កាលពី ១០ឆ្នាំមុននៅពេលដែលការបោះឆ្នោតជាតិឆ្នាំ២០១៣ ជិតមកដល់ ពលរដ្ឋដែលចង់បានការផ្លាស់ប្ដូររបៀបដឹកនាំនៅកម្ពុជា ដើម្បីឱ្យងាកមករកគន្លងប្រជាធិបតេយ្យ បានងើបឡើងគាំទ្រគណបក្សសង្គ្រោះជាតិសឹងគ្រប់ទិសទីដូចទឹកបាក់ទំនប់ ប៉ុន្តែ ១០ឆ្នាំក្រោយនៅមុនការបោះឆ្នោតជាតិឆ្នាំ២០២៣ ខាងមុខនេះ សកម្មជន និងមន្ត្រីជាន់ខ្ពស់បក្សប្រឆាំងបែរជានាំគ្នាទៅចុះចូលជាមួយបក្សកាន់អំណាចដូចព្យុះសង្ឃរាទៅវិញ។
កាលពីថ្ងៃទី៩ ខែឧសភា ឆ្នាំ២០២៣ មេដឹកនាំបក្សកាន់អំណាច លោក ហ៊ុន សែន បានចេញអនុក្រឹត្យតែងតាំង និងផ្តល់ឋានៈដល់អតីតចៅសង្កាត់ជាប់ឆ្នោតក្រុងប៉ោយប៉ែត ខេត្តបន្ទាយមានជ័យ របស់គណបក្សសង្គ្រោះជាតិ លោក សារ៉ូ សុវុឌ្ឍិ ជាទីប្រឹក្សាអមក្រសួងអភិវឌ្ឍន៍ជនបទ មានឋានៈស្មើអគ្គនាយករង ស្របពេលដែលសមាជិកបក្សប្រឆាំងដទៃទៀតក៏បាននាំគ្នាចុះចូលជាបន្តបន្ទាប់ដែរ។
ការតែងតាំងនេះ ធ្វើឡើងបន្ទាប់ពីអតីតសមាជិកបក្សប្រឆាំងរូបនេះបានសរសេរលិខិតសុំចុះចូលជាមួយបក្សកាន់អំណាចកាលពីថ្ងៃទី២៤ ខែមេសា ឆ្នាំ២០២៣ ដោយបញ្ជាក់ថា លោកនឹងបម្រើជីវភាពនយោបាយជាមួយគណបក្សប្រជាជនកម្ពុជាជារៀងរហូត បន្ទាប់ពីលោកបានស្វែងយល់ពីគោលនយោបាយ និងតាមរយៈនៃការណែនាំរបស់លោក យឹម ស៊ីណន ដែលបានចុះចូលជាមួយបក្សកាន់អំណាចកាលពីចុងខែមេសា កន្លងទៅនេះ។
ការប្រកាសចុះចូលជាមួយគណបក្សប្រជាជនកម្ពុជារបស់លោក ហ៊ុន សែន នៅពេលនេះ ត្រូវក្រុមអ្នកសង្កេតការណ៍រិះគន់ថា គឺជាឱកាសដ៏ល្អមួយសម្រាប់អ្នកដែលចង់បានសេរីភាពនៅពេលដែលពួកគេត្រូវរងនូវការចោទប្រកាន់ និងឃុំខ្លួនទាំងអយុត្តិធម៌ ហើយក៏ជាឱកាសសម្រាប់អ្នកដែលចង់បានតំណែងតួនាទីក្នុងជួររដ្ឋាភិបាលផងដែរ ព្រោះបក្សកាន់អំណាចនៅពេលនេះ គឺត្រូវការអ្នកចុះចូលជាមួយខ្លួនឱ្យបានកាន់តែច្រើន ដើម្បីជួយលម្អការបោះឆ្នោតដែលគ្មានបក្សប្រឆាំងចូលរួម និងអវត្តមានមេដឹកនាំបក្សប្រឆាំងនោះ។
សកម្មជន និងមន្ត្រីបក្សប្រឆាំងដែលសុំចុះចូលជាមួយបក្សកាន់អំណាចនៅពេលនេះ មិនមែនតែលោក សារ៉ូ សុវុឌ្ឍិ លោក យឹម ស៊ីណន លោក ហ៊ុន កុសល ឬបណ្ឌិត សូ ណារ៉ូ ដែលមាននិន្នាការគាំទ្រលោក កឹម សុខា តែម្ខាងនោះទេ សូម្បីមន្ត្រីបក្សប្រឆាំងដែលមាននិន្នាការគាំទ្រលោក សម រង្ស៊ី ក៏ប្រកាសចុះចូលជាមួយបក្សកាន់អំណាចដូចគ្នាដែរ ក្នុងនោះរួមមានលោក អៀ ចាន់ណា លោក តុ វ៉ាន់ចាន់ លោក គង់ ម៉ាស់ ព្រមទាំងសកម្មជន និងមន្ត្រីបក្សសង្គ្រោះជាតិជាច្រើននាក់ផ្សេងទៀតផងដែរ។
ទាក់ទិននឹងបញ្ហានេះ អ្នកវិភាគនយោបាយឯករាជ្យ និងជាប្រធានវេទិកាពលរដ្ឋ លោក គឹម សុខ បានអះអាងនៅពេលដែលចរន្តចុះចូលចាប់ផ្តើមនៅពេលដំបូងថា ក្រោយចុះចូលជាមួយបក្សកាន់អំណាច មានវិញ្ញាសាតូចតាចសម្រាប់លោក យឹម ស៊ីណន គឺត្រូវទាញលោក ហ៊ុន កុសល ឱ្យចុះចូលជាមួយបក្សកាន់អំណាចដូចខ្លួនដែរ។
លោក គឹម សុខ លើកឡើងនៅពេលដែលលោក យឹម ស៊ីណន អូសទាញលោក ហ៊ុន កុសល បានសម្រេច លោក ហ៊ុន សែន នឹងផ្តល់ឱកាសឱ្យលោក យឹម ស៊ីណន ធ្វើជាមេចលនាស្នូលទាក់ទាញក្រុមអ្នកគាំទ្រលោក កឹម សុខា ទៅថ្ងៃមុខ ព្រោះថាលោក ហ៊ុន សែន ត្រូវការសងសឹកឲ្យដល់ទីបំផុតជាមួយនឹងលោក កឹម សុខា ដែលគាត់នៅតែមានជំហររឹងមាំមិនធ្វើតាមគំនិតរបស់គាត់កន្លងមក។
លោក គឹម សុខ បញ្ជាក់ថា កន្លងមក លោក ហ៊ុន សែន រាវរកមិនឃើញមេចរន្តសម្រាប់អូសទាញមន្ត្រីបក្សប្រឆាំងនោះទេ ប៉ុន្តែនៅពេលនេះ លោក ហ៊ុន សែន ចាប់បានលោក យឹម ស៊ីណន និងលោក ហ៊ុន កុសល ហើយ ដូច្នេះលោក ហ៊ុន សែន នឹងប្រគល់ការងារជាមេចលនានេះឲ្យពួកគេកូរកកាយចរន្តសកម្មជនរបស់បក្សប្រឆាំងនៅគ្រប់ទីកន្លែងជាមិនខាន។
ជាក់ស្តែង បន្ទាប់ពីលោក យឹម ស៊ីណន ប្រកាសចុះចូលជាមួយគណបក្សប្រជាជនកម្ពុជា និងត្រូវបានតែងតាំងជាអនុរដ្ឋលេខាធិការនៃក្រសួងការងារ និងបណ្តុះបណ្តាលវិជ្ជាជីវៈ ក៏មានមន្ត្រីបក្សប្រឆាំងប្រកាសចុះចូលជាមួយបក្សកាន់អំណាចជាបន្តបន្ទាប់ សូម្បីអ្នកខ្លះដែលគេមិនស្គាល់ឈ្មោះពីមុនមក ក៏ខំប្រឹងរៀបរាប់ពីប្រវត្តិប្រឆាំងរបស់ខ្លួនក្នុងលិខិតសុំចុះចូលដែរ ទំនងជាធ្វើឡើងក្នុងបំណងតថ្លៃយកតំណែងដែលខ្លួនសុំចុះចូលនៅពេលនេះ។
អតីតអ្នកទោសនយោបាយ និងជាមន្ត្រីជាន់ខ្ពស់គណបក្សសង្គ្រោះជាតិ លោក មាជ សុវណ្ណារ៉ា ប្រាប់សារព័ត៌មាន The Cambodia Daily នៅថ្ងៃទី១១ ឧសភា នេះថា បើការចុះចូលជាមួយបក្សកាន់អំណាចដើម្បីកែលំអការដឹកនាំដែលមានចំណុចខ្វះខាតរបស់រដ្ឋាភិបាល គឺជារឿងល្អ ប៉ុន្តែបើចុះចូលដើម្បីយកតំណែង និងបម្រើផែនការនយោបាយរបស់បក្សកាន់អំណាចមកកៀរគរសមាជិកបក្សប្រឆាំងនោះ គឺជាទង្វើផ្ទុយពីឆន្ទៈរបស់ពលរដ្ឋដែលចង់បានការផ្លាស់ប្ដូរដែលកំពុងគាំទ្រគណបក្សសង្គ្រោះជាតិសព្វថ្ងៃនេះទាំងស្រុង។
លោក មាជ សុវណ្ណារ៉ា លើកឡើងថា ការចុះចូលជាមួយបក្សកាន់អំណាចពីសំណាក់មន្ត្រីបក្សប្រឆាំង ជារូបភាពមួយបង្កប់នូវការជាន់ឈ្លីទឹកចិត្តពលរដ្ឋដែលចង់បានការផ្លាស់ប្ដូរយ៉ាងធ្ងន់ធ្ងរ ព្រោះថាពលរដ្ឋដែលចង់បានប្រជាធិបតេយ្យពិតប្រាកដ ហើយនាំគ្នាបោះឆ្នោតគាំទ្រគណបក្សសង្គ្រោះជាតិ ត្រូវពួកគេប្រមូលយកទៅជូនបក្សកាន់អំណាចវិញទាំងអស់ បើទោះបីជាទង្វើនេះមិនខុសច្បាប់ តែជាការប្រមាថទឹកចិត្តស្នេហាជាតិរបស់ម្ចាស់ឆ្នោតយ៉ាងខ្លាំង។
ចំណែកអ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិត និងការស្រាវជ្រាវ លោក សេក សុជាតិ ប្រាប់សារព័ត៌មាន The Cambodia Daily នៅថ្ងៃទី១១ ឧសភា នេះដែរថា ចរន្តនៃការចុះចូលរបស់មន្ត្រីបក្សប្រឆាំងមានហេតុផលមួយចំនួនចេញពីខាងក្រុមប្រឆាំងខ្លួនឯងដោយផ្ទាល់ ដូចជាការគ្រប់គ្រងមិនបានល្អ ការកើតមានអំពើពុករលួយ ភាពអយុត្តិធម៌អំឡុងពេលដាក់បេក្ខជនតំណាងរាស្ត្រ និងការឆក់ឱកាសពីបុគ្គលផ្ទាល់ខ្លួនដែលចង់បានតំណែងតួនាទី ជាដើម។
លោក សេក សុជាតិ លើកឡើងថា ក្រោយការចុះចូលក៏ត្រូវលោកនាយករដ្ឋមន្ត្រី ហ៊ុន សែន តែងតាំងជារដ្ឋលេខាធិការ និងអនុរដ្ឋលេខាធិការព្រោងព្រាត ប៉ុន្តែតំណែងទាំងនោះគ្រាន់ជាតំណែងចុងអាណត្តិប៉ុណ្ណោះ ព្រោះតំណែងទាំងនេះនឹងអស់សុពលភាពនៅពេលរដ្ឋាភិបាលថ្មីត្រូវបានបង្កើតឡើងក្រោយការបោះឆ្នោត ដូច្នេះបើគ្មានការតែងតាំងថ្មីទេ នោះតំណែងទាំងនោះក៏នឹងមិនអាចបន្តទៅថ្ងៃមុខទៀតបានដែរ។
អ្នកប្រឹក្សាយោបល់ផ្នែកអភិវឌ្ឍន៍ផ្នត់គំនិតរូបនេះបញ្ជាក់ថា ការផ្តល់តំណែងតួនាទីដល់អ្នកចុះចូលបែបនេះ ក៏ជាយុទ្ធសាស្ត្រមួយរបស់បក្សកាន់អំណាចដែរ ស្របពេលបក្សប្រឆាំងកំពុងបែកបាក់កម្លាំងសាមគ្គីនៅពេលនេះ៕