31 C
Phnom Penh

មន្ត្រី​សិទ្ធិមនុស្ស​អន្តរជាតិ៖ ការ​បោះឆ្នោត​ជាតិ​នៅ​កម្ពុជា​ឆ្នាំ​២០២៣​គ្រាន់​ជា​ការ​បោះឆ្នោត​កំប្លុក​កំប្លែង

ដោយ ឌឹ ខេមបូឌា ដេលី

បទវិភាគ

មន្ត្រី​ជាន់ខ្ពស់​របស់​អង្គការ​ឃ្លាំមើល​សិទ្ធិមនុស្ស​អន្តរជាតិ (Human Rights Watch) ចាត់ទុក​ការ​បោះឆ្នោត​ជាតិ​នៅ​កម្ពុជា​ដែល​គ្មាន​បក្ស​ប្រឆាំង​ចូលរួម​នៅ​ខែ​កក្កដា ឆ្នាំ​២០២៣ ខាងមុខ​នេះ គ្រាន់តែ​ជា​ការ​បោះឆ្នោត​កំប្លុកកំប្លែង​សម្រាប់​ប្រទេស​ដែល​កាន់​របប​ប្រជាធិបតេយ្យ​ប៉ុណ្ណោះ។

អនុប្រធាន​ប្រចាំ​តំបន់​អាស៊ី​របស់​អង្គការ​ឃ្លាំមើល​សិទ្ធិមនុស្ស (Human Rights Watch) លោក ហ្វីល រ៉ូបឺសុន បាន​លើកឡើង​ក្នុង​កម្មវិធី Idea Talk នៃ​សារព័ត៌មាន The Cambodia Daily កាលពី​រាត្រី​ថ្ងៃទី​១៧ ឧសភា ថា ពលរដ្ឋ​ខ្មែរ​នៅ​ក្រៅ​ស្រុក​អាច​ធ្វើ​កិច្ចការ​មាន​ប្រសិទ្ធភាព​ជុំវិញ​ការ​ជំរុញ​ឱ្យ​ស្ដារ​ប្រជាធិបតេយ្យ និង​ការ​គោរព​សិទ្ធិមនុស្ស​នៅ​កម្ពុជា ឱ្យ​តែ​ពួកគេ​ធ្វើ​តាម​ច្បាប់ និង​តាម​លំដាប់លំដោយ។

លោក​បន្ថែម​ថា ពលរដ្ឋ​ខ្មែរ​រស់នៅ​ក្រៅ​ស្រុក មិន​គួរ​នាំគ្នា​បំភ្លេច​ប្រទេស​កំណើត​របស់​ខ្លួន​ដោយ​ទុក​ឱ្យ​មេដឹកនាំ​ធ្វើ​អ្វីៗ​ស្រេច​តែ​នឹង​ទំនើងចិត្ត​នោះ​ទេ ប្រសិនបើ​ពួកគេ​ចង់​ឱ្យ​ជាតិ​សាសន៍​របស់​ខ្លួន​រស់នៅ​ក្នុង​សង្គម​ប្រជាធិបតេយ្យ​ពិតប្រាកដ​ទៅ​ថ្ងៃ​មុខ​នោះ។

មន្ត្រី​ជាន់ខ្ពស់​របស់​អង្គការ​ឃ្លាំមើល​សិទ្ធិមនុស្ស​រូប​នេះ​បញ្ជាក់​ថា សព្វថ្ងៃ​នេះ​ប្រទេស​ដែល​កំពុង​ធ្វើ​ដំណើរ​ទៅ​រក​ប្រព័ន្ធ​ផ្ដាច់ការ​មួយ​ចំនួន​កំពុង​យក​ប្រទេស​ភូមា មក​បិទបាំង​ទង្វើ​របស់​ពួកគេ ព្រោះ​ថា​នៅ​ពេល​ដែល​មាន​ការ​ទាមទារ​ណា​មួយ​ពី​សហគមន៍​អន្តរជាតិ​ឱ្យ​ស្ដារ​លទ្ធិប្រជាធិបតេយ្យ និង​គោរព​សិទ្ធិមនុស្ស ពួកគេ​តែងតែ​ជំរុញ​ឱ្យ​សហគមន៍​អន្តរជាតិ​ទៅ​ពិនិត្យ​មើល​ការ​ដឹកនាំ​របស់​ប្រទេស​ភូមា ទៅវិញ។

ការ​អះអាង​នេះ ធ្វើឡើង​ស្រប​ពេល​ដែល​កម្ពុជា​កំពុង​រៀបចំ​ដំណើរ​ឆ្ពោះ​ទៅ​រក​ការ​បោះឆ្នោត​ជាតិ​នៅ​ខែ​កក្កដា ឆ្នាំ​២០២៣ ខាងមុខ​នេះ ស្រប​ពេល​ដែល​គេ​មើល​ឃើញ​ថា​ជា​ការ​បោះឆ្នោត​មួយ​ដែល​គ្មាន​តម្លាភាព សេរី ត្រឹមត្រូវ និង​យុត្តិធម៌។

