមិត្តសន្តិសុខដ៏សំខាន់នៅអាស៊ីប៉ាស៊ីហ្វិកដែលសហរដ្ឋអាមេរិកមិនអាចខ្វះបានឡើយ៕