34 C
Phnom Penh

លោក ហ៊ុន សែន៖ សិទ្ធិ​ឈរឈ្មោះ​បោះឆ្នោត​នឹង​ត្រូវ​បាត់បង់​មួយ​ជីវិត បើ​ជន​ណា​មិន​ទៅ​បោះឆ្នោត​នៅ​ខែ​កក្កដា

ដោយ ឌឹ ខេមបូឌា ដេលី

បទវិភាគ

បុរស​ខ្លាំង​កម្ពុជា​លោក ហ៊ុន សែន ព្រមាន​ថា ជន​ណា​ក៏ដោយ​នៅ​ក្នុង​គណបក្ស​ណា​ក៏ដោយ ដែល​មាន​បំណង​ឈរឈ្មោះ​ឱ្យ​គេ​បោះឆ្នោត​ឱ្យ ប៉ុន្តែ​បើ​ខ្លួន​មិន​ទៅ​ចូលរួម​ការ​បោះឆ្នោត​នៅ​ថ្ងៃទី​២៣ ខែ​កក្កដា ខាងមុខ​នេះ​ទេ នោះ​ពួកគេ​នឹង​ត្រូវ​បាត់បង់​សិទ្ធិ​ឈរឈ្មោះ​ឱ្យ​គេ​បោះឆ្នោត​ឱ្យ​អស់​មួយ​ជីវិត។

បុរស​ខ្លាំង​រូប​នេះ​បាន​លើកឡើង​ពិធី​ជួប​កម្មករ​ក្នុង​រាជធានី​ភ្នំពេញ នៅ​ថ្ងៃទី​១៣ មិថុនា នេះ ដោយ​បញ្ជា​ឱ្យ​រដ្ឋមន្ត្រី​ក្រសួង​យុត្តិធម៌ និង​ក្រសួង​មហាផ្ទៃ ធ្វើ​វិសោធនកម្ម​ច្បាប់​បោះឆ្នោត​ក្រុមប្រឹក្សា​ឃុំ-សង្កាត់ ច្បាប់​ស្ដីពី​ការ​បោះឆ្នោត​ជ្រើសតាំង​សមាជិក​ព្រឹទ្ធសភា និង​ច្បាប់​ស្ដីពី​ការ​បោះឆ្នោត​ជ្រើសតាំង​តំណាងរាស្ត្រ​ឲ្យ​បាន​មុន​ការ​បោះឆ្នោត​ជាតិ​ឆ្នាំ​២០២៣ ខាងមុខ​នេះ។

លោក ហ៊ុន សែន អះអាង​ថា ការ​ធ្វើ​វិសោធនកម្ម​នៃ​ច្បាប់​នេះ គឺ​មាន​ខ្លឹមសារ​ថា បើ​អ្នក​ចង់​ឈរឈ្មោះ​ឲ្យ​គេ​បោះឆ្នោត​ឲ្យ តែ​បើ​ខ្លួន​មិន​ទៅ​ចូលរួម​ការ​បោះឆ្នោត​នៅ​ថ្ងៃទី​២៣ ខែ​កក្កដា ខាងមុខ​នេះ​ទេ អ្នក​ទាំងនោះ​នឹង​មិន​អាច​ឈរឈ្មោះ​ឱ្យ​គេ​បោះឆ្នោត​ឱ្យ​នៅ​ពេល​ក្រោយ​បាន​ឡើយ ដូចជា​ការ​បោះឆ្នោត​ឃុំ-សង្កាត់​ក្តី ការ​បោះឆ្នោត​ក្រុមប្រឹក្សា​រាជធានី ខេត្ត ក្រុង ស្រុក ខណ្ឌ ក្តី ការ​បោះឆ្នោត​ជ្រើសរើស​សមាជិក​ព្រឹទ្ធសភា​ក្តី រួម​ទាំង​ការ​បោះឆ្នោត​សមាជិក​សភា​ឆ្នាំ​២០២៨ ថែម​ទៀត។

បុរស​ខ្លាំង​កម្ពុជា​រូប​នេះ​អះអាង​ថា បើ​ពិនិត្យ​មើល​ស្ថានភាព​នៅ​ប្រទេស​ថៃ មាន​គណបក្ស​មួយ​ចំនួន​ត្រូវ​បាត់បង់​សមាជិក​សភា​ទាំងស្រុង ទោះ​ពួកគេ​បាន​ជាប់​ឆ្នោត​ហើយ​ក៏ដោយ ក៏​ត្រូវ​បាត់បង់​សិទ្ធិ​ជាប់​ឆ្នោត​ទៅវិញ​ដែរ ដោយសារតែ​ពួកគេ​មិន​បាន​បំពេញ​កាតព្វកិច្ច​នៅ​ក្នុង​ការ​ទៅ​បោះឆ្នោត​លើក​ទី​១ ដូច្នេះ​កម្ពុជា​ក៏​អាច​ធ្វើ​បែប​នេះ​បាន​ដែរ។

លោក ហ៊ុន សែន ដែល​កំពុង​ត្រួតត្រា​រដ្ឋសភា​ឯក​បក្ស​រូប​នេះ​បញ្ជាក់​ថា ការ​ធ្វើ​វិសោធនកម្ម​នេះ គឺ​ស្រប​តាម​មាត្រា​៣៤​ថ្មី នៃ​រដ្ឋធម្មនុញ្ញ ដែល​មិន​ធ្វើ​ឱ្យ​ប៉ះពាល់​ដល់​សិទ្ធិ​ពលរដ្ឋ​ទៅ​បោះឆ្នោត ឬ​មិន​បោះឆ្នោត​នោះ​ទេ ហើយ​ក៏​ដើម្បី​ចៀសវាង​នូវ​ការ​លើកឡើង​មិន​ដាច់ស្រេច​ថា តើ​អ្នក​ដែល​ចង់​ឈរឈ្មោះ​បោះឆ្នោត គួរតែ​ទៅ​បោះឆ្នោត ឬ​មិន​ទៅ​បោះឆ្នោត​នោះ​ដែរ។

គម្រោង​នៃ​ការ​ធ្វើ​វិសោធនកម្ម​ច្បាប់​នេះ ធ្វើឡើង​ស្រប​ពេល​ដែល​មជ្ឈដ្ឋាន​នានា​រិះគន់​ថា ជា​ចេតនា​ដើម្បី​គាបសង្កត់​គណបក្ស​ក្រៅ​រដ្ឋាភិបាល​ដើម្បី​បម្រើ​ផល​ប្រយោជន៍​នយោបាយ​របស់​បក្ស​កាន់​អំណាច​ប៉ុណ្ណោះ។

អ្នកវិភាគ​ឯករាជ្យ និង​ជា​ប្រធាន​វេទិកា​ពលរដ្ឋ លោក គឹម សុខ ប្រាប់​សារព័ត៌មាន The Cambodia Daily នៅ​ថ្ងៃទី​១៣ មិថុនា នេះ​ថា ការ​កែ​ច្បាប់​បោះឆ្នោត​ម្តង​នេះ គឺ​មាន​គោលដៅ​សងសឹក និង​បំបែក​បំបាក់​បំផ្លាញ​ជាតិ​ឯង​ដើម្បី​តែ​ប្រយោជន៍​អំណាច​គ្រួសារ​ត្រកូល​ហ៊ុន​តែប៉ុណ្ណោះ ព្រោះ​ខ្លឹមសារ​នៃ​ច្បាប់​នេះ គឺ​ទី​១ ដើម្បី​ព្យាយាម​បោស​សម្អាត​អ្នក​ប្រឆាំង និង​អ្នក​ប្រជាធិបតេយ្យ​ពី​សមរភូមិ​នយោបាយ​កម្ពុជា ព្រោះ​លោក ហ៊ុន សែន ដឹង​ថា​កូន​របស់​គាត់ គឺ​លោក ហ៊ុន ម៉ាណែត គ្មាន​សមត្ថភាព​ប្រកួតប្រជែង​ជាមួយ​អ្នក​ទាំងនោះ​បាន​ទេ នៅ​ពេល​ដែល​គ្មាន​រូប​គាត់​នៅ​ថ្ងៃ​មុខ។

លោក​ថា ចំណែក​ទី​២ ច្បាប់​នេះ​មាន​ខ្លឹមសារ​បង្ខំ​ពលរដ្ឋ​ឲ្យ​ទៅ​បោះឆ្នោត​បែប​ប្លន់​អំណាច​តែប៉ុណ្ណោះ ព្រោះ​លោក ហ៊ុន សែន ខ្លាច​ត្រូវ​អាម៉ាស់​មុខ​ខ្លាំង​ពេល​ពលរដ្ឋ​លើសលប់​មិន​ទៅ​បោះឆ្នោត ដែល​ជា​ការ​សម្ដែង​មតិ​ប្រឆាំង​នឹង​ការ​បោះឆ្នោត​នៅ​ថ្ងៃ​ខាងមុខ​នេះ។

លោក គឹម សុខ បញ្ជាក់​ថា យ៉ាងណា​ក៏ដោយ លោក ហ៊ុន សែន នៅតែ​ប្រឈម​នឹង​ភាព​អាម៉ាស់​ដដែល ព្រោះ​ថា​បើ​គ្មាន​បក្ស​ណា​ដែល​ពលរដ្ឋ​ខ្មែរ​ពេញចិត្ត​ទេ ពួកគាត់​អាច​ហែក​សន្លឹកឆ្នោត​ជា​ពីរ ឬ​ខ្វែង​សន្លឹកឆ្នោត​ចោល ឬ​សរសេរ​ពាក្យពេចន៍​ដែល​ពួកគាត់​ចង់​សរសេរ ដូចជា​ពាក្យ​ផ្ដាច់ការ ជាដើម ហើយ​បត់​សន្លឹកឆ្នោត​នោះ​ឲ្យ​ស្អាត ទម្លាក់​ចូល​ទៅ​ក្នុង​ធុង​ឆ្នោត​ជា​ការ​ស្រេច ដើម្បី​សម្ដែង​ឆន្ទៈ​របស់​ពួកគេ​ប្រឆាំង​នឹង​ការ​គាបសង្កត់​នៅ​ពេលនេះ។

ចំណែក​មន្ត្រី​ជាន់ខ្ពស់​អតីត​គណបក្ស​សង្គ្រោះ​ជាតិ​លោក មាជ សុវណ្ណារ៉ា ប្រាប់​សារព័ត៌មាន The Cambodia Daily នៅ​ថ្ងៃទី​១៣ មិថុនា នេះ​ដែរ​ថា ការ​កែ​ច្បាប់​នេះ​គ្រាន់តែ​បង្ហាញ​ពី​ការ​សងសឹក​គំនុំ​បុគ្គល​រវាង​លោក សម រង្ស៊ី និង​លោក ហ៊ុន សែន ប៉ុណ្ណោះ ខណៈ​ពលរដ្ឋ​នឹង​ត្រូវ​រងគ្រោះ​ពី​ជម្លោះ​នយោបាយ​របស់​ពួកគេ​កាន់តែ​ខ្លាំង​ឡើងៗ​នៅ​ពេលនេះ។

ដោយឡែក​អ្នក​នាំពាក្យ​សមាគម​ការពារ​សិទ្ធិមនុស្ស​អាដហុក លោក ស៊ឹង សែនករុណា ប្រាប់​សារព័ត៌មាន The Cambodia Daily នៅ​ថ្ងៃ​នេះ​ដែរ​ថា ស្ថានភាព​នៃ​ការ​ចេញ​ទៅ​បោះឆ្នោត​របស់​ពលរដ្ឋ​ខ្មែរ​មិន​អាច​យក​ទៅ​ប្រៀបធៀប​ប្រទេស​អូស្ត្រាលី បាន​ទេ។

លោក​បន្ថែម​ថា ប្រទេស​អូស្ត្រាលី​ចេញ​ច្បាប់​ផាក​អ្នក​ដែល​មិន​ទៅ​បោះឆ្នោត ដោយសារតែ​ពលរដ្ឋ​អូស្ត្រាលី មិន​ចេញ​ទៅ​បោះឆ្នោត​មិន​ដល់ ៥០% នៃ​ចំនួន​អ្នក​មាន​ឈ្មោះ​បោះឆ្នោត​ផង​នោះ ប៉ុន្តែ​សម្រាប់​កម្ពុជា ពលរដ្ឋ​ខ្មែរ​បាន​ចេញ​ទៅ​បោះឆ្នោត​ស្ទើរតែ ១០០% នៅ​គ្រប់​អាណត្តិ​ទាំងអស់ ដូច្នេះ​ការ​កែ​ច្បាប់​បោះឆ្នោត​ដែល​រដ្ឋាភិបាល​ព្រាង​នៅ​ពេលនេះ គឺជា​រឿង​ដែល​មិន​ចាំបាច់​នោះ​ឡើយ។

លោក ស៊ឹង សែនករុណា បញ្ជាក់​ថា ខ្លឹមសារ​នៃ​ច្បាប់​ដែល​ព្រាង​នឹង​ធ្វើ​វិសោធនកម្ម​នៅ​ពេលនេះ គឺ​សំដៅ​ទៅ​រក​បេក្ខជន​ឈរឈ្មោះ​បោះឆ្នោត​តែប៉ុណ្ណោះ ដូច្នេះ​ច្បាប់​នេះ​ពិត​ជា​រក​ខ្លឹមសារ ឬ​ប្រយោជន៍​មិន​ឃើញ​ទាល់តែសោះ ព្រោះ​ថា​បើ​បេក្ខជន​ឈរឈ្មោះ​មិន​បោះឆ្នោត វា​ក៏​មិន​មាន​ផល​ប៉ះពាល់​អ្វី​ដល់​ដំណើរការ​នៃ​ការ​បោះឆ្នោត​នោះ​ដែរ ត្បិត​បេក្ខជន​ឈរឈ្មោះ​ទាំងនោះ គឺ​មាន​ចំនួន​តិចតួច​បំផុត បើ​ធៀប​នឹង​ចំនួន​ពលរដ្ឋ​ដែល​ត្រូវ​ចេញ​ទៅ​បោះឆ្នោត។

ដំណើរការ​នៃ​ការ​បោះឆ្នោត​ជាតិ​អាណត្តិ​ទី​៧ នឹង​ប្រព្រឹត្ត​ទៅ​នៅ​អាទិត្យ ទី​២៣ ខែ​កក្កដា ឆ្នាំ​២០២៣ ខាងមុខ​នេះ ប៉ុន្តែ​ការ​បោះឆ្នោត​នេះ​មិន​មាន​ការ​ចូលរួម​សង្កេតការណ៍​ពី​សហគមន៍​អន្តរជាតិ​នោះ​ទេ ដោយសារតែ​ពួកគេ​ចាត់ទុក​ថា​ជា​ការ​បោះឆ្នោត​ដែល​មិន​ប្រកប​ដោយ​សេរី ត្រឹមត្រូវ និង​យុត្តិធម៌ ព្រមទាំង​គ្មាន​តម្លាភាព និង​ជា​ការ​បោះឆ្នោត​ដែល​គ្រប់គ្រង​ដោយ​បក្ស​ប្រជាជន​កម្ពុជា​របស់​លោក ហ៊ុន សែន៕

© 2024, ខេមបូឌា ដេលី. All rights reserved. No part of this article may be reproduced in print, electronically, broadcast, rewritten or redistributed without written permission.

អត្ថបទទាក់ទង

អត្ថបទអានច្រើន

សេចក្ដីរាយការណ៍ពិសេស