ដំណើរការ​នៃ​ការ​បោះឆ្នោត​ជាតិ​នៅ​កម្ពុជា​អាណត្តិ​ទី​៧ ឆ្នាំ​២០២៣ នឹង​ប្រព្រឹត្ត​ទៅ​នៅ​ថ្ងៃ​អាទិត្យ ទី​២៣ ខែ​កក្កដា ឆ្នាំ​២០២៣ ខាងមុខ​នេះ​ដែល​មាន​គណបក្ស​ចំនួន​១៨ ចូលរួម ខណៈ​ប្រទេស​សេរី​ប្រជាធិបតេយ្យ​មួយ​ចំនួន​មិន​បាន​បញ្ជូន​អ្នក​សង្កេតការណ៍​របស់​ពួកគេ​មក​ពិនិត្យ​មើល​ការ​បោះឆ្នោត​នេះ​ទេ ដោយសារតែ​គេ​មើល​ឃើញ​ថា​ជា​ការ​បោះឆ្នោត​ដែល​គ្មាន​តម្លាភាព។

យ៉ាងណា​ក៏ដោយ មេដឹកនាំ​ខ្មែរ​ដែល​គេ​ចាត់ទុក​ជា​ចោរ​លួច​ប្លន់​សន្លឹកឆ្នោត លោក ហ៊ុន សែន បាន​គំរាម​កាលពី​ពេល​ថ្មីៗ​នេះ​ថា ពលរដ្ឋ​ខ្មែរ​មាន​ជម្រើស​តែ​មួយ​គត់ បើ​ពិត​ជា​ចង់​ឲ្យ​កម្ពុជា​អាច​ធានា​នូវ​សន្តិភាព​យូរអង្វែង គឺ​មាន​តែ​បោះឆ្នោត​ឲ្យ​គណបក្ស​ប្រជាជន​កម្ពុជា​ដែល​កំពុង​ដឹកនាំ​ប្រទេស​សព្វថ្ងៃ​នេះ​ប៉ុណ្ណោះ។

បុរស​ខ្លាំង​ក្តាប់​អំណាច​តាម​របៀប​ដឹកនាំ​នៃ​របប​យោធា លោក ហ៊ុន សែន បាន​លើកឡើង​ថា នៅ​ពេល​ដែល​គណបក្ស​ប្រជាជន​កម្ពុជា​បន្ត​គ្រប់គ្រង​អំណាច​ដូច​សព្វថ្ងៃ​នេះ នោះ​គណបក្ស​នឹង​អាច​រក​សន្តិភាព​ជូន​ប្រទេស​ជាតិ​បាន ដែល​នឹង​ធ្វើ​ឲ្យ​ពលរដ្ឋ​មាន​ភាព​សុខសាន្ត​ពេញលេញ​ទាំងអស់​គ្នា។

បែប​នេះ​ក្តី មន្ត្រី​ជាន់ខ្ពស់​របស់​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា ធ្លាប់​បាន​លើកឡើង​កាលពី​ពេល​ថ្មីៗ​នេះ​ថា ដើម្បី​ធានា​នូវ​ការ​បោះឆ្នោត​ខាងមុខ​នេះ​មាន​ភាព​ត្រឹមត្រូវ​ស្រប​តាម​ខ្លឹមសារ​រដ្ឋធម្មនុញ្ញ​ដែល​មាន​ចែង​អំពី​រដ្ឋាភិបាល​កម្ពុជា ត្រូវតែ​បើក​សិទ្ធិ​សេរីភាព​ដល់​អ្នក​នយោបាយ សកម្មជន​នយោបាយ និង​ពលរដ្ឋ​ឱ្យ​មាន​សិទ្ធិ​ពេញលេញ​ក្នុង​ការ​ចូលរួម​ប្រកួត​ប្រជែង​ដោយ​យុត្តិធម៌ និង​មាន​សិទ្ធិ​អាច​ជ្រើសរើស​គណបក្ស​នយោបាយ​ដែល​ពួកគេ​ពេញចិត្ត ដោយ​គ្មាន​ការ​បង្ខិតបង្ខំ និង​ការ​បំភិតបំភ័យ​ណា​មួយ​នោះ​ឡើយ។

ក្រុម​អ្នក​សង្កេតការណ៍​លើកឡើង​ថា បើ​ពិនិត្យ​លើ​សកម្មភាព​ទុច្ចរិត​ក្នុង​កិច្ចការ​នយោបាយ​របស់​លោក ហ៊ុន សែន ដែល​ប្រើ​ឧបាយកល​លួច​សន្លឹកឆ្នោត​កាលពី​អាណត្តិ​កន្លងមក​ផង និង​ការ​រៀបចំ​ផែនការ​លុបបំបាត់​វត្តមាន​គណបក្ស​ប្រឆាំង និង​ប្រធាន​គណបក្ស​សង្គ្រោះ​ជាតិ លោក កឹម សុខា ក្នុង​ការ​បោះឆ្នោត​ជាតិ​ខាងមុខ​នេះ​ផង​នោះ គេ​អាច​វាយតម្លៃ​បាន​ថា ការ​បោះឆ្នោត​នៅ​កម្ពុជា​ក្នុង​ឆ្នាំ​២០២៣ នេះ គឺជា​ការ​រៀប​ផែនការ​ប្លន់​លទ្ធផល​បោះឆ្នោត​របស់​គណបក្ស​កាន់​អំណាច​ដែល​កំពុង​បញ្ជា​ដោយ​លោក ហ៊ុន សែន ប៉ុណ្ណោះ មិនមែន​ជា​ការ​បោះឆ្នោត​ដោយ​ត្រឹមត្រូវ​នេះ​ទេ៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